1. Ke dipotšišo dife tšeo mosadi yo a nyakago go nyalwa a swanetšego go ipotšiša tšona?

JESU KRISTE ke hlogo ya Bakriste ka moka. Eupša ge mosadi a nyalwa, monna wa gagwe e ba hlogo ya gagwe. Go ka ba thata gore mosadi a ikokobeletše monna yo a nago le sebe. Ge mosadi a nagana ka go nyalwa ke ngwanabo rena yo a itšego o swanetše go ipotšiša gore: ‘Ke tla tseba bjang gore ngwanabo rena yo e tlo ba hlogo e botse ya lapa? Na go hlankela Jehofa go tla pele bophelong bja gagwe? Ge e ba go se bjalo, ke’ng seo se dirago gore ke nagane gore e tlo ba hlogo e botse ka morago ga gore re nyalane?’ Le gona o swanetše go ipotšiša gore: ‘Ke dika dife tšeo ke nago le tšona tšeo di tlo dirago gore re thabele lenyalo la rena? Na ke ithutile go se fele pelo? Na ke rata go thuša ba bangwe? Na ke na le segwera se se tiilego le Jehofa?’ (Mmo. 4:9, 12) Ge mosadi a ka dira diphetho tše dibotse pele a ka nyalwa, seo se tlo mo thuša go thabela lenyalo la gagwe.

2. Re tlo araba dipotšišo dife sehlogong se?

² Basadi ba bantšintši ba Bakriste ba re beela mohlala o mobotse wa go kwa banna ba bona. Re ba reta kudu! Re thabela go hlankela Jehofa gotee le basadi ba bao ba botegago. Sehlogong se re tlo araba dipotšišo tše tše tharo: (1) Ke dilo dife tšeo di ka dirago gore go be thata gore basadi ba hlomphe banna ba bona? (2) Ke ka baka la’ng basadi ba kgetha go hlompha banna ba bona ntle le go gapeletšwa? (3) Banna bao ba nyetšego le basadi bao ba nyetšwego ba ka ithuta’ng tabeng ya go ikokobetša go Jesu, Abigaile le Maria mmago Jesu?

3. Ke ka baka la’ng banyalani ka moka ba fela ba e ba le mathata?

³ Lenyalo ke mpho e botse yeo e tšwago go Jehofa. Eupša banyalani ba tlo fela ba direlana diphošo ka ge ba na le sebe. (1 Joh. 1:8) Ke ka baka leo Beibele e lemošago banyalani gore ba tlo ba le mathata, e bile e bitša mathata ao gore ke “tlaišego nameng.” (1 Bakor. 7:28) Ga bjale re tlo bolela ka tše dingwe tša dilo tšeo di ka dirago gore go be thata gore mosadi a hlomphe monna wa gagwe.

4. Ke ka baka la’ng mosadi a ka nagana gore go hlompha monna wa gagwe go tlo dira gore batho ba mo nyatše?

⁴ Mohlomongwe tsela yeo mosadi a godišitšwego ka yona e ka dira gore a nagane gore ge a hlompha monna wa gagwe batho ba bangwe ba tlo mo nyatša. Marisol yo a dulago United States o re: “Mo ke goletšego gona, basadi ba rutwa gore ba swanetše go lekana le banna dilong ka moka. Ke a tseba gore Jehofa o kgethile banna gore e be dihlogo tša malapa e bile o nyaka gore basadi le bona ba hlomphiwe. Eupša ka dinako tše dingwe go thata gore ke hlomphe monna wa ka ka gobane ke gotše ke tseba gore ga go hlokagale gore ke mo hlomphe.”

5. Ke dilo dife tše di fošagetšego tšeo batho ba bangwe ba di naganago ka karolo ya mosadi ka lapeng?

⁵ Ka dinako tše dingwe mosadi a ka ba a nyetšwe ke monna yo a naganago gore basadi ga ba bohlokwa. Kgaetšedi Ivon yo a dulago Amerika Borwa o re: “Mo ke dulago gona, ge go jewa ka lapeng go ja banna pele ke moka ka morago gwa ja basadi. Bana ba banenyana ke bona ba apeago le go šoma ka gae, ba bašemane ga ba dire selo e bile ba botšwa gore ke bona dikgošana tša ka gae.” Kgaetšedi Yingling yo a dulago Asia o re: “Ka segagešo go na le polelwana yeo e rego ga go hlokagale gore basadi ba rutego. Sa bona ke go dira mešongwana ka moka ya ka gae e bile ga se ba swanela go botša banna ba bona seo ba se naganago.” Monna yo a latelago setšo ga a rate mosadi wa gagwe, o dira gore a se ipshine ka bophelo e bile ga a ekiše Jesu. Jehofa ga a kgahlwe ke monna yo bjalo.—Baef. 5:28, 29; 1 Pet. 3:7.

6. Basadi bao ba nyetšwego ba swanetše go dira’ng gore ba tiiše segwera sa bona le Jehofa?

⁶ Sehlogong sa go feta, re kwele gore Jehofa o nyaka gore banna ba hlokomele malapa a bona le gore ba thuše bohle ka lapeng go ba le segwera se sebotse le Jehofa. (1 Tim. 5:8) Eupša basadi bao ba nyetšwego le bona ba swanetše go ipha nako ya go ithuta Lentšu la Modimo letšatši le letšatši, ba naganišiše ka lona e bile ba rapele. Eupša ga go bonolo gore ba dire seo. Ka baka la’ng? Ka gobane basadi ba na le mešomo e mentši. Ka gona ba ka lapa e bile ba bona eka ga ba na nako ya go ithuta. Eupša go bohlokwa gore ba iphe nako ya go ithuta ka gobane Jehofa o nyaka gore yo mongwe le yo mongwe wa rena a be le segwera se sebotse le yena.—Dit. 17:27.

7. Ke’ng seo se ka dirago gore go be bonolo gore mosadi a hlomphe monna wa gagwe?

⁷ Re a tseba gore mosadi o swanetše go šoma ka thata gore a hlomphe monna wa gagwe le ge monna yoo a fela a dira diphošo. Eupša go ka ba bonolo gore a hlomphe monna wa gagwe ge e ba a ka ithuta Mangwalo, a ba a kwešiša gore ke ka baka la eng Jehofa a re a hlomphe monna wa gagwe.

8. Go ya ka Baefeso 5:22-24, ke ka baka la’ng mosadi wa Mokriste a kgetha go ikokobeletša monna wa gagwe ntle le go gapeletšwa?

⁸ Mosadi wa Mokriste o kgetha go ikokobeletša monna wa gagwe ka gobane Jehofa a re  a dire bjalo. (Bala Baefeso 5:22-24.) O a tseba gore Tatagwe wa legodimong o a mo rata e bile a ka se mo kgopele go dira selo seo se ka se mo holego.—Doit. 6:24; 1 Joh. 5:3.

9. Go tlo direga’ng ge mosadi a hlompha monna wa gagwe?

⁹ Batho ba lefase ba ruta basadi gore ge ba ekwa molao wa Jehofa wa gore ba hlomphe banna ba bona go ra gore bona ba a nyatšega. Batho ba go bolela bjalo ba no bontšha gore ga ba tsebe Modimo wa rena yo a nago le lerato. Jehofa a ka se tsoge a kgopetše basadi go dira selo seo se tla dirago gore ba nyatšege. Mosadi yo a šomago ka thata gore a kwe taelo ya Jehofa ya gore a hlomphe monna wa gagwe o dira gore ka lapeng go be le khutšo. (Ps. 119:165) Monna wa gagwe o a holega, bana ba gagwe ba a holega le yena o a holega.

10. Re ka ithuta’ng go seo Carol a se boletšego?

¹⁰ Mosadi yo a hlomphago monna wa gagwe yoo a felago a dira diphošo, o bontšha gore o rata Jehofa e bile o a mo hlompha. O hlompha monna wa gagwe ka gobane o a tseba gore Jehofa ke yena a kgethilego monna yoo gore e be hlogo ya gagwe. Carol yo a dulago Amerika Borwa o re: “Ke a tseba gore monna wa ka o tlo fela a dira diphošo. E bile ke a tseba gore tsela yeo ke mo swarago ka yona ge a dirile diphošo e tla bontšha gore ke hlompha Jehofa gakaakang. Ka gona ke dira sohle seo ke se kgonago gore ke hlomphe monna wa ka e le gore ke thabiše Jehofa.”

11. Ke’ng seo se thušago Aneese gore a lebalele monna wa gagwe, gona re ka ithuta’ng go seo a se boletšego?

¹¹ Ge monna a sa naganele mosadi wa gagwe, go ka ba thata gore mosadi yo a mo kwe le go mo hlompha. Ekwa gore kgaetšedi Aneese o dira eng ge monna wa gagwe a ka bontšha gore ga a mo naganele. O re: “Ke leka go se mo galefele. Ke dula ke ikgopotša gore le nna ke dira diphošo. Ke ithuta go lebalela ka bolokologi go swana le Jehofa. Ge ke lebalela monna wa ka ke a imologa.” (Ps. 86:5) Ge mosadi a kgona go lebalela go tlo ba bonolo gore a hlomphe monna wa gagwe.

12. Ge re bala Beibele re kwa ka mehlala ya banna le basadi ba mohuta ofe?

¹² Batho ba bangwe ba nagana gore ge motho a ikokobetša ke lešilo. Eupša ao ke maaka  a matala. Ka Beibeleng re kwa ka banna le basadi bao ba bego ba ikokobeditše. Na e be e le mašilo? Aowa! Ba be ba na le sebete e bile ba le bohlale. Ga bjale re tlo kwa gore re ka ithuta eng go Jesu, Abigaile le Maria.

13. Ke ka baka la’ng Jesu a ikokobeletša Jehofa? Hlalosa.

¹³ Jesu o ikokobeletša Jehofa, eupša se ga se bolele gore Jesu ga a bohlale goba ga a na bokgoni. Tsela yeo Jesu a bego a ruta batho ka yona e be e bontšha gore o bohlale. (Joh. 7:45, 46) Jehofa o be a tseba gore Jesu o na le bokgoni, ke ka baka leo ilego a mo dumelela go šoma le yena ge a be bopa dilo ka moka legodimong le lefaseng. (Die. 8:30; Baheb. 1:2-4) Le gona ka morago ga gore Jesu a tsošetšwe legodimong, Jehofa o ile a mo nea ‘matla ka moka legodimong le lefaseng.’ (Mat. 28:18) Ka ge Jesu a rata Tatagwe, o sa dutše a mo kgopela gore a mo hlahle le ge a kgona go dira dilo tše dintši.—Joh. 14:31.

14. Banna ba ka ithuta’ng (a) tseleng yeo Jehofa a lebelelago basadi ka yona? (b) go seo se lego go Diema 31?

¹⁴ Seo banna ba ka ithutago sona. Jehofa ga se a kgetha monna gore e be hlogo ya mosadi ka gobane a nyatša basadi. Jehofa o bontšhitše gore ga a nyatše basadi ka gore a ba kgethe gore le bona ba tle ba buše le Jesu. (Bagal. 3:26-29) Jehofa o bontšhitše gore o tshepa Morwa wa gagwe ka go mo nea matla a go laola. Monna le yena a ka ekiša Jehofa ka go nea mosadi matla a go laola dilo tše dingwe tše bohlokwa ka lapeng. Ge Diema 31 e hlalosa mosadisadi e re o hlokomela lapa, o reka dilo e bile o šomiša tšhelete gabotse. (Bala Diema 31:15, 16, 18.) Mosadi o bohlokwa e bile o swanetše go bolela seo a se naganago. Le gona monna yo a ratago mosadi wa gagwe o a mo theetša e bile o a mo tshepa. (Bala Diema 31:11, 26, 27.) Ge monna a swara mosadi wa gagwe gabotse, mosadi yoo o tlo mo kwa le go mo hlompha.

15. Basadi ba ka ithuta’ng go Jesu?

¹⁵ Seo basadi ba ka ithutago sona. Le ge Jesu a ile a dira dilo tše dintši tše dikgolo, ga a nagane gore ge a ikokobeletša Jehofa go ra gore o a nyatšega. (1 Bakor. 15:28; Bafil. 2:5, 6) Mosadisadi yo a ekišago Jesu ga a nagane gore o a nyatšega ge a ikokobeletša monna wa gagwe. O ikokobeletša monna wa gagwe ka gobane a mo rata, eupša sa bohlokwa le go feta ke ka gobane a rata Jehofa le go mo hlompha.

16. Go ya ka Samuele wa Pele 25:3, 23-28, Abigaile o ile a ba le mathata afe? (Bona seswantšho sa letlakala la ka ntle.)

¹⁶ Abigaile o be nyalane le monna yo a bitšwago Nabala. Nabala o be a ikgantšha, a sa naganele batho ba bangwe e bile a sa leboge. Eupša Abigaile ga se a ka a nagana go mo hlala. Ge nkabe Abigaile a be a nyaka gore lenyalo la bona le fele o be a tlo tlogela Dafida le banna ba gagwe ba mmolaya. Eupša o ile a šomiša bohlale gore a šireletše Nabala le lapa la gagwe le legolo. Nagana kamoo Abigaile a ilego a swanelwa ke go ba le sebete gore a ye go Dafida le banna ba 400 bao ba bego ba swere dibetša gore a kgopelele Nabala tshwarelo. (Bala 1 Samuele 25:3, 23-28.) Dafida o ile a lemoga gore Jehofa o dirišitše Abigaile go mo thuša gore a se ke a dira phošo e kgolo kudu.

17. Banna ba ka ithuta’ng go Dafida?

¹⁷ Seo banna ba ka ithutago sona. Abigaile e be e le mosadi yo bohlale. Dafida o ile a bontšha bohlale ka go theetša Abigaile gomme a se be le molato wa madi. Monna yo bohlale a ka ekiša Dafida ka go naganišiša ka seo mosadi wa gagwe a se naganago pele a dira diphetho. Go ka direga gore seo mosadi wa gagwe a se boletšego se tle se mo thuše go dira phetho e botse.

18. Basadi ba ka ithuta’ng go Abigaile?

 ¹⁸ Seo basadi ba ka ithutago sona. Mosadi yo a hlomphago Jehofa le go mo rata a ka tiiša lapa la gagwe le ge monna wa gagwe a sa hlankele Jehofa goba a sa phele ka go dumelelana le melao ya motheo ya Beibele. A ka se leke go hlala monna wa gagwe ka ntle le ge e ba mangwalo a mo dumelela go dira bjalo. E bile ge a hlompha monna wa gagwe le go mo kwa, a ka dira gore monna yoo a nyake go ithuta ka Jehofa. (1 Pet. 3:1, 2) Le ge monna yoo a kgetha go se hlankele Jehofa, eupša Jehofa yena o tlo thabišwa ke gore mosadi yoo o hlompha monna wa gagwe.

19. Ke neng moo mosadi a sa swanelago go kwa monna wa gagwe?

¹⁹ Le ge mosadi wa Mokriste a ikokobeletša monna wa gagwe, ga se a swanela go mo kwa ge e ba monna yoo a mo kgopela gore a se ke a kwa melao ya Jehofa. Ka mohlala, ge monna yo e sego Hlatse a kgopela mosadi wa gagwe gore a utswe, a bolele maaka goba a dire selo seo se sa kgahlišego Jehofa, mosadi yoo o swanetše go gana. Bakriste ka moka go akaretša le basadi bao ba nyetšwego, ba swanetše go kwa Jehofa Modimo go feta batho ka moka. Ge e ba monna a kgopela mosadi wa gagwe go dira selo seo Jehofa a sa se ratego, mosadi yoo o swanetše go gana a tiišitše go dira seo monna wa gagwe a mo kgopelago gore a se dire eupša a dire seo ka tsela e botho.—Dit. 5:29.

20. Re tseba bjang gore Maria o be a na le segwera se se tiilego le Jehofa?

²⁰ Maria o be a na le segwera se se tiilego le Jehofa. O be a tseba Mangwalo gabotse. Ge Maria a be a boledišana le mmago Johane Mokolobetši e lego Elisabetha, o ile a tsopola Mangwalo a fetago a 20 a Seheberu. (Luka 1:46-55) Nagana ka taba ye: Le ge Maria a be a le kgauswi le go nyalwa ke Josefa, morongwa ga se a boledišana le Josefa pele. Eupša o ile a boledišana le Maria pele, a mmotša gore o tlo belega Morwa wa Modimo. (Luka 1:26-33) Jehofa o be a tseba Maria gabotse e bile o be a kgodišegile gore o tlo hlokomela Morwa wa gagwe le go mo rata. Ga re belaele gore Maria o ile a no tšwela pele a na le segwera se sebotse le Jehofa le ka morago ga gore Jesu a tsošetšwe legodimong.—Dit. 1:14.

21. Banna ba ka ithuta’ng go Maria?

 ²¹ Seo banna ba ka ithutago sona. Monna yo bohlale o a thaba ge mosadi wa gagwe a tseba Mangwalo gabotse. Ga a bone eka mosadi yo o leka go itira hlogo ya lapa ka gobane a tseba Mangwalo gabotse. O a tseba gore mosadi yo a tsebago Mangwalo gabotse o tlo hola lapa la bona. Le ge mosadi a ka ba a rutegile go feta monna wa gagwe, Jehofa o file monna boikarabelo bja go ruta lapa. Ka mohlala, monna ke yena a swanetšego go swara borapedi bja lapa.—Baef. 6:4.

22. Basadi ba ka ithuta’ng go Maria?

²² Seo basadi ba ka ithutago sona. Le ge monna e le yena a rutago lapa, mosadi le yena o swanetše go dula a tiiša tumelo ya gagwe. (Bagal. 6:5) Ke ka baka leo a swanetšego go ipha nako ya go ithuta Beibele le dikgatišo tša mokgatlo le go naganišiša ka seo a ithutilego sona. Go dira bjalo go tla mo thuša gore a kgone go dula a rata Jehofa le go mo hlompha. E bile go tla mo thuša gore a thabele go ikokobeletša monna wa gagwe.

23. Basadi bao ba ikokobeditšego ba thuša malapa a bona le phuthego bjang?

²³ Basadi bao ba kwago taelo ya Jehofa ya gore ba ikokobeletše banna ba bona ba tlo thaba kudu go feta bao ba sa kwego taelo yeo. Ba beela bafsa mohlala o mobotse. E bile ba dira gore ka lapeng le ka phuthegong go be le khutšo. (Tito 2:3-5) Lehono ka phuthegong go na le basadi ba bantši go feta banna. (Ps. 68:11) Eupša ka moka ga rena re ka dira gore ka phuthegong go be le khutšo. Sehlogo se se latelago se tlo re botša gore re ka dira seo bjang.