1. Ke boemo bofe bjo thata bjoo Dafida a bego a lebeletšane le bjona?

 DAFIDA o ile a tšhaba ka gobane go be go na le motho yo a nyakago go mmolaya. Kgoši e matla ya Isiraele e lego Saulo o be a nyaka go mmolaya. Ge Dafida a be a hloka dijo, o ile a ya Motseng wa Nobe, moo a ilego a kgopela dinkgwa tše hlano. (1 Sam. 21:1, 3) Ka morago yena le banna bao a bego a na le bona ba ile ba khuta ka leweng. (1 Sam. 22:1) Go tlile bjang gore Dafida a be boemong bjo?

2. Ke’ng seo Saulo a se dirilego seo se ilego sa mmea boemong bjo kotsi ga kaakaa? (1 Samuele 23:16, 17)

² Saulo o be a jela Dafida mona ka gobane batho ba bantši ba be ba mo rata ka ge a be a fenya dintweng. Le gona Saulo o be a tseba gore ka baka la go se kwe ga gagwe, Jehofa o ile a swanelwa ke go kgetha Dafida gore e be kgoši. (Bala 1 Samuele 23:16, 17.) Ka ge Saulo e be e sa le kgoši ya Isiraele, o be a na le madira a mantši le batho ba bantši bao ba mo thekgago, ka gona Dafida o ile a tšhaba gore a šireletše bophelo bja gagwe. Na Saulo o be a tloga a nagana gore a ka thibela Jehofa gore a kgethe Dafida gore e be kgoši? (Jes. 55:11) Beibele ga e re botše, eupša re ka kgodišega ka selo se tee: Saulo o be a ipea kotsing. Bao ba lwago le Jehofa ba ka se tsoge ba fentše!

3. Dafida o ile a ikwa bjang go sa šetšwe mathata ao a bego a na le ona?

³ Dafida o be a ikokobeditše. Ga se a ikgethela gore e be kgoši ya Isiraele. Jehofa ke yena a mo kgethilego. (1 Sam. 16:1, 12, 13) Saulo o ile a thoma go hloya Dafida kudu. Eupša Dafida ga se a ka a sola Jehofa ka gore bophelo bja gagwe bo kotsing, a belaela ka gore ga a na dijo goba gore o khutile ka leweng.  Go e na le moo go ka direga gore nakong ya ge a be a le ka leweng, o ile a hlama koša e botse yeo e nago le mantšu a sehlogo sa rena ao a rego: “Bao ba tsomago Jehofa ba ka se hloke selo se sebotse.”—Ps. 34:10.

4. Re tlo boledišana ka dipotšišo dife, gona ke ka baka la’ng di le bohlokwa?

⁴ Ka dinako tše dingwe bahlanka ba Jehofa ga ba na dijo tšeo di lekanego goba dilo tšeo ba di hlokago. * Se se bonagetše kudu nakong ya bolwetši bja corona. Ge “masetlapelo a magolo” a dutše a batamela, dilo di tlo mpefala le go feta. (Mat. 24:21) Sehlogong se re tlo boledišana ka dipotšišo tše tše nne: Dafida o ile a se hloke “selo se sebotse” bjang? Ke ka baka la’ng re swanetše go ithuta go kgotsofalela dilo tšeo re nago le tšona? Ke ka baka la’ng re ka tshepa gore Jehofa o tlo re hlokomela? Re ka itokišeletša bjang dilo tšeo di tlago go direga nakong e tlago?

5-6. Psalme 23:1-6 e re thuša bjang go kwešiša seo Dafida a bego a se bolela ge a be a re: Bahlanka ba Jehofa ‘ba ka se hloke selo’?

⁵ Dafida o be a e ra go re’ng ge a be a re bahlanka ba Jehofa ba “ka se hloke selo”? Ge Dafida a be a ngwala Psalme ya 23 o ile a šomiša mantšu a swanago. Ka gona Psalme ye e ka re thuša go kwešiša gore Dafida o be a e ra go reng. (Bala Psalme 23:1-6.) Dafida o thoma psalme ye ka gore: “Jehofa ke Modiši wa ka. Nka se hloke selo.” Go psalme yeo ka moka, Dafida o bolela ka dilo tšeo di tlogago di le bohlokwa, go swana le dilo tše dibotse tšeo Jehofa a mo diretšego tšona bjale ka modiši wa gagwe. Jehofa o be a mo iša “mafelong a boikhutšo,” le gona Jehofa o be a dula a thekga Dafida ka dinako tšohle. Dafida o ile a bontšha gore le ge Jehofa a mo utamiša “mafulong a ma tala” ga se gore o be a ka se be le mathata. Ka dinako tše dingwe, o be a ka nyama go swana le ge eka o sepela “moeding wa kgampi ya leswiswi,” le gona o  be a tlo ba le manaba. Le gona ka ge Jehofa e be e le Modiši wa gagwe o be a ka se “boife selo” se sebe.

⁶ Bjale re tlo araba potšišo yeo e rego: Dafida o ile a se hloke “selo se sebotse” bjang? Dafida o be a na le dilo ka moka tšeo a di hlokago gore e be mogwera wa Jehofa. Le gona o be a se a ithekga ka dilo tšeo di bonagalago gore a thabe. Dafida o be a kgotsofalela dilo tšeo Jehofa a bego a mo nea tšona. Sa bohlokwa kudu go yena e be e le gore Jehofa a mo šegofatše le go mo šireletša.

7. Go ya ka Luka 21:20-24, Bakriste ba mehleng ya pele ba Bajuda ba ile ba lebeletšana le mathata afe?

⁷ Mantšu a Dafida a re ruta gore re se ke ra lebelela dilo tšeo re nago le tšona di le bohlokwa kudu go rena. Re ka thabela dilo ka moka tšeo re nago le tšona eupša ga se ra swanela go di etiša pele maphelong a rena. Bakriste bao ba bego ba dula Judea ba ile ba swanela ke go kwešiša taba ye gabotse. (Bala Luka 21:20-24.) Jesu o ile a ba lemoša gore go be go tla tla nako yeo Jerusalema e bego e tla ‘dikologwa ke madira.’ Ge nako yeo e fihla, ba ile ba swanela ke go “tšhabela dithabeng.” Ge ba be ba ka tšhaba ba be ba tlo phologa, eupša ba ile ba swanelwa ke go šia dilo tša bona morago. Nakong e fetilego Morokami o mongwe o ile wa re: “Ba ile ba tlogela mašemo le magae, ba se kgoboketše gaešita le dithoto tšeo di lego ka dintlong tša bona. Ka ge ba be ba kgodišegile ka tšhireletšo le thekgo ya Jehofa, ba ile ba etiša borapedi bja gagwe pele ga selo le ge e le sefe se sengwe seo se bego se ka bonagala se le bohlokwa.”

8. Ke thuto efe e bohlokwa yeo re ithutago yona go seo se ilego sa diragalela Bakriste bao ba bego ba dula Judea?

⁸ Ke thuto efe e bohlokwa yeo re ithutago yona go seo se ilego ya diragalela Bakriste bao ba bego ba dula Judea? Morokami woo o ile wa re: “Ka gona, mo gongwe go ka ba go ena le diteko tše di lego ka pele ge e le mabapi le kamoo re lebelelago dilo tše di bonagalago ka gona; na ke selo se bohlokwa kudu, goba na sa bohlokwa ke gore bohle bao ba lego ka lehlakoreng la Modimo ba phologe? Ee, go tšhaba ga rena mo gongwe go ka akaretša go ba le mathata a itšego le go se be le dilo tše dingwe. Re tla swanelwa ke go dira sohle seo se nyakegago, go etša ge go dirile magagabo rena a lekgolong la pele la nywaga ao a ilego a tloga Judea.” *

9. Keletšo yeo Paulo a ilego a e nea Baheberu e go kgothatša bjang?

⁹ Nagana gore go be go le thata bjang gore Bakriste bao ba tlogele dilo ka moka tšeo ba bego ba na le tšona, gomme ba ye go thoma bophelo ka bofsa lefelong le lengwe. Ba be ba swanetše go ba le tumelo ya gore Jehofa o tlo ba hlokomela ka dilo tšeo ba di hlokago. Eupša go be go na le selo seo se ka ba thušago. Mengwaga e mehlano pele Baroma ba ka hlasela Jerusalema, moapostola Paulo o ile a nea Baheberu keletšo yeo e rego: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane Modimo o itše: “Le ka mohla nka se ke ka go tlogela le ge e le go go lahla.” E le gore re be le sebete kudu gomme re re: “Jehofa ke mothuši wa ka; nka se boife. Motho a ka ntira’ng?’”(Baheb. 13:5, 6) Go be go le bonolo gore batho bao ba kwelego keletšo ya Paulo ba kgotsofalele dilo tšeo ba nago le tšona magaeng a bona a mafsa. Ba be ba kgodišegile gore Jehofa o tlo ba hlokomela ka dilo tšeo ba di hlokago. Mantšu a Paulo a re kgonthišetša gore le rena re ka kgodišega  gore Jehofa o tlo re hlokomela ka dilo tšeo re di hlokago.

10. Paulo o re boditše “sephiri” sefe?

¹⁰ Paulo o file Timotheo keletšo yeo e swanago yeo le rena re ka e dirišago. O ngwadile gore: “Ka gona ge re na le dijo le diaparo re tla kgotsofala ka tšona.” (1 Tim. 6:8) Na se se ra gore ga se ra swanela go thabela dijo tše dibose, ra ba le magae a mabotse goba ra reka diaparo? Se ga se seo Paulo a bego a bolela ka sona. Paulo o be a e ra gore re swanetše go kgotsofalela dilo tšeo re nago le tšona. (Bafil. 4:12) Se ke “sephiri” seo Paulo a bego a bolela ka sona. Selo sa bohlokwa kudu go rena ke segwera sa rena le Modimo, e sego dilo tšeo re nago le tšona.—Habak. 3:17, 18.

11. Re ithuta’ng mantšung ao Moshe a ilego a a botša Baisiraele ka go kgotsofala?

¹¹ Dilo tšeo re di nyakago di ka fapana le tšeo Jehofa a tsebago gore re tloga re di hloka. Nagana ka seo Moshe a ilego a se botša Baisiraele ka morago ga gore ba fetše mengwaga e 40 ba le lešokeng, o itše: “Jehofa Modimo wa lena o le šegofaditše medirong ka moka ya diatla tša lena. Yena o tseba gabotse leeto la lena la go phatša lešokeng le le legolo. Jehofa Modimo wa lena o bile le lena nywageng ye e masomenne. Ga se la hloka selo.” (Doit. 2:7) Mengwageng yeo e 40 Jehofa o ile a fepa Baisiraele ka manna. Jehofa o ile a dira gore diaparo tšeo ba tlogilego ka tšona Egipita di se ke tša hlagala. (Doit. 8:3, 4) Le ge ba bangwe ba be ba nyatša dilo tšeo Modimo a ba filego tšona, Moshe o ile a  ba gopotša gore ba be ba na le dilo ka moka tšeo ba di hlokago. Jehofa o tlo thaba ge re ka ithuta go kgotsofalela dilo tšeo re nago le tšona le ge e ka ba e le tše di nyenyane, ra di lebelela e le dimpho tše di tšwago go yena ke moka ra di leboga.

12. Ke’ng seo se bontšhago gore Dafida o be a sa itshepe eupša a tshepa Jehofa?

¹² Dafida o be a tseba gore Jehofa o a botega e bile o hlokomela bao ba mo ratago kudu. Le ge bophelo bja Dafida bo be bo le kotsing ge a be a ngwala Psamle ya 34, o be a na le tumelo e tiilego e bile a kgodišegile gore “morongwa wa Jehofa” o hlomile “mešaša go mo dikologa.” (Ps. 34:7) Mohlomongwe Dafida o be a swantšha morongwa wa Jehofa le lešole leo le emego ka ntle ga motse le dula le letile gore manaba a se ke a hlasela. Le ge Dafida a be a fenya dintweng e bile Jehofa a mo tshepišitše gore o tlo mo dira kgoši, ga se a ka a ithekga ka matla a gagwe le gore o kgona go foša maswika goba go šomiša tšhoša go fenya manaba. (1 Sam. 16:13; 24:12) Dafida o ile a tshepa Jehofa a kgodišegile gore ‘morongwa wa Jehofa o phološa bao ba mmoifago.’ Ke nnete gore ga se ra letela gore Jehofa a re šireletše ka mohlolo, eupša re a tseba gore batho ka moka bao ba boifago Jehofa ba tlo hwetša bophelo bjo bo sa felego le ge ba ka hwa gona bjale.

13. Ge Gogo wa Magogo a hlasela, ke ka baka la’ng re tlo bonala eka ga se ra šireletšega, gona ke ka baka la’ng re se ra swanela go tšhoga? (Bona seswantšho sa letlakala la ka ntle.)

¹³ Kgauswinyane tumelo ya rena ya gore Jehofa o tlo re šireletša e tlo lekwa. Ge Gogo wa Magogo, e lego ditšhaba tšeo di ipopilego ngatana e tee, a hlasela batho ba Modimo, maphelo a rena a tlo bonala a le kotsing. Re tlo swanela ke go tshepa gore Jehofa o tlo re phološa. Ditšhaba di tlo bona eka re ka se kgone go itšhireletša. (Hesek. 38:10-12) Re tla be re sa tsebe ntwa, e bile re se na dibetša. Ditšhaba di tlo bona eka di tlo re fenya ga bonolo. Di tla be di sa tsebe gore barongwa ba Jehofa ba ikemišeditše go re šireletša. Eupša rena re tseba seo ka ge re na le tumelo. Di tla be di se na tumelo go Modimo. Di tlo makala kudu ge madira a legodimong a re lwela!—Kut. 19:11, 14, 15.

14. Re swanetše go dira’ng gore re itokiše?

¹⁴ Re swanetše go dira’ng gore re itokiše? Sa pele ga se ra swanela go nagana gore dilo tšeo re nago le tšona di bohlokwa kudu ka gore ka letšatši le lengwe re ka swanela ke go kgaogana le tšona. Re swanetše go kgotsofalela seo re nago le sona le go thabišwa kudu ke segwera seo re nago le sona le Jehofa. Ge re ka ithuta ka Modimo ka mo go tseneletšego re tlo kgona go tshepa gore o tlo re šireletša ge Gogo wa Magogo a hlasela.

15. Dilo tšeo di ilego tša direga ge Dafida e be e sa le yo monyenyane di mo thušitše bjang go tseba gore Jehofa a ka se tlogele go mo šireletša?

¹⁵ A re boneng se sengwe seo se ilego sa thuša Dafida, seo se ka re thušago le rena lehono gore re kgotlelele mathata. Dafida o itše: “Latswang le be le boneng gore Jehofa o lokile; Go thaba monna yo a tšhabelago go yena.” (Ps. 34:8) Mantšu a a bontšha gore ke ka baka la’ng Dafida a ile a ithekga ka Jehofa. Dafida o be a dula a ithekga ka Jehofa, le gona Jehofa ga se a ka a mo tlogela. Ge Dafida e be e sa le yo monyenyane, o ile a lwa le Goliata e lego monna wa senatla yoo a bego a tseba ntwa. O ile a re go yena: “Lehono Jehofa o tla go gafela seatleng sa ka.” (1 Sam. 17: 46) Ka morago, Saulo o ile a leka ka makga a mantši go bolaya Dafida ge a be a mo hlankela. Eupša “Jehofa o be a” na le Dafida. (1 Sam. 18:12) Dafida o be a tseba gore Jehofa o tlo mo thuša mathateng ao a nago le ona ka ge a ile a mo thuša nakong e fetilego.

16. Re ka dira’ng gore re “latswe” gomme re bone gore Jehofa o lokile?

¹⁶ Ge re ka ithekga ka Jehofa re tlo tshepa gore le nakong e tlago o tlo re phološa. Go nyakega gore re be le tumelo le go ithekga ka Jehofa gore re kgone go kgopela nako mošomong gore re ye dikopanong, dibokeng le go tšea karolo tšhemong. Re ka dira’ng ge ba ka re ganetša goba ra lahlegelwa ke mošomo? Re swanetše go ba le tumelo ya gore Jehofa a ka se tsoge a re lahlile e bile o tlo re fa dilo tšeo re di hlokago? (Heb. 13:5) Batho ba bantši bao ba lego tirelong ya nako e tletšego ba ka bontšha kamoo a ilego a ba thuša ka gona ge ba be ba mo hloka. Jehofa o a botega.

17. Sehlogo sa ngwaga sa 2022 se re’ng, gona ke ka baka la’ng se le nakong?

¹⁷ Ga re tšhoge gore go tlo direga eng nakong e tlago ka gore Jehofa o na le rena. Modimo wa rena o tlo dula a re thuša ge feela mmušo wa gagwe o etla pele maphelong a rena. Sehlopha se Bušago se kgethile Psalme 34:10 gore e be sehlogo sa ngwaga wa 2022. Sehlogo seo se re: “Bao ba Tsomago Jehofa ba ka se Hloke Selo se Sebotse.” Sehlogo se se re thuša go bona gore Jehofa a ka se tsoge a re lahlile, le go re thuša go bona gore re swanetše go itokišeletša mathata a nakong e tlago.