1. Re ka fetša nako le Jehofa bjang?

 RE RATA go fetša nako re na le batho bao re ba ratago. Batho bao ba nyalanego ba rata go fetša nako ba le mmogo. Bafsa le bona ba rata go fetša nako ba na le bagwera ba bona. Le gona ka moka ga rena re nyaka go fetša nako re na le bana babo rena le dikgaetšedi. Eupša selo sa bohlokwa kudu ke gore re rata go fetša nako le Modimo wa rena. Re dira seo ka go mo rapela, go bala Beibele le go naganišiša ka dika tša gagwe tše dibotse. Nako yeo re e fetšago le Jehofa e bohlokwa kudu go rena!—Ps. 139:17.

2. Re ka kopana le mathata afe?

² Le ge re rata go rapela le go ithuta Beibele, ka dinako tše dingwe ga go bonolo. Re dula re swaregile kudu moo re ka thatafalelwago ke go ipha nako ya go ithuta ka Jehofa. Mešomo ya rena, malapa a rena le dilo tšeo re swanetšego go di dira di ka tšea nako ya rena e ntši moo re ka ikwago eka re ka se kgone go rapela, go ithuta le go naganišiša.

3. Ke’ng se sengwe seo se ka re tšeelago nako?

³ Go na le selo se sengwe gape seo se ka re tšeelago nako. Ge e ba re sa šetše re ka dumelela dilo tšeo e sego phošo go di dira di re tšeela nako yeo re swanetšego go e fetša re tiiša segwera sa rena le Modimo. Ka mohlala, go bohlokwa gore re ithabiše. Eupša ge e ba re ka se hlokomele, boithabišo bo ka re tšeela nako yeo re swanetšego go e fetša re hlankela Jehofa. Re swanetše go gopola gore boithabišo ga bo tle pele  maphelong a rena.—Die. 25:27; 1 Tim. 4:8.

4. Re tlo boledišana ka’ng sehlogong se?

⁴ Sehlogong se, re tlo boledišana ka gore ke ka baka la eng re swanetše go dira diphetho tša go etiša pele dilo tšeo di lego bohlokwa maphelong a rena. Re tlo boledišana kamoo re ka dirišago nako ya rena gabotse ge re hlankela Jehofa, le gore seo se tlo re hola bjang.

5. Go naganišiša ka Baefeso 5:15-17 go ka thuša bafsa bjang gore ba dire diphetho tše bohlale?

⁵ Kgetha bophelo bjo bobotse. Bafsa gantši ba tshwenyega ka go nyaka go phela bophelo bjo bobotse. Barutiši ba bona goba batswadi ba bona bao e sego Dihlatse tša Jehofa ba ka ba kgothaletša gore ba phegelele dithuto tše di phagamego tšeo di tlago go dira gore ba gole tšhelete e ntši. Eupša batswadi bao e lego Dihlatse tša Jehofa le bagwera ba bona ba ka phuthegong ba ka ba kgothaletša gore ba hlankele Jehofa. Motho yo a ratago Jehofa a ka thuša ke eng gore a dire diphetho gabotse? A ka holwa ke go bala lengwalo la Baefeso 5:15-17 le go naganišiša ka lona. (Bala.) Ka morago ga go bala ditemana tša lengwalo le mofsa yoo a ka ipotšiša gore: “Jehofa o nyaka ke dira’ng”? Modimo o rata’ng? Nka dira’ng gore ke mo thabiše? Ke phetho efe yeo e ka nthušago gore ke kgone go diriša nako ya ka gabotse? Gopola gore “mehla ke e mebe,” Le gona lefase le leo le bušago ke Sathane le kgauswi le go fela. Go bohlokwa gore re dire diphetho tšeo di tlago go thabiša Jehofa.

6. Maria o ile a dira phetho efe, gona ke ka baka la’ng e le phetho e bohlale?

⁶ Etiša dilo tše bohlokwa pele. Ka dinako tše dingwe go diriša nako ya rena gabotse go ka nyaka re kgetha go dilo tše pedi tšeo e sego phošo go di dira. Re bona se nakong ya ge Jesu a be a etetše Maria le Mareta. Mareta o be a thabile ge Jesu a be a ba etetše moo a ilego a mo apeela dijo tše dintši. Eupša Maria o ile a dula fase a theetša seo Jesu a se rutago. Go be go se na phošo ka seo Mareta a se dirilego eupša Jesu o ile a re Maria “o kgethile kabelo e botse.” (Luka 10:38-42.) Ge nako e dutše e eya, Maria a ka ba a ile a lebala dijo tšeo ba ilego ba di nea Jesu Kriste, eupša ga se a ka a lebala dithuto tšeo a ithutilego tšona. Go no swana le ge Maria a ile a thabela nako yeo a e feditšego le Jesu, le rena re thabela nako yeo re e fetšago le Jehofa. Re ka diriša bjang nako yeo gabotse?

7. Ke ka baka la’ng go le bohlokwa go rapela, go ithuta le go naganišiša?

⁷ Re swanetše go tseba gore go rapela, go ithuta le go naganišiša ka dilo tšeo re ithutago tšona ke karolo ya go hlankela Jehofa. Ge re rapela re boledišana le Tatago rena wa legodimong yo a re ratago kudu. (Ps. 5:7) Ge re bala Beibele re hwetša “tsebo ka ga Modimo” yo a lego bohlale go feta dilo ka moka. (Die. 2:1-5) Ge re naganišiša re kgona go bona dika tše dibotse tša Jehofa le gore o ikemišeditše go tlo re direla eng nakong e tlago. Ye ke tsela e bohlale ya go diriša nako ya rena gabotse. Eupša re ka hwetša kae nako ya go dira dilo tše ka moka?

8. Re ka ithuta’ng tseleng yeo Jesu a dirišitšego nako ka gona ge a be a le lešokeng?

⁸ Ge go kgonega nyaka lefelo leo le homotšego. Nagana ka mohlala wa Jesu. Pele  Jesu a ka thoma bodiredi bja gagwe mo lefaseng o ile a fetša matšatši a 40 lešokeng. (Luka 4:1, 2) Ge a le moo Jesu o ile a kgona go rapela Tatagwe le go naganišiša ka yena. Se se ile sa thuša Jesu gore a tle a kgone go lebeletšana le diteko tšeo di tlago go mo diragalela. Mohlala wa Jesu o ka go thuša bjang? Ge o etšwa lapeng la batho ba bantši go ka ba thata go hwetša lefelo leo le homotšego ka gae. Ge go le bjalo, o ka hwetša lefelo leo ka ntle. Se ke seo Julie a se dirago ge a nyaka go rapela Jehofa. Yena le monna wa gagwe ba dula ntlong e nyenyane kua France, moo a sa hwetšego sebaka sa go dira dilo a nnoši. Julie o re: “Ke ya phakeng letšatši le lengwe le le lengwe, ge ke le moo ke kgona go naganišiša le go bolela le Jehofa .”

9. Le ge Jesu a be a swaregile kudu o ile a bontšha bjang gore o tšeela godimo segwera sa gagwe le Jehofa?

⁹ Jesu o be a dula a swaregile. Nakong ya ge a be a le mo lefaseng a bolela ditaba tše dibotse, o be a dula a latela ke batho ba bantši bao ba bego ba nyaka go mo theetša. Ka letšatši le lengwe batho ba motsnge ka moka ba be ba kgobokane mojako gore ba mmone. Le ga go le bjalo, Jesu o ile a beela nako ka thoko gore a rapele Jehofa. Pele letšatši le hlaba, o ile a ya “lefelong la lekatana” gomme a bolela le tatagwe.—Mar. 1:32-35.

10-11. Go ya ka Mateo 26:40, 41, Jesu o ile a botša barutiwa ba gagwe gore ba dire’ng, gona ba ile ba dira’ng?

¹⁰ Bošegong bja mafelelo bja ge Jesu a le mo lefaseng, o ile a nyaka lefelo leo le homotšego gore a kgone go naganišiša le go rapela. O ile a hwetša lefelo leo serapeng sa Getsemane. (Mat. 26:36) Ka nako yeo Jesu o ile a botša barutiwa ba gagwe thuto e bohlokwa ka thapelo.

¹¹ Nagana ka seo se diregilego. Ge ba fihla serapeng sa Getsemane e be e le bošego kudu. Jesu o ile a kgopela baapostola ba gagwe gore ‘ba dule ba phakgame’ gomme yena a ya go rapela. (Mat. 26:37-39) Eupša ge a dutše a rapela ba ile ba robala. Ge Jesu a ba hwetša ba robetše o ile a ba botša gore: “Dulang le phakgame gomme le rapele le sa kgaotše.” (Bala Mateo 26:40, 41.) O ile a bona gore ba be ba imetšwe e bile ba lapile. Jesu o ile a ba botša ka go ba kwela bohloko gore “nama e a fokola.” Jesu o ile a ya go rapela ka makga a mabedi gape, ge a boa o ile a hwetša barutiwa ba gagwe ba robetše go e na le gore ba rapele.—Mat. 26:42-45.

12. Re ka dira’ng ge ka dinako tše dingwe re imetšwe kudu goba re lapile kudu gore re ka rapela?

¹² Kgetha nako ya maleba ya go rapela. Ka  dinako tše dingwe re ka ikwa re lapile e bile re imetšwe gore re ka rapela. Ge e ba seo se ile sa go diragalela, ga o noši. O ka dira’ng? Batho bao ba tlwaetšego go rapela Jehofa thapama ge ba fetša letšatši la bona, ba hweditše go le kaone gore ba rapele nakong yeo ba sa tšwago ba lapa ka yona. Ba bangwe ba lemogile gore tsela yeo ba dulago ka yona ge ba rapela e a ba thuša. O ka dira’ng ge e ba o ikwa o imetšwe goba o lapile kudu gore o ka rapela? Botša Jehofa gore o ikwa bjang. O ka kgodišega gore Jehofa o tlo go kwešiša.—Ps. 139:4.

13. Di dirišwa tša elektroniki di ka re šitiša bjang ge re rapela, re ithuta le ge re le dibokeng?

¹³ Dira gore o seke wa šitiša ke selo ge o ithuta. Thapelo ga se yona feela yeo e ka ra thušago gore re tiiše segwera sa rena le Jehofa. Go ba gona dibokeng le go ithuta lentšu la Modimo le gona go re thuša gore re batamele kgauswi le Modimo. Na go na le seo o ka se dirago gore o diriše nako ya gago gabotse ge o ithuta le ge o le dibokeng? Ipotšiše gore: “ke eng seo se ntšhitišago ge ke le dibokeng goba ke ithuta Beibele?” Na e ka ba go araba difounu, di e-mail goba go fetola melaetša difounung tša rena goba di dirišweng tše dingwe tša elektroniki? Batho ba bantši lehono ba diriša dilo tše. Banyakišiši ba bangwe ba re difounu di ka re šitiša ge re leka go theetša. Moprofesara yo mongwe o itše: “O ka palelwa ke dilo tšeo o nyakago go di dira ge o nagana ka se sengwe gape.” Ge re le dikopanong tše dinyenyane le tše dikgolo re eletšwa gore re bee difounu tša rena boemong bjo bo ka se šitišego ba bangwe. Na le rena re ka dira se se swanago ge re ithuta ka Jehofa?

14. Go ya ka Bafilipi 4:6, 7, Jehofa o tlo re thuša bjang gore re theetše?

¹⁴ Kgopela Jehofa gore a go thuše gore o theetše. Ge e ba o lemoga gore o palelwa ke go theetša ge o ithuta le ge o le dibokeng, kgopela Jehofa gore a go thuše. Ge e ba o tshwenyegile goba o nyamile go ka se be bonolo gore o tlogele go nagana ka mathata a gago ge o ithuta Beibele, eupša go bohlokwa gore o dire bjalo. Rapela Jehofa gore a go fe khutšo yeo e tlago go “diša pelo ya gago le matla a gago a monagano.”—Bala Bafilipi 4:6, 7.

15. Re holega bjang ge re fetša nako e ntši le Jehofa?

¹⁵ Ge o ka fetša nako e ntši o bolela le Jehofa, o mo theetša le go naganišiša ka yena, o tlo holega kudu. Bjang? Sa pele, o tlo dira diphetho tše dibotse. Beibele e re kgonthišetša gore “yo a sepelago le ba bohlale o tla hlalefa.” (Die. 13:20) Ka gona, ge o fetša nako o ithuta ka Jehofa o tlo ba bohlale. O tlo kwešiša gore o ka phema bjang go dira diphetho tšeo di ka mo kwešago bohloko.

16. Go fetša nako e ntši le Jehofa go ka re thuša bjang gore re be barutiši ba bakaone?

¹⁶ Sa bobedi, o tlo ba morutiši yo mokaone. Ge re ithuta Beibele le motho yo mongwe, sa bohlokwa kudu ke gore re mo thuše gore a batamele kgauswi le Modimo. Ge re dula re rapela Jehofa ka mehla, lerato la rena go yena le tlo gola e bile re tlo kgona go thuša barutwana ba rena gore ba mo rate. Nagana ka mohlala wa Jesu. O boletše ka Jehofa ka tsela yeo e ilego ya thuša barutiwa ba gagwe gore ba mo rate.—Joh. 17:25, 26.

17. Ke ka baka la’ng go rapela le go ithuta go re thuša go tiiša tumelo ya rena?

¹⁷ Sa boraro, tumelo ya gago e tla tia. Nagana ka seo se diregago ge o kgopela Modimo gore a go thekge, a go homotše le go go thuša. Tumelo ya gago e tia le go feta ge Jehofa a araba dithapelo tša gago. (1 Joh. 5:15) Ke eng seo se ka go thušago go tiiša tumelo ya gago? Thuto ya motho ka noši. Gopola gore “tumelo e latela seo se kwelwego.” (Baroma 10:17) Eupša ga se ra swanela go ithuta feela, re swanetše go dira se sengwe. Ke eng se sengwe seo re swanetšego go se dira?

18. Hlalosa gore ke ka baka la’ng go le bohlokwa gore re naganišiše.

¹⁸ Re swanetše go naganišiša ka seo re ithutago sona. Nagana ka mohlala wa mongwadi wa Psalme 77. O be a tshwenyegile ka gobane o be a nagana gore Jehofa ga a sa amogela yena le Baisiraele ba bangwe. Seo se ile sa dira gore a se ke a robala. (Ditemana 2-8) O ile a dira’ng? O boditše Jehofa gore: “Ke tla naganišiša ka mediro ya gago ka moka, Ka tshwenyega ka ditiro tša gago.” (Temana 12) Ke nnete gore mopsalme yoo o be a tseba dilo tšeo Jehofa a di diretšego batho ba gagwe nakong e fetilego, eupša o be a ipotšiša gore: “Na Modimo o lebetše go re šokela, Goba na o thibile dikgaugelo tša gagwe ka bogale?” (Temana 9) Mopsalme yoo o ile a naganišiša ka dilo tšeo Jehofa a di diretšego batho ba gagwe kudukudu ge a be a ba gaugela le go ba kwela bohloko. (Temana 11) Mafelelo e bile afe? Mopsalme yoo o ile a  kgodišega gore Jehofa a ka se tsoge a tlogetše batho ba gagwe. (Temana 15) Ka tsela e swanago le wena tumelo ya gago e tlo tia ge o ka nagana ka dilo tšeo Jehofa a di diretšego batho ba gagwe le tšeo a go diretšego tšona.

19. Re tlo holega bjang ge re fetša nako e ntši le Jehofa?

¹⁹ Selo sa bone seo se lego bohlokwa kudu ke gore lerato la gago go Jehofa le tlo tia. Seka se segolo kudu sa Lerato se tlo re thuša gore re kwe Jehofa, re dire dilo tšeo di tlago go mo thabiša e bile re kgotlelele mathata. (Mat. 22:37-39; 1 Bakor. 13:4, 7; 1 Joh. 5:3) Ga go na selo se bohlokwa kudu go feta go ba le segwera se sebotse le Jehofa!—Ps. 63:1-8.

20. O tlo dira’ng gore o iphe nako ya go rapela, go ithuta le go naganišiša?

²⁰ Re swanetše go gopola gore go rapela, go ithuta Beibele le go naganišiša, ke go hlankela Modimo. Go swana le Jesu nyaka lefelo leo le homotšego gore o kgone go fetša nako e ntši le Jehofa. Tloša dilo tšeo di ka go šitišago. Kgopela Jehofa gore a go thuše gore o theetše ge o le dibokeng le ge o ithuta Beibele. Ge o diriša nako ya gago gabotse, Jehofa o tlo go šegofatša ka bophelo go ya go ile lefaseng le lefsa.—Mar. 4:24.