1-2. (a) Gantši ke neng moo re gopolago motho yo re mo ratago yo a hlokofetšego? (b) Jesu o ile a laela gore re dire’ng bošegong bja pele ga ge a ka hwa?

 LE GE batho bao re ba ratago e le kgale ba hlokofetše, re sa dutše re ba gopola. Gantši re ba gopola ka letšatši leo ba hlokofetšego ka lona.

² Ngwaga o mongwe le o mongwe re ba gare ga batho ba dimilione bao ba bokanago gore ba gopole lehu la motho yo re mo ratago kudu e lego Jesu Kriste. (1 Pet. 1:8) Re mo gopola ka gobane o re lopolotše sebeng le lehung. (Mat. 20:28) Le gona Jesu o be a nyaka gore balatedi ba gagwe ba gopole lehu la gagwe. Bošegong bja pele ga ge a ka hwa, o ile a kgobokanya barutiwa ba gagwe gomme a ba botša gore: “Dulang le dira se e le go nkgopola.”—Luka 22:19.

3. Re tlo boledišana ka’ng sehlogong se?

³ Palo ya bao ba bago gona segopotšong e bile ba eya go phela legodimong, ke e nyenyane kudu. Eupša le bao ba nago le kholofelo ya go tlo phela mo lefaseng ba ba gona segopotšong. Sehlogong se, re tlo ithuta gore ke ka baka la eng dihlopha tše tše pedi di thabela go ba gona segopotšong ngwaga o mongwe le o mongwe. Re tlo ithuta le gore re holega bjang ka go ba gona segopotšong. A re thomeng pele ka go bona gore ke ka baka la eng batlotšwa ba e ba gona segopotšong.

4. Ke ka baka la’ng batlotšwa ba eja senkgwa le go nwa beine ge ba le segopotšong?

⁴ Ngwaga o mongwe le o mongwe batlotšwa bao ba bago gona segopotšong ba ja senkgwa le go nwa beine. Ke ka baka la’ng ba dira seo? Gore re hwetše karabo, a re boneng seo se ilego sa direga bošegong bja pele ga ge Jesu a ka hwa. Ka morago ga monyanya wa paseka, Jesu o ile a botša barutiwa ba gagwe gore ba dule ba dira segopotšo. O ile a nea baapostola ba gagwe bao ba botegago ba 11 senkgwa le beine gomme a ba botša gore ba je ba be ba nwe. Le gona Jesu o ile a ba botša ka dikgwerano tše pedi e lego kgwerano e mpsha le kgwerano ya Mmušo. * (Luka 22:19, 20, 28-30) Dikgwerano tše di dirile gore baapostola ba Jesu le sehlotswana se senyenyane sa batho ba bangwe ba kgone go ba dikgoši le baperisita legodimong. (Kut. 5:10; 14:1) Batlotšwa bao ba lego dikgweranong tše, bao ba sa lego mo lefaseng ke bona feela ba sa jago senkgwa le go nwa beile segopotšong.

5. Batlotšwa ba tseba’ng ka kholofelo yeo ba nago le yona?

⁵ Lebaka le lengwe leo le dirago gore batlotšwa ba fele pelo ya go ba gona segopotšong ke ka gobane ba hwetša sebaka sa go naganišiša ka kholofelo ya bona ya go ya legodimong. Jehofa o ba file kholofelo e kgahlišago kudu ya go ba le bophelo bjo bo sa felego legodimong, ya gore ba buše le Jesu Kriste le ba bangwe ba 144 000 e bile ba le kgauswi le Jehofa Modimo! (1 Bakor. 15:51-53; 1 Joh. 3:2) Batlotšwa ba a tseba gore ba ya go thabela dilo tše ka moka legodimong. Eupša gore ba amogelwe legodimong ba swanetše go botegela Jehofa go fihla ba hlokofala. (2 Tim. 4:7, 8) Batlotšwa ba thabišwa ke gore ba ya go phela legodimong. (Tito 2:13) Re ka re’ng ka “dinku tše dingwe”? (Joh. 10:16) Ke ka baka la’ng ba eba gona segopotšong?

6. Ke ka baka la’ng ba dinku tše dingwe ba eba gona segopotšong ngwaga le ngwaga?

⁶ Ba dinku tše dingwe ba thabela go ba gona segopotšong le ge ba sa je senkgwa goba go nwa beine. Ka 1938, ba dinku tše dingwe ba ile ba ba gona la mathomo segopotšong. Morokami wa March 1, 1938, o itše: “Go bohlokwa gore ba dinku tše dingwe ba be gona segopotšong le gore ba bone gore go direga eng . . . Le gona, le bona ba swanetše go thaba.” Go no swana le ge batho bao ba memilwego lenyalong ba thabela go ba gona, le ba dinku tše dingwe ba thabela go ba gona segopotšong.

7. Ke ka baka la’ng ba dinku tše dingwe ba fela pelo ya go kwa polelo ya segopotšo?

⁷ Ba dinku tše dingwe le bona ba naganišiša ka kholofelo ya bona ya go tlo phela mo lefaseng. Ba fela pelo ya go kwa polelo ya segopotšo yeo e bolelago ka seo Jesu Kriste le ba 144 000, ba tlago go se direla batho mo lefaseng nakong ya Pušo ya Mengwaga e Sekete. Ba tlo thuša Jesu Kriste go fetoša lefase le gore e be paradeise le go dira gore batho ba phethagale. Batho ba dimilione bao ba bago gona segopotšong, ba a thaba ge ba nagana ka dikholofetšo tšeo  di lego ka Beibeleng tša go swana le tšeo di lego go Jesaya 35:5, 6; 65:21-23; le Kutullo 21:3, 4. Ba tiiša kholofelo ya bona ka go ipona ba na le batho bao ba ba ratago lefaseng le lefsa gomme seo se dira gore ba se ke ba tlogela go hlankela Jehofa.—Mat. 24:13; Bagal. 6:9.

8. Ke lebaka lefe le lengwe leo le dirago gore ba dinku tše dingwe ba be gona segopotšong?

⁸ A re boneng lebaka le lengwe leo le dirago gore ba dinku tše dingwe ba be gona segopotšong. Ba nyaka go bontšha batlotšwa gore ba a ba rata e bile ba a ba thekga. Lentšu la Modimo le boletše e sa le pele gore batlotšwa le ba dinku tše dingwe ba be ba tlo šoma gotee. Bjang? A re boledišaneng ka mehlala e sego kae.

9. Boporofeta bjo bo lego go Sakaria 8:23, bo bontšha bjang gore ba dinku tše dingwe ba thekga batlotšwa?

⁹ Bala Sakaria 8:23. Boporofeta bjo bo lego lengwalong le bo bolela ka tsela yeo bana babo rena le dikgaetšedi ba ikwago ka yona ka batlotšwa. Mantšu “Mojuda” le “lena batho” a bolela ka sehlopha setee e lego batlotšwa bao ba sa lego mo lefaseng. (Baroma 2:28, 29) Banna “ba lesome bao ba tšwago bathong ba maleme ka moka” ba swantšhetša dinku tše dingwe. Ba “itshwarelela” ka batlotšwa goba ba a ba thekga ebile ba hlankela Jehofa le bona ka go botega. Ka letšatši la segopotšo ba dinku tše dingwe ba bontšha gore ba thekga batlotšwa ka go ba gona segopotšong.

10. Jehofa o ile a phethagatša bjang boporofeta bjo bo lego go Hesekiele 37:15-19, 24, 25?

¹⁰ Bala Hesekiele 37:15-19, 24, 25. Jehofa o ile a phethagatša boporofeta bjo ka go dira gore batlotšwa ba šome gotee le ba dinku tše dingwe. Boporofeta bjo bo bolela ka mapara a mabedi. Bao ba nago le kholofelo ya go yo phela legodimong ba swana le lepara la “Juda” (e lego moloko woo dikgoši tša Isiraele di tšwago go ona), gomme bao ba nago le kholofelo ya go tlo phela mo lefaseng ba swana le lepara la “Efuraime.” Jehofa o be a tlo dira gore dihlopha tše tše pedi di be “lepara letee.” Se se bolela gore ba be ba tlo hlankela gotee ka tlase ga kgoši ya bona e tee e lego Jesu Kriste. Ngwaga o mongwe le o mongwe batlotšwa le ba dinku tše dingwe ba ba gona segopotšong ba le bjalo ka, “mohlape o tee wa modiši o tee.”—Joh. 10:16.

11. Dinku tšeo go boletšwego ka tšona go Mateo 25:31-36, 40 di bontšha gore di thekga batlotšwa bjang?

¹¹ Bala Mateo 25:31-36, 40. “Dinku” tšeo Jesu a boletšego ka tšona, ke batho bao ba botegago mo nakong ya bofelo bao ba nago le kholofelo ya go tlo phela mo lefaseng. Ba thekga batlotšwa bao ba sa lego gona mo lefaseng ka modiro o mogolo wa go bolela ditaba tše dibotse le go dira batho barutiwa lefaseng ka moka.—Mat. 24:14; 28:19, 20.

12-13. Ke ditsela dife tše dingwe tšeo di bontšhago gore ba dinku tše dingwe ba thekga batlotšwa?

¹² Dibeke tše sego kae pele ga segopotšo ngwageng o mongwe le o mongwe, ba dinku tše dingwe ba thekga batlotšwa ka go mema batho gore ba tle segopotšong. (bona lepokisi leo le rego “ Na o Itokišeletša Nako ya Segopotšo?”) Ba thuša le gore dilo ka moka tšeo di hlokegago tša segopotšo di be gona le ge ka phuthegong ya gabo bona go se na motho yo a tloditšwego. Ba dinku tše dingwe ba thabela go thuša batlotšwa kudu. Ba a tseba gore Jesu o bona seo ba se direlago batlotšwa se swana le ge eka ba se direla yena.—Mat. 25:37-40.

 ¹³ Ke mabaka afe a mangwe ao a dirago gore re be gona segopotšong go sa šetšwe gore re yo pela legodimong goba mo lefaseng?

14. Jehofa le Jesu ba bontšhitše bjang gore ba re rata kudu?

¹⁴ Re leboga lerato leo Jehofa le Jesu ba re bontšhitšego lona. Jehofa o re bontšhitše ka ditsela tše dintši gore o a re rata, eupša go na le tsela yeo e di fetago ka moka. O ile a re bontšha lerato ka go romela M orwa wa gagwe a nnoši gore a tle a re hwele. (Joh. 3:16) Jesu le yena o ile a bontšha gore o a re rata ka go dumela gore a tle a re hwele. (Joh. 15:13) Re ka se kgone go lefa lerato leo Jehofa le Jesu ba re bontšhitšego lona. Eupša re ka ba bontšha gore re a ba leboga ka tsela yeo re phelago ka yona letšatši le lengwe le le lengwe. (Bakol. 3:15) Le gona re ba gona segopotšong gore re gopole ka lerato leo ba re bontšhitšego lona le gore re bontšhe gore re a ba rata.

15. Ke ka baka la’ng ba dinku tše dingwe le batlotšwa ba tšeela godimo mpho ya topollo?

¹⁵ Re leboga mpho ya topollo kudu. (Mat. 20:28) Batlotšwa ba leboga kudu mpho ye ka gobane e dira gore ba kgone ba le kholofelo ya go phela legodimong. Ka ge ba na le tumelo sehlabelong sa Jesu sa topollo, Jehofa o ba lebelela e le bana ba gagwe bao ba lokilego. (Baroma 5:1; 8:15-17, 23) Le ba dinku tše dingwe ba leboga sehlabelo sa topollo kudu. Ka ge ba na le tumelo sehlabelong sa Jesu sa topollo, ba hlankela Modimo ka letswalo le le hlwekilego, ba mo direla tirelo e kgethwa ebile ba na le tumelo ya gore ba tlo ‘phologa masetlapelo a magolo.’ (Kut. 7:13-15) Lebaka le lengwe leo le bontšhago gore ba dinku tše dingwe le batlotšwa ba leboga sehlabelo sa topollo, ke ka go ba gona segopotšong ngwaga o mongwe le o mongwe.

16. Lebaka le lengwe leo le dirago gore re be gona segopotšong ke lefe?

¹⁶ Lebaka le lengwe leo le dirago gore re be gona segopotšong ke ka gobane re nyaka go kwa Jesu. Go sa šetšwe gore re ya go phela legodimong goba mo lefaseng, re kwa seo Jesu a ilego a re botša sona bošegong bja pele ga ge a ka hwa ge a be a re: “Dulang le dira se e le go nkgopola.”—1 Bakor. 11:23, 24.

17. Segopotšo se re thuša bjang gore re batamele kgauswi le Jehofa?

¹⁷ Re batamela Jehofa. (Jak. 4:8) Bjale ka ge re šetše re bone, segopotšo se re nea sebaka sa go naganišiša ka kholofelo yeo Jehofa a re neilego yona le lerato leo a re bontšhitšego lona. (Jer. 29:11; 1 Joh. 4:8-10) Ge re naganišiša ka kholofelo yeo Jehofa a re neilego yona le lerato leo a re bontšhitšego lona, re tlo mo rata kudu gomme ra ba le segwera se sebotse le yena.—Rom. 8:38, 39.

18. Re ikwa re nyaka go dira’ng ge re naganišiša ka mohlala wa Jesu?

¹⁸ Re nyaka go ekiša mohlala wa Jesu. (1 Pet. 2:21) Matšatšinyana pele ga segopotšo re bala ka matšatši a mafelelo a ge Jesu a sa le mo lefaseng, ka lehu la gagwe le ka morago ga ge a tsošitšwe. Ka letšatši la segopotšo polelo yeo e newago dibokeng e re gopotša ka lerato leo Jesu a re bontšhitšego lona. (Baef. 5:2; 1 Joh. 3:16) Ge re bala ka mohlala woo Jesu a re bontšhitšego ona e bile re naganišiša ka ona, re ikwa re nyaka “go  sepela go swana le kamoo yoo a sepetšego ka gona.”—1 Joh. 2:6.

19. Re ka ba bagwera ba Jehofa bjang?

¹⁹ Re ikemišeditše go dula re le bagwera ba Jehofa. (Juda 20, 21) Eupša re tlo kgona go ba bagwera ba gagwe ge e ba re ka dira sohle seo re ka se kgonago gore re mo kwe, re tagafatše leina la gagwe e bile re mo thabiše. (Die. 27:11; Mat. 6:9; 1 Joh. 5:3) Segopotšo se re thuša gore re dule re phela letšatši le lengwe le le lengwe bjale ka ge eka re botša Jehofa gore: ‘Ke nyaka gore o dule o nthata!’

20. Re na le mabaka afe ao a kwagalago a gore re be gona segopotšong?

²⁰ Go sa šetšwe gore re ya go phela legodimong goba mo lefaseng re na le mabaka ao a kwagalago a gore re be gona segopotšong. Ngwaga o mongwe le o mongwe re bokana ka letšatši la segopotšo gore re gopole lehu la motho yo re mo ratago kudu e lego Jesu Kriste. Le gona re gopola lerato le legolo kudu leo Jehofa a re bontšhitšego lona ka go re nea morwa wa gagwe gore a re hwele. Ngwageng wo segopotšo se tlo ba ka Labohlano la di 15 April 2022, ka morago ga ge letšatši le sobetše. Re rata Jehofa le morwa wa gagwe Jesu. Ka gona ka letšatši la segopotšo ga se gwa swanela go ba le selo seo se ka re šitišago go ba gona.