1-3. Ke dilo dife tšeo di ka dirago gore re lle?

 KE NENG la mafelelo o ilego wa lla? Ka dinako tše dingwe re na le go ntšha megokgo ya lethabo. Eupša gantši re lla ka gobane re nyamile. Ka mohlala, gantši re a lla ge motho yo re mo ratago a hlokofala. Kgaetšedi Lorilei, yo a tšwago United States, o ngwadile gore: “Go na le dinako tšeo ke bego ke nyama ge ke be ke nagana ka morwedi wa ka yo a hlokofetšego e bile ke ikwa eka ga gona selo seo se ka nkgothatšago. Ka dinako tšeo ke be ke sa nagane gore nka kgona go kgotlela bohloko bjoo.” *

² Go na le dilo tše dingwe tšeo di ka dirago gore re lle. Kgaetšedi Hiromi yo e lego mmulamadibogo yo a tšwago Japan, o itše: “Ka dinako tše dingwe ke a nyama ge batho ba bangwe ba sa nyake go kwa molaetša wa Beibele. Ka dinako tše dingwe ke rapela Jehofa ke tletše megokgo ka mahlong ke kgopela Jehofa gore a nthuše gore ke hwetše motho yo a nyakago go ithuta ka yena.”

³ Na le wena o kile wa ikwa ka tsela yeo? Ba bantši ba ile ba ikwa ka tsela yeo. (1 Pet. 5:9) Re nyaka go ‘hlankela Jehofa ka go hlalala,’ eupša ka dinako tše dingwe re a lla ka gobane motho yo re mo ratago a hlokofetše, re nyamile goba re na le mathata ao a lekago tumelo ya rena go Modimo. (Ps. 6:6; 100:2) Re ka dira eng ge re ikwa ka tsela ye?

4. Re tlo ithuta ka’ng sehlogong se?

⁴ Re ka ithuta se sengwe mohlaleng wa Jesu. Ka dinako tše dingwe go ile gwa direga dilo tšeo di ilego tša dira gore a lle. (Joh 11:35; Lu 19:41; 22:44; Heb 5:7) A re boledišaneng ka dilo tšeo. Gomme re bone seo re ka ithutago sona go Jehofa  le Jesu. Re tlo bona le gore re ka dira eng ge re kopana le dilo tšeo di ka dirago gore re feleletše re lla.

5. Johane 11:32-36 e re ruta’ng ka Jesu?

⁵ Ka marega a 32 C.E mogwera wa Jesu yo mogolo e lego Latsaro o ile a babja gomme a hwa. (Joh 11:3, 14) Monna yoo o be a na le dikgaetšedi tše pedi e lego Maria le Mareta, le gona, Jesu o be a rata lapa leo kudu. Basadi bao ba be ba nyamile kudu ka ge kgaetšedi ya bona e be e hlokofetše. Ka morago ga lehu la Latsaro, Jesu o ile a ya motseng wa Bethania, moo Maria le Mareta ba bego ba dula gona. Ge Mareta a e kwa gore Jesu o a tla, o ile a tšwa a kitima a ya go mo gahlanetša. Nagana gore o be a nyamile bjang ge a be a bolela gore: “Morena, ge nkabe o be o le mo, kgaetšedi ya ka nkabe a se a hwa.” (Joh 11:21) Ka moragonyana, ge Jesu a bona Maria le ba bangwe ba lla, o ile “a ntšha megokgo.”—Bala Johane 11:32-36.

6. Ke ka baka la’ng Jesu a ile a lla?

⁶ Ke ka baka la’ng Jesu a ile a lla? Puku ya Insight on the Scriptures e re: “Lehu la mogwera wa Jesu yo mogolo e lego Latsaro le ile la dira gore dikgaetšedi tša gagwe di nyame, le gona seo se ile sa dira gore Jesu a ‘tsetsele moyeng gomme a thoma go lla.’” * Jesu a ka ba a ile a nagana ka bohloko bjoo mogwera wa gagwe a ilego a bo kwa ge a be a babja le kamoo a ilego a ikwa ka gona ge a be a nagana gore o kgauswi le go hwa. Jesu le yena o ile a lla ge a bona kamoo Maria le Mareta ba bego ba kwele bohloko ka gona ka lebaka la lehu la kgaetšedi ya bona. Le wena o ka ikwa ka tsela yeo ge e ba go na le mogwera wa gago goba wa leloko yo a hlokofetšego. A re boleleng ka dilo tše tharo tšeo re ka ithutago tšona tiragalong ye.

7. Taba ya gore Jesu o ile a llela bagwera ba gagwe e re ruta’ng ka Jehofa?

⁷ Jehofa o kwešiša kamoo o ikwago ka gona. Jesu ke “seswantšho sa kgonthe” sa Tatagwe.  (Heb. 1:3) Ge Jesu a be a lla, o ile a bontšha gore Jehofa o ikwa bjang ge batho bao re ba ratago ba hlokofala. (Joh 14:9) Ge e ba motho yo o mo ratago a hlokofetše, o ka kgodišega gore Jehofa ga a no lemoga seo, eupša o go kwela bohloko. O nyaka go go thuša gore o kgone go kgotlelela bohloko bjoo.—Ps. 34:18; 147:3.

8. Ke ka baka la’ng re ka kgodišega gore Jesu o tlo tsoša batho ba gabo rena bao ba hlokofetšego?

⁸ Jesu o nyaka go tsoša batho bao ba hlokofetšego. Pejana ga ge Jesu a ka lla, o ile a botša Mareta gore: “Kgaetšedi ya gago o tla tsoga.” Mareta o ile a tshepa Jesu. (Joh. 11:23-27) Ka ge Mareta e be e le mohlanka yo a botegago wa Jehofa, ga go pelaelo gore o be a tseba gore baporofeta ba nakong e fetilego ba go swana le Eliya le Elisha ba ile ba tsoša bahu. (1 Dikg. 17:17-24; 2 Dikg. 4:32-37) Le gona go ka direga gore o be a kwele gore Jesu o ile a tsoša bahu. (Lu 7:11-15; 8:41, 42, 49-56) Le wena o ka kgodišega gore batho bao o ba ratago bao ba hlokofetšego, ba tlo tsošwa. Megokgo ya Jesu e re ruta gore o fela pelo ya go tlo tsoša batho bao ba hlokofetšego!

9. Go swana le Jesu, o ka kgothatša bjang bao ba hlokofaletšwego? Nea mohlala.

⁹ O ka kgothatša bao ba hlokofaletšwego. Jesu ga se a no lla le Maria le Mareta feela, eupša o ile a ba theetša le go ba kgothatša. Le rena re ka kgothatša bao ba hlokofaletšwego. Dan, e lego mogolo yo a dulago Australia, o re: “Ke be ke hloka thekgo ka morago ga gore mosadi wa ka a hlokofale. Banabešo ba bantši le basadi ba bona ba be ba dula ba ntheetša. E bile ke be ke sa ba ješe dihlong ge ke lla. Ba be ba nthuša ka dilo tšeo ke bego ke palelwa ke go di dira, tše bjalo ka go hlatswa koloi go ya mabenkeleng le go apea. Le gona, ba be ba rapela lenna gantši. Ba ile ba bontšha gore ke bagwera le banabešo bao nka ‘ithekgago ka bona mohlang wa tlalelo.’”—Die 17:17.

10. Ke tiragalo efe yeo go bolelwago ka yona go Luka 19:36-40?

¹⁰ Jesu o ile a fihla Jerusalema ka Nisani 9, 33 C.E. Ge a fihla motseng o ile a hwetša lešaba le kgobokane gomme batho ba ala diaparo tša bona tseleng gore ba mo amogele bjalo ka kgoši. Ruri ye e be e le nako e thabišago kudu. (Bala Luka 19:36-40.) Eupša barutiwa ba gagwe ba ile ba makatšwa ke seo se ilego sa direga ka morago. “Ke moka ge a batamela Jerusalema, a bona motse woo gomme a o llela.” Ge Jesu a dutše a lla, o ile a bolela ka dilo tše mpe tšeo di bego di tlo diragalela batho ba Jerusalema e se kgale.—Lu 19:41-44.

11. Ke ka baka’ng Jesu a ile a lla ge a nagana ka batho ba Jerusalema?

¹¹ Jesu o be a nyamile ka gobane o be a tseba gore Bajuda ba bantši ba tlo gana go kwa molaetša wa Mmušo wa Modimo. Ka gona, ge Jerusalema e fedišwa, Bajuda bao ba phologago e be e tlo ba makgoba. (Lu 21:20-24) Ka maswabi, go ile gwa ba ka yona tsela yeo, batho ba bantši ba ile ba gana Jesu. Batho ba bantši mo o dulago gona ba arabela bjang go molaetša wa Mmušo wa Modimo? Ge e ba batho ba bantši ba sa arabele gabotse, re ka ithuta’ng tabeng ya gore Jesu o ile a lla ge a nagana ka baagišane ba gagwe? Re tlo boledišana ka dilo tše tharo tšeo re ka ithutago tšona.

12. Go lla ga Jesu ka baka la baagišane ba gagwe go re ruta’ng ka Jehofa?

¹² Jehofa o rata batho. Ge Jesu a be a lla, o ile a re gopotša gore Jehofa o tloga a rata batho. “Ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Pe 3:9) Lehono re bontšha gore re  rata baagišane ba rena ka go dira sohle seo re ka se kgonago gore re ba botše ka ditaba tše dibotse tša Mmušo wa Modimo.—Mat 22:39. *

13-14. Jesu o ile a bontšha bjang gore o kwela batho ba bangwe bohloko, gona rena re ka mo ekiša bjang?

¹³ Jesu o be a šoma ka thata tšhemong. O be a ruta batho ka mehla ge sebaka se bulega. (Lu 19:47, 48) O ile a thušwa ke eng? O be a ba kwela bohloko. Ka dinako tše dingwe Jesu le barutiwa ba gagwe “ba be ba sa kgone le go ja dijo” ka gobane batho ba bangwe ba be ba nyaka gore a ba rute. (Mar 3:20) Le gona, o ile a dumela ge monna yo mongwe a be a nyaka go bolela le yena bošego. (Joh 3:1, 2) Batho ba bantši bao ba ilego ba theetša molaetša wa Jesu ga se ba ka ba ba barutiwa ba gagwe. Eupša ka moka ga bona ba ile ba kwa molaetša wa ditaba tša Mmušo wa Modimo. Lehono re nyaka gore batho ka moka ba kwe ditaba tše dibotse. (Dit 10:42) E le gore re kgone go dira se, re swanetše go fetola tsela yeo re bolelago ditaba tše dibotse ka yona.

¹⁴ Fetofetoga le maemo. Ge e ba re dula re eya tšhemong ka nako e tee, re ka no se kgone go kopana le batho ba ka thabelago go kwa ditaba tše dibotse. Kgaetšedi wa mmulamadibogo yo a bitšwago Matilda o re: “Nna le monna wa ka re botša batho ditaba tše dibotse ka dinako tše di fapafanego. Ge e sa le mesong, re šoma mafelong a kgwebo. Ke moka mosegare ge batho ba tletše diterateng, re diriša diteroli. Gomme thapama, re hwetša ba bantši ba dutše ka magaeng a bona.” Ga se ra swanela go no ya tšhemong ka nako yeo re ipeetšego yona feela, eupša re swanetše go ya ka nako yeo batho ba hwetšagalago ka yona. Ge e ba re dira bjalo, re tlo thabiša Jehofa.

15. Luka 22:39-44 e re botša gore go diregile’ng bošegong bja pele ga ge Jesu a ka bolawa?

¹⁵ Bošegong bja Nisani 14, 33 C.E., Jesu o ile a ya serapeng sa Getsemane. Ge a fihla moo, o ile a rapela Jehofa go tšwa pelong. (Bala Luka 22:39-44.) Ka nako yeo, o ile a “kgopela Jehofa ka megoo e matla. . . le megokgo.” (Heb. 5:7) Jesu o ile a rapelela eng bošegong  bja pele a ka bolawa? O ile a kgopela Jehofa gore a mo nee matla le go mo thuša gore a botege. Jehofa o ile a kwa thapelo yeo ya Morwa wa gagwe gomme a romela morongwa gore a mo matlafatše.

16. Ke ka baka la’ng Jesu a be a nyamile ge a be a rapela kua serapeng sa Getsemane?

¹⁶ Ga go pelaelo gore Jesu o ile a lla ge a be a rapela kua serapeng sa Getsemane ka gobane o be a tseba gore batho ba tlo mo lebelela e le motho yo a sa hlomphego leina la Modimo. O be a tseba le gore go bohlokwa kudu gore a botege le go kgethagatša leina la Tatagwe. Ge e ba o kopana le mathata ao a ka dirago gore o se ke wa botegela Jehofa, o ka ithuta eng tabeng ya gore Jesu o ile a lla? A re boleleng ka dilo tše dingwe tše tharo tšeo re ithutago tšona.

17. Re ithuta’ng tabeng ya gore Jehofa o ile a araba Jesu ge a mo rapela go tšwa pelong?

¹⁷ Jehofa o a go theetša ge o rapela. Jehofa o ile a theetša Jesu ge a be a mo rapela go tšwa pelong. Ka baka la’ng? Ka gobane Jesu o be a nyaka go dula a botegela Tatagwe le go kgethagatša Leina la gagwe. Ge e ba re tshwenyegile ka go dula re botegela Jehofa le go kgethagatša leina la gagwe, o tlo araba dithapelo tša rena ge re mo kgopela gore a re thuše.—Ps. 145:18, 19.

18. Ke ka baka la’ng re ka re Jesu o swana le mogwera yo a kwešišago mathata a rena?

¹⁸ Jesu o kwešiša kamoo o ikwago ka gona. Ge re nyamile, re thaba kudu ge mogwera wa rena a re kgothatša, kudukudu ge e ba e le mogwera yo a ilego a kopana le mathata ao re nago le ona. Jesu ke mogwera wa mohuta woo. O a tseba gore go bjang go ikwa o se na matla e bile o hloka thušo. O a kwešiša gore re na le mathata e bile o tla dira gore re hwetše thušo “ka nako e swanetšego.” (Heb. 4:15, 16) Go swana le ge Jesu a ile a dumela gore morongwa a mo thuše kua serapeng sa Getsemane, le rena re swanetše go amogela thušo yeo Jehofa a re neago yona, a diriša dikgatišo, dibidio, dipolelo, bagolo goba bana babo rena le dikgaetšedi.

19. Re ka hwetša kae matla ge re kopana le mathata ao a ka dirago gore re se ke ra botegela Jehofa? Nea mohlala.

¹⁹ Jehofa o tlo go nea “khutšo ya Modimo.”  Jehofa o tlo re tiiša bjang? Ge re rapela, re tlo amogela “khutšo ya Modimo yeo e fetago kwešišo yohle.” (Bafil. 4:6, 7) Khutšo yeo Jehofa a re neago yona e tlo dira gore re nagane gabotse le go dula re išitše maswafo fase. Nagana ka mohlala wa kgaetšedi yo a bitšwago Luz, o re: “Gantši ke ikwa ke lewa ke bodutu. Seo ka dinako tše dingwe se dira gore ke ikwe eka Jehofa ga a nthate. Eupša ge seo se direga, kapelapela ke botša Jehofa kamoo ke ikwago ka gona. Thapelo e dira gore ke ikwe ke le kaone.” Phihlelo ye e re bontšha gore le rena re ka hwetša khutšo ge re rapela.

20. Taba ya gore Jesu o ile a lla e re rutile‘ng?

²⁰ Go lla ga Jesu go re ruta dithuto dife tše bohlokwa? Re ithuta gore re swanetše go thekga batho bao ba nyamilego le gore Jehofa le Jesu ba tlo re thekga ge batho bao re ba ratago ba hlokofala. Re kgothaletšwa gore re ekiše seka se sebotse sa lerato, sa Jehofa Modimo le sa Morwa wa gagwe Jesu Kriste ka gore re ye tšhemong gomme re rute batho ditaba tše dibotse tša Mmušo wa Modimo. Re a thaba ge re tseba gore Jehofa le Morwa wa gagwe yo a rategago ba kwešiša kamoo re ikwago ka gona, ba re kwela bohloko ka baka mathata a rena e bile ba ikemišeditše go re thuša gore re kgotlelele. Eka ka moka ga rena re ka diriša seo re ithutilego sona, go fihla ge Jehofa a phethagatša tshepišo ya gagwe yeo e rego: ‘O tla phumola megokgo ka moka mahlong a rena’!—Kut 21:4.