KA LABORARO la di-18 tša January 2023, go ile gwa ba le tsebišo e kgethegilego go jw.org, yeo e bego e bontšha gore bana babo rena ba babedi e lego Gage Fleegle le Jeffrey Winder ba kgethilwe go ba ditho tša Sehlopha se Bušago sa Dihlatse tša Jehofa. Ke kgale bana babo rena ba, ba hlankela Jehofa ka go botega.

Ngwanabo rena Fleegle o godišitšwe ke batswadi bao e bego e le Dihlatse tša Jehofa kua bodikela bja Pennsylvania, U.S.A. Ge a be a le mahlalagading, lapa la gabo le ile la hudugela toropong e nyenyane yeo e bego e na le tlhokagalo ya bagoeledi. Ka moragonyana ga moo o ile a kolobetšwa ka di-20 tša November 1988.

Batswadi ba Ngwanabo rena Fleegle ba be ba dula ba mo kgothaletša gore a tsenele tirelo ya nako e tletšego. Ba be ba dula ba amogela balebeledi ba tikologo le bana babo rena bao ba tšwago legaeng la Bethele, gomme Ngwanabo rena Fleegle o ile a bona kamoo ba bego ba thabile ka gona. Ka moragonyana ga gore a kolobetšwe o ile a ba mmulamadibogo wa ka mehla go thoma ka di-1 tša September 1989. Mengwaga e mebedi ka morago, o ile a fihlelela pakane yeo a bego a ipeetše yona ge a be a na le mengwaga e lesomepedi, e lego ya go hlankela Bethele.O ile a thoma go hlankela Bethele ya kua Brooklyn ka October 1991.

Kua Bethele, Ngwanabo rena Fleegle o ile a šoma lefapheng la go tlema dipuku (goba Bindery) ka mengwaga e seswai, ke moka ka morago a abelwa go šoma Lefapheng la tša Tirelo. Ka nako yeo o be a hlankela phuthegong ya go bolela leleme le se-Russia. Ka 2006 o ile a nyalana le mosadi wa gagwe Nadia, ke moka ba hlankela Bethele. Ba be ba hlankela tšhemong ya go bolela leleme la Sepotokisi ke moka ka morago ba fetša mengwaga e lesome ba hlankela tšhemong ya go bolela leleme la Sepanishi. Ngwanabo rena Fleegle o šomile Lefapheng la tša Tirelo ka mengwaga e mentšhi, a abelwa go šoma Ofising ya Komiti ya go Ruta ke moka ka morago a ya Ofising ya  Komiti ya Tirelo. O ile a kgethwa gore e be mothuši wa Komiti ya Tirelo ya Sehlopha se Bušago ka March 2022.

Ngwanabo rena Winder o goletše kua Murrieta, California, U.S.A. O godišitšwe ke batswadi bao e bego e le Dihlatse tša Jehofa gomme o kolobeditšwe ka di-29 tša March 1986. Kgwedi e latelago o ile a tšea bobulamadibogo bja go thuša. O ile a bo thabela kudu moo a ilego a nyaka go tšwela pele e le mmulamadibogo. Ka morago ga go ba mmulamadibogo wa go thuša ka dikgwedi tše mmalwa, o ile a tšea bobulamadibogo bja ka mehla ka di-1 tša October 1986.

Ge Ngwanabo rena Winder a be a le mahlalagading, o ile a etela bo buti’agwe ba babedi bao ba bego ba hlankela Bethele ka nako yeo. Ketelo yeo e ile ya dira gore a nyake go hlankela Bethele ge a gola.O ile a laletšwa gore a tle a hlankele Bethele ya kua Wallkill ka May 1990.

Kua Bethele, Ngwanabo rena Winder o ile a šoma mafapheng a fapafapanego ao a akaretšago, Lefapha la go Hlwekiša, Lefapha la tša Temo le Ofisi ya Bethele. O nyalane le mosadi wa gagwe Angela ka 1997, gomme ba hlanketše Bethele ga e sa e le go tloga ka yona nako yeo. Ka 2014 ba ile ba išwa kua Warwick, moo ngwanabo rena Winder a ilego a thuša ka go aga ntlokgolo ya lefase ka moka. Ka 2016 ba ile ba hudugela Watchtower Educational Center kua Patterson, moo Ngwanabo rena Winder a ilego a šoma Lefapheng la Audio/Video. Ka morago ga mengwaga e mene ba ile ba boela Warwick, moo Ngwanabo rena Winder a ilego a abelwa go šoma Ofising ya Komiti ya Bašomi. O ile a kgethwa gore e be mothuši wa Komiti ya Bašomi ya Sehlopha se Bušago ka March 2022.

Re rapelela gore Jehofa a tšwele pele a šegofatša “dimpho tše e lego banna” wa go tlala seatla ge ba dutše ba šoma ka thata go etiša dikgahlego tša Mmušo pele.—Baef. 4:8.