SEHLOGO SE ITHUTWAGO 8
KOPELO 130 Lebalelang
Ekiša Tsela Yeo Jehofa a Lebalelago ka Yona
“Go no swana le ge Jehofa a le lebaletše ka pelo ka moka, le lena le lebalelaneng ka pelo ka moka.”—BAKOL. 3:13
SEO RE TLAGO GO ITHUTA SONA
Sehlogong se, re tlo ithuta gore re ka dira eng gore re lebalele motho yo a re kgopišitšego.
1-2. (a) Ke ka baka la’ng go ka ba thata gore re lebalele motho yo mongwe? (b) Denise o ile a dira’ng go bontšha gore o a lebalela?
NA O thatafalelwa ke go lebalela ba bangwe? Batho ba bantšhi ba thatafalelwa ke go lebalela batho bao ba ba kwešitšego bohloko kudu. Eupša go na le dilo tšeo di ka re thušago gore le ge re kwele bohloko re kgone go lebalela ba bangwe. Go bontšha gore seo se a kgonega, a re kweng ka mohlala wa kgaetšedi Denise, a yo a ilego a lebalela motho yo a mo kwešitšego bohloko kudu. Ka 2017, Denise le lapa la gagwe ba ile ba etela ntlokgolo ya Dihlatse tša Jehofa yeo e bego e sa tšwa go bulwa. Ge ba be ba boela gae mootledi yo mongwe o ile a palelwa ke go laola koloi ya gagwe gomme a thula ya bona. Denise o ile a idibala. Ge a phafoga o ile a kwa gore bana ba gagwe ba gobetše kudu, le gore monna wa gagwe Brian o hlokofetše. Ge Denise a be a ekwa ditaba tšeo o re: “Ke ile ka kwa bohloko kudu ebile ke gakanegile.” Ka moragonyana Denise o ile a kwa gore monna yo a ba thutšego ga se a gobala. Denise o ile a rapela Jehofa gore a mo nee khutšo.
2 Maphodisa a ile a swara monna yo a ba thutšego ka ge a bolaile monna wa gagwe. Ge e ba monna yoo a be a ka bonwa molato, o be a tlo ya tronkong. Kgoro ya tsheko e ile ya botša Denise gore bohlatse bjo a bego a tlo bo nea ke bjona bo tlo dirago gore monna yoo a ye tronkong. Denise o re: “Go bolela ka selo seo se diregilego letšatšing leo go be go le bjalo ka ge e ka motho wa nthonkga.” Ka morago ga dibekenyana, Denise o ile a fana ka bohlatse kgorong ya tsheko, o be a bolela ka monna yo a ilego a kweša lapa la gagwe bohloko. O ile a re’ng ge a be a le moo kgorong ya tsheko? Denise o ile a kgopela moahlodi gore a šokele monna yoo. b Ge Denise a fetša go bolela, moahlodi yoo o ile a thoma go lla. O ile a re: “Ke feditše mengwaga e 25 ke le moahlodi gomme ga sa nka ka bona selo sa mohuta wo se direga. Ga sa nka ka kwa lapa leo le senyeditšwego le kgopela moahlodi gore a kwele motho yo a ba senyeditšego bohloko. E be e le mathomo ke bona motho a bontšha lerato le go lebalela ka kgorong ya tsheko.”
3. Ke eng seo se dirilego gore Denise a lebalele?
3 Denise o thušitšwe ke’ng gore a kgone go lebalela monna yoo? O ile a naganišiša ka tsela yeo Jehofa a re lebalelago ka yona. (Mika 7:18) Ge e ba re thabišwa ke gore Jehofa o a re lebalela, seo se tlo re thuša gore le rena re kgone go lebalela ba bangwe.
4. Jehofa o nyaka gore re dire’ng? (Baefeso 4:32)
4 Ka ge Jehofa a re lebalela ka bolokologi o nyaka gore le rena re lebalele ba bangwe ka bolokologi. (Bala Baefeso 4:32.) O nyaka gore re dule re ikemišeditše go lebalela batho bao ba re kwešitšego bohloko. (Ps. 86:5; Luka 17:4) Sehlogong se re tlo ithuta ka dilo tše tharo tšeo di tlago go re thuša go lebalela ba bangwe.
O SEKE WA PHAELA MAIKWELO A GAGO KA THOKO
5. Re ka ikwa bjang ge motho yo mongwe a re kgopiša? (Diema 12:18)
5 Re ka kwešwa bohloko ke dilo tšeo batho ba di bolelago goba ba di dirago, kudukudu ge e ba motho yoo e le wa gabo rena goba e le mogwera. (Ps. 55:12-14) Ka dinako tše dingwe bohloko bjo re bo kwago bo ka swantšhwa le go hlabja ka thipa. (Bala Diema 12:18.) Re ka no leka go phaela ka thoko tsela yeo re ikwago ka yona. Eupša go dira bjalo go no swana le go tlogela thipa yeo mo ba go hlabilego gona. Seo se ra gore le rena re ka se fole ge e ba re phaela maikwelo a rena ka thoko.
6. Re ka dira’ng ge motho yo mongwe a re kgopiša?
6 Gantšhi Beibele le yona e re motho a ka kwata, eupša e re lemoša gore re se ke ra kwatela sa ruri. (Ps. 4:4; Baef. 4:26) Ka baka la’ng? Ka gobane tsela yeo re ikwago ka yona e ka dira gore re dire dilo tše itšego. Gantšhi ge motho a galefile o dira diphošo. (Jak. 1:20) Motho yo mongwe le yo mongwe a ka kwata, eupša re na le kgetho ya gore re ka dula re kwatile goba ra iša maswafo fase.
Go a direga gore re galefe eupša re ka kgetha gore re dira’ng ka seo
7. Ke tsela efe e nngwe yeo re ka ikwago ka yona ge motho yo mongwe a re kweša bohloko?
7 Ge batho ba re swara gampe re ka nyama goba ra ikwa ka tsela e itšego. Ka mohlala, kgaetšedi Ann o re: “Ge ke sa le ngwana papa o ile a hlala mma gomme a nyalana le motho yo a bego a re hlokomela. Ge papa a e ba le bana ba bangwe, ke ile ka bona ba ntšeetše sekgoba. Ke gotše ke ikwa okare ga ke ratwe ke motho.” Kgaetšedi Georgette o hlalosa kamoo a ilego a ikwa ka gona ka morago ga gore monna wa gagwe a se ke a mmotegela, o re: “Re bile bagwera go tloga re sa le bana. Re be re ipshina ka go ba babulamadibogo re le gotee! Ke ile ka kwa bohloko kudu.” Kgaetšedi Naomi yena o re: “Ke be ke sa nagane gore monna wa ka a ka tsoga a nkwešitše bohloko. Ge a mpotša gore o be a bogela diswantšho le di bidio tša batho ba sa aparago ke ile ka kwa bohloko kudu ebile ka bona a nthadiile.”
8. (a) Ke ka baka la’ng re swanetše go lebalela batho ba bangwe? (b) Re holega bjang ge re lebalela batho ba bangwe? (Bona lepokisi leo le rego, “ Ge Eba Motho yo Mongwe a go Kwešitše Bohloko”)
8 Re ka se kgone go laola dilo tšeo batho ba di bolelago goba tšeo ba re dirago tšona, eupša re ka leka go laola tsela yeo re arabelago ka yona. Gantšhi go lebalela ke tsela e kaone ya go dira dilo. Ka baka la’ng? Ka gobane re rata Jehofa ebile o nyaka gore re lebalele batho ba bangwe. Ge e ba re ka dula re kwatile gomme ra se lebalele ba bangwe, re tlo dira dilo tša botlaela gomme ra se be le ditlamorago tše dibotse. (Die. 14:17, 29, 30) Ekwa ka mohlala wa kgaetšedi Christine. O re: “Ge ke kwele bohloko ga ke kgone go semaela. Ga ke je gabotse. Ga ke kgone go robala, ebile ke palelwa ke go laola maikwelo a ka gomme seo se dira gore ke se ke ka swara monna wa ka gabotse ebile ke se ke ka kwana le batho ba bangwe.”
9. Ke ka baka la’ng re se ra swanela go swara sekgopi?
9 Le ge motho yo a re kwešitšego bohloko a sa re kgopele tshwarelo, rena re ka dula re ikemišeditše go lebalela. Bjang? Georgette yo re boletšego ka yena pejana o re: “Le ge go ntšere nako, ke ile ka feleletša ke lebaletše monna yo ke bego ke nyalane le yena. Seo se ile sa dira gore ke be le khutšo ya kgonthe.” Ge re lebalela batho ba bangwe, go tlo ba bonolo gore re ba sware gabotse. Re itirela selo se se kaone kudu, le gona re tlogela go hlwa re nagana ka selo seo se diregilego gomme re tlo boela ra ipshina ka bophelo. (Die. 11:17) O ka dira’ng ge e ba go se bonolo go lebalela motho yo mongwe?
GO LEBELETŠANA LE KAMOO O IKWAGO KA GONA
10. Ke ka baka la’ng re swanetše go ipha nako ya gore re fole? (Bona le diswantšho.)
10 O ka thušwa ke’ng gore o se ke wa dula o kwatile? O se ke wa dulela go nagana kudu ka seo se diragetšego. Motho yo a bego a gobetše kudu, o hloka nako ya gore a fole ka morago ga gore a alafiwe. Ka mo go swanago, go ka re tšea nako gore re lebalele motho yo a re kwešitšego bohloko.—Mmo. 3:3; 1 Pet. 1:22.
Go swana le ge motho yo a gobetšego a hloka nako gore a fole, go bjalo le ge motho a re kgopiša (Bona serapa 10)
11. (a) Go rapela go ka go thuša bjang gore o lebalele batho ba bangwe? (b) O ithutile’ng dibidiong tšeo di bolelago ka go lebalela?
11 Kgopela Jehofa gore a go thuše go lebalela batho ba bangwe. c Ann yo re boletšego ka yena pejana o re: “Ke ile ka kgopela gore Jehofa a lebalele yo mongwe le yo mongwe ka mo lapeng ka baka la tsela yeo re ilego ra dira dilo ka yona. Ke moka ke ile ka ngwalela tate le mosadi wa gagwe yo moswa lengwalo ke ba botša gore ke ba lebaletše.” O re go dira bjalo go be go se bonolo. Eupša o re: “Ka ge ke lekile go ekiša Jehofa ka go ba lebalela, ke tshepa gore tate le mosadi wa gagwe ba tla ithuta ka Jehofa.”
12. Ke ka baka la’ng re swanetše go tshepa Jehofa go e na le go itshepa? (Diema 3:5, 6)
12 Tshepa Jehofa go e na le go itshepa. (Bala Diema 3:5, 6.) O tseba seo se re loketšego. (Jes. 55:8, 9) A ka se tsoge a re kgothaleditše go dira selo seo a tsebago gore se tlo re gobatša. Ka gona ge a re kgothaletša gore re lebalele ba bangwe re ka kgodišega gore o a tseba gore seo se tlo re hola. (Ps. 40:4; Jes. 48:17, 18) Ka lehlakoreng le lengwe ge re ka itshepa re ka se kgone go lebalela batho ba bangwe. (Die. 14:12; Jer. 17:9) Naomi yo re boletšego ka yena mathomong o re: “Ke be ke sa bone lebaka la gore ke lebalele monna wa ka. Ke be ke tšhaba gore o tlo nkweša bohloko gape goba a lebala gore o dirile phošo. Le gona ke ile ka ipotša gore Jehofa o kwešiša kamoo ke ikwago ka gona. Eupša ke ile ka lemoga gore taba ya gore Jehofa o kwešiša kamoo ke ikwago ka gona, ga e re gore o dumelelana le seo ke se dirago. O a tseba gore ke ikwa bjang le gore go ka tšea nako gore ke fole, eupša o nyaka gore ke lebalele.”
KE ENG SEO SE KA GO THUŠAGO GO LEBALELA?
13. Go ya ka Baroma 12:18-21, re swanetše go dira’ng?
13 Go lebalela motho yo a tlogago a re kwešitše bohloko, ga go bolele gore re no kgetha go tlogela go bolela ka selo seo se diragetšego. Re nyaka gore go dule go na le khutšo le ge motho yo e le ngwanabo rena goba kgaetšedi. (Mat. 5:23, 24) Re swanetše go kwela batho bohloko go e na le go dula re ba kwatetše ebile re ba lebalele go e na le go dula re ba swaretše sekgopi. (Bala Baroma 12:18-21; 1 Pet. 3:9) Ke eng seo se ka re thušago go dira bjalo?
14. Ke’ng seo re swanetšego go lwela go se dira, gona ka baka la’ng?
14 Re swanetše go lebelela motho yo a re kgopišitšego ka tsela yeo Jehofa a mo lebelelago ka yona. Jehofa o kgetha go lebelela dilo tše dibotse go rena. (2 Dikor. 16:9; Ps. 130:3) Re dula re hwetša selo seo re nyakago go se bona go motho. Ge re ka dula re bona dika tše dibotse go motho yo a itšego go tlo ba bonolo gore re mo lebalele. Ka mohlala, ngwanabo rena Jarrod o re: “Gantšhi ke hwetša go le bonolo gore ke lebalele ngwanešo ge ke bapetša seo a se dirilego le dilo tše dintšhi tše dibotse tšeo a dulago a di dira.”
15. Ke ka baka la’ng go le bohlokwa gore o botše motho yo mongwe gore o mo lebaletše?
15 Selo se sengwe se bohlokwa seo o ka se dirago ke go botša motho yo a go kwešitšego bohloko gore o mo lebaletše. Ka baka la’ng? Naomi yo re boletšego ka yena pejana o re: “Monna wa ka o ile a mpotšiša gore, ‘na o ntebaletše?’ Ke ile ka palelwa ke go mo araba, ke bone gore gabotse ga se ka hlwa ke mo lebalela. Ka morago, ke ile ka kgona go mmotša gore, ‘ke go lebaletše.’ Ke moka ge a ekwa gore ke mo lebaletše, o ile a tlala megokgo ka mahlong. Ke ile ka lemoga gore o imologile gomme le nna ke ile ka ikwa ke na le khutšo. Gona bjale re thabile kudu ebile re bagwera ba go ntšhana sa inong.”
16. O ithutile’ng ka go lebalela?
16 Jehofa o nyaka re lebalela batho ba bangwe. Le ge go ka se be bonolo go dira bjalo. (Bakol. 3:13). Eupša re ka kgona ge re ka dira sohle seo re ka se kgonago gore re se ke ra dula re kwatile. Ke moka re ka kgona go dula re thabile.—Bona lepokisi leo le rego, “ Dilo tše Tharo Tšeo di ka re Thušago go Lebalela ba Bangwe.”
DULA O NAGANA KA MEHOLA YA GO LEBALELA
17. Go lebalela go re hola bjang?
17 Re na le mabaka a mantšhi a go lebalela batho ba bangwe. A re kweng ka a mangwe a ona. Lebaka la pele ke gore re ekiša Tatago rena yo a nago le kwelobohloko e lego Jehofa. (Luka 6:36) Lebaka la bobedi ke gore re leboga Jehofa ka gobane o a re lebalela. (Mat. 6:12) Lebaka la mafelelo ke gore re tlo phela gabotse ebile ra dula re na le bagwera.
18-19. Ke’ng seo se ka diregago ge re lebalela batho ba bangwe?
18 Re diragalelwa ke dilo tše dibotse tšeo re sa di letelago ge re lebalela batho ba bangwe. Ka mohlala, ekwa seo se diragaletšego Denise yo re boletšego ka yena pejana. O be a sa tsebe gore monna yo a bego a ba thutše o be a nyaka go ipolaya ka morago ga tsheko. O ile a leboga gore Denise o mo lebaletše gomme a thoma go ithuta Beibele le Dihlatse tša Jehofa.
19 Re ka nagana gore go lebalela motho ke selo se se thata kudu seo o ka se dirago, eupša e ka ba se sengwe sa dilo tše di ka go holago kudu. (Mat. 5:7) Bjale eka ka moka ga rena re ka šoma ka thata gore re ekiše Jehofa gomme re lebalele batho ba bangwe.
KOPELO 125 “Go Thaba Bagaugedi!”
