Na o kile wa ikwa o gakanegile gomme o sa tsebe gore o ye go mang? Re phela “[dinakong] tše di hlobaetšago tšeo go lego thata go lebeletšana le tšona” gomme seo se ka dira gore re fele matla ebile re ikwe re le noši. (2 Tim. 3:1) Ge e le gabotse go na le batho bao ba ka re thušago ge re na le mathata. Beibele e re botša gore mogwera wa nnete a ka go thuša “mohlang o tlaletšwe.”—Die. 17:17.

Paulo o ile a holwa ke segwera seo a bego a na le sona le batho bao a bego a sepela le bona maetong a gagwe. (Bakol. 4:​7-11). Ge Paulo a be a le kgolegong kua Roma, bagwera ba gagwe ba ile ba mo direla dilo tšeo a bego a ka se kgone go di dira. Ka mohlala, Epaforodito o ile a tlišetša Paulo dilo tšeo bana babo le dikgaetšedi ba kua Filipi ba mo rometšego tšona. (Bafil. 4:18) Tigiko o be a romela diphuthego mangwalo ao Paulo a a ngwadilego. (Bakol. 4:7; bona ntlha ya go ithuta ka Beibeleng ya Seisemane.) Ka ge Paulo a be a na le bagwera bao ba mo thekgago, o ile a kgona go bolela ditaba tše dibotse nakong ya ge a be a golegilwe ka ntlong le nakong ya ge a be a ile kgolegong. Wena o ka dira eng gore o be mogwera wa nnete?

Lehono go na le bana babo rena le dikgaetšedi bao ba kgonago go bontšha gore bagwera ba nnete ba ka dira eng gore ba thušane. Kgaetšedi Elisabet yo e lego mmulamadibogo nageng ya Spain, o hlalosa kamoo kgaetšedi yo mongwe a ilego a mo thuša ge a be a na le mathata. Nakong ya ge mmago kgaetšedi Elisabet a na le bolwetši bja kankere, kgaetšedi yoo o ile a mo romela melaetša yeo e kgothatšago yeo e nago le ditemana tša ka Beibeleng. Elisabet o re: “Ge ke be ke bona melaetša ya gagwe, ke be ke thaba kudu, ka gobane ke a tseba gore go na le motho yo a naganago ka nna gomme ke kgona go kgotlelela le go dira dilo tšeo ke bego ke swanetše go di dira.”—Die. 18:24.

Re ka bontšha bana babo rena le dikgaetšedi gore re bagwera ba nnete ka go ya le bona tšhemong goba dibokeng. Ka mohlala, o ka ithaopela go iša ngwanabo rena goba kgaetšedi yo a godilego dibokeng goba tšhemong. Go dira bjalo go tlo le thuša gore le kgothatšane. (Baroma 1:12) Le ge go le bjalo go na le bana babo rena ba bangwe bao ba sa kgonego go tšwa ka magaeng a bona. Re ka ba thuša bjang?

Bana babo rena le dikgaetšedi ba bangwe ba palelwa ke go ba gona dibokeng Holong ya Mmušo ka gobane ba a babja. Nagana ka ngwanabo rena David yo a bego a na le bolwetši bja kankere. O feditše dikgwedi tše fetago tše tshela a hwetša kalafo ya bolwetši bjoo. Ge a be a hwetša kalafo, yena le mosadi wa gagwe ba be ba tsena diboka ba le ka gae.

 Bana babo bona le dikgaetšedi ka phuthegong ba ba thušitše bjang? Ka morago ga diboka, ba bangwe bao ba lego ka Holong ya Mmušo, ba be ba leka go boledišana le David le Lidia ka bidio. Ka morago ga gore ba arabe dibokeng, bana babo bona le dikgaetšedi ba be ba ba romela melaetša, ba ba botša gore ba leboga dikarabo tša bona. David le Lydia ba ile ba ikwa bjang? Ba ile ba bona gore bana babo bona le dikgaetšedi ba a ba rata.

Re ka kgona go bolela ditaba tše dibotse le bana babo rena bao ba sa kgonego go tšwa ka gae. Ka dinako tše dingwe re ka fetola tsela yeo re tlwaetšego go šoma tšhemo ka yona gore re kgone go šoma le bana babo rena bao ba sa kgonego go tšwa ka gae. (Die. 3:27) O ka rulaganya gore le ngwale mangwalo goba le bolele ditaba tše dibotse ka founo. Bao ba sa kgonego go tšwa ka gae ba ka ba gona sebokeng sa tirelo ya tšhemo ba diriša bidio. Ngwanabo rena David le mosadi wa gagwe ba be ba thabela seo. David o re, “go ba le sehlopha sa rena sa tšhemo le go rapela le bona go re kgothatša kudu.” Ge eba maemo a dumela, o ka ya le motho yo o ithutago Beibele le yena moo ngwanabo rena goba kgaetšedi yo a sa kgonego go tšwa ka gae a dulago gona gomme la swarela thuto ya Beibele moo.

Ge re šoma tšhemo le bana babo rena le dikgaetšedi bao ba palelwago ke go tšwa ka gae, re kgona go bona dika tša bona tše dibotse gomme seo se dira gore re gwerane le bona. Ka mohlala, ge o eya le bana babo rena bao tšhemong gomme o bona ka moo ba kgonago go diriša Lentšu la Modimo ge ba ruta, o ba rata le go feta. Ge o thuša bana babo rena le dikgaetšedi go hlankela Jehofa, o tlo kgona go ba le bagwera ba bantšhi.—2 Bakor. 6:13.

Ge Paulo a be a na le mathata, mogwera wa gagwe Tito o ile a mo etela gomme seo se dirile gore a ikwe a le kaone. (2 Bakor. 7:​5-7) Go bohlokwa gore re kgothatše bana babo rena le dikgaetšedi eupša mohlala wa Tito o re ruta gore go no dira bjalo ga se wa lekana, re swanetše go ba etela le go ba thuša ka dilo tšeo ba di hlokago.—1 Joh. 3:18.

Bana babo rena le dikgaetšedi ba Russia, ba re beetše mohlala o mo botse wa go thekgana ge go na le mathata. Nagana ka mohlala wa ngwanabo rena Sergey le mosadi wa gagwe, Tatyana. Maphodisa a ile a phuruphutša legae la bona gomme ka morago a ba tšea a ya le bona seteišeneng sa maphodisa gore a ba botšiše dipotšišo. Tatyana o ile a lokollwa pele gomme a boela gae. Sergey o re: “Ka morago ga gore Tatyana a fihle gae, kgaetšedi yo mongwe o ile a mo etela. Ka morago bana babo rena le dikgaetšedi ba ile ba tla gomme ba re thuša go lokiša legae la rena.”

Sergey o oketša ka gore: “Ke rata lengwalo la Diema 17:17 leo le rego: ‘Mogwera wa nnete o dula a bontšha lerato ka dinako ka moka, e bile o swana le ngwaneno yo o ka ithekgago ka yena mohlang o tlaletšwe.’ Ke ile ka bona mantšu a a phethagala bophelong bja ka ge re be re na le mathata. Jehofa o re neile bagwera bao ba nago le sebete le go re thekga.” a

Ge re na le mathata, re hloka bagwera ba rena gore ba re thuše. Re tlo ba hloka le go feta nakong ya masetlapelo a magolo. A re direng sohle seo re ka se kgonago gona bjale gore re be bagwera ba nnete.—1 Pet. 4:​7, 8.