SEHLOGO SE ITHUWAGO 7
KOPELO 15 Tumišang Leitšibulo la Jehofa!
Re Holega Bjang ge Jehofa a re Lebalela?
“Ka gobane o tloga o lebalela batho dibe tša bona.”—PS. 130:4.
SEO RE TLAGO GO ITHUTA SONA
Re tlo ithuta ka mehlala yeo e lego ka Beibeleng yeo e bontšhago kamoo Jehofa a re lebalelago ka gona. Sehlogo se se tlo re thuša go leboga mpho e botse yeo Jehofa a re filego yona ya go re lebalela.
1. Ke ka baka la’ng go le thata go kwešiša gore motho o ra gore’ng ge a re o go lebaletše?
KA MORAGO ga gore o kgopiše motho yo mongwe goba o mo kweše bohloko, o a thaba ge o ekwa a re: “Ke go lebaletše.” Gantšhi ge motho a re “ke go lebaletše” o ra gore’ng? Na motho yoo o ra gore le boetše le bagwera gape? Goba o no ra gore ga a sa nyaka go bolela ka seo se diregilego? Batho ga ba lebalele ka tsela ya go swana.
2. Mangwalo a hlalosa bjang tsela yeo Jehofa a re lebalelago ka yona? (Bona le mongwalo wa tlase.)
2 Tsela yeo Jehofa a lebalelago ka yona, ga e swane le yeo rena re lebalelago ka yona. Ga go na motho yo a ka lebalelago go swana le Jehofa. Ge mopsalme a bolela ka Jehofa o itše: “Ka gobane o tloga o lebalela batho dibe tša bona, ke ka baka leo batho ba go hlomphago kudu.” a (Ps. 130:4) Ge Jehofa a re lebalela, o re lebalela ka nnete. Ke yena a re rutago gore re swanetše go lebalelana bjang. Ka mangwalong a mangwe a Seheberu, ge bangwadi ba hlalosa kamoo Jehofa a re lebalelago ka gona, ba dirišitše mantšu ao ba sa kago ba a diriša ge ba hlalosa tsela yeo rena re lebalelanago ka yona.
3. Tsela yeo Jehofa a re lebalelago ka yona e fapana bjang le tsela yeo rena re lebalelanago ka yona? (Jesaya 55:6, 7)
3 Ge Jehofa a go lebalela o phumola sebe sa gago, ebile le kgona go boela le be bagwera gape. Re leboga ge Jehofa a sa re felele pelo ebile a dula a re lebalela ka mo go feletšego.—Bala Jesaya 55:6, 7.
4. Jehofa o re thuša bjang go kwešiša gore go lebalela ka nnete go ra gore’ng?
4 Ka ge re sa lebalele go swana le Jehofa, re ka kwešiša bjang tsela yeo a re lebalelago ka yona? Go na le mehlala yeo Jehofa a e dirišago go re thuša go kwešiša seo. Sehlogong se re tlo boledišana ka e mengwe ya mehlala yeo. E tlo re thuša go bona kamoo Jehofa a re lebalelago ka gona, le go dira gore re boele re be bagwera ba gagwe gape. Ge re dutše re ithuta ka mehlala yeo, re tlo bona kamoo Tatago rena wa go ba le kwelobohloko a re bontšhago gore o a re rata, ka go re lebalela ka ditsela tše di fapafapanego.
JEHOFA O LAHLELA DIBE TŠA RENA KGOLE
5. Go direga’ng ka dibe tša rena ge Jehofa a re o re lebaletše?
5 Gantšhi ka Beibeleng, dibe di swantšhwa le morwalo o boima. Ge Kgoši Dafida a hlalosa ka dibe tšeo a ilego a di dira o re: “Melato ya ka e pakelane godimo ga hlogo ya ka, e nkimela kudu go etša morwalo o boima.” (Ps. 38:4) Jehofa o lebalela batho bao ba itsholago. (Ps. 25:18; 32:5) Lentšu la Seheberu leo le fetoletšwego e le “go lebalela,” le ka bolela “go kuka” goba go “go rwala” selo se itšego. Ge Jehofa a re lebalela go no swana le ge a tloša morwalo o boima woo re o rwelego.
‘Go lebalelwa’ (Ps. 32:5)
6. Jehofa o lahlela dibe tša rena bokgoleng bjo bokaakang?
6 Go na le mohlala o mongwe gape ka mo Beibeleng wo o bontšhago kamoo Jehofa a lahlelago dibe tša rena kgole ka gona. Lengwalo la Psalme 103:12 le re: “Go swana le ge bohlabela bo le kgole le bodikela, le dibe tša rena o di lahletše kgole le rena.” Bohlabela le bodikela di kgole le kgole, ebile di ka se tsoge di kopane. Ka mantšu a mangwe, re ka re Jehofa o tšea dibe tša rena a di lahlela kgole kudu le rena. Go tseba gore Jehofa o re lebalela ka mo go feletšego go a re kgothatša.
“Go swana le ge bohlabela bo le kgole le bodikela” (Ps. 103:12)
7. Beibele e re Jehofa o dira’ng ka dibe tša rena? (Mika 7:18, 19)
7 Ge Jehofa a lahlela dibe tša rena kgole le yena, na se se ra gore o re lebaletše ka mo go feletšego? Ee. Ge Kgoši Hesekia a be a ngwala ka Jehofa, o itše: “O lahletše dibe tša ka ka moka ka morago ga gago.” (Jes. 38:9, 17) Ge re itshola, Jehofa o lahlela dibe tša rena kgole ebile ga a sa nyaka le go di bona le gatee. Mantšu a a ka fetolelwa gape ka gore: “O lahletše dibe tša ka kgole gwa ba bjalo ka ge e ka ga sa nka ka go direla sebe.” Jehofa o sa tšwela pele go gatelela ntlha ye go Mika 7:18, 19. (Bala.) Ditemana tše di re botša gore Jehofa o lahlela dibe tša rena ka garegare ga lewatle. Mehleng ya Beibele go be go sa kgonege gore batho ba hwetše selo seo se wetšego goba seo se lahletšwego ka lewatleng.
“O lahletše dibe tša ka ka moka ka morago ga gago” (Jes. 38:17)
“Dibe tša rena o tla di lahlela garegare ga lewatle” (Mika 7:19)
8. Re šetše re ithutile’ng?
8 Mehlala yeo re šetšego re ithutile ka yona e re bontšha gore ge Jehofa a re lebalela o a re imolla. Dafida o be a bolela nnete ge a be a re, “go thaba bao ditiro tša bona tša go hloka molao di swaretšwego le bao dibe tša bona di khupeditšwego; go thaba motho yo sebe sa gagwe le gatee Jehofa a ka se se balego.” (Baroma 4:7, 8) Re tloga re bona gore Jehofa o re lebalela ka nnete.
JEHOFA O PHUMOLA DIBE TŠA RENA
9. Beibele e re thuša bjang go tseba gore Jehofa o re lebalela ka mo go feletšego?
9 Jehofa o diriša mehlala e mengwe go re thuša go leboga mpho ya topollo yeo a e dirišago go phumola dibe tša batho bao ba itsholago. Ka Beibeleng re bala gore Jehofa o hlatswa dibe tša rena. Seo se dira gore motho yo a dirilego sebe a hlweke. (Ps. 51:7; Jes. 4:4; Jer. 33:8) Jehofa le yena o ile a bolela gore: “Le ge dibe tša lena di ka hwibila go etša madi, di tla šweufala go etša kapoko; le ge di ka hwibila wa letsoku, di tlo etša boya bja dinku.” (Jes. 1:18) Go boima go tloša madi goba letsoku godimo ga lešela. Jehofa o diriša mohlala wo go re kgodiša gore o tloga a re lebalela, go no swana le ge lešela leo le bego le na le letsoku le hlatswa ke moka letsoku leo la se sa bonala.
“Le ge dibe tša lena di ka hwibila go etša madi, di tla šweufala go etša kapoko” (Jes. 1:18)
10. Ke mohlala ofe o mongwe wo o re bontšhago gore Jehofa o re lebalela bjang?
10 Sehlogong se se fetilego, re kwele gore dibe di swantšhwa le dikoloto. (Mat. 6:12; Luka 11:4) Ge re direla Jehofa diphošo, go swana le ge re oketša sekoloto sa rena. Re mo kolota kudu, eupša ge a re lebalela go swana le ge a phumola sekoloto seo. Ga go hlokagale gore re patele dibe tšeo a šetšego a re lebaletše tšona. Go no swana le ge motho yo mongwe le yo mongwe a thaba ge sekoloto sa gagwe se phumotšwe, le rena re a thaba ge Jehofa a re lebalela.
“O re lebalele melato ya rena” (Mat. 6:12)
11. Beibele e ra go re’ng ge e re dibe tša rena di phumotšwe? (Ditiro 3:19)
11 Ge Jehofa a re lebalela o tloša sekoloto sa rena ka go se phumola. (Bala Ditiro 3:19.) Ge motho a tloša sekoloto se itšego, re tlo bona a thadile mothalo godimo ga tšhelete yeo re e kolotago. Eupša re sa tlo kgona go bona gore tšhelete yeo e be e le bokae ka gobane ga se a e phumola, o no thala mothalo godimo ga yona. E le gore re kwešiše mohlala wo gabotse, re swanetše go gopola gore mehleng ya kgale ba be ba šomiša enke yeo e bego e kgona go phumolega gabonolo. O be o ka kgona go e phumola ka sepontšhe seo se thapilego. Ka gona, ge sekoloto se phumotšwe, ga se sa bonagala. Motho a ka se sa kgona go bona tšhelete yeo motho yo mongwe a bego a e kolota. Go swana le ge re ka re motho yoo ga se a ka a ba le sekoloto. Go a thabiša go tseba gore ge Jehofa a re lebalela, go swana le ge eka ga se ra ka ra mo direla sebe.—Ps. 51:9.
“Itsholeng le sokologe e le gore dibe tša lena di phumolwe” (Dit. 3:19)
12. Re ithuta eng mohlaleng wo o bolelago ka maru?
12 Go na le mohlala o mongwe gape wo Jehofa a o dirišago go re bontšha ka mo a re lebalelago ka gona. O itše: “Ke tla phumola dikarogo tša gago bjalo ka ge eka di khupeditšwe ke leru, dibe tša gago ka di phumola bjalo ka ge eka di khupeditšwe ke maru.” (Jes. 44:22) Ge Jehofa a re lebalela, go no swana le ge eka o diriša maru go khupetša dibe tšeo re mo direlago tšona gore di se ke tša bonagala.
“Ke tla phumola dikarogo tša gago bjalo ka ge eka di khupeditšwe ke leru” (Jes. 44:22)
13. Re ikwa bjang ge Jehofa a re lebalela?
13 Mohlala wo o re ruta’ng? Ge Jehofa a re lebalela ga se ra swanela go ikwa re le molato bophelong bja rena ka moka. Sehlabelo sa Jesu Kriste se phumola melato ya rena ka moka. Ge e ba re itshola, Jehofa o phumola dibe tša rena ka moka gwa ba bjalo ka ge eka ga se tša ka tša ba gona.
JEHOFA O DIRA GORE RE BE BAGWERA BA GAGWE GAPE
Ge Jehofa a re lebalela, re kgona go ba le segwera se sebotse le yena (Bona serapa 14)
14. Ke ka baka la’ng re ka tshepa gore Jehofa o re lebalela ka mo go feletšego? (Bona le seswantšho.)
14 Ge Jehofa a re lebalela re ka kgodišega gore re sa le bagwera ba gagwe. Ka ge Jehofa a phumotše dibe tša rena, ga se ra swanela go ikwa re le molato. Ga se ra swanela go nagana gore o re swaretše sekgopi ebile o nyaka go re otla. Jehofa a ka se tsoge a dirile seo. Ke ka baka la’ng re swanetše go tshepa Jehofa ge a re botša gore o re lebaletše? Jehofa o boditše moporofeta Jeremia gore: “Ke tla ba lebalela molato wa bona gomme nka se sa gopola sebe sa bona.” (Jer. 31:34) Moapostola Paulo o ile a tsopola mantšu ao ge a be a re: “Nka se sa hlwa ke gopola dibe tša bona le ka mohla.” (Baheb. 8:12) Mantšu ao a ra go re’ng?
“Nka se sa gopola sebe sa bona” (Jer. 31:34)
15. Jehofa o ra gore’ng ge a re ga a sa gopola dibe tša rena?
15 Ka Beibeleng, lentšu “gopola” ga se ka mehla le bolelago go dula o gopola dilo tšeo di ilego tša direga nakong e fetilego goba go nagana ka tšona. Go ena le moo, le ka bolela gore motho a ka dira selo se itšego. Modiradibe yo a bego a fegilwe kgauswi le Jesu o ile a re: “Jesu, o nkgopole ge o tsena Mmušong wa gago.” (Luka 23:42, 43) Monna yoo, o be a kgopela gore Jesu a mo direle selo se itšego. Tsela yeo Jesu a arabile a ka yona e bontšhitše gore o tla tla tsoša monna yoo. Ge Jehofa a re botša gore a ka se sa gopola dibe tša rena, o ra gore a ka se tle a re patediša ka baka la tšona. A ka se tle a re otlela dibe tšeo re ilego ra di dira ka gobane o tloga a phumotše melato ya rena.
16. Ke ka baka la’ng Beibele e re swantšha le makgoba?
16 Beibele e diriša mohlala o mongwe go re thuša go kwešiša gore ge Jehofa a re lebalela re a imologa. Ka ge re le batho ba go dira diphošo, re “makgoba a sebe.” Re leboga Jehofa ka ge a ile a kgona go re “lokolla sebeng” ka go re lebalela. (Baroma 6:17, 18; Kut. 1:5) Go tseba gore Jehofa o re lebaletše go dira gore re thabe go swana le lekgoba leo le lokolotšwego.
“Le lokolotšwe sebeng” (Baroma 6:18)
17. Ke ka baka la’ng Beibele e re swantšha le motho yo a babjago? (Jesaya 53:5)
17 Bala Jesaya 53:5. Ka ge re le batho ba go dira dibe, Beibele e re swantšha le batho bao ba babjago kudu. Jehofa o re fodišitše a diriša sehlabelo sa Jesu Kriste. (1 Pet. 2:24) Ge re dira sebe re senya segwera sa rena le Jehofa, eupša ka baka la topollo o kgona go re lebalela gomme ra boela ra ba bagwera ba gagwe. Ge motho a fodišitšwe o a thaba, le rena re a thaba ge Jehofa a re lebalela.
“Ka baka la dintho tša gagwe re fodišitšwe” (Jes. 53:5)
RE HOLEGA BJANG GE JEHOFA A RE LEBALELA?
18. Mehlala yeo e lego ka Beibeleng e re rutile’ng ka tsela yeo Jehofa a re lebalelago ka yona? (Bona le lepokisi leo le rego “Kamoo Jehofa a re Lebalelago ka Gona.”)
18 Mehlala yeo re ithutilego ka yona ya ka Beibeleng, e re rutile eng ka tsela yeo Jehofa a re lebalelago ka yona? E re rutile gore ge Jehofa a re lebalela, o phumola melato ya rena sa ruri. Se se dira gore re kgone go ba bagwera ba babotse le yena. Jehofa o re lebalela ka gobane a re rata e sego ka gobane a gapeletšega.—Baroma 3:24.
19. (a) Re swanetše go leboga eng? (Baroma 4:8) (b) Re tlo ithuta ka’ng sehlogong seo se latelago?
19 Bala Baroma 4:8. Re a thaba ka gobane Jehofa o lebalela ‘dibe tša rena.’ (Ps. 130:4) Eupša e le gore Jehofa a re lebalele, re swanetše go dira selo se sengwe se bohlokwa. Jesu o boletše gore: “Ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.” (Mat. 6:14, 15) Se se ra gore go bohlokwa gore re ekiše tsela yeo Jehofa a lebalelago ka yona. Re ka dira bjang seo? Re tlo araba potšišo ye sehlogong se se latelago.
KOPELO 46 Re a go Leboga Jehofa
a Le ge go na le ditsela tše dintšhi tša go lebalela, ge polelwana ya Seheberu e diriša mantšu “go lebalela,” e bolela ka go lebalela ka nnete. Bafetoledi ba bantšhi ba Beibele, ntlha ye e ba tshetše ka godimo, eupša Beibele ya Phetolelo ya Lefase le Lefsa ya Mangwalo a Makgethwa e e hlalositše gabotse, ke ka baka leo lengwalo la Psalme 130:4, le kwagalago.
