SEHLOGO SE ITHUTWAGO 6
KOPELO 18 Go Leboga Topollo
Re Leboga Gore Jehofa o a re Lebalela
“Modimo o ratile lefase kudu mo a ilego a gafa Morwa wa gagwe yo a tswetšwego a nnoši.”—JOH. 3:16.
SEO RE TLAGO GO ITHUTA SONA
Re nyaka go leboga tsela yeo Jehofa a re lebalelago ka yona. E le gore re dire seo, re tlo ithuta ka dilo tšeo Jehofa a di dirilego gore a kgone go re lebalela.
1-2. Re ka re boemo bja batho ba mo lefaseng bo swana bjang le bja lesogana leo go bolelwago ka lona go serapa 1?
NAGANA ka lesogana leo le goletšego ka lapeng leo le humilego le dinala. Ka letšatši le lengwe batswadi ba gagwe ba ile ba hlokofala. O ile a kwa bohloko kudu. Eupša go na le ditaba tše dingwe gape tšeo di kwešago bohloko. O lemoga gore batswadi ba gagwe ba ile ba senya tšhelete gomme ba tsena dikolotong. Go ena le gore a hwetše mahumo ao ba bego ba na le ona, o ile a swanelwa ke go patela dikoloto tšeo ba di dirilego. Dikoloto tšeo ke tše dintšhi kudu ebile di tlo mo kgama.
2 Le rena re swana le lesogana leo ka tsela e itšego. Batswadi ba rena ba mathomo e lego Adama le Efa ba be ba phethagetše ebile ba dula paradeiseng e botse. (Gen. 1:27; 2:7-9) Ba be ba na le tebelelo ya go ba le bophelo bjo bo kgahlišago ka mo go sa felego. Eupša dilo di ile tša senyega, ba ile ba dira sebe. Ka baka leo, ba ile ba lahlegelwa ke legae la bona le lebotse le tebelelo ya go phela ka mo go sa felego. Ke’ng seo ba ilego ba se tlogelela bana ba bona? Beibele e re: “Ka baka leo go etša ge ka motho o tee [e lego Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Selo feela seo Adama a re tlogeletšego sona ke sebe seo se dirago gore re hwe. Sebe seo se swana le sekoloto seo go se nago yo a ka kgonago go se patela.—Ps. 49:8.
3. Ke ka baka la’ng dibe tša rena di ka swantšhwa le dikoloto?
3 Jesu o ile a swantšha dibe le dikoloto. (Mat. 18:32-35) Ge re dira sebe go ba bjalo ka ge e ka re kolota Jehofa. Ebile re swanetše go patela sekoloto seo. Ge sekoloto seo se ka se patelwe, se tlo phumolwa feela ge re hlokofala.—Baroma 6:7, 23.
4. (a) Go ka direga’ng go badiradibe ge ba ka se hwetše thušo? (Psalme 49:7-9) (b) Lentšu “sebe” le šupa eng ka Beibeleng? (Bona lepokisi leo le rego “ Sebe.”)
4 Rena ka noši re ka se kgone go dira gore re phethagale go swana le ge Adama le Efa ba be ba phethagetše mathomong. (Bala Psalme 49:7-9.) Re ka se be le kholofelo ya go phela ka mo go sa felego goba go tsošwa ge e ba go se na yo a ka re thušago. Ge e le gabotse re tla be re swana le diphoofolo re se na kholofelo ya go tsoga gape.—Mmo. 3:19; 2 Pet. 2:12.
5. Tatago rena yo lerato o re thušitše bjang ka ge re na le sebe seo re se hweditšego go Adama? (Bona seswantšho sa letlakala la ka ntle)
5 Lesogana leo re boletšego ka lona mathomong, le ka ikwa bjang ge go ka tšwelela monna wa mohumi gomme a tshepiša go patela dikoloto tša lona ka moka? Ga go pelaelo gore lesogana leo le tlo amogela mpho yeo gomme la thaba kudu. Ka mo go swanago, Tatago rena yo lerato e lego Jehofa o re neile mpho yeo e patelago sekoloto sa sebe seo re se hweditšego go Adama. Jesu o boletše gore: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Go oketša moo, mpho yeo Jehofa a re filego yona, e dira gore re kgone go ba le segwera sa kgauswi le yena.
Jesu o ile a bolela ditaba tše dibotse ka tebalelo ya Jehofa yeo e theilwego sehlabelong sa topollo. (Joh. 3:16) Ke moka o ile a neela bophelo bja gagwe gore e be topollo (Bona serapa 5)
6. Ke dipolelwana dife tša ka Beibeleng tšeo re tlo boledišanago ka tšona, gona ka baka la’ng?
6 Re holwa bjang ke mpho yeo Jehofa a re neilego yona ya go dira gore dibe tša rena di lebalelwe? E le gore re kgone go araba potšišo yeo, re tlo boledišana ka dipolelwana tše dingwe tša ka Beibeleng le go bona gore di ra gore’ng. Ge re dutše re boledišana ka tšona, re tlo kgona go leboga gore Jehofa o a re lebalela.
JEHOFA O NYAKA GORE RE BE BAGWERA BA GAGWE
7. (a) Ke’ng se sengwe seo Adama le Efa ba se lahlilego? (b) Ka ge re le ditlogolo tša Adama le Efa, re hloka eng? (Baroma 5:10, 11)
7 Adama le Efa ga se ba no lahlegelwa ke tebelelo ya go phela ka mo go sa felego, eupša ba ile ba senya le segwera sa bona le Jehofa. Mathomong Adama le Efa e be e le karolo ya lapa la Modimo. (Luka 3:38) Eupša ka baka la go se kwe Jehofa, ba ile ba rakwa ka lapeng leo la gagwe pele ba ka ba le bana. (Gen. 3:23, 24; 4:1) Ka ge re le ditlogolo tša bona, re swanetše gore re boelanywe le Jehofa. (Bala Baroma 5:10, 11.) Ka mantšu a mangwe, re swanetše go ba le segwera seo se kgahlišago le yena. Go ya ka puku e nngwe ya ditšhupetšo, lentšu la Segerika leo le dirišitšwego e le “poelanyo” le ka bolela “go dira gore lenaba la gago e be mogwera wa gago.” Go a kgahliša go tseba gore Jehofa ke yena a tšerego mogato wa pele wa go dira gore se se kgonege. O dirile seo bjang?
MODIMO O DIRILE GORE RE KGONE GO BA BAGWERA BA GAGWE
8. Poelano e re hola bjang?
8 Jehofa o ile a dira gore go kgonege gore batho bao ba nago le dibe ba kgone go ba le segwera se sebotse le yena. O ile a rulaganya gore re kgone go hwetša seo Adama a se lahlilego ka go neelana ka motho yo a phethagetšego. Mangwalo a Bakriste a Segerika a diriša polelwana e swanago yeo e hlaloswago e le poelano. (Baroma 3:25) Poelano e re thuša gore re kgone go ba le khutšo le Modimo le go gwerana le yena.
9. Jehofa o ile a dira thulaganyo efe ya nakwana go thuša Baisiraele gore ba lebalelwe dibe?
9 Jehofa o ile a dira thulaganyo ya nakwana ya go lebalelwa ga dibe gore Baisiraele ba kgone go ba le segwera sa kgauswi le yena. Kua Isiraele go be go na le letšatši letee mo ngwageng la go lebalelwa ga dibe. Letšatšing leo, moperisita yo a phagamego o be a neela dihlabelo tša diphoofolo bakeng sa batho. Go molaleng gore dihlabelo tša diphoofolo di be di ka se kgone go phumola dibe tša Baisiraele ka mo go feletšego ka gobane diphoofolo ga di swane le batho. Eupša Jehofa o be a ikemišeditše go lebalela Moisiraele yo mongwe le yo mongwe yo a bego a dira dihlabelo ka tsela yeo Jehofa a bego a nyaka ka yona. (Baheb. 10:1-4) Dihlabelo tšeo Baisiraele ba bego ba di neela ka letšatši la poelano, ka dinako tše dingwe di be di ba thuša go lemoga gore ke badiradibe bao ba swanetšego gore ka letšatši le lengwe, ba tle ba hwetše selo seo se ka ba thušago gore dibe tša bona di tle di lebalelwe ka mo go feletšego.
10. Ke thulaganyo efe ya sa ruri yeo Jehofa a e dirilego gore dibe tša rena di lebalelwe?
10 Jehofa o ile a dira eng gore batho ba tle ba kgone go lebalelwa dibe tša bona ka mo go feletšego? O ile a dira gore Morwa wa gagwe yo a rategago e be “sebego gatee ya ba moka gore a rwale dibe tša ba bantši.” (Baheb. 9:28) Jesu o ile a “nea moya wa gagwe gore e be topollo bakeng sa ba bantši.” (Mat. 20:28) Topollo ke’ng?
SEHLABELO SA JESU SE RE PATELETŠE SEKOLOTO
11. (a) Go ya ka Beibele, ke ka baka la’ng go be go swanetše gore go be le topollo? (b) Go be go nyakega’ng gore topollo e patelwe?
11 Ka Beibeleng go bolelwa gore Jehofa o ile a bona go nyakega topollo gore re kgone go lebalelwa dibe le gore re kgone go ba bagwera ba gagwe. Go be go nyakega topollo ya mohuta mang gore batho ba kgone go hwetša seo Adama a se lahlilego? Gopola gore Adama le Efa ba ile ba fetoga batho bao ba sa phethagalago, ba se sa ba le tebelelo ya go phela ka mo go sa felego. Ka gona, topollo e swanetše go lekana le selo seo se lahlegilego. (1 Tim. 2:6) Topollo yeo e ka ba ka monna yo a godilego yoo a phethagetšego, yo a ka kgonago go phela ka mo go sa felego mo lefaseng, le yo a ka ikemišetšago go neela bophelo bja gagwe bakeng sa rena. Bophelo bja motho yoo bo ka patela bjo bo lahlegilego.
12. Ke baka la’ng Jesu a be a swanelega go patela topollo?
12 A re kweng mabaka a mararo ao a dirilego gore Jesu a kgone go ba topollo. (1) O be a phethagetše, “ga se a ka a dira sebe.” (1 Pet. 2:22) (2) O be a ka kgona go phela ka mo go sa felego mo lefaseng. (3) O be a ikemišeditše go hwa le go neela bophelo bja gagwe bakeng sa rena. (Baheb. 10:9, 10) Ka ge Jesu a be a phethagetše, o be a swana le Adama pele a dira sebe. (1 Bakor. 15:45) Ka ge Jesu a ile a re hwela, o ile a kgona go patela sekoloto seo re nago le sona. (Baroma 5:19) Jesu o ile a ba “Adama wa mafelelo.” Ga go sa hlokega gore go tle motho yo mongwe yo a phethagetšego gore a tle a patele sekoloto sa Adama. Jesu o hwile “gatee ya ba moka.”—Baheb. 7:27; 10:12.
13. Poelano le topollo di fapana bjang?
13 Poelano le topollo di fapana bjang? Poelano ke kgato yeo Jehofa a e tšeago gore a lokiše segwera sa gagwe le batho. Topollo ke tefo yeo e dirwago gore poelano e kgonege bakeng sa Modimo le batho bao ba nago le sebe. Jesu o ile a neelana ka bophelo bja gagwe e le sehlabelo gore a patele dikoloto tša rena.—Baef. 1:7; Baheb. 9:14.
JEHOFA O RE LOKOLLA SEBENG LE LEHUNG LE GO BOLELA GORE RE LOKILE
14. Re tlo boledišana ka’ng, gona ka baka la’ng?
14 Poelano e re hola bjang? Beibele e diriša dipolelwana tše mmalwa go hlalosa kamoo e re holago ka gona. Le ge dipolelwana tšeo di ka ba di swana, di gatelela bohlokwa bja poelano yeo e dirago gore Jehofa a re lebalele. Ge re dutše re hlahloba mantšu ao re tlo bona kamoo a re kgomago ka gona.
15-16. (a) Lentšu “poelano” leo le dirišitšwego ka Beibeleng le bolela’ng? (b) Se se re kgoma bjang?
15 Beibele e re botša gore ka ge topollo e patetšwe, re lokolotšwe sebeng gomme ga re sa na sekoloto. Moapostola Petro o boletše gore: “Le tseba gore e be e se ka dilo tše di senyegago, e lego silifera goba gauta, ge le hlakodišitšwe tseleng ya lena ya lefeela ya bophelo yeo le e gafetšwego ke borakgolokhukhu ba lena. Eupša e bile ka madi a bohlokwa, a swanago le a kwana e hlokago sekodi le sepatso, ona a Kriste.”—1 Pet. 1:18, 19.
16 Sebe le lehu ga di sa re buša ka ge go bile le tefelo ya topollo. (Baroma 5:21) Re tloga re leboga Jehofa le Jesu gore ba patetše dikoloto tša rena ka madi goba bophelo bja Jesu Kriste.—1 Bakor. 15:22.
17-18. (a) Jehofa o ra gore’ng ge a re re lokile? (b) Se se re kgoma bjang?
17 Go bolelwa gore re lokile go ra gore melato yeo re nago le yona e phumotšwe gomme ga go sa hlokega gore re patelele dibe tšeo re di dirago. Jehofa o sa dutše a nyaka gore re phele ka melao ya gagwe ya motheo le ge go sa nyakege gore re patelele dibe tša rena. Ga a bolele gore re lokile ka gobane go na le selo se itšego seo re se dirilego, ebile ga se gore o dumelelana le dibe tšeo re di dirago. Eupša Jehofa o pateletše dibe tša rena ka baka la tumelo yeo re nago le yona thulaganyong ya gagwe ya poelano le topollong yeo a e lefilego.—Baroma 3:24; Bagal. 2:16.
18 Re holega bjang ge Jehofa a bolela gore re lokile? Bao ba kgethilwego go yo buša le Jesu legodimong go šetše go boletšwe gore ba lokile ebile ke bana ba Modimo. (Tito 3:7; 1 Joh. 3:1) Dibe tša bona di lebaletšwe. Ga ba sa na molato gomme ba swanelega go ba Mmušong. (Baroma 8:1, 2, 30) Bao ba nago le kholofelo ya go phela lefaseng ba bolelwa gore ke bagwera ba Modimo gomme dibe tša bona di lebaletšwe. (Jak. 2:21-23) Lešaba le legolo leo le tlago go phologa Haramagedone, le tlo ba le kholofelo ya go phela ka mo go sa felego. (Joh. 11:26) “Baloki” gotee le “ba sa lokago” bao ba hlokofetšego ba tlo tsošwa. (Dit. 24:15; Joh. 5:28, 29) Mafelelong bahlanka ba Jehofa ka moka bao ba mo kwago ba tlo ba le “tokologo ya letago ya bana ba Modimo.” (Baroma 8:21) A ditšhegofatšo tše di kgahlišago tšeo re di hwetšago ka baka la thulaganyo ya poelano yeo e dirago gore re gwerane le Tatago rena Jehofa!
19. Boemo bja rena bo kaonafetše bjang ka baka la seo Jehofa le Jesu ba re diretšego sona? (Bona le lepokisi leo le rego “Kamoo re Holegago ka Gona.”)
19 Ruri re be re swana le lesogana le la re boletšego ka lona mathomong leo le lahlegetšwego ke dilo ka moka gomme le hweditše dikoloto tša batswadi ba lona tše le bego le ka se kgone go di patela. Eupša re leboga gore Jehofa o re thušitše. Boemo bja rena bo ile bja fetoga ka baka la thulaganyo ya poelano le ya topollo. Go ba le tumelo go Jesu Kriste go re thuša gore re lokollwe sebeng le lehung. Ge Jehofa a lebalela dibe tša rena, go ba bjalo ka ge e ka ga se tša ka tša direga. Sa bohlokwa kudu ke gore gona bjale re ka kgona go gwerana le Jehofa e lego Tatago rena yo lerato wa legodimong.
20. Re tlo boledišana ka’ng sehlogong seo se latelago?
20 Re tloga re leboga Jehofa le Jesu ge re naganišiša ka seo ba re diretšego sona. (2 Bakor. 5:15) Ruri nkabe re le mathateng ge nkabe ba se ba re thuša. Eupša motho yo mongwe le yo mongwe o holega bjang ge Jehofa a mo lebalela? Re tlo araba potšišo yeo sehlogong seo se latelago.
KOPELO 10 Tumišang Jehofa Modimo wa Rena!
