1, 2. Jehofa o diriša bjang dilo tša gagwe go hlokomela batho?

JEHOFA ke Modimo yo a neago. Selo se sengwe le se sengwe seo re nago le sona se tšwa go yena. Gauta le silifera ke tša gagwe gotee le dilo ka moka tše di lego mo lefaseng, le gona o di diriša gore a re nee dilo tše di nyakegago e le gore re dule re phela. (Ps. 104:13-15; Hag. 2:8) Beibele e na le dipego tše mmalwa tša ka moo Jehofa a ilego a diriša dilo tšeo di tšweletšwago ke lefase gore a hlokomele bahlanka ba gagwe ka mohlolo.

² Jehofa o ile a nea setšhaba sa Isiraele manna le meetse ge se be se le lešokeng ka mengwaga e 40. (Ek. 16:35) Ka baka leo, se ile sa “se hloke selo.” (Neh. 9:20, 21) Jehofa o ile a nea moporofeta Elisha matla a go dira mohlolo. Elisha, o ile a dira gore oli e nyenyane ya mohlologadi yo a bego a botega e se fele. Seo Jehofa a ilego a se direla mosadi yo se ile sa dira gore a kgone go patela dikoloto tša gagwe ka moka, le gore ka morago a be le tšhelete e lekanego bakeng sa go itlhokomela le go hlokomela barwa ba gagwe. (2 Dikg. 4:1-7) Jehofa o ile a thuša Jesu gore a dire dijo ka mohlolo. O ile a ba mo thuša gore a dire tšhelete ka mohlolo ge e be e nyakega.​—Mat. 15:35-38; 17:27.

3. Re tlo hwetša dikarabo tša dipotšišo dife sehlogong se?

 ³ Jehofa o na le matla a sa lekanywego a go kgona go diriša dilo tšeo di tšweletšwago ke lefase go fepa dibopiwa tša gagwe tša mo lefaseng. Lega go le bjalo, o sa dutše a kgopela bahlanka ba gagwe gore ba diriše dilo tšeo ba nago le tšona go thekga modiro wa mokgatlo wa gagwe. (Ek. 36:3-7; bala Diema 3:9.) Ke ka baka la’ng Jehofa a ka letela gore re mmušetše dilo tšeo a re filego tšona? Bahlanka ba Jehofa botegago ba mehleng ya kgale ba ile ba thekga bjang baemedi ba gagwe ka tša ditšhelete? Lehono, mokgatlo o diriša bjang tšhelete yeo re e neelago? Sehlogo se, se tlo araba dipotšišo tšeo.

4. Re bontšha Jehofa eng ge re thekga modiro wa gagwe?

⁴ Re nea Jehofa dimpho ka baka la gore re mo rata e bile re mo leboga. Ge re nagana ka dilo ka moka tšeo Jehofa a re diretšego tšona, re ikwa re felelwa ke mantšu a go mo leboga. Ge Kgoši Dafida a be a hlalosa ka dilo tšeo di bego di nyakega modirong wa go aga tempele, o ile a lemoga gore dilo ka moka tšeo re nago le tšona di tšwa go Jehofa, le gore selo le ge e le sefe seo re se neago Jehofa, se tšwa go dilo tšeo Yena a šetšego a re neile tšona.​—Bala 1 Dikoronika 29:11-14.

5. Mangwalo a bontšha bjang gore go nea ka pelo ka moka ke karolo e bohlokwa ya borapedi bja therešo?

⁵ Go nea ke karolo e nngwe ya go hlankela Jehofa. Ponong e nngwe, moapostola Johane o ile a kwa morongwa wa Jehofa a re: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.” (Kut. 4:11) Na o ka ganetša taba ya gore Jehofa o swanelwa ke go amogela letago le kgodišo tšeo re ka mo neago tšona ka go neela ka dilo tše bohlokwa tšeo re nago le tšona? Jehofa o ile a diriša Moshe go laela setšhaba sa Isiraele gore se eme pele ga Gagwe menyanyeng e meraro ya ngwaga le ngwaga. Ka ge menyanya yeo e be e le karolo ya borapedi bja bona, Baisiraele ba be ba se ba swanela “[go tla] pele ga Jehofa [ba] lekeleditše diatla.” (Doit. 16:16) Le lehono, karolo e bohlokwa ya borapedi bja rena ke go neela ka pelo ka moka bakeng sa go leboga le go thekga mokgatlo wa Jehofa.

6. Ke ka baka la’ng go nea go re hola? (Bona seswantšho seo se lego mathomong a sehlogo.)

⁶ Ge re nea re tlo holega. Re swanetše go nea ka pelo ka moka, re se ke ra no rata go amogela. (Bala Diema 29:21.) Re ka nagana ka ngwana yo a neago batswadi ba gagwe mpho yeo a e rekilego ka tšhelete e nyenyane yeo batswadi ba gagwe ba bego ba dutše ba mo fa yona. Ruri batswadi bao ba tla leboga mpho yeo! A re re morwa goba morwedi o bula madibogo a dula ka gae. A ka fela a nea batswadi ba gagwe tšhelete go ba thuša ka ditshenyagalelo tša ka gae. Le ge batswadi ba ka ba ba sa letela seo, ba ka amogela dimpho tša ngwana yoo ka gobane ge a dira bjalo o bontšha gore o leboga dilo ka moka tšeo batswadi ba gagwe ba mo diretšego tšona. Ka mo go swanago, Jehofa o a tseba gore ge re neela ka dilo tša rena tše bohlokwa re tlo holega.

7, 8. Bahlanka ba Jehofa ba mehleng ya kgale, ba ile ba re beela mohlala bjang tabeng ya go neela (a) medirong e itšego ya Modimo? (b) bakeng sa go thekga modiro wa Modimo ka kakaretšo?

⁷ Beibele e re botša ka batho bao ba ilego ba neela ka dilo tša bona mehleng ya kgale. Ka dinako tše dingwe, Bahlanka ba Jehofa ba ile ba neela bakeng sa mediro e itšego. Ka mohlala, Moshe o ile a laela setšhaba sa Isiraele gore se ntšhetše Jehofa meneelo gore go agiwe taberenakele, go no swana le ge Kgoši Dafida a ile a dira bjalo ge go be go agwa tempele. (Ek. 35:5; 1 Dikor. 29:5-9) Mehleng ya Kgoši Jehoashe, baperisita ba ile ba diriša tšhelete yeo e bego e kgobokeditšwe gore ba lokiše ntlo ya Jehofa. (2 Dikg.  12:4, 5) Ge Bakriste ba lekgolong la pele la mengwaga ba be ba lemošwa gore bana babo bona ba kua Judea ba be ba wetšwe ke tlala e kgolo, ba ile ba “ikemišetša go romela tirelo ya thušo go bana babo bona bao ba dulago Judea, yo mongwe le yo mongwe wa bona go ya kamoo a bego a ka kgona ka gona.”​—Dit. 11:27-30.

⁸ Ka dinako tše dingwe, bahlanka ba Jehofa ba ile ba thuša ka ditšhelete batho bao ba eteletšego pele modiro wa Jehofa. Molaong wa Moshe, Balefi ba be ba sa hwetše bohwa go swana le meloko e mengwe. Ka gona, Baisiraele ba be ba ba nea karolo ya lesome, yeo e bego e ba thuša gore ba dule ba dira mošomo wa bona wa taberenakeleng. (Num. 18:21) Ka mo go swanago, basadi ba bangwe ba ile ba thekga Jesu le baapostola ka dilo tša bona.​—Luka 8:1-3.

9. Mehleng ya kgale batho ba be ba tšea kae meneelo ya bona?

⁹ Ke therešo gore meneelo yeo e be e fapana. Go bonagala meneelo yeo Baisiraele ba e ntšhitšego bakeng sa gore go agiwe taberenakele kua lešokeng, e be e le e mengwe ya dilo tšeo ba tlogilego le tšona Egipita. (Ek. 3:21, 22; 35:22-24) Lekgolong la pele la mengwaga, Bakriste ba bangwe ba ile ba rekiša dilo tša bona, go swana le mašemo goba dintlo, e le gore ba nee baapostola tšhelete yeo. Ka gona baapostola ba be ba abela batho bao ba bego ba diila tšhelete yeo. (Dit. 4:34, 35) Bakriste ba bangwe ba be ba beela tšhelete e itšego ka thoko gomme ba neela ka yona bakeng sa go thekga modiro wa Jehofa. (1 Bakor. 16:2) Ka baka leo, batho bao ba tšwago ditlogong tše di fapafapanego—bao ba humilego le dinala le bao ba diilago—ba ile ba tšea karolo.​—Luka 21:1-4.

10, 11. (a) Re ka ekiša bjang mohlala wa bahlanka ba Modimo ba mehleng ya kgale bao ba ilego ba neela ka pelo ka moka? (b) Wena o ikwa bjang ka tokelo yeo o nago le yona bakeng sa go thekga Modiro wa Mmušo?

¹⁰ Lehono le rena re ka kgopelwa gore re ntšhe meneelo bakeng sa mediro e itšego. Ka mohlala, na phuthego ya lena e nyaka go aga Holo e mpsha ya Mmušo? Goba na Holo ya lena ya Mmušo e nyaka go mpshafatšwa? Mohlomongwe re ka tsebišwa gore go nyakega tšhelete e itšego gore go mpshafatšwe ofisi ya rena ya lekala, go lefelelwe ditshenyagalelo tša kopano yeo re tla bego re le go yona, goba re thuše bana babo rena bao ba wetšwego ke dikotsi tša tlhago. Le gona, re ntšha meneelo e le gore re thekge bao ba lego ntlong-kgolo le bao ba lego diofising tša makala lefaseng ka moka e le gore ba tšwetše pele modiro wa Modimo. Meneelo ya rena e thekga baromiwa, babulamadibogo ba kgethegilego le balebeledi ba tikologo. Ga go pelaelo gore phuthego ya lena e romela meneelo kgwedi le kgwedi gore e thuše ka ditšhelete bakeng sa lenaneo la lefase ka bophara la go agwa ga Diholo tša Mmušo le tša Dikopano. Meneelo yeo e thuša bana babo rena lefaseng ka moka.

¹¹ Ka moka ga rena re ka tšea karolo bakeng sa go thekga modiro wo mokgatlo wa Jehofa o o dirago mehleng ye ya bofelo. Gantši ga go bolelwe gore meneelo e tšwa go bomang. Ge re tsenya moneelo ka mapokising a meneelo goba re neela re diriša wepesaete ya jw.org, ga re nyake gore batho ba tsebe gore re ntšhitše bokae. Go thwe’ng ge e ba o bona okare tšhelete yeo o e ntšhago ga e re selo? Tseba gore tšhelete e ntši ya meneelo e dirwa ke meneelo e menyenyane ya batho ba bantši e sego ya batho ba sego kae bao ba ntšhago tšhelete e ntši. Bana babo rena ba mehleng ye, gaešita le bao ba diilago kudu, ba a neela go no swana le bana babo rena ba Matsedonia bao ba bego ba neela go tšwa pelong le ge ba be ba le ‘bodiiding bjo bogolo’.​—2 Bakor. 8:1-4.

12. Mokgatlo wa rena o dira’ng go kgonthišetša gore meneelo e dirišwa gabotse?

¹² Sehlopha se Bušago se leka ka thata gore se botege le go diriša temogo mabapi le kamoo tšhelete ya mokgatlo e dirišwago ka gona. (Mat. 24:45) Ditho tša sehlopha se, di rapela pele di dira  phetho ya gore di diriše bjang tšhelete yeo. (Luka 14:28) Mehleng ya kgale, banna ba botegago bao ba bego ba hlokomela meneelo ba be ba latela lenaneo go kgonthišetša gore meneelo e be e dirišwa feela medirong ya Jehofa. Ka mohlala, Esera o ile a boela Jerusalema le dilo tšeo di bego di neetšwe ke kgoši ya Peresia. Dilo tšeo di be di akaretša gauta, silifera le dilo tše dingwe tšeo mehleng ya rena di ka lekanago le diranta tše 1,3 bilione. Esera o be a lebelela meneelo ye e le dimpho tšeo di newago Jehofa. Ke ka baka leo a ilego a nea baperisita le Balefi ditaelo tša gore ba di šireletše dimpho tšeo ka ge ba be ba tlo feta le tšona mafelong ao a lego kotsi. (Esera 8:24-34) Moapostola Paulo o ile a kgoboketša tšhelete ya go hlakodiša bana babo bao ba bego ba dula Judea. O ile a kgonthišetša gore bao ba bego ba swere ditšhelete tšeo ba “dira dilo ka moka ka potego, e sego feela mahlong a Jehofa, eupša gape le mahlong a batho.” (Bala 2 Bakorinthe 8:18-21.) Lehono mokgatlo wa rena o latela mohlala wa Esera le wa Paulo ka go kgonthišetša gore ditšhelete tšeo di neetšwego di dirišwa ka šedi.

13. Ke ka baka la’ng mokgatlo o ile wa dira diphetogo tše itšego morago bjale?

¹³ Ditho tša lapa di ka dira diphetogo tseleng yeo di dirišago tšhelete ka yona e le gore di se šomiše tšhelete e ntši go feta yeo di e hwetšago. Goba di ka nyaka ditsela tša go nolofatša maphelo a tšona gomme tša fokotša ditshenyagalelo e le gore di kgone go hlankela Jehofa kutšwanyana. Le mokgatlo wa Jehofa o dira bjalo. Mengwageng e sa tšwago go feta, go bile le mediro e mentši e kgahlišago yeo e nyakago tšhelete. Go ile gwa ba le nako e itšego moo go ilego gwa feleletša go šomišwa tšhelete e ntši go feta yeo e tsenago. Ka baka leo, mokgatlo o lebelela ditsela tšeo o ka fokotšago ditshenyagalelo gomme wa nolofatša mošomo e le gore o kgone go dira mešomo e mentši ka meneelo ya lena e tšwago pelong.

14-16. (a) Meneelo yeo re e ntšhago e thuša go dira’ng? (b) Wena o hotšwe bjang ke ditokišetšo tšeo di bago gona ka baka la meneelo yeo?

¹⁴ Ba bantši ba bana babo rena bao e lego kgale ba hlankela Jehofa ba bolela gore gona bjale re hwetša dimpho tše dintši ka mokgatlong wa Jehofa go feta le ge e le neng pele. E no nagana ka seo! Gona bjale re na le wepesaete ya jw.org le Kgašo ya JW. Beibele ya Phetolelo ya Lefase le Lefsa ya Mangwalo a Makgethwa e hwetšagala ka maleme a mantši. Ka 2014 le 2015, go ile gwa swarwa Dikopano tša Ditšhabatšhaba tša sehlogo se se rego “Tšwelang Pele le Tsoma Mmušo wa Modimo Pele!” Dikopano tšeo di ile tša swarelwa go tše dingwe tša ditediamo tše dikgolo, metseng e 14 lefaseng ka moka. Batho bao ba bilego dikopanong tšeo ba be ba thabile kudu.

 ¹⁵ Batho ba bantši ba ile ba leboga dilo tšeo mokgatlo o re direlago tšona. Ka mohlala, ge banyalani ba bangwe bao ba hlankelago kua Asia ba be ba bolela ka tokišetšo yeo re nago le yona ya Kgašo ya JW ba ngwadile gore: “Re hlankela motseng o monyenyane. Ka baka leo, ka dinako tše dingwe re fela re ikwa re le kgole le bana babo rena, e bile re lebala le gore mošomo wa Jehofa ke o mogolo gakaakang. Eupša ge re thoma go bogela mananeo a fapafapanego ao a lego go Kgašo ya JW, re gopola gore re karolo ya bana babo rena lefaseng ka bophara. Bana babo rena le dikgaetšedi ba lefelong leo re hlankelago go lona ba rata Kgašo ya JW kudu. Gantši re fela re ekwa ba re ka morago ga gore ba bogele lenaneo la kgwedi le kgwedi la Kgašo ya JW, ba ikwa ba le kgauswi le ditho tša Sehlopha se Bušago. Ga bjale ba thabela go ba karolo ya mokgatlo wa Jehofa go feta le ge e le neng pele.”

¹⁶ Lefaseng ka moka, Diholo tša Mmušo tše e ka bago tše 2 500 di a agwa goba go mpshafatšwa. Ka morago ga gore ditho tša phuthego ya kua Honduras di thome go diriša Holo ya tšona e mpsha, di ile tša ngwala gore: “Ruri re tloga re thabela go ba karolo ya lapa la Jehofa e bile re thabela go ba karolo ya bana babo rena lefaseng ka moka, bao ba re thušitšego gore re be le Holo ya Mmušo yeo re bego re sa tshepe gore re ka tsoga re bile le yona mo re dulago.” Ka morago ga gore batho ba bantši ba hwetše Beibele le dikgatišo tše dingwe ka maleme a gabo bona, ka morago ga gore ba hwetše thušo ge ba wetšwe ke dikotsi tša tlhago, le go holwa ke modiro wa go nea bohlatse ditoropong tše dikgolo goba ditikologong tše ba dulago go tšona, le bona ba ikwa go swana le bana babo rena ba kua Honduras.

17. Re tseba bjang gore Jehofa o thekga mokgatlo wa rena lehono?

¹⁷ Batho ba bantši bao e sego Dihlatse tša Jehofa ga ba kgone go kwešiša gore go kgonega bjang gore re dire mediro ye ka moka re diriša feela meneelo. Ka morago ga gore mookamedi yo mongwe wa khamphani e kgolo a etele e mengwe ya meago ya rena yeo go gatišwago go yona, o ile a makatšwa ke gore mediro yeo ka moka e be e dirwa ke baithaopi feela, ba be ba dira mediro yeo ka meneelo yeo batho ba e ntšhitšego ka go rata, ntle le gore khamphani e itšego e ba thuše ka tša ditšhelete. O ile a re ga go kgonege gore dilo tše kaakaa di dirwe feela ka meneelo. Le rena re a dumela! Re a tseba gore go kgonega feela ka gobane Jehofa a re thekga.​—Jobo 42:2.

18. (a) Ke ditšhegofatšo dife tšeo re di hwetšago ge re thekga Mmušo wa Modimo ka meneelo? (b) Re ka thuša bjang bana ba rena le batho bao ba sa tšwago go thoma go kopanela gore le bona ba neele?

¹⁸ Jehofa o re neile sebaka se sebotse sa go thekga modiro o mogolo wo o dirwago lehono. O re kgonthišetša gore re tlo hwetša ditšhegofatšo ge re thekga Mmušo wa gagwe ka meneelo. (Mal. 3:10) Jehofa o holofetša gore ge motho a nea ka go rata o tla atlega. (Bala Diema 11:24, 25.) Le gona, go nea go a re thabiša ka baka la gore “go na le lethabo le legolo go neeng go feta go amogeleng.” (Dit. 20:35) Re ka ruta bana ba rena le batho bao ba sa tšwago go thoma go kopanela gore go neela go bohlokwa. Re ka ba ruta ka seo re se bolelago le seo re se dirago. Le gona go neela go tla dira gore Jehofa a ba šegofatše.

19. Sehlogo se se go hotše bjang?

¹⁹ Dilo ka moka tšeo re nago le tšona di tšwa go Jehofa. Ge re mo nea dilo tšeo a re filego tšona re bontšha gore re a mo rata e bile re leboga dilo tšeo a re diretšego tšona. (1 Dikor. 29:17) Ge Baisiraele ba be ba ntšha meneelo ya go aga tempele, Beibele e hlalosa gore: ‘Ba ile ba thabela go ntšha dibego tša bona tša boithaopo, ka gobane ba be ba neela Jehofa dibego tša boithaopo ka pelo e feletšego.’ (1 Dikor. 29:9) Anke le rena re tšweleng pele re thabišwa ke go nea Jehofa seo a re filego sona.