1. Ke ka baka la’ng mehla ye re phelago go yona e fapane le ya kgale?

RE PHELA mehleng yeo e fapanego kudu le ya kgale. Bjalo ka ge Beibele e boletše e sa le pele, Jehofa o kgoboketša “lešaba le legolo . . . le le tšwago ditšhabeng tšohle, melokong yohle, merafong yohle le malemeng ohle.” Bao ba kgobokeditšwego ba bopa “setšhaba se matla” sa batho bao ba thabilego bao ba fetago dimilione tše seswai bao ‘ba direlago Modimo tirelo e kgethwa mosegare le bošego.’ (Kut. 7:9, 15; Jes. 60:22) Ruri ga se gwa ka gwa ba le mehla yeo batho ba bantši ba ratago Jehofa le batho ba bangwe ka tsela ye.

2. Batho bao e sego bagwera ba Modimo ba na le lerato la mohuta ofe? (Bona seswantšho se se lego ka mo godimo.)

² Beibele e boletše e sa le pele gore mehleng ye re phelago go yona, batho bao e sego bagwera ba Modimo ba be ba tla ba le lerato leo le fapanego le leo re le tlwaetšego, e lego lerato la boithati. Moapostola Paulo o ngwadile gore: “Mehleng ya bofelo . . . , batho e tla ba baithati, barati ba tšhelete, . . . ba ratago maipshino go e na le go rata Modimo.” (2 Tim. 3:1-4) Lerato le bjalo la boithati le fapane kgole le lerato leo rena re le bontšhago Modimo. Le ge batho ba bangwe ba nagana gore ba ka thaba ge ba nyaka go dira dilo tšeo di holago  bona, eupša dilo tše bjalo ga di ba tlišetše lethabo. Go e na le moo, le dira gore batho ba bantši ba nagane kudu ka bona, gomme seo sa thatafišetša batho ka moka bophelo.

3. Sehlogong se re tlo ithuta ka’ng, gona ka baka la’ng?

³ Paulo o ile a lemoga gore batho ba bantši ba be ba tla ba le lerato la boithati, le gore lerato leo le be le tla baka mathata magareng ga Bakriste. Ke ka baka leo a ilego a eletša Bakriste gore ba “furalele” batho bao ba bontšhago lerato leo. (2 Tim. 3:5) Lega go le bjalo, ga go kgonege gore re ba pheme ka mo go feletšego ka gobane re phela le bona. Ka gona, re ka dirang gore re itšhireletše bathong ba bao ba nago le mekgwa ya lefase le gaešita le ge re phela le bona, e le gore re kgahliše Modimo wa rena yo lerato? Ga bjale anke re boneng phapano magareng ga lerato la Modimo le lerato leo go bolelwago ka lona go Timotheo wa Bobedi 3:2-4. Ka morago ga moo re tla itlhahloba gomme ra bona kamoo re ka bontšhago lerato leo le tlago go re dira gore re kgotsofale e le ka kgonthe le go thaba.

4. Ke ka baka la’ng go ithata e se phošo?

⁴ Moapostola Paulo o ngwadile gore: “Batho e tla ba baithati.” Na go ithata ke phošo? Aowa, ga se phošo, e bile go a nyakega. Jehofa o re bopile re na le kganyogo ya go ithata. Jesu o itše: “O rate moagišani wa gago ka mokgwa wo o ithatago ka wona.” (Mar. 12:31) Re ka se kgone go rata moagišani wa rena ge e ba re sa ithate. Le gona ka Beibeleng re bala gore: “Banna ba swanetše go rata basadi ba bona bjalo ka mebele ya bona. Monna yo a ratago mosadi wa gagwe o a ithata, gobane ga go na motho yo a kilego a hloya mmele wa gagwe; eupša o a o fepa le go o babalela.” (Baef. 5:28, 29) Ka gona, re swanetše go ithata.

5. Batho bao ba ithatago ka mo go feteletšego ke ba mohuta mang?

⁵ Lerato leo go bolelwago ka lona go Timotheo wa Bobedi 3:2 ga se leo re swanetšego go ba le lona. Ke lerato la boikaketši, e lego la boithati. Batho bao ba ithatago ka mo go feteletšego ba nagana kudu ka bona le ge go sa nyakege. (Bala Baroma 12:3.) Selo seo se lego bohlokwa kudu maphelong a bona, ke bona. Ga ba na taba le batho ba bangwe. Ge dilo di sa sepele gabotse, gantši ba sola ba bangwe go e na le go amogela phošo. Batho ba bjalo ga se gore ba thabile.

6. Ke dika dife tše dibotse tšeo re bago le tšona ge re rata Modimo?

⁶ Diithuti tše dingwe tša Beibele di re Paulo o thoma pele ka go bolela ka seka sa boithati ka gobane ke sona se tšweletšago dika tše dingwe tše mpe tšeo a bolelago ka tšona ka morago. Eupša batho bao ba ratago Modimo ba bontšha dika tše dibotse. Beibele e re dika tšeo ke lerato, lethabo, khutšo, go se fele pelo, botho, toko, tumelo, boleta le boitshwaro. (Bagal. 5:22, 23) Mopsalme o ngwadile gore: “Go thaba batho bao Modimo wa bona e lego Jehofa!” (Ps. 144:15) Jehofa ke Modimo yo a thabilego le gona bahlanka ba gagwe ba thabile. Go oketša moo, go fapana le batho bao e lego baithati, le bao ba ratago go no amogela dilo go e na le go fa, bahlanka ba Jehofa ba a thaba ka gobane ba rata go fa batho ba bangwe.​—Dit. 20:35.

7. Ke dipotšišo dife tšeo di tlago go re thuša go bona ge e ba re rata Modimo?

⁷ Re ka bona bjang ge e ba re thoma go ithata kudu go feta Modimo? Nagana ka keletšo ye e bohlokwa e rego: “Le se dire selo ka tshele goba ka go ikgopola, eupša ka boikokobetšo le tšee gore ba bangwe ba le feta ka bogolo. Le se ke la kgahlegela ditaba tša lena feela, eupša le kgahlegele le tša ba bangwe.” (Bafil. 2:3, 4) Re swanetše go ipotšiša gore: ‘Na ke diriša keletšo ye? Na ke tloga ke rata go dira thato ya Modimo? Na ke dula ke nyaka sebaka sa gore ke thuše bana  bešo ka phuthegong le batho ba tšhemong?’ Ga se ka mehla go lego bonolo go thuša batho ba bangwe. Re swanetše go šoma ka thata gomme re tlogele dilo tše re di ratago e le gore re thuše batho ba bangwe. Ruri ga go na selo seo se thabišago kudu go feta go tseba gore re thabiša Mmuši wa legohle e lego Jehofa!

8. Go rata Modimo go tutueditše ba bangwe go dira’ng?

⁸ Bana babo rena ba bangwe ba tlogetše mešomo yeo e bego e ka ba dira gore ba hume le dinala, e le gore ba hlankele Jehofa ka nako e tletšego. Ka mohlala, Ericka yo a dulago kua United States ke ngaka. Eupša go e na le gore a lwele go hlatlošwa mošomong wa gagwe, o ile a tšea bobulamadibogo. O hlanketše dinageng tše mmalwa le monna wa gagwe. Ge a gopola dilo tša morago, o re: “Dilo tše dintši tšeo re di bonego ge re be re hlankela tšhemong ya leleme le šele le bagwera bao re ba hweditšego ge re be re hlankela moo, di dirile gore bophelo bja rena bo thabiše kudu. Ke sa le ngaka, eupša go fetša nako e ntši ke ruta batho ba bangwe ka Jehofa le go thuša bana bešo ka phuthegong go ntlišetša lethabo la kgonthe le kgotsofalo.”

9. Ke ka baka la’ng go rata tšhelete go sa dire gore motho a thabe?

⁹ Paulo o ngwadile gore batho e tla ba “barati ba tšhelete.” Mengwageng e fetilego, mmulamadibogo yo mongwe kua Ireland o ile a boledišana le monna yo mongwe ka Modimo. Monna yoo o ile a ntšha tšhelete ya pampiri ka sekhwameng sa gagwe gomme a re: “Wa e bona ntwe, ke Modimo wa ka!” Le ge batho ba bantši ba ka se bolele gore tšhelete ke modimo wa bona, eupša lefase le le tletše ka batho bao ba ratago tšhelete. Lega go le bjalo, Beibele e re eletša ka gore: “Morati wa silifera a ka se kgotsofatšwe ke silifera, le yo mongwe le yo mongwe yo a ratago lehumo a ka se kgotsofatšwe ke tšeo di mmoelago.” (Mmo. 5:10) Batho ba go rata tšhelete ga ba kgotsofale, e bile ba dula ba swaregile ka go hwetša tšhelete, eupša se ke go itlhaba gohle ka “mahloko a mantši.”​—1 Tim. 6:9, 10.

10. Aguri o ngwadile’ng mabapi le mahumo le bodiidi?

¹⁰ Ke therešo gore ka moka ga rena re hloka tšhelete. Tšhelete e a re šireletša. (Mmo. 7:12) Eupša na motho a ka thaba le ge a se na tšhelete e ntši? Kudu! (Bala Mmoledi 5:12.) Aguri morwa wa Jakeo ngwadile gore: “O se nnee bodiidi goba mahumo. Anke ke je dijo tšeo di ntekanego.” Re ka kwešiša gore ke ka baka la’ng a be a sa nyake go ba modiidi wa go hloka le pudi ya leleme le letala. Ge a dutše a hlalosa, o re o be a sa nyake go tlelwa ke kgopolo ya go utswa ka gobane go utswa go be go tla goboša leina la Jehofa. Eupša ke ka baka la’ng a ile se rapelele go huma? O ngwadile gore: “Gore ke se be yo a sa kgotsofalego gomme ka go latola ka re: ‘Jehofa ke mang?’” (Die. 30:8, 9) Mohlomongwe le wena o tseba batho bao ba ithekgilego ka mahumo a bona go e na le go ithekga ka Modimo.

11. Ke keletšo efe yeo Jesu a e neilego mabapi le tšhelete?

¹¹ Batho bao ba ratago tšhelete ba ka se kgone go kgahliša Modimo. Jesu o itše: “Ga go yo a ka bago lekgoba la marena a mabedi, gobane o tla hloya yo mongwe a rata yo mongwe goba o tla kgomarela yo mongwe a nyatša yo mongwe. Le ka se be makgoba a Modimo le a Mahumo.” Eupša hlokomela gore Jesu o thomile pele ka go bolela gore: “Tlogelang go ipolokela matlotlo lefaseng, moo tshwele le ruse di jago, le moo mahodu a thubago a utswa. Go e na le moo, ipolokeleng matlotlo legodimong, moo tshwele le ge e le ruse di sa jego, le moo mahodu a sa thubego a utswa.”​—Mat. 6:19, 20, 24.

12. Go phela bophelo bjo bonolo go ka thuša bjang motho gore a kgone go hlankela Modimo? Nea Mohlala.

¹² Bana babo rena ba bangwe ba hweditše gore go phela bophelo bjo bonolo ga go ba dire feela  gore thabe, eupša go dira le gore ba kgone go hlankela Jehofa kamoo go oketšegilego. Jack, yo a dulago kua United States o ile a rekiša ntlo le kgwebo ya gagwe ka gobane a tseba gore seo se tla dira gore yena le mosadi wa gagwe ba kgone go bula madibogo. O re: “Go be go le boima go rekiša ntlo ya rena e botse le lefelo la rena le legolo. Lega go le bjalo, ka mehla ke be ke boa gae ke hlakahlakane ka baka la mathata a mošomo. Eupša mosadi wa ka yo e lego mmulamadibogo o be a dula a thabile. O be a rata go bolela gore: ‘Boss ya ka e di phala ka moka!’ Ka ge ga bjale le nna ke bula madibogo re šomela Motho o tee, e lego Jehofa.”

13. Re swanetše go ipotšiša dipotšišo dife ge e ba re nyaka go tseba gore re na le pono efe ka tšhelete?

¹³ Ge e ba re nyaka go tseba gore re na le pono efe ka tšhelete, re swanetše go itlhahloba ka go ipotšiša dipotšišo tše di latelago: ‘Na tsela yeo ke phelago ka yona e bontšha gore ke dumela seo Beibele e se bolelago ka tšhelete? Na tšhelete e tla pele bophelong bja ka? Na ke rata dilo tše di bonagalago go feta tswalano yeo ke nago le yona le Jehofa le batho? Na ke tloga ke tshepa gore Jehofa o tla ntlhokomela ka dilo tše bohlokwa bophelong?’ Re swanetše go kgodišega gore a ka se tlogele bahlanka ba gagwe bao ba mmotilego.​—Mat. 6:33.

14. Na go ithabiša ka mo go lekanetšego ke phošo?

¹⁴ Ka ge Beibele e boletše e sa le pele, batho ba bantši lehono ke bao “ba ratago maipshino.” Go no swana le ge e se phošo gore motho a be le tšhelete le gore a ithate, ga se phošo gore motho a ipshine ka mo go lekanetšego. Batho ba bangwe ba nagana gore ge o le Mokriste ga se wa swanela go fela o ithabiša goba go ipshina. Eupša Jehofa o nyaka gore re fele re ithabiša. Beibele e kgothaletša mohlanka yo mongwe le yo mongwe yo a botegago wa Modimo gore: “Eya o je dijo tša gago o thabile, o nwe beine ya gago ka pelo e thabilego.”​—Mmo. 9:7.

15. Ke mohuta ofe wa maipshino woo Timotheo wa Bobedi 3:4 e bolelago ka wona?

¹⁵ Timotheo wa Bobedi 3:4 e bolela ka batho bao ba ratago maipshino kudu eupša ba sa rate Modimo. Hlokomela gore temana ye ga e re batho ba tla rata maipshino go feta Modimo. Seo  se be se tla bolela gore ba rata Modimo ganyenyane. Eupša temana ye e re “go e na le go rata Modimo.” Seithuti se sengwe sa Beibele se ngwadile gore: “[Temana] ye ga e re gore ba rata Modimo go fihla bokgoleng bjo itšego. Eupša e ra gore le ganyenyane ga ba mo rate.” Ruri ye ke temošo e bohlokwa kudu go batho bao ba ratago maipshino! Polelwana e rego “ba ratago maipshino” ge e le gabotse e hlalosa batho bao ba ‘gogolwago ke maipshino a bophelo bjo.’​—Luka 8:14.

16, 17. Jesu o re beetše mohlala ofe ditabeng tša maipshino le boithabišo?

¹⁶ Jesu o re beetše mohlala wa kamoo re ka ithabišago ka gona. O ile a ya “[monyanyeng] wa lenyalo” le “[monyanyeng] o mogolo wa kamogelo.” (Joh. 2:1-10; Luka 5:29) Monyanyeng wa lenyalo, ge go be go hlaela beine, Jesu o ile a fetoša meetse gore e be beine. Le gona ge a be a le monyanyeng wa kamogelo, batho ba ile ba mo swaya phošo ka gore o ja le balekgetho le badiradibe. Eupša o ile a sola batho bao ka gore ga ba na tekatekano.​—Luka 7:33-36.

¹⁷ Lega go le bjalo, Jesu o be a sa phelele menate goba maipshino. Selo se bohlokwa bophelong bja gagwe e be e le go dira thato ya Jehofa le go thuša batho ba bangwe gore ba mo tsebe. E le gore batho ba bantši ba tle ba phele ka mo go sa felego, o ile a kgotlelela go hwa lehu le sehlogo koteng. Jesu o ile a botša batho bao ba bego ba nyaka go mo latela gore: “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe ka lena ka baka la ka. Thabang le hlalaleng ka ge moputso wa lena e le o mogolo magodimong, gobane ba tlaišitše baporofeta ba pele ga lena ka tsela yeo.”​—Mat. 5:11, 12.

18. Ke dipotšišo dife tšeo di tlago go re thuša go bona ge e ba re rata maipshino kudu?

¹⁸ Re ka tseba bjang ge e ba re rata maipshino kudu? Re swanetše go ipotšiša gore: ‘Na menate e tla pele bophelong bja ka go feta diboka le tšhemo? Na ke ikemišeditše go itima dilo tšeo ke di ratago e le gore ke hlankele Jehofa? Ge ke kgetha boithabišo na ke ipotšiša ge e ba Jehofa a tla bo thabela?’ Ge e ba re tloga re rata Modimo re ka se pheme feela go dira dilo tšeo di sa mo kgahlego, eupša re tla phema le go dira dilo tšeo re bonago eka di ka no se mo kgahle.​—Bala Mateo 22:37, 38.

19. Ke batho ba mohuta ofe bao ba ka se tsogego ba thabile?

¹⁹ Batho ba na le mengwaga e fetago e 6 000 ba tlaišega. Ga bjale lefase la Sathane le kgauswi le go fedišwa. Lefase le le tletše ka batho bao ba ithatago ka mo go feteletšego, bao ba ratago tšhelete le maipshino. Ba dula ba naganne ka dilo tšeo ba nyakago go di hwetša, e bile ba bona dikganyogo tša bona di le bohlokwa kudu go feta selo le ge e le sefe. Batho ba mohuta woo ba ka se tsogile ba thabile. Eupša go fapana le seo, mopsalme o boletše gore: “Go thaba yo a thušwago ke Modimo wa Jakobo, yo a holofetšego Jehofa Modimo wa gagwe.”​—Ps. 146:5.

20. Go rata Jehofa go go tlišeditše lethabo ka tsela efe?

²⁰ Lerato leo bahlanka ba Modimo ba ratago Jehofa ka lona le gola le go feta e bile ngwaga o mongwe le o mongwe batho ba bantši ba tla ka mokgatlong wa Modimo. Ruri bjo ke bohlatse bja gore Mmušo wa Modimo o a buša, le gore o kgauswi le go tlo nea batho ditšhegofatšo tše di kgahlišago kudu. Lethabo la kgonthe le tlišwa ke go dira thato ya Jehofa le go tseba gore re dula re mo thabiša. Le gona bao ba ratago Jehofa ba tla thaba ka mo go sa felego! Sehlogong se se latelago, re tlo ithuta ka dika tšeo di tlišwago ke lerato la boithati, le gona re tlo ithuta kamoo dika tšeo di fapanego le tšeo bahlanka ba Jehofa ba di bontšhago.