1-2. (a) Jehofa o ikwa bjang ge a bona batho ba bantši lefaseng ka moka ba tlile Segopotšong? (Bona seswantšho sa letlakala la ka ntle.) (b) Re tlo ithuta’ng sehlogong se?

NAGANA kamoo Jehofa a ikwago ka gona ge a bona batho ba bantši lefaseng ka moka ba eba gona Segopotšong. Ga a fo lebelela batho bao e le sehlopha, eupša o šetša yo mongwe le yo mongwe yo a tlilego Segopotšong. Ka mohlala, o tseba batho bao ba bago gona Segopotšong ngwaga le ngwaga. Gare ga bona, go ka ba go na le bao ba bago gona le ge ba ganetšwa o šoro. Ba bangwe ga ba ye dibokeng ka mehla eupša ba dula ba eya Segopotšong ka ge ba bona se le bohlokwa kudu. Le gona Jehofa o bona bao e lego la mathomo ba eba gona Segopotšong le ge ba no tlela go bona gore go direga eng.

² Re kgodišegile gore Jehofa o thaba kudu ge a bona batho ba bantši ba eba gona Segopotšong. (Luka 22:19) Lega go le bjalo, Jehofa ga a no kgahlwa ke palo ya batho bao ba tlago Segopotšong, eupša o kgahlwa ke lebaka leo le dirago gore ba be gona. Sehlogong se, re tlo araba potšišo ye e bohlokwa: Ke ka baka la’ng re sa swanela go ya Segopotšong feela, eupša re swanetše le go ya dibokeng ka mehla?

3-4. (a) Ke ka baka la’ng re eya dibokeng ka mehla? (b) Ge re eba gona dibokeng re bontšha gore re batho ba mohuta mang? (c) Go ya ka 1 Bakorinthe 11:23-26, ke ka baka la’ng re sa swanela go lofa Segopotšong?

³ Lebaka le legolo la gore re ye dibokeng ke ka gobane e le karolo e bohlokwa kudu ya borapedi bja rena. Lebaka le lengwe ke gore ge re le dibokeng re rutwa ke Jehofa. Batho ba go ikgogomoša ga ba nyake go rutwa. (3 Joh. 9) Eupša rena ga re swane le bona, re thabela go rutwa ke Jehofa le mokgatlo wa gagwe.—Jes. 30:20; Joh. 6:45.

 ⁴ Ge re eba gona dibokeng re bontšha gore re ikokobeditše le gore re ikemišeditše go rutwa ke Jehofa. Le gona ga re ye Segopotšong ka gobane re ithola kgwara, eupša re ya ka gobane re ekwa taelo ya Jesu yeo e rego: “Dulang le dira se e le go nkgopola.” (Bala 1 Bakorinthe 11:23-26.) Segopotšo se tiiša kholofelo yeo re nago le yona ka bokamoso e bile se re gopotša kamoo Jehofa a re ratago ka gona. Eupša Jehofa o a tseba gore re hloka go kgothatšwa ka mehla e sego gatee feela ka ngwaga. Ke ka baka leo a dirilego gore go be le diboka beke le beke, e bile o re kgothaletša gore re be gona dibokeng tšeo. Boikokobetšo bo re hlohleletša gore re mo kwe. Re fetša nako e ntši beke le beke re lokišeletša diboka le go ba go tšona.

5. Ke ka baka la’ng batho bao ba ikokobeditšego ba arabela ge Jehofa a ba laletša go tla dibokeng?

⁵ Ngwaga o mongwe le o mongwe, Jehofa o laletša batho gore a tle a ba rute gomme ba bantši bao ba ikokobeditšego ba amogela taletšo yeo. (Jes. 50:4) Ba ipshina ka go ba gona Segopotšong gomme ba thoma go tla le dibokeng. (Sak. 8:20-23) Bao ba lego ka phuthegong gotee le bao ba sa ithutago Beibele ba thabela go rutwa le go hlahlwa ke Jehofa, yena “mothuši [wa rena] le mohlakodiši [wa rena].” (Ps. 40:17) Ruri re thabela go rutwa ke Jehofa le Morwa wa gagwe yo a mo ratago kudu!—Mat. 17:5; 18:20; 28:20.

6. Boikokobetšo bo ile bja thuša bjang monna yo a itšego go ba gona Segopotšong?

⁶ Ngwaga le ngwaga, re dira sohle seo re ka se kgonago go mema batho ba bantši go tla Segopotšong sa lehu la Jesu. Batho ba bantši bao ba ikokobeditšego ba holegile kudu ka go ba gona Segopotšong. Nagana ka phihlelo ye: Mengwaga e mmalwa e fetilego, ngwanabo rena yo mongwe o ile a nea monna yo mongwe taletšo ya Segopotšo, eupša monna yo a re a ka se kgone go tla. Eupša ka letšatši la Segopotšo ngwanabo rena yoo o ile a makala ge a bona monna yoo a tsena ka Holong ya Mmušo. Monna yoo o ile a thabišwa kudu ke tsela yeo bana babo rena ba mo amogetšego ka yona moo a ilego a thoma go ya dibokeng ka mehla. Ge e le gabotse, ngwageng wa go latela o lofile gararo feela dibokeng. Ke’ng seo se mo thušitšego go ya dibokeng ka mehla? O thušitšwe ke boikokobetšo. Ngwanabo rena yo a bego a mo memile o itše: “Monna yo o ikokobeditše kudu.” Ga go pelaelo gore Jehofa ke yena a gogilego monna yo gore a mo hlankele. Ga bjale o kolobeditšwe.—2 Sam. 22:28; Joh. 6:44.

7. Dilo tšeo re ithutago tšona dibokeng le ka Beibeleng di ka re thuša bjang gore re be le boikokobetšo?

⁷ Dilo tšeo re ithutago tšona dibokeng le ka Beibeleng di ka re thuša go ba le boikokobetšo. Dibeke tše mmalwa pele ga Segopotšo, diboka di bolela kutšwanyana ka mohlala o mobotse wa Jesu le boikokobetšo bjo a bo bontšhitšego ka go neela bophelo bja gagwe e le sehlabelo. Le gona re kgothaletšwa gore matšatši pele ga Segopotšo re bale dipego tša Beibele tšeo di bolelago ka lehu la Jesu le tsogo ya gagwe. Dilo tšeo re ithutago tšona dipegong tša Beibele le dibokeng tša pele ga Segopotšo, di re thuša go leboga kudu seo Jesu a re diretšego sona. Ka gona se se dira gore re ekiše boikokobetšo bja gagwe le go dira thato ya Modimo le ge go le boima.—Luka 22:41, 42.

8. Jesu o ile a bontšha sebete bjang?

⁸ Re leka go ekiša Jesu ka go bontšha sebete. Nagana ka sebete seo a ilego a se bontšha pele a bolawa. O be a tseba gabotse gore kgauswinyane  manaba a gagwe a be a tlo mo tlaiša, a mmetha le go mmolaya. (Mat. 20:17-19) Lega go le bjalo, o ile a dula a ikemišeditše go re hwela. Ge nako ya gore a bolawe e fihlile, o ile a botša baapostola ba gagwe bao ba botegago bao ba bego ba na le yena kua Getsemane gore: “Tsogang, a re sepeleng. Bonang! Moeki wa ka o batametše.” (Mat. 26:36, 46) Ge batho bao ba bego ba swere ditšhoša ba tlile go mo swara, o ile a batamela go bona gomme a ba botša gore ke yena Jesu ke moka a ba laela gore ba tlogele baapostola ba gagwe ba sepele. (Joh. 18:3-8) Ruri Jesu o bontšhitše sebete! Lehono Bakriste bao ba tloditšwego le dinku tše dingwe ba leka ka thata gore ba ekiše Jesu ka go bontšha sebete. Ba dira seo bjang?

9. (a) Ke ka baka la’ng go nyakega sebete gore re be gona dibokeng ka mehla? (b) Mohlala wa rena o mobotse o ka kgoma bjang bana babo rena bao ba golegilwego ka baka la tumelo ya bona?

⁹ Go nyakega sebete gore re be gona dibokeng ka mehla le ge go le thata. Bana babo rena le dikgaetšedi ba bangwe ba ba gona dibokeng le ge ba hlokofaletšwe, ba gateletšegile goba ba babja. Ba bangwe ba bontšha sebete ka go ya dibokeng le ge ba lapa ba ba ganetša o šoro goba mmušo o ba thibela. Nagana feela kamoo mohlala wa rena o kgomago bana babo rena bao ba golegilwego ka baka la go emela tumelo ya bona. (Baheb. 13:3) Ge ba ekwa gore re kgotleletše tirelong ya Jehofa le ge re na le mathata, tumelo ya bona e a tia, ba ba le sebete e bile ba tšwela pele ba botega. Moapostola Paulo le yena o ile a holwa ke go kwa ka tumelo ya Bakristegotee le yena. Ge a be a le kgolegong kua Roma, o be a thaba kudu ge nako le nako a ekwa gore bana babo ba sa dutše ba hlankela Modimo ka go botega. (Bafil. 1:3-5, 12-14) Pejana ga gore Paulo a lokollwe kgolegong goba ka moragonyana ga moo, o ile a ngwalela Baheberu lengwalo. Lengwalong leo o ile a kgothaletša Bakriste bao ba botegago gore ba ‘tšwele pele ba bontšhana lerato la borwarre’ le gore ba se ke ba tlogela go bokana gotee.—Baheb. 10:24, 25; 13:1.

10-11. (a) Re swanetše go mema bomang Segopotšong? (b) Baefeso 1:7 e re nea lebaka lefe la go dira bjalo?

¹⁰ Re bontšha sebete ge re mema ba leloko, bao re šomago le bona le baagišani go tla Segopotšong. Ke ka baka la’ng re ba mema? Re tloga re leboga seo Jehofa le Jesu ba re diretšego sona, ka gona re nyaka go mema batho ba bantši kamoo re ka kgonago gore ba be gona Segopotšong. Re nyaka gore le bona ba ithute kamoo ba ka holwago ke “botho bjo bogolo bja Modimo” bjo a re bontšhitšego bjona ka sehlabelo sa morwa wa gagwe.—Bala Baefeso 1:7; Kut. 22:17.

¹¹ Ge re bontšha sebete ka go ba gona dibokeng, re bontšha le seka se sengwe se se kgahlišago kudu, e lego seka seo Modimo le Morwa wa gagwe ba se bontšhago ka ditsela tše di kgahlišago kudu.

12. (a) Diboka di re thuša bjang go rata Jehofa le Jesu kudu? (b) Lengwalo la Bakorinthe ba Bobedi 5:14, 15 le re kgothaletša bjang go ekiša Jesu?

¹² Go rata Jehofa le Jesu go re hlohleletša go ya dibokeng. Dilo tšeo re ithutago tšona dibokeng di dira gore re rate Jehofa le Morwa wa gagwe kudu. Ka mehla ge re le dibokeng re gopotšwa ka dilo tšeo Jehofa le Jesu ba re diretšego tšona. (Baroma 5:8) Segopotšo sona se re gopotša kamoo Jehofa le Jesu ba re ratago kudu ka gona, le kamoo ba ratago batho bao ba sa tsebego kamoo topollo e ba holago ka gona. Go bontšha gore re leboga topollo, re leka ka gohle go ekiša Jesu ka tsela yeo re phelago ka yona letšatši le letšatši. (Bala 2 Bakorinthe 5:14, 15.) Le gona dipelo tša rena di re hlohleletša go leboga Jehofa le go mo tumiša ka ge a re neile topollo. Tsela e nngwe yeo re ka mo tumišago ka yona ke ka go nea dikarabo tšeo di tšwago pelong ge re le dibokeng.

13. Re ka bontšha bjang gore re rata Jehofa le Morwa wa gagwe? Hlalosa.

¹³ Re ka bontšha gore re rata Jehofa le Morwa wa gagwe ka go ikemišetša go dira sohle seo ba re laelago sona. Ka mohlala, gantši go nyakega gore re gafe dilo tše dingwe gore re be gona dibokeng. Diphuthego tše dintši di swara diboka tša gare ga beke bošego goba thapama ka nako yeo ba bantši ba rena re tla bego re lapile. Diboka tše dingwe di ba gona mafelobekeng, gomme ka nako yeo batho ba bangwe ba tla be ba khuditše. Na Jehofa o a re bona ge re eba gona dibokeng gaešita le ge re lapile? Ee, o a re bona. Ge e le gabotse, ge re leka ka thata gore re be gona dibokeng, ke moo Jehofa a bonago gore re tloga re mo rata.—Mar. 12:41-44.

14. Jesu o ile a bea bjang mohlala tabeng ya go bontšha lerato la boikgafo?

¹⁴ Jesu o re beetše mohlala o mobotse kudu wa go bontšha lerato la boikgafo. Ga se feela gore o be a ikemišeditše go hwela barutiwa ba gagwe, eupša ka mehla o be a phela ka tsela yeo e bontšhago gore o be a ba naganela go e na le go inaganela. Ka mohlala, o be a eba le bona le ge a be a lapile goba a gateletšegile maikwelong. (Luka 22:39-46) O be a rata go hlankela batho ba bangwe, e sego go hlankelwa. (Mat. 20:28) Ge e ba re rata Jehofa le bana babo rena kudu, re tla dira sohle seo re  ka se kgonago go ba gona Segopotšong le dibokeng.

15. Ke bomang bao re nyakago go ba thuša kutšwanyana?

¹⁵ Ke rena feela re lego bodumeding bja therešo, gomme re thabela go fetša nako e ntši re thuša batho gore le bona ba tle bodumeding bja therešo. Lega go le bjalo, re thabela kutšwanyana go fetša nako e ntši re thuša bao ba fodilego moyeng, e lego “bao ba tswalanego le rena tumelong.” (Bagal. 6:10) Re bontšha gore re a ba rata ka go ba kgothaletša go tla dibokeng, kudukudu Segopotšong. Go swana le Jehofa le Jesu, le rena re thaba kudu ge motho yo a bego a fodile moyeng a boela go Jehofa, yena Tatago rena yo lerato le Modiši wa rena.—Mat. 18:14.

16 (a) Re ka kgothatšana bjang, gona diboka di ka re thuša bjang? (b) Ke ka baka la’ng ye e le nako e botse mo ngwageng go gopola mantšu a Jesu ao a lego go Johane 3:16?

¹⁶ Dibekeng tše di latelago, mema batho ba bantši kudu kamoo o ka kgonago gore ba tle Segopotšong mantšiboeng a Labohlano la di-19 tša April 2019. (Bona lepokisi leo le rego “ Na o tla ba Mema?”) Ngwageng wo ka moka, anke re direng sohle seo re ka se kgonago go kgothatšana ka go ba gona dibokeng ka moka tšeo Jehofa a re lokišeleditšego tšona. Ge bofelo bo dutše bo batamela, diboka di tlo re thuša go dula re na le boikokobetšo, sebete le lerato. (1 Bathes. 5:8-11) Ka ge Jehofa le Morwa wa gagwe ba re rata kudu, anke re lekeng ka gohle go bontšha gore le rena re a ba rata!—Bala Johane 3:16.