1-3. (a) Ke ka baka la’ng Jehofa a be a rata Solomone, gona Solomone o ile a hwetša ditšhegofatšo dife? (b) Re tlo araba dipotšišo dife sehlogong se?

SOLOMONE o thomile go buša Isiraele e sa le lesogana. Ge a be a sa tšwa go thoma go buša, Jehofa o ile a iponagatša go yena torong gomme a re: “Nkgopele seo o nyakago ke go nea sona.” Solomone o ile a re: “Ke fo ba mošemanyana. Ga ke tsebe go tšwa le go tsena. . . . O nee nna mohlanka wa gago pelo yeo e kwago gore ke ahlole setšhaba sa gago.” (1 Dikg. 3:5-10) Ruri o ile a bontšha boikokobetšo ka go kgopela “pelo yeo e kwago!” Ka gona re kgona go kwešiša gore ke ka baka la eng Jehofa a be a rata Solomone. (2 Sam. 12:24) Modimo o ile a kgahlwa kudu ke tsela yeo Solomone a ilego a mo araba ka yona moo a ilego a nea lesogana le “pelo e bohlale le ya kwešišo.”—1 Dikg. 3:12.

² Ge Solomone a be a botegela Modimo, o ile a hwetša ditšhegofatšo tše dintši. O ile a newa tokelo ya go agela “leina la Jehofa Modimo wa Isiraele” tempele. (1 Dikg. 8:20) O ile a tsebja kudu ka baka la bohlale bjo Modimo a bego a mo neile bjona. Le gona ka dipukung tše tharo tša Beibele go ngwadilwe dilo tšeo a ilego a di bolela ge a be a hlahlwa ke moya wa Modimo. E nngwe ya dipuku tšeo ke puku ya Diema.

³ Lentšu pelo le tšwelela ka makga a mantši kudu ka pukung ya Diema. Ka mohlala, Diema 4:23 e re: “Go feta tšohle tšeo di swanetšego go šireletšwa, šireletša pelo ya gago.” Lentšu “pelo” le ra go re’ng temaneng ye? Re tlo araba potšišo ye sehlogong se. Le gona re tlo araba dipotšišo tše dingwe tše pedi tšeo di rego: Sathane o leka bjang go senya dipelo tša rena? E bile re ka dira’ng gore re šireletše dipelo tša rena? Ge re nyaka go dula re  botegela Modimo, re swanetše go tseba le go kwešiša dikarabo tša dipotšišo tše tše bohlokwa.

4-5. (a) Psalme 51:6 e re thuša bjang go kwešiša gore lentšu pelo le šupa go eng? (b) Go itlhokomela mmeleng go re thuša bjang go kwešiša bohlokwa bja go hlokomela pelo ya rena ya seswantšhetšo?

⁴ Go Diema 4:23, lentšu pelo le šupa go “seo re lego sona ka garegare” goba “motho wa ka gare.” (Bala Psalme 51:6.) Ka mantšu a mangwe, lentšu “pelo” le šupa go dilo tšeo re di naganago, maikwelo, maikemišetšo le dikganyogo tša rena. Ke seo re lego sona ka garegare, e sego seo batho ba bangwe ba se bonago.

⁵ Ela hloko kamoo go itlhokomela mmeleng go re thušago ka gona go kwešiša bohlokwa bja go hlokomela pelo ya rena ya seswantšhetšo. Sa pele, e le gore re se ke ra babja, re swanetše go ja dijo tše di nago le phepo le go itšhidulla ka mehla. Ka mo go swanago, e le gore re dule re phetše gabotse moyeng, re swanetše go bala Beibele le dikgatišo tšeo di theilwego go yona ka mehla e bile re bontšhe gore re na le tumelo go Jehofa. Re bontšha gore re na le tumelo go Jehofa ka go diriša seo re ithutago sona le go botša ba bangwe ka tumelo ya rena. (Baroma 10:8-10; Jak. 2:26) Sa bobedi, ge re itebelela, re ka nagana gore re phetše gabotse mola e le gore ge e le gabotse re a babja. Ka mo go swanago, re ka nagana gore ge re dula re swaregile ka go hlankela Jehofa seo se ra gore tumelo ya rena e tiile, mola e le gore dikganyogo tše di fošagetšego di gola ka dipelong tša rena. (1 Bakor. 10:12; Jak. 1:14, 15) Re swanetše go gopola gore Sathane o nyaka gore re nagane go swana le yena. A ka leka go dira seo bjang, gona re ka itšhireletša bjang?

6. Morero wa Sathane ke ofe, gona ke’ng seo a se dirago go leka go o fihlelela?

⁶ Ka ge Sathane e le lerabele leo le sa nyakego go kwa melao ya Jehofa e bile a itirela boithatelo, o nyaka gore re swane le yena. Sathane a ka se re gapeletše gore re nagane go swana le yena le go dira dilo go swana le yena. Ka gona o diriša mekgwa e mengwe go leka go dira gore re swane le yena. Ka mohlala, ka ge Sathane a laola lefase, re phela le batho bao a šetšego a  ba sentše. (1 Joh. 5:19) O holofela gore re tla kgetha go fetša nako e ntši re na le bona, le ge re tseba gore bagwera ba babe ba tla “senya” goba ba šilafatša tsela yeo re naganago ka yona le yeo re itshwarago ka yona. (1 Bakor. 15:33) Mokgwa wo o ile wa šoma go Kgoši Solomone. O ile a nyala basadi ba bantši bao ba bego ba rapela medimo ya maaka, gomme mafelelong “ba aroša pelo ya gagwe” gore a se sa hlankela Jehofa.—1 Dikg. 11:3.

7. Ke mokgwa ofe o mongwe woo Sathane a o dirišago go ruta batho go nagana go swana le yena, gona ke ka baka la’ng re swanetše go ba šedi?

⁷ Sathane o diriša dimubi le mananeo a thelebišene go ruta batho go nagana go swana le yena. O a tseba gore ditori ga di no re tloša bodutu, eupša di re ruta go nagana go swana le yena, go ikwa go swana le yena le go dira dilo go swana le yena. Jesu o ile a diriša mokgwa wo wa go anega ditaba ka tsela e botse kudu ge a be a ruta batho. Ka mohlala, nagana ka papišo ya Mosamaria wa kgaugelo le ya morwa yo a ilego a tloga gae gomme a yo senya bohwa bja gagwe. (Mat. 13:34; Luka 10:29-37; 15:11-32) Eupša bao ba šetšego ba nagana go swana le Sathane ba ka diriša ditori go re senya. Re swanetše go ba le tekatekano. Dimubi le mananeo a mangwe a thelebišene a ka re tloša bodutu le go re ruta dilo tše itšego ntle le go senya menagano ya rena. Eupša re swanetše go ba šedi. Ge re kgetha boithabišo, re swanetše go ipotšiša gore: ‘Na mubi goba lenaneo le la thelebišene le nthuta gore go lokile go ineela dikganyogong tša nama?’ (Bagal. 5:19-21; Baef. 2:1-3) O swanetše go dira’ng ge o lemoga gore lenaneo le itšego le go ruta go nagana go swana le Sathane? Le pheme go swana le kamoo o tla itšhireletšago ka gona bolwetšing bjo bo fetelago!

8. Batswadi ba ka dira’ng gore ba šireletše bana ba bona gore Sathane a se ke a senya dipelo tša bona?

⁸ Lena batswadi, le na le boikarabelo bjo bogolo kudu bja go šireletša bana ba lena gore Sathane a se ke a senya dipelo tša bona. Re kgodišegile gore le dira sohle seo le ka se kgonago  go šireletša bana ba lena gore ba se tsenwe ke malwetši. Le dira gore dintlo tša lena di dule di hlwekile, e bile le lahla selo le ge e le sefe seo se ka bakelago lena goba bana ba lena malwetši. Ka mo go swanago, le swanetše go šireletša bana ba lena dimubing, mananeong a thelebišene, dipapading tša elektroniki le diwepesaeteng tšeo di ka dirago gore ba thome go nagana go swana le Sathane. Jehofa o le neile boikarabelo bja go hlokomela bana ba lena moyeng. (Die. 1:8; Baef. 6:1, 4) Ka gona le se ke la tšhaba go ba beela melao yeo e theilwego Beibeleng. Botšang bana ba lena seo ba ka se bogelago le seo ba sego ba swanela go se bogela, gomme le ba thuše go kwešiša mabaka a lena a go dira diphetho tšeo. (Mat. 5:37) Ge bana ba gago ba dutše ba gola, ba rute gore ba itlwaetše go diriša melao ya Jehofa tabeng ya go kgetha magareng ga seo se nepagetšego le seo se fošagetšego. (Baheb. 5:14) O se ke wa lebala gore gantši bana ba ithuta kudu go seo o se dirago go e na le seo o se bolelago.—Doit. 6:6, 7; Baroma 2:21.

9. Sathane o fora batho bjang, gona ke ka baka la’ng seo se le kotsi?

⁹ Le gona Sathane o nyaka go senya dipelo tša rena ka go dira gore re tshepe bohlale bja lefase go e na le go tshepa bohlale bja Jehofa. (Bakol. 2:8) Ka mohlala, Sathane o fora batho ka gore go huma ke selo sa bohlokwa kudu bophelong. Batho bao ba tshepago taba yeo ba ka feleletša ba humile eupša ba bangwe go no pala. Go sa šetšwe gore batho bao ba a huma goba ga ba hume, ka moka ga bona ba kotsing. Ke ka baka la’ng re rea’lo? Ke ka gobane batho ba ba ka šoma ka thata moo ba ka feleletšago ba se sa na nako ya go itlhokomela gabotse mmeleng le ya go fetša nako le malapa a bona goba ba se sa na taba le segwera sa bona le Modimo. (1 Tim. 6:10) Ruri rena re thabišwa ke gore Tatago rena wa legodimong o re thuša gore re se ke ra kitimiša mahumo!—Mmo. 7:12; Luka 12:15.

10-11. (a) Re swanetše go dira’ng gore re šireletše dipelo tša rena? (b) Bahlapetši ba be ba šoma go dira’ng, gona re ka swantšha letswalo la rena bjang le mohlapetši?

¹⁰ Ge e ba re nyaka go šireletša dipelo tša rena re swanetše go tseba dilo tšeo di ka di senyago ke moka re di lwantšhe kapelapela. Lentšu leo le fetoletšwego e le “šireletša” go Diema 4:23 le re gopotša ka mošomo woo o bego o dirwa ke mohlapetši. Mehleng ya Kgoši Solomone, bahlapetši ba be ba ema godimo ga maboto a motse gomme ba goeletša ge ba bona kotsi e tšwelela. Mohlala wo o ka re thuša go tseba seo re swanetšego go se dira go thibela Sathane go senya dipelo tša rena.

¹¹ Mehleng ya kgale, bahlapetši ba be ba šoma kutšwanyana le baletakgoro ba motse. (2 Sam. 18:24-26) Ba be ba thušana go šireletša motse ka go kgonthišetša gore ba tswalela dikgoro tša motse ge manaba a le kgauswi le go hlasela motse woo. (Neh. 7:1-3) Re ka swantšha letswalo la rena leo le tlwaeditšwego ka Beibele * le mohlapetši. Letswalo le ka re lemoša ge Sathane a nyaka go senya dipelo tša rena, ke gore, ge a nyaka go hlohleletša menagano ya rena, maikwelo le dilo tšeo re dumago go di dira. Ge letswalo le re lemoša ka kotsi e itšego re swanetše go le theetša ke moka re dire sohle seo re ka se kgonago go phema kotsi yeo.

12-13. Re ka lekega go dira’ng, eupša re swanetše go arabela bjang?

¹² Nagana ka mohlala wa kamoo re ka šireletšago  dipelo tša rena gore Sathane a se ke a di senya. Jehofa o re ruta gore “bootswa le ditšhila tša mohuta o mongwe le o mongwe goba megabaru le go bolelwa di se ke tša bolelwa gare ga [rena].” (Baef. 5:3) Eupša o tla dira’ng ge e ba bao o tsenago le bona sekolo goba bašomigotee le wena ba thoma go bolela ka dilo tšeo di sego tša hlweka? Re a tseba gore ga se ra swanela go ‘gana go boifa Modimo, eupša re swanetše go gana dikganyogo tša lefase.’ (Tito 2:12) Letswalo la rena le ka re lemoša ge kotsi e etla. (Baroma 2:15) Eupša na re tla le theetša? Ka dinako tše dingwe re ka lekega go theetša seo dithaka tša rena di se bolelago goba go bogela diswantšho tše sa hlwekago tšeo ba di bontšhanago. Eupša ye ke nako ya gore re šireletše dipelo tša rena ka go fetoša taba yeo go bolelwago ka yona goba go no itshepelela.

¹³ Go nyakega sebete gore re gane ge dithaka tša rena di leka go re hlohleletša go dira dilo tše di fošagetšego. Re ka kgodišega gore Jehofa o bona maiteko ao re a dirago a go mmotegela, e bile o tla re nea matla le bohlale gore re se nagane go swana le Sathane. (2 Dikor. 16:9; Jes. 40:29; Jak. 1:5) Eupša ke eng se sengwe gape seo re ka se dirago gore re šireletše dipelo tša rena?

14-15. (a) Re swanetše go tsenya’ng ka dipelong tša rena, gona re ka dira seo bjang? (b) Diema 4:20-22 e re thuša bjang gore re holege kutšwanyana ge re ithuta Beibele? (Bona lepokisi leo le rego “ O ka Naganišiša Bjang?”)

¹⁴ Ge e ba re nyaka go šireletša dipelo tša rena ga se feela gore re swanetše go gana dilo tše mpe eupša re swanetše le go nagana ka dilo tše dibotse. Nagana ka mohlala wola wa bahlapetši le baletakgoro. Moletakgoro o be a tswalela dikgoro tša motse gore manaba a se ke a tsena, eupša ka dinako tše dingwe o be a bula dikgoro gore go tsenywe dijo le dilo tše dingwe. Ge e ba dikgoro tšeo di be di ka dula di tswaletšwe, setšhaba se be sa tla hwa ka tlala. Ka mo go swanago, le rena re swanetše go bula dipelo tša rena ka mehla gore go tsene dikgopolo tša Modimo.

¹⁵ Beibele e na le dikgopolo tša Jehofa, ka gona nako le nako ge re e bala re dumelela dikgopolo tšeo di kgoma tsela yeo re naganago ka yona, re ikwago ka yona le dilo tšeo re di dirago. Re ka dira’ng gore re holege kutšwanyana ge re ithuta Beibele? Re swanetše go rapela pele re e bala. Kgaetšedi yo mongwe o re: “Pele ke bala Beibele, ke rapela Jehofa gore a nthuše go ‘bona dilo tše di makatšago’ ka Lentšung la Gagwe.” (Ps. 119:18) Le gona re swanetše go naganišiša ka seo re se balago. Ge e ba re rapela, re ithuta e bile re naganišiša, Lentšu la Modimo le tlo tsenelela ka ‘dipelong tša rena,’ gomme seo sa dira gore re rate dikgopolo tša Jehofa.—Bala Diema 4:20-22; Ps. 119:97.

16. Ba bangwe ba hotšwe bjang ke go bogela Kgašo ya JW?

¹⁶ Tsela e nngwe ya go dumelela dikgopolo tša Modimo di tsena ka dipelong tša rena ke ka go bogela dibidio tšeo di lego go Kgašo ya JW. Banyalani ba bangwe ba re: “Jehofa o arabile dithapelo tša rena ka go re nea kgašo ya kgwedi le kgwedi. Mananeo a a re matlafatša kudu le go re kgothatša ge re nyamile le ge re lewa ke bodutu. Re phela re theeditše dikoša tšeo di lego go Kgašo ya JW. Re di theetša ge re apea, re hlwekiša goba ge re enwa teye.” Mananeo a a re thuša go šireletša dipelo tša rena. A re ruta go nagana go swana le Jehofa le go gana dikgopolo tša Sathane.

17-18. (a) Go ya ka 1 Dikgoši 8:61, re ikwa bjang ge re diriša seo Jehofa a re rutago sona? (b) Re ka ithuta’ng mohlaleng wa Kgoši Hesekia? (c) Ka go dumelelana le thapelo ya Dafida yeo e lego go Psalme 139:23, 24, re swanetše go rapelela eng?

¹⁷ Nako le nako ge re bona gore go kwa Jehofa go a hola, tumelo ya rena e a tia. (Jak. 1:2, 3)  Re a thaba ka gobane Jehofa o thabela go re bitša bana ba gagwe gomme seo se dira gore re dule re nyaka go mo kgahliša. (Die. 27:11) Nako le nako ge re kopana le teko ke sebaka se sebotse sa go bontšha gore re hlankela Tatago rena yo lerato ka pelo ka moka. (Ps. 119:113) Re bontšha gore re rata Jehofa go feta selo le ge e le sefe gomme re dira seo ka go kwa melao ya gagwe le go dira thato ya gagwe.—Bala 1 Dikgoši 8:61.

¹⁸ Na go a kgonega gore re se ke ra dira diphošo? Aowa, ka moka ga rena ga se ra phethagala. Ge e ba o ka dira phošo, nagana ka mohlala wa Kgoši Hesekia. O ile a dira diphošo eupša a itshola gomme a tšwela pele a hlankela Jehofa ka “pelo ka moka.” (Jes. 38:3-6; 2 Dikor. 29:1, 2; 32:25, 26) Ka gona, a re direng sohle seo re ka se kgonago go gana dikgopolo tša Sathane. Anke re rapeleng Jehofa gore a re thuše go ba le “pelo yeo e kwago.” (1 Dikg. 3:9; bala Psalme 139:23, 24.) Re ka kgona go dula re botegela Jehofa ge re ka dira sohle seo re ka se kgonago go šireletša dipelo tša rena.