1-2. (a) Molaetša wo o lego go Jesaya 41:10 o ile wa kgoma bjang kgaetšedi Yoshiko? (b) Ke bomang bao ba ka holwago ke molaetša woo?

KGAETŠEDI Yoshiko yo a botegago o ile a botšwa ditaba tše di sa kgahlišego. Ngaka ya gagwe e ile ya mmotša gore o šaletšwe ke dikgwedi tše sego kae feela gore a phele. O ile a ikwa bjang? Yoshiko o ile a gopola lengwalo la gagwe la mmamoratwa, e lego lengwalo la Jesaya 41:10. (Bala.) Ke moka o ile a botša ngaka ya gagwe gore ga a boife selo, ka gobane Jehofa o mo swere ka seatla sa gagwe. * Molaetša wo woo re o hwetšago lengwalong le o ile wa thuša kgaetšedi yo gore a bote Jehofa ka mo go feletšego. Le rena lengwalo le le ka re thuša go dula re sa tšhoge selo ge re lebeletšane le mathata a magolo. E le gore re kwešiše kamoo le ka re thušago ka gona, sa pele anke re kweng gore ke ka baka la eng Modimo a ile a laela Jesaya gore a ngwale molaetša wo.

² Mathomong, Jehofa o ile a laela Jesaya gore a ngwale mantšu a e le gore a kgothatše Bajuda bao ka morago ba bego ba tlo išwa bothopša Babilona. Eupša Jehofa o ile a dira gore molaetša wo o se hole feela Bajuda bao, eupša o hole le batho ba gagwe ka moka go fihla le lehono. (Jes. 40:8; Baroma 15:4) Gona bjale re phela mehleng yeo “go lego thata go lebeletšana le [yona]” go feta le ge e le neng pele. Ka gona re tloga re hloka kgothatšo ye yeo re e hwetšago pukung ya Jesaya.—2 Tim. 3:1.

3. (a) Re hwetša dikholofetšo dife go Jesaya 41:10, e lego temana ya ngwaga ya 2019? (b) Ke ka baka la’ng re hloka go kwa dikholofetšo tše?

³ Sehlogong se re tlo ithuta ka dikholofetšo tše tharo tšeo di lego go Jesaya 41:10 tšeo Jehofa a di dirišago go matlafatša tumelo  ya rena. (1) Jehofa o tla ba le rena, (2) ke Modimo wa rena, (3) o tla re thuša. Re hloka go kwa dikholofetšo * tše ka gobane go swana le Yoshiko, re lebeletšana le mathata a magolo bophelong. Le gona re lebeletšana le mathata a magolo ao a bakwago ke dilo tše mpe tšeo di diregago mo lefaseng. Ba bangwe ba rena re kgotleletše kganetšo yeo e tšwago go babuši bao ba nago le matla mebušong. Ka gona anke ga bjale re ithuteng ka dikholofetšo tšeo tše tharo.

4. (a) Ke kholofetšo efe ya mathomo yeo re tlago go bolela ka yona? (Bona le mongwalo wa ka tlase.) (b) Jehofa o hlalosa bjang kamoo a ikwago ka gona ka rena? (c) Mantšu a a Modimo a dira gore o ikwe bjang?

⁴ Sa pele Jehofa o re kgonthišetša ka mantšu ao a rego: “O se ke wa boifa gobane ke na le wena.” * Ka go bolela mantšu a, Jehofa o re botša gore o na le rena ka go re hlokomela le ka go re bontšha lerato. Ela hloko tsela yeo a hlalosago kamoo a ikwago ka gona ka rena. O re: “O bile bohlokwa mahlong a ka, ke go tšea o le yo a hlomphegago, ke go ratile.” (Jes. 43:4) Ga go na selo le ge e le sefe legodimong goba lefaseng seo se ka dirago gore Jehofa a se sa rata batho bao ba mo hlankelago. O tla dula a ba botegela. (Jes. 54:10) Lerato la gagwe le bogwera bja gagwe di re dira gore re be le sebete. O tla re šireletša, go etša ge a ile a šireletša mogwera wa gagwe e lego Aborama (goba Aborahama). Jehofa o ile a re go yena: “Se boife Aborama. Ke nna kotse ya gago.”—Gen. 15:1.

5-6. (a) Re tseba bjang gore Jehofa o nyaka go re thuša ge re na le mathata? (b) Re ka ithuta’ng mohlaleng wa Yoshiko?

⁵ Re a tseba gore Jehofa o nyaka go re thuša ge re na le mathata ka gobane o re holofetša gore: “Le ge o ka phatša meetseng, ke tla ba le wena; le ge o ka phatša dinoka, di ka se go gogole. Le ge o ka phatša mollong, o ka se ke wa fsa, e bile le kgabo e ka se go tlabole.” (Jes. 43:2) Mantšu a a ra go re’ng?

⁶ Jehofa ga a re tshepiše gore o tla tloša mathata ka moka ao a re imelago. Eupša o re tshepiša gore a ka se dumelele “dinoka” tša mathata goba ‘mollo’ wa diteko o re gobaletša sa ruri goba o dira gore re se sa mo hlankela. O re  holofetša gore o tla ba le rena, a re thuša go “phatša” goba go feta mathateng ao re lebeletšanego le ona. Bjale ke’ng seo Jehofa a tlago go se dira? O tlo dira gore re ikwe re sa tšhoge selo e le gore re dule re mmotegela, gaešita le ge re lebeletšane le lehu. (Jes. 41:13) Yoshiko, yoo re boletšego ka yena pejana, o ile a bona nnete ya taba ye. Morwedi wa gagwe o re: “Re ile ra thabišwa ke go bona ka tsela yeo mma a bego a išitše maswafo fase ka yona. Re ile ra bona gore ruri Jehofa o mo neile khutšo ya monagano. Mma o ile a botša baoki le balwetši ka Jehofa le dikholofetšo tša gagwe go fihlela letšatšing leo a hlokofetšego ka lona.” Re ithuta’ng mohlaleng wa Yoshiko? Re ithuta gore ge re bota kholofetšo ya Modimo yeo e rego: “Ke tla go thuša,” le rena re tlo ba le sebete le go tia matla ge re dutše re kgotlelela mathata a rena.

7-8. (a) Ke kholofetšo efe ya bobedi yeo re tlago go bolela ka yona, gona e ra go re’ng? (b) Ke ka baka la’ng Jehofa a ile a botša Bajuda bao ba bego ba le bothopša gore: “O se ke wa lealea”? (c) Ke mantšu afe ao a lego go Jesaya 46:3, 4 ao a swanetšego go ba a ile a dira gore batho ba Modimo ba se tšhoge selo?

⁷ Ela hloko kholofetšo ya bobedi yeo Jesaya a e ngwadilego. E re: “O se ke wa lealea gobane ke Modimo wa gago.” Mantšu a ao a bolelago ka go lealea a ra go re’ng? Temaneng ye, lentšu la mathomong la Seheberu bakeng sa ‘go lealea’ le na le kgopolo ya “go lebelela morago gantšintši ka ge o boifa gore selo se itšego goba motho yo mongwe a ka go gobatša, goba “go tšhoga go swana le motho yo a lego boemong bjo kotsi.”

⁸ Ke ka baka la’ng Jehofa a ile a botša Bajuda bao ba bego ba le bothopša kua Babilona gore ba se ke ba “lealea”? Ke ka gobane o be a tseba gore badudi ba naga yeo ba be ba tlo boifa. Ke’ng seo se bego se tla ba dira gore ba boife? Ge mengwaga e 70 ya ge Bajuda ba be ba le bothopša e le kgauswi le go fela, Bababilona ba be ba tlo hlaselwa ke madira a matla a Bamede le Baperesia. Jehofa o be a tla diriša madira ao go lokolla batho ba gagwe bokgobeng kua Babilona. (Jes. 41:2-4) Ge Bababilona le batho ba ditšhaba tše dingwe ba be ba tseba gore manaba a bona a a batamela, ba ile ba leka go dula ba na le sebete ka go botšana gore: “Tia matla.” Le gona ba ile ba dira medingwana e mentši ba holofetše gore e tla ba šireletša. (Jes. 41:5-7) Ge dilo tšeo di be di direga, Jehofa o ile a dira gore Bajuda bao ba bego ba le bothopša ba se tšhoge selo ka go bolela mantšu a rego: “Wena Isiraele, [go fapana le baagišani ba gago] . . . o mohlanka wa ka . . . O se ke wa lealea gobane ke Modimo wa gago.” (Jes. 41:8-10) Hlokomela gore Jehofa o itše: “Ke Modimo wa gago.” Ka go bolela mantšu a Jehofa o be a kgodiša batho ba gagwe gore ga se a ba lebala, e be e sa le Modimo wa bona, le bona e be e sa le setšhaba sa gagwe. O ba boditše gore: ‘Ke tla le rwala gomme ka le hlakodiša.’ Ga go pelaelo gore mantšu a ao a kgothatšago a ile a matlafatša Bajuda bao ba bego ba le bothopša.—Bala Jesaya 46:3, 4.

9-10. Ke ka baka la’ng go sa hlokagale gore re boife? Nea mohlala.

⁹ Lehono, batho ba bantši ba tšhogile ka gobane maemo a lefase a mpefala le go feta. Ke therešo gore le rena mathata a a a re ama. Eupša ga go hlokagale gore re boife. Jehofa o re botša gore: “Ke Modimo wa [lena].” Ke ka baka la’ng mantšu a a re nea lebaka le legolo la go se boife selo?

¹⁰ Nagana ka mohlala wo: Jim le Ben ba nametše sefofane seo se tšeatšeago ke diphefo tše matla. Ge sefofane seo se dutše se išwa godimo le fase ke diphefo tšeo, banamedi ba kwa lentšu leo le kwagalago gabotse le re: “Bofang mapanta a lena. Sefofane sa rena se tla ba se fofa diphefong tše matla ka nakwana.” Jim o thoma go tshwenyega kudu. Eupša lentšu leo le bolela  gape gore: “Le se ke la boifa. Ke nna mofofiši wa sefofane sa lena.” Ge mofofiši yo a re’alo, Jim o šikinya hlogo ka go tenega gomme o re: “Se motho yo a se bolelago ga se kgonege!” Eupša o lemoga gore Ben yena ga a tshwenyege le gatee. Jim o mmotšiša gore: “Ke ka baka la’ng o sa tshwenyege?” Ben o a myemyela gomme o re: “Ke ka gobane ke tseba mofofiši wa sefofane se gabotse. Ke tate!” Ke moka Ben o re: “E re ke go botše se sengwe ka tate. Ke kgodišegile gore ge nkabe o tseba gore tate ke sekgwari sa go fofiša difofane, le wena o be o ka se tshwenyege.”

11. Ke dilo dife tšeo re ithutago tšona mohlaleng wa banamedi ba ba babedi ba sefofane?

¹¹ Re ithuta’ng mohlaleng wo? Go swana le Ben, ga re boife selo ka gobane re tseba gabotse Tatago rena wa legodimong, e lego Jehofa. Re a tseba gore mehleng ye ya bofelo, Jehofa o tla re thuša mathateng ao re lebeletšanego le ona, ao a swanago le diphefo tše matla. (Jes. 35:4) Ka ge re botile Jehofa, re dula re sa boife selo mola batho ba lefase le ba thothomela ka letšhogo. (Jes. 30:15) Le gona re swana le Ben ka go botša ba bangwe mabaka ao re nago le ona a go bota Modimo. Ke moka le bona ba ka kgodišega gore Jehofa o tla ba thekga go sa šetšwe mathata ao ba lebeletšanago le ona.

12. (a) Ke kholofetšo efe ya boraro yeo re tlago go bolela ka yona? (b) Ge Beibele e diriša polelwana ‘letsogo la Jehofa’ e re gopotša’ng?

¹² Ela hloko kholofetšo ya boraro yeo Jesaya a e ngwadilego. E re: “Ke tla go matlafatša. Ruri ke tla go thuša.” Jesaya o be a šetše a hlalositše kamoo Jehofa a tlago go matlafatša batho ba gagwe ka go bolela gore: “Jehofa o tla tla e le yo matla, letsogo la gagwe le tla buša bakeng sa gagwe.” (Jes. 40:10) Gantši Beibele e diriša lentšu “letsogo” go swantšhetša matla. Ka gona polelwana yeo e rego “letsogo la gagwe le tla buša” e re gopotša gore Jehofa ke Kgoši e  matla. O ile a diriša matla a gagwe a magolo go lwela batho ba gagwe nakong e fetilego, le lehono o sa tšwela pele a šireletša bao ba mmotilego.—Doit. 1:30, 31; Jes. 43:10.

13. (a) Ke neng moo Jehofa a phethagatšago kholofetšo ya gagwe ya gore o tla re matlafatša? (b) Ke kholofetšo efe yeo e re neago matla e bile e re dirago gore re ikwe re sa boife selo?

¹³ Ke therešo gore ka mehla Jehofa o a re matlafatša, eupša o dira bjalo kudukudu ge manaba a rena a re tlaiša. O phethagatša kholofetšo ya gagwe ya gore: “Ke tla [le] matlafatša.” Dinageng tše dingwe, manaba a rena a leka ka thata go thibela modiro wa rena wa go bolela ditaba tše dibotse goba go thibela mokgatlo wa rena. Lega go le bjalo, ga re tšhošwe ke ditlhaselo tše bjalo. Jehofa o re neile kgonthišetšo yeo e re dirago gore re ikwe re na le matla e bile re sa boife selo. O re holofetša gore: “Sebetša le ge e le sefe seo se rulelwago go lwa le wena se ka se atlege.” (Jes. 54:17) Mantšu a a re gopotša dilo tše tharo tše bohlokwa.

14. Ke ka baka la’ng re sa makale ge manaba a rena a re hlasela?

¹⁴ Sa pele, ka ge re le balatedi ba Kriste, ga re makale ge batho ba re hloya. (Mat. 10:22) Jesu o boletše e sa le pele gore balatedi ba gagwe ba be ba tla tlaišwa o šoro mehleng ya bofelo. (Mat. 24:9; Joh. 15:20) Sa bobedi, boporofeta bja Jesaya bo re lemošitše e sa le pele gore manaba a rena a be a ka se re hloye feela, eupša gape a be a tlo diriša dibetša tša go fapafapana go lwa le rena. Manaba a rena a ka bolela dilo tšeo di bonagalago eka ke therešo, a ka bolela maaka ka rena goba a re tlaiša o šoro. (Mat. 5:11) Jehofa a ka se thibele manaba a rena go diriša dibetša tša ona go lwa le rena. (Baef. 6:12; Kut. 12:17) Eupša ga se ra swanela go boifa. Ka baka la’ng?

15-16. (a) Ke taba efe ya boraro yeo re swanetšego go e gopola,gona Jesaya 25:4, 5 e thekga bjang taba yeo? (b) Jesaya 41:11, 12 e re mafelelo a bao ba lwago le rena e tla ba afe?

¹⁵ Ela hloko taba ya boraro yeo re swanetšego go e gopola. Jehofa o itše “sebetša le ge e le  sefe” seo se tlago go rulelwa go lwa le rena “se ka se atlege.” Go no swana le ge leboto le re šireletša madimong a šoro, Jehofa le yena o re šireletša ‘ledimong leo le tšubutlago.’ (Bala Jesaya 25:4, 5.) Manaba a rena a ka se tsoge a atlegile go dira gore re se sa hlankela Jehofa.—Jes. 65:17.

¹⁶ Le gona Jehofa o re matlafatša ka go re hlalosetša seo se tlago go diragalela “bao ba [re] galefelago.” (Bala Jesaya 41:11, 12.) Go sa šetšwe gore manaba a rena a leka ka thata gakaakang go lwa le rena goba gore go hlafa gakaakang, mafelelo e tla ba a swanago. Manaba ka moka a batho ba Modimo a “tla etša lefeela gomme [a] tla fedišwa.”

17-18. (a) Go ithuta Beibele go ka re thuša bjang gore re bote Modimo kutšwanyana? Nea mohlala. (b) Go naganišiša ka temana ya ngwaga ya 2019 go ka re thuša bjang?

¹⁷ Go tseba Jehofa gabotse go tla re thuša go mmota kutšwanyana. Le gona tsela e nnoši ya go dira seo ke ka go ithuta Beibele ka kelohloko gomme ra naganišiša ka seo re ithutilego sona. Beibele e na le dipego tšeo re ka di botago tšeo di bontšhago kamoo Jehofa a ilego a šireletša batho ba gagwe nakong e fetilego. Dipego tšeo di re thuša gore re bote Jehofa kutšwanyana tabeng ya gore le lehono o tla dula a re hlokomela.

¹⁸ Nagana ka mohlala wo Jesaya a o dirišitšego go bontšha kamoo Jehofa a re šireletšago ka gona. Mohlaleng woo Jesaya o swantšha Jehofa le modiši gomme bahlanka ba gagwe o ba swantšha le dikwana. Ge a bolela ka Jehofa o re: “O tla kgoboketša dikwana ka letsogo la gagwe; o tla di rwala sehubeng sa gagwe.” (Jes. 40:11) Ge re ekwa matsogo a Jehofa a matla a re gokaretše, re ikwa re šireletšegile e bile re sa boife selo. E le go re thuša gore re dule re sa boife selo go sa šetšwe mathata ao re nago le ona, mohlanka yo a botegago le wa temogo o kgethile lengwalo la Jesaya 41:10 gore e be temana ya ngwaga ya 2019. Yona e re: “O se ke wa lealea gobane ke Modimo wa gago.” Naganišiša ka mantšu a ao a re neago kholofelo. A tla go matlafatša gore o tle o kgone go lebeletšana le mathata ao a sa tlago.