MESONG ya Laboraro la di-24 tša January 2018, bana babo rena le dikgaetšedi ba kua Bethele ya United States le ya Canada ba ile ba thabela go kwa tsebišo ya gore Ngwanabo rena Kenneth Cook, Jr., o kgethilwe go ba setho sa Sehlopha se Bušago sa Dihlatse tša Jehofa.

Ngwanabo rena Cook o belegetšwe Pennsylvania, U.S.A. e bile o goletše gona. O ithutile therešo go motho yo a bego a tsena le yena ka klaseng nakwana pele a ka fetša sekolo sa sekontari, gomme a kolobetšwa ka di-7 tša June 1980. O thomile go ba mmulamadibogo wa ka mehla ka di-1 tša September 1982. Ka morago ga go fetša mengwaga e mebedi e le mmulamadibogo, o ile a thoma go hlankela Bethele ka di-12 tša October 1984 kua Wallkill, New York.

Ngwanabo rena Cook o feditše mengwaga e 25 a šoma mešomo ya go fapafapana lefapheng la go gatiša le mafapheng a go hlokomela legae la Bethele. Ka 1996 o ile a nyala Jamie, gomme ba hlankela mmogo Bethele ya kua Wallkill. Ka December 2009, Ngwanabo rena Cook le mosadi wa gagwe ba ile ba abelwa go yo hlankela Watchtower Educational Center kua Patterson, New York gomme Ngwanabo rena Cook a abelwa go hlankela Lefapheng la Bongwadi. Ka April 2016, ngwanabo rena Cook le mosadi wa gagwe ba ile ba boela Bethele ya kua Wallkill ka nakwana gomme ka morago ga moo ba abelwa go yo hlankela kua Brooklyn, New York. Ka morago ga dikgwedi tše hlano, ba ile ba abelwa go yo hlankela ntlongkgolo kua Warwick, New York. Ka January 2017, Ngwanabo rena Cook o ile a kgethwa go ba mothuši wa Komiti ya Bongwadi ya Sehlopha se Bušago.