1. Ke’ng seo se bontšhago gore ga go sa na lerato ka malapeng a mantši lehono?

BEIBELE e ile ya bolela e sa le pele gore mehleng ya bofelo batho ba ka se sa ba le “lerato la tlhago” goba ba ka se sa ratana ka malapeng. (2 Tim. 3:1, 3) Lehono se se a direga. Ka mohlala, batswadi ba bantši lehono ba a hlalana, ba kwatelana ke moka seo se dira gore bana ba bona ba ikwe ba sa ratwe. Le malapa ao a dulago ka ntlong e tee a ka no ikhwetša a sa tsebane. Ka mohlala, motho yo mongwe yoo a šomago go eletša malapa ge a na le mathata o re: “Mma, tate le bana ga ba boledišane. Ba fetša nako ya bona e ntši ba le dikhomphutheng, dithaboleteng, difounong goba ba bapala dipapadi tša bidio. Le ge malapa ao a dula ka ntlong e tee, ga a tsebane gabotse.”

2-3. (a) Go ya ka Baroma 12:10, ke bomang bao re swanetšego go ba bontšha lerato? (b) Re tlo ithuta’ng sehlogong se?

² Ga re nyake go swana le batho ba bantši mo lefaseng ka gore re se bontšhe ba bangwe lerato. (Baroma 12:2) Go e na le moo re swanetše go ithuta go oketša tsela yeo re ratago ba gabo rena le bana babo rena le dikgaetšedi ka phuthegong. (Bala Baroma 12:10.) Lerato leo re bolelago ka lona mo ke la mohuta mang? Ke lerato leo batho ba ka lapeng ba le bontšhanago. E bile ke lerato leo re swanetšego go le bontšha bana babo rena le dikgaetšedi ka phuthegong. Ge re bontšhana lerato re dira gore batho ka moka ba hlankele Jehofa gotee ba thabile.—Mika 2:12.

³ Go re thuša gore re kgone go bontšhana lerato leo, a re ithuteng mehlaleng e mengwe ya ka Beibeleng.

4. Jakobo 5:11 e re botša eng ka lerato la Jehofa?

⁴ Beibele e re botša ka dika tša Jehofa tše dibotse. Ka mohlala, e re botša gore “Modimo ke lerato.” (1 Joh. 4:8) Go tseba seo ka Modimo go dira gore re nyake go ba bagwera ba gagwe. Beibele e re botša gape gore Jehofa “o na le lerato le legolo.” (Bala Jakobo 5:11.) Ruri ye ke tsela e botse ya go hlalosa kamoo Jehofa a re ratago ka gona!

5. Jehofa o re bontšha bjang gore o na le kgaugelo, gona re ka mo ekiša bjang?

⁵ Jakobo 5 temana 11 e re botša ka lerato la Modimo le ka seka se sengwe gape seo se dirago gore re mo rate, e lego kgaugelo ya gagwe. (Ek. 34:6) Tsela e nngwe yeo Jehofa a re bontšhago kgaugelo ke ka go re lebalela diphošo tšeo re di dirago. (Ps. 51:1) Ka Beibeleng kgaugelo ga e bolele feela go no lebalela motho ge a dirile phošo. Kgaugelo e akaretša go ba le maikwelo a tseneletšego ge o bona motho a nyamile, ke moka e dira gore o leke go mo thuša. Jehofa o hlalosa gore o ikemišeditše go re thuša go feta ka tsela yeo mma a ikemišeditšego go thuša ngwana wa gagwe. (Jes. 49:15) Kgaugelo ya Jehofa e dira gore a nyake go re thuša ge re na le mathata. (Ps. 37:39; 1 Bakor. 10:13) Re ka bontšha bana babo rena le dikgaetšedi kgaugelo ge ba re diretše diphošo gomme ra se dule re kgopišegile. (Baef. 4:32) Eupša tsela e nngwe ya bohlokwa ya go bontšha bana babo rena le dikgaetšedi kgaugelo ke ka go ba thuša ge ba na le mathata. Ge lerato le dira gore re bontšhe ba bangwe kgaugelo, gona re ekiša Jehofa yoo a bontšhago lerato go feta batho ka moka.—Baef. 5:1.

6. Jonathane le Dafida ba ile ba bontšhana bjang gore ba be ba ratana?

⁶ Beibele e re botša ka mehlala ya batho bao ba ilego ba kgona go ba bagwera ba bagolo le ge ba be ba na le sebe. Nagana ka mohlala wa Jonathane le Dafida. Beibele e re: “Moya wa Jonathane [o ile] wa thoma go kwana le moya  wa Dafida gomme Jonathane a rata Dafida go etša ge a ithata.” (1 Sam. 18:1) Jehofa o ile a kgetha Dafida gore e tle e be kgoši ka morago ga Saulo. Ka morago ga moo Saulo o ile a jela Dafida mona ke moka a leka go mmolaya. Eupša morwa wa Saulo e lego Jonathane ga se a ka a thekga tatagwe ge a be a nyaka go bolaya Dafida. Jonathane le Dafida ba ile ba tshepišana go dula e le bagwera le go thekgana.—1 Sam. 20:42.

7. Ke’ng seo se bego se ka dira gore Jonathane le Dafida e se ke ya ba bagwera?

⁷ Go ka no se be bonolo go dumela gore Jonathane le Dafida e be e le bagwera ba bagolo ka gobane go be go na le dilo tše dintši tšeo di bego di ka ba thibela gore e be bagwera. Ka mohlala, Jonathane o be a feta Dafida ka mengwaga e ka bago e 30. Jonathane a ka ba a ile a ipotša gore a ka se gwerane le motho yo monyenyane yo a sa tsebego selo ka bophelo. Eupša Jonathane ga se a ka a nagana ka tsela yeo. O be a hlompha Dafida kudu.

8. Ke ka baka la’ng o nagana gore Jonathane e be e le mogwera wa nnete wa Dafida?

⁸ Jonathane a ka ba a ile a jela Dafida mona. Ka ge Jonathane e be e le morwa wa Kgoši Saulo, a ka ba a ile a gapeletša gore ke yena a swanetšego go ba kgoši ka morago ga tatagwe. (1 Sam. 20:31) Eupša Jonathane o be a na le boikokobetšo e bile a botegela Jehofa. Ka baka leo o ile a thekga phetho ya Jehofa ya gore Dafida ke yena e tlago go ba kgoši. E bile Jonathane o be a botegela Dafida le ge seo se be se galefiša Saulo kudu.—1 Sam. 20:32-34.

9. Re tseba bjang gore Jonathane ga se a ka jela Dafida mona?

⁹ Ka ge Jonathane a be a rata Dafida, ga se a ka a mo jela mona. Jonathane e be e le mohlabani yo a nago le sebete e bile o be a kgona go foša mesebe. Batho ba ile ba bolela gore yena le tatagwe “ba be ba na le lebelo go feta dintšhu” e bile ba na le “matla go feta ditau.” (2 Sam. 1:22, 23) Ka baka leo, Jonathane a ka ba a ile a ikgantšha ka dilo tše dikgolo tšeo a ilego a kgona go di dira. Eupša Jonathane ga se a ka a nyaka go phadišana le Dafida e bile o be a sa mo jele mona ka dilo tše dibotse tšeo a di dirilego. Go ena le moo, Jonathane o ile a kgahlwa ke gore Dafida o be a na le sebete e bile a ithekgile ka Jehofa. Ka mohlala, Jonathane o ile a thoma go rata Dafida kudu ka morago ga gore a bolaye Goliata. Re ka bontšha bjang gore re rata bana babo rena le dikgaetšedi ka tsela yeo Jonathane a bego a rata Dafida ka yona?

10. ‘Go ratana ka mo go tseneletšego go tšwa pelong’ go ra go re’ng?

¹⁰ Beibele e re botša gore “[re rataneng] ka mo go tseneletšego go tšwa pelong.” (1 Pet. 1:22) Jehofa o re beela mohlala tabeng ye. O re rata ka mo go tseneletšego moo e lego gore ge re ka dula re mmotegela a ka se tlogele go re rata. (Baroma 8:38, 39) Polelwana “ka mo go tseneletšego” yeo Petro a e dirišitšego, e fetiša kgopolo ya gore motho o swanetše go dira maiteko a magolo kudu gore a bontšhe ba bangwe lerato. Ka dinako tše dingwe ga go bonolo gore re bontšhe bana babo rena le dikgaetšedi lerato. Ge ba bangwe ba re kgopiša re swanetše go tšwela pele re “kgotlelelana ka lerato, [re] leka ka matla go boloka botee bja moya setlemong se se tlemaganyago sa khutšo.” (Baef. 4:1-3) Ge e ba re leka go phela le bana babo rena le dikgaetšedi ka khutšo, re ka se dule re lebeletše diphošo tša bona. Re tlo leka ka thata go ba lebelela ka tsela yeo Jehofa a ba lebelelago ka yona.—1 Sam. 16:7; Ps. 130:3.

11. Ke ka baka la’ng ka dinako tše dingwe go ka se be bonolo go bontšha ba bangwe lerato?

 ¹¹ Ga se ka mehla go lego bonolo go bontšha bana babo rena le dikgaetšedi lerato, kudukudu ge re tseba mafokodi a bona. Go bonagala Bakriste ba bangwe ba pele le bona ba ile ba ba le bothata bjo. Ka mohlala, Ebodia le Sintike ba be se na bothata bja go šoma gotee le Paulo “ditabeng tše dibotse.” Eupša go bonagala bona ba be ba sa kwane. Ka baka leo Paulo o ile a ba kgothaletša gore ba be le “monagano o tee Moreneng.”—Bafil. 4:2, 3.

12. Re ka dira’ng gore re bontšhe bana babo rena le dikgaetšedi lerato?

¹² Re ka dira’ng gore re bontšhe bana babo rena le dikgaetšedi lerato lehono? Ge re ipha nako ya gore re tsebe bana babo rena le dikgaetšedi gakaone, go ba bonolo gore re kgone go ba kwešiša le go ba rata. Re ka kgona go ba bagwera le ge re sa lekane ka mengwaga goba re etšwa ditšong tša go se swane. Gopola gore Jonathane o be a feta Dafida ka mengwaga e ka bago e 30 eupša e ile ya ba bagwera ba bagolo. Na go na le motho yo mogolo goba yo monyenyane go wena ka phuthegong yoo o nyakago go gwerana le yena? Ka go gwerana le motho yoo, o tla be o bontšha gore o rata “mokgatlo wohle wa bana babo rena.”—1 Pet. 2:17.

13. Ke ka baka la’ng ka phuthegong go ka se kgonege gore re gwerane le motho yo mongwe le yo mongwe?

¹³ Na go rata bana babo rena le dikgaetšedi ka phuthegong go ra gore re tlo gwerana le bona ka moka? Aowa, seo ga se kgonege. Go tlwaelegile go gwerana le ba bangwe kudu go feta ba bangwe ka ge le rata dilo tša go swana. Jesu o be a bitša baapostola ba gagwe ka moka “bagwera,” eupša o be a rata Johane kudu. (Joh. 13:23; 15:15; 20:2) Seo ga se re gore Jesu o be a swara Johane gabotse kudu go feta ba bangwe. Ka mohlala, ge Johane le Jakobo ngwanabo ba be ba kgopela Jesu gore a ba nee maemo a bohlokwa Mmušong wa Modimo, Jesu o ile a re go bona: “Madulo a ka letsogong la ka la le letona goba ka go la le letshadi ga se nna yo nka a neago.” (Mar. 10:35-40) Go swana le Jesu, le rena ga se ra  swanela go swara bagwera ba rena ba bagolo gabotse kudu go feta ba bangwe. (Jak. 2:3, 4) Ge re ka dira seo go ka se be le botee ka phuthegong.—Juda 17-19.

14. Bafilipi 2:3, e ka re thuša bjang gore re se ke ra nyaka go phadišana le ba bangwe?

¹⁴ Ge e ba re rata bana babo rena le dikgaetšedi ka phuthegong, re ka se nyake go phadišana le bona. Gopola gore Jonathane ga se a ka a phadišana le Dafida, a nyaka gore e be yena kgoši go e na le gore e be Dafida. Ka moka ga rena re ka ekiša mohlala wa Jonathane. O se ke wa jela bana beno mona ka baka la bokgoni bja bona, ‘eupša ka boikokobetšo o tšee gore ba bangwe ba go feta ka bogolo.’ (Bala Bafilipi 2:3.) Dula o gopola gore go na le seo yo mongwe le yo mongwe a ka se dirago go thuša phuthego. Ge re na le boikokobetšo re tlo kgona go bona dika tše dibotse tša bana babo rena le dikgaetšedi, ke moka ra ithuta mehlaleng ya bona e mebotse.—1 Bakor. 12:21-25.

15. O ithuta’ng go seo se ilego sa diragalela kgaetšedi Tanya le lapa la gagwe?

¹⁵ Ge re welwa ke mathata, Jehofa o re kgothatša a diriša bana babo rena le dikgaetšedi go re bontšha lerato le go re thuša. Nagana ka seo se ilego sa diragalela lapa le lengwe leo le bego le ile Kopanong ya Ditšhabatšhaba ya 2019 ya “Lerato le ka Mohla ga le Fele!” kua United States. Kgaetšedi Tanya yo a nago bana ba bararo o re: “Ge re be re le tseleng re boela moo re bego re robala gona, koloi e nngwe e ile ya thula koloi ya rena. Ga go na yo a bego a gobetše, eupša ka baka la gore re be re tšhogile, re ile ra tšwa ka koloing ke moka ra ema ka thoko ga tsela. Motho yo mongwe o ile a re bitša gore re tsene ka koloing ya gagwe  e le gore re šireletšege. E be e le ngwanabo rena yo mongwe yoo le yena a bego a etšwa kopanong. E be e se yena a nnoši yo a ilego a ema. Dihlatse tše dingwe tše hlano tša go tšwa Sweden tšeo le tšona di bego di etšwa kopanong di ile tša ema. Dikgaetšedi tšeo di bego di le gona moo di ile tša gokarela nna le morwedi wa ka, gomme seo se ile sa dira gore re ikwe re le kaone. Ke ile ka botša bana babo rena bao le dikgaetšedi gore, go lokile le ka feta, eupša ba ile ba no dula le rena. Ba ile ba dula le rena le ge ba thušo ya pele ba fihlile, e bile ba ile ba kgonthišetša gore re hwetša se sengwe le se sengwe seo re bego re se hloka. Nakong yeo ka moka re ile ra bona gore Jehofa o a re rata. Seo se ilego sa re diragalela se re thušitše gore re rate bana babo rena le dikgaetšedi kudu, e bile sa dira gore re rate Jehofa le go mo leboga le go feta.” Na o gopola nako yeo o bego o hloka thušo ke moka ngwaneno a go thuša ka go go bontšha lerato?

16. Re na le mabaka afe a go bontšhana lerato?

¹⁶ Nagana ka dilo tše dibotse tšeo di diregago ge re bontšhana lerato. Re kgothatša bana babo rena le dikgaetšedi ge ba na le mathata. Re thuša bana babo rena le dikgaetšedi go hlankela Jehofa ba thabile. Re bontšha gore re balatedi ba Jesu ba nnete, gomme seo se dira gore batho ba bangwe le bona ba nyake go hlankela Jehofa. Sa bohlokwa le go feta re tumiša Jehofa yoo e lego “Tate wa dikgaugelo le Modimo wa khomotšo yohle.” (2 Bakor. 1:3) Ka gona, anke ka moka ga rena re ikemišetšeng go oketša tsela yeo re bontšhanago lerato ka yona!