1. Ba bangwe ba rena ba ka botšiša potšišo efe yeo e ilego ya botšišwa ke Kgoši Dafida?

KA MOKA ga rena re nyaka go thabela bophelo gomme re ipshine. Ga go na motho yo a ka rego yena o rata go tshwenyega. Eupša ka dinako tše dingwe re ka ikwa re tshwenyegile kudu. Ke ka baka leo ba bangwe ba bahlanka ba Jehofa ba ka botšišago potšišo yeo Kgoši Dafida a ilego a e botšiša Jehofa. O itše: “Ke tla kgaotša neng go nyama ka pelong letšatši ka moka?”—Ps. 13:2.

2. Re tlo boledišana ka’ng sehlogong se?

² Le ge ka moka ga rena re fela re tshwenyega, go na le dilo tšeo re ka di dirago gore re se ke ra tshwenyega kudu. Sehlogong se, re tlo thoma pele ka go boledišana ka tše dingwe tša dilo tšeo di ka dirago gore re tshwenyege. Ke moka ka morago ga moo re tlo boledišana ka dilo tše tshela tšeo re ka di dirago tšeo di ka re thušago gore re se ke ra tshwenyega kudu ge re na le mathata.

3. Ke dilo dife tšeo di ka dirago gore re tshwenyege, gona na re ka kgona go di thibela?

³ Dilo tše dintši tšeo di dirago gore re tshwenyege re ka se kgone go di thibela. Ka mohlala, re ka se kgone go thibela gore tšhelete ya dijo, ya diaparo goba ya madulo e se ke ya oketšega ngwaga o mongwe le o mongwe. Le gona, re ka se kgone go laola gore batho bao re šomago le bona goba bao re tsenago le bona sekolo ba tla re leka gakae gore re se ke ra botegela Modimo  goba ba tla re leka gakae gore re itshware gampe. E bile re ka se kgone go thibela ditsotsi tšeo di tshwenyago batho tikologong ya gabo rena. Re welwa ke mathata a ka gobane re phela lefaseng leo batho ba bantši ba sa phelego ka go dumelelana le melao ya motheo ya Beibele. Lebaka le lengwe ke gore modimo wa lefase le e lego Sathane o a tseba gore batho ba bangwe ba ka se hlankele Jehofa ka gobane “lefase le” le ba dira gore ba tshwenyege kudu. (Mat. 13:22; 1 Joh. 5:19) Ka baka leo, ga re makale ge re bona mo lefaseng go tletše mathata ao a dirago gore batho ba tshwenyege!

4. Go ka direga’ng ge e ba re ka tshwenyega kudu ka mathata a rena?

⁴ Re ka tshwenyega kudu ka mathata a rena moo re ka feleletšago re sa nagane le ka dilo tše dingwe. Ka mohlala, re ka tshwenyega ka gore re ka no se be le tšhelete ya go reka dilo tšeo re di hlokago, goba gore re ka babja gomme ra se kgone go ya mošomong goba ra lahlegelwa ke mošomo. Le gona re ka tshwenyega ka gore re ka no se kgone go botegela Modimo ge re lekwa. Kgauswinyane Sathane o tlo dira gore batho ba gagwe ba hlasele batho ba Modimo, ka gona re ka no tshwenyega ka gore re tlo dira eng ge a re hlasela. Motho a ka ipotšiša gore: ‘Na ke phošo gore ke tshwenyege ka dilo tša mohuta wo?’

5. Jesu o be a e ra go re’ng ge a be a re: ‘Tlogelang go belaela’?

⁵ Re a tseba gore Jesu o ile a botša balatedi ba gagwe gore: ‘Tlogelang go belaela.’ (Mat. 6:25) Na Jesu o be a e ra gore ga se ra swanela go tshwenyega le ganyenyane? Aowa! Gopola gore nakong e fetilego, ba bangwe ba bahlanka ba Jehofa ba botegago ba ile ba tshwenyega. Eupša Jehofa o ile a tšwela pele a ba amogela. * (1 Dikg. 19:4; Ps. 6:3) Ge e le gabotse, ge Jesu a be a bolela mantšu ao o be a re kgothatša. O be a sa nyake gore re tshwenyege kudu ka go hwetša dilo tšeo re di hlokago moo re feleletšago re palelwa ke go etiša pele go hlankela Jehofa. Ka gona, re ka dira’ng ge re ikwa re tshwenyegile kudu?—Bona lepokisi leo le rego, “ O ka Dira Eng Gore o se ke wa Tshwenyega Kudu?”

6. Go ya ka Bafilipi 4:6, 7, ke’ng seo se ka re thušago gore re se tshwenyege kudu?

⁶ (1) Rapela gantši. Ge o tshwenyegile ka bothata bjo itšego, o ka rapela Jehofa wa mo kgopela gore a go thuše. (1 Pet. 5:7) A ka araba dithapelo tša gago ka go go nea “khutšo ya Modimo yeo e fetago kwešišo yohle ya batho.” (Bala Bafilipi 4:6, 7.) Jehofa o tla diriša moya wa gagwe o mokgethwa go go nea khutšo yeo.—Bagal. 5:22.

7. Re swanetše go gopola’ng ge re rapela Modimo?

⁷ Ge o rapela Jehofa, mo tšhollele seo se lego ka pelong ya gago. Mmotše ka go lebanya seo o se nyakago. Mmotše gore bothata ke eng e bile o mo hlalosetše gore bothata bjoo bo dira gore o ikwe bjang. Ge e ba bothata bjoo bo ka ba bo na le tharollo, mo kgopele gore a go thuše go e hwetša le go go nea bohlale le matla a go e diriša. Ge e ba go se na seo o ka se dirago ka bothata bja gago, kgopela Jehofa gore a go thuše gore o se ke wa tshwenyega kudu ka bjona. Ge o bolela le Jehofa ka go lebanya ge o mo rapela, o tlo kgona go bona gabotse ge a go arabile. Ge e ba Jehofa a sa go arabe kapejana ka morago ga gore o mo rapele, o se ke wa tlogela go mo rapela. Jehofa o nyaka gore ge o mo rapela o bolele le yena ka go lebanya e bile o se ke wa no mo rapela gatee feela.—Luka 11:8-10.

8. Ke’ng se sengwe gape seo re swanetšego go se bolela ge re rapela Jehofa?

⁸ Ge o rapela Jehofa o mmotša dilo tšeo di go  tshwenyago, tsenya le mantšu a go mo leboga dithapelong tša gago. Le ge re na le mathata a mantši, ga se ra swanela go lebala dilo ka moka tše dibotse tšeo re nago le tšona. Eupša o swanetše go dira’ng ge e ba o palelwa ke go hlalosetša Jehofa gore o ikwa bjang? O swanetše go gopola gore Jehofa o tlo araba thapelo ya gago, le ge o ka no re go yena: ‘Nthuše hle!’—2 Dikor. 18:31; Baroma 8:26.

9. Re swanetše go dira’ng ge re ikwa re boifa?

⁹ (2) Tshepa bohlale bja Jehofa, e sego bja gago. Mehleng ya moporofeta Jesaya, batho ba Juda ba be ba boifa gore Baasiria ba tlo ba hlasela. Ka ge batho ba Juda ba be ba sa nyake gore Baasiria ba ba fenye, ba ile ba kgopela thušo go Baegipita. (Jes. 30:1, 2) Jehofa o ile a ba lemoša gore go tshepa Baegipita go be go ka se ba thuše ka selo. (Jes. 30:7, 12, 13) Jehofa o ile a diriša Jesaya go botša batho bao seo ba swanetšego go se dira ge ba be ba boifa. Jesaya o ile a re: “Le tla ba le matla ge le dula le sa tshwenyege gomme le” bota Jehofa.—Jes. 30:15b.

10. Ke maemong afe moo re ka bontšhago gore re tshepa Jehofa?

¹⁰ Re ka bontšha bjang gore re tshepa Jehofa? Nagana ka mehlala e latelago. A re re o hwetša mošomo wo o tlago go go patela tšhelete e ntši, eupša mošomo woo o tlo nyaka gore o šome diiri tše dintši e bile o tlo go šitiša go hlankela Jehofa. Goba a re re motho yo mongwe yo o šomago le yena yo e sego Hlatse ya Jehofa o go botša gore o a go rata. Goba o tla dira eng ge e ba motswadi wa gago goba molekane wa gago a re go wena: “O kgetha mang magareng ga ka le Modimo wa gago?” Maemo ao ka moka ga a bonolo, eupša Jehofa o tla go thuša ka go go nea keletšo gore o dire phetho e botse. (Mat. 6:33; 10:37; 1 Bakor. 7:39) Na o tla tshepa keletšo yeo ya Jehofa gomme wa e diriša?

11. Ke dipego dife tša ka Beibeleng tšeo re ka ithutago tšona tšeo di tlago go re thuša gore re se ke ra tshwenyega kudu ge re ganetšwa go dira modiro wa rena?

¹¹ (3) Ithute mehlaleng e mebotse le e mebe. Ka Beibeleng go na le dipego tše dintši tšeo di re bontšhago gore go bohlokwa gore re se ke ra tshwenyega kudu eupša re tshepe Jehofa. Ge o dutše o bala dipego tšeo, nagana ka seo se thušitšego bahlanka ba Modimo gore ba se ke ba tshwenyega kudu ge ba be ba tlaišwa o šoro. Ka mohlala, ge lekgotla le le phagamego la Bajuda le be le laela baapostola gore ba tlogele go ruta ba bangwe ka Modimo, baapostola ga se ba ka ba tšhoga. Go e na le moo ba ile ba bolela ka sebete ba re: “Modimo ke mmuši yo re swanetšego go mo kwa go e na le go kwa batho.” (Dit. 5:29) Gaešita le ka morago ga gore baapostola ba itiwe, ga se ba ka ba boifa. Ka baka la’ng? Ka gobane ba be ba tseba gore Jehofa o be a na le bona. O be a ba amogela. Ka baka leo ba ile ba tšwela pele ba botša batho ditaba tše dibotse. (Dit. 5:40-42) Morutiwa Stefano le yena o ile a dula a išitše maswafo fase e bile a sa boife ge a be a le kgauswi le go bolawa, moo Beibele e rego sefahlego sa gagwe se be se swana le “sefahlego sa morongwa.” (Dit. 6:12-15) Ke ka baka la’ng a ile a se boife? Ka gobane o be a kgodišegile gore Jehofa o a mo amogela.

12. Go ya ka Petro wa Pele 3:14 le 4:14, ke ka baka la’ng re ka thaba le ge re tlaišwa?

¹² Baapostola ba be ba na le bohlatse bjo bontšhago gore Jehofa o be a na le bona. O be a ba neile matla a go kgona go dira mehlolo. (Dit. 5:12-16; 6:8) Lehono Jehofa ga a re nee matla a go dira mehlolo. Eupša o diriša Beibele go re kgonthišetša gore ge re tlaišetšwa toko, re a thaba ka gobane seo re se dirago se a mo kgahliša. (Bala 1 Petro 3:14; 4:14.) Ka gona ga se ra swanela go dula re naganne ka gore re tlo dira eng ge re tlaišwa nakong e tlago. Go e na le moo, re swanetše go dira sohle se re ka se kgonago gore re matlafatše segwera sa rena  le Jehofa le go tshepa gore o tla re thekga le go re phološa. Re swanetše go ekiša barutiwa ba pele gomme re tshepe kholofetšo ya Jesu yeo e rego: “Ke tla le nea mantšu ao le tlago go a bolela gotee le bohlale tšeo baganetši ba lena ka moka ba ka se kgonego go di ganetša goba go di ngangiša.” Le gona Jesu o re tshepišitše gore: “Ka go kgotlelela ga lena, le tla rua meoya ya lena.” (Luka 21:12-19) O se ke wa lebala gore Jehofa o gopola dilo ka moka ka bahlanka ba gagwe bao ba hwago ba mmotegela e le gore a tle a kgone go ba tsoša.

13. Go ithuta ka mehlala ya bao ba ilego ba tshwenyega kudu gomme ba se tshepe Jehofa go tla re thuša bjang?

¹³ Re ka ithuta se sengwe mehlaleng ya bao ba ilego ba tshwenyega kudu gomme ba se tshepe Jehofa. Go ithuta ka mehlala yeo e mebe go tla re thuša gore re se ke ra bušeletša diphošo tšeo ba di dirilego. Ka mohlala, ge Kgoši Asa wa kua Juda a be a thoma go buša o ile a ithekga ka Jehofa ge a be a hlaselwa ke madira a matla, gomme Jehofa o ile a mo thuša gore a fenye. (2 Dikor. 14:9-12) Eupša ka morago ge madira a sego matla a Kgoši Baasha wa Isiraele a be a etla go hlasela Asa, ga se a ka a ithekga ka Jehofa go swana le ge a ile a dira nakong e fetilego. Go e na le moo, o ile a nea Baasiria silifera le gauta gore ba mo thuše. (2 Dikor. 16:1-3) Le gona ge a be a le kgauswi le go hwa o ile a swarwa ke bolwetši bjo bošoro kudu, eupša ga se a ka a kgopela Jehofa gore a mo thuše.—2 Dikor. 16:12.

14. Re ka ithuta’ng diphošong tša Asa?

¹⁴ Ge Asa a be a thoma go buša o ile a ithekga ka Jehofa gore a mo thuše ge a be a na le mathata. Eupša ka morago o ile a se sa kgopela thušo go Jehofa, a kgetha go itharollela mathata. Ge re sa tsebe ditaba ka botlalo, re ka nagana gore leano la Asa la gore a kgopele thušo go Baasiria e be e le lebotse kudu. Eupša go be go se bjalo. Jehofa o ile a diriša moporofeta yo mongwe go botša Asa gore: “Ka baka la ge o ithekgile ka kgoši ya Siria wa se ithekge ka Jehofa Modimo wa gago, ka lona lebaka leo madira a kgoši ya Siria a phonyokgile ka seatleng sa gago.” (2 Dikor. 16:7) Re swanetše go itlhokomela gore re se ke ra nagana gore re ka kgona go rarolla mathata a rena re sa nyake tlhahlo ya Jehofa ka go bala Lentšu la Gagwe. Ge re tshepa Jehofa, o tla re thuša gore re dire phetho e botse le ge re swanelwa ke go dira phetho e itšego kapejana.

15. Re ka dira’ng ge re bala Beibele?

¹⁵ (4) Tseba ditemana tše itšego tša Beibele ka hlogo. Ge o ka re o bala Beibele gomme wa kopana le ditemana tšeo di bontšhago gore go bohlokwa gakaakang go se tshwenyege kudu le go tshepa Jehofa, leka go swara ditemana tšeo ka hlogo. E le gore o kgone go di swara ka hlogo, di balele godimo goba o di ngwale fase gomme o di bale gantšintši. Jehofa o ile a laela Joshua gore a bale puku ya Molao ka mehla ka lentšu la tlasana e le gore a tle a kgone go dira dilo ka bohlale. Seo a bego a se bala ka pukung yeo ya Molao se be se tlo mo thuša le gore a se ke a boifa, eupša a be le sebete ge a etelela batho ba Modimo pele. (Josh. 1:8, 9) Ditemana tše dintši tšeo di lego ka Beibeleng di ka go thuša gore o theoše maswafo ge o lebeletšane le boemo bjo gantši bo ka dirago gore o tshwenyege kudu goba o boife.—Ps. 27:1-3; Die. 3:25, 26.

16. Jehofa o diriša bjang phuthego go re thuša gore re se ke ra tshwenyega le go mo tshepa?

¹⁶ (5) Iphe nako ya go ba le batho ba Modimo. Jehofa o diriša bana babo rena le dikgaetšedi go re thuša gore re se ke ra tshwenyega kudu le gore re mo tshepe. Ge re le dibokeng re holwa ke dipolelo tšeo re di kwago, dikarabo tša bana babo rena le dikgaetšedi le dipoledišano tšeo re bago le tšona le bona. (Baheb. 10:24, 25) Le gona re ka holega kudu ge re ka botša batho  bao re ba tshepago ka phuthegong dilo tšeo di re tshwenyago. “Lentšu le lebotse” leo re le botšwago ke mogwera wa rena le ka re thuša kudu gore re se sa tshwenyega.—Die. 12:25.

17. Go ya ka Baheberu 6:19, kholofelo ya rena e re thuša bjang gore re se ke ra tshwenyega le ge re lebeletšane le mathata?

¹⁷ (6) Matlafatša kholofelo ya gago. Kholofelo ya rena e swana le “tshetledi ya sekepe ya maphelo a rena.” (Tshetledi ke tšhipi e boima yeo e thekgago sekepe gore se se ke sa sepela ge se eme ka meetseng.) Ka gona kholofelo yeo ya rena e re thuša gore re se ke ra tshwenyega ge re welwa ke mathata goba re na le dikgopolo tšeo di re tshwenyago. (Bala Baheberu 6:19.) Nagana ka dilo tše dibotse tšeo Jehofa a tshepišitšego go tlo re direla tšona nakong e tlago moo re ka se tshwenyegego ka selo. (Jes. 65:17) Ipone o le lefaseng le lefsa la paradeise moo go tla bego go se sa na mathata. (Mika 4:4) Le gona kholofelo ya gago e tla matlafala ge o botša ba bangwe ka lefase le lefsa leo Modimo a re tshepišitšego lona. Dira sohle seo o ka se kgonago modirong wa go dira batho barutiwa. Ge o ka dira seo, o tla ba le “kgodišego e tletšego ya kholofelo go ba go fihla bofelong.”—Baheb. 6:11.

18. Ke mathata afe ao a ka re welago nakong e tlago, gona re ka lebeletšana le ona bjang?

¹⁸ Ka ge lefase le le le kgauswi le go fedišwa, re tlo welwa ke mathata a mantši ao a ka dirago gore re tshwenyege kudu. Temana ya rena ya ngwaga ya 2021 e tla re thuša gore re lebeletšane le mathata ao re sa tshwenyege kudu. E bile e tla re thuša gore re se ke ra itshepa eupša re tshepe Jehofa. Anke ngwageng wo ka moka re bontšheng ka ditiro tša rena gore re na le tumelo tshepišong ya Jehofa yeo e rego: “Le tla ba le matla ge le dula le sa tshwenyege gomme le botega.”—Jes. 30:15.