SEHLOGO SE ITHUTWAGO 4
Jehofa o Šegofatša Maiteko a Rena a go ba Gona Segopotšong
“Dulang le dira se e le go nkgopola.”—LUKA 22:19.
KOPELO 19 Selalelo sa Morena
SEO RE TLAGO GO ITHUTA SONA a
1-2. Ke ka baka la’ng re e ba gona segopotšong ngwaga o mongwe le o mongwe?
MENGWAGENG e ka bago e 2,000 e fetilego, Jesu o ile a neela bophelo bja gagwe gore re kgone go hwetša bophelo bjo bo sa felego. Bošegong bja pele ga ge a ka hwa, o laetše balatedi ba gagwe gore ba gopole tiragalo ye e lerato ka go diriša senkgwa le beine.—1 Bakor. 11:23-26.
2 Re kwa taelo ye ya Jesu ka gobane re mo rata kudu. (Joh. 14:15) Ngwaga o mongwe le o mongwe ka nako ya segopotšo, re bontšha gore re leboga seo a re diretšego sona ka go rapela le go naganišiša ka seo lehu la gagwe le se bolelago go rena. E bile re thabela go mema ba bantši go ba gona tiragalong ye e bohlokwa. Ka gona ga re nyake go dumelela selo le ge e le sefe se re šitiša go ba gona segopotšong.
3. Re tlo bolela ka’ng sehlogong se?
3 Sehlogong se, re tlo bolela ka dilo tše tharo tšeo bahlanka ba Jehofa ba lekilego ka thata go di diriša gore ba gopole lehu la Jesu: (1) Ka go swara segopotšo ka tsela yeo Jesu a ba rutilego gore ba se sware ka yona, (2) ka go mema ba bangwe segopotšong le (3) ka go ba gona segopotšong go sa šetšwe mathata ao ba ka kopanago le ona.
GO SWARA SEGOPOTŠO KA TSELA YEO JESU A RE RUTILEGO KA YONA
4. Re hwetša dikarabo tša dipotšišo dife ngwaga o mongwe le o mongwe ge re le segopotšong, gona ke ka baka la’ng re swanetše go di tšeela godimo? (Luka 22:19, 20)
4 Ngwaga o mongwe le o mongwe ge re le segopotšong re theetša polelo yeo e theilwego Beibeleng yeo e arabago dipotšišo tše dintši. Re ithuta gore ke ka lebaka la eng re hloka topollo le gore ke bjang topollo ya motho o tee e ka lefago dibe tša batho ba bantši. Re gopotšwa gore senkgwa le beine di emela eng le gore ke bomang bao ba swanetšego go ja le go nwa. (Bala Luka 22:19, 20.) E bile re naganišiša ka ditšhegofatšo tšeo bao ba tlago go phela mo lefaseng ba tlago go di hwetša. (Jes. 35:5, 6; 65:17, 21-23) Re swanetše go tšeela ditherešo tše godimo. Batho ba dibilione ga ba di tsebe e bile ga ba kwešiše ka tsela yeo sehlabelo sa Jesu se lego bohlokwa ka yona. E bile ga ba gopole lehu la Jesu ka tsela yeo a rutilego barutiwa ba gagwe gore ba dire ka yona. Ke ka baka la’ng go le bjalo?
5. Ka morago ga gore baapostola ba bantši ba Jesu ba hlokofale, go diregile eng ka tsela yeo Jesu a rutilego gore lehu la gagwe le gopolwe ka yona?
5 Ka moragonyana ga gore baapostola ba bantši ba Jesu ba hlokofale, Bakriste ba maaka ba ile ba tla ka phuthegong. (Mat. 13:24-27, 37-39) Ba ile ba bolela “dilo tše di kgopamego gore ba goge barutiwa gore ba ba šale morago.” (Dit. 20:29, 30) E nngwe ya “dilo tše di kgopamego” tše ba di boletšego, ke gore Jesu ga se a neela mmele wa gagwe gore e be “sebego gatee ya ba moka gore a rwale dibe tša ba bantši” go ya le ka ge Beibele e bolela, eupša ba boletše gore sehlabelo se se swanetše go dirwa gantši. (Baheb. 9:27, 28) Lehono batho ba bantši ba dumela thuto yeo ya maaka. Ba ya kerekeng nako e nngwe le e nngwe ka mehla, ka nako e nngwe ba ya letšatši le lengwe le lengwe gore ba gopole sehlabelo sa Jesu seo gantši kereke ya Khatolika e se bitšago gore ke “the Sacrifice of the Mass.” b Madumedi a mangwe ga a be le segopotšo sa Jesu gantši, Eupša batho ba bantši ga ba kwešiše gore segopotšo seo se ra gore’ng. Ba bangwe ba ipotšiša gore ‘Na ka nnete lehu la Jesu le ra gore dibe tša ka di lebaletšwe?’ Ke ka baka la’ng ba ipotšiša potšišo yeo? Ka dinako tše dingwe ba ka ba ba forilwe ke batho bao ba rego lehu la Jesu le ka se phumole dibe tša rena. Balatedi ba nnete ba ile ba thuša bjang batho ba bantši gore ba kwešiše tsela ya maleba ya go gopola lehu la Jesu?
6. Ke phetho efe yeo sehlopha sa barutwana ba Beibele se ilego sa e fihlelela ka 1872?
6 Mafelelong a lekgolo la bo-19 la mengwaga, sehlopha sa barutwana ba Beibele seo se bego se eteletšwe pele ke Charles Taze Russell se ile sa ithuta Beibele ka mo go tseneletšego. Ba be ba nyaka go tseba therešo ka sehlabelo sa Jesu le kamoo ba swanetšego go gopola lehu la Jesu ka gona. Ka 1872, ba ile ba fihlelela phetho yeo e theilwego Beibeleng ya gore ka nnete Jesu o ile a neela sehlabelo bakeng sa batho ka moka. Ga se ba homola ka seo ba se hweditšego. Ba ile ba botša ba bangwe. Ba dirile se ka go bolela phatlalatša ka dipuku, dikuranta le dimakasine. Ka morago ga moo ba ile ba thoma go ekiša Bakriste ba mathomo ka go swara segopotšo gatee ka ngwaga.
7. Nyakišišo ya Bakriste ba nakong e fetilego e re hola bjang?
7 Lehono re holwa ke nyakišišo yeo Bakriste bao ba e dirilego mengwageng e mentši e fetilego. E re hola bjang? Jehofa o re thušitše go kwešiša therešo ka sehlabelo sa Jesu le gore se tlo re direla eng. (1 Joh. 2:1, 2) Re ithutile le ka dihlopha tše pedi tša batho bao ba thabišago Modimo e lego bao ba yago go phela legodimong ba sa hwe le bao ba tlago go phela ka mo go sa felego mo lefaseng. Re rata Jehofa kudu ge re bona kamoo a re ratago ka gona le kamoo sehlabelo sa Jesu sa topollo se holago yo mongwe le yo mongwe wa rena ka gona. (1 Pet. 3:18; 1 Joh. 4:9) Go no swana le Bakriste bao ba botegago ba nakong e fetilego, re mema batho ba bangwe gore ba tle ba be le rena segopotšong seo se tlago go swarwa ka tsela yeo Jesu a rutilego gore se swarwe ka yona.
GO MEMA BA BANGWE GORE BA TLE SEGOPOTŠONG
O ka dira eng gore o tšee karolo go mema batho gore ba be gona segopotšong? (Bona dirapa 8-10) e
8. Ke’ng seo bahlanka ba Jehofa ba se dirilego gore ba meme batho Segopotšong? (Bona seswantšho.)
8 Bahlanka ba Jehofa ke kgale ba memela batho gore ba be gona segopotšong sa lehu la Jesu. Go tloga ka 1881, bana babo rena ba United States ba ile ba memelwa go ba gona lapeng la ngwanabo rena kua Allegheny, Pennsylvania, tiragalong ye e bohlokwa. Ka morago phuthego e nngwe le e nngwe e ile ya itshwarela segopotšo. Ka March 1940, bagoeledi ba ile ba botšwa gore ba ka mema motho yo mongwe le yo mongwe tšhemong ya gabo bona yo a bontšhago kgahlego. Ka 1960, e bile la mathomo Bethele e nea diphuthego dimemo tšeo di gatišitšwego. Go tloga ka nako yeo, dimemo tše dibilione di ile tša phatlalatšwa. Ke ka baka la’ng re šoma ka thata go mema ba bangwe gore ba be gona segopotšong?
9-10. Ke bomang bao ba holwago ke maiteko a rena a go memela batho Segopotšong? (Johane 3:16)
9 Lebaka le lengwe le legolo leo le dirago gore re meme batho segopotšong ke ka gobane re nyaka gore ba ithute ka seo Jehofa le Jesu ba re diretšego sona. (Bala Johane 3:16.) Re holofela gore seo ba se bonago le go se kwa Segopotšong se ba dira gore ba nyake go ithuta ka mo go oketšegilego ka Jehofa ke moka ka morago e be bahlanka ba gagwe. Eupša Segopotšo se hola le ba bangwe.
10 Re mema le bao ba tlogetšego go hlankela Jehofa. Re dira seo ka gobane re nyaka go ba gopotša gore Modimo o sa ba rata. Ba bantši ba amogela taletšo ya rena e bile re thabela go ba bona. Ge ba le Segopotšong ba gopola kamoo ba bego ba thabela go hlankela Jehofa ka gona nakong e fetilego. Nagana ka mohlala wa Monica. c O ile a bušetšwa gore e be mogoeledi nakong ya leuba la bolwetši bja COVID-19. Ka morago ga gore a be Segopotšong ka 2021, o itše: “Segopotšo se se be se le bohlokwa go nna. Ka morago ga mengwaga e 20 ke sa be gona tšhemong, ke be ke thabela go memela batho segopotšong, ke be ke mema batho ka pelo ka moka ka gobane ke leboga seo Jehofa le Jesu ba ntiretšego sona.” (Ps. 103:1-4) Go sa šetšwe gore batho ba arabela gabotse goba aowa ge re ba memela Segopotšong, rena re šoma ka thata go memela batho Segopotšong re tseba gore Jehofa o thabela maiteko ao re a dirago.
11. Ke bjang Jehofa a šegofaditšego maiteko a rena a go memela batho Segopotšong? (Hagai 2:7)
11 Jehofa o šegofaditše maiteko a rena a go memela batho Segopotšong. Ka 2021, go sa šetšwe dithibelo tša COVID-19, go bile le batho ba 21,367,603. Ye e dira palo ya Dihlatse tša Jehofa tša lefaseng ka moka gabedi le seripa! Jehofa ga a lebelele kudu gore ke batho ba bakae bao ba bilego gona. Eupša o kgahlegela yo mongwe ke yo mongwe wa rena yo a bago gona Segopotšong. (Luka 15:7; 1 Tim. 2:3, 4) Re kgodišegile gore Jehofa o re thuša go hwetša batho ba dipelo tšeo di lokilego mošomong wa rena wa go memela batho Segopotšong.—Bala Hagai 2:7.
GO BA GONA SEGOPOTŠONG GO SA ŠETŠWE MATHATA AO RE NAGO LE ONA
Jehofa o šegofatša maiteko a rena a go ba gona segopotšong (Bona serapa 12) f
12. Ke maemo afe ao a ka dirago gore go be thata gore re be gona Segopotšong? (Bona seswantšho.)
12 Jesu o boletše e sa le pele gore mehleng ya bofelo re tlo kopana le mathata a go swana le go ganetšwa ke ba lapa, go tlaišwa, dintwa, mauba a malwetši le tše dingwe. (Mat. 10:36; Mar. 13:9; Luka 21:10, 11) Ka dinako tše dingwe mathata a a dira gore re palelwe ke go ba gona segopotšong sa lehu la Jesu. Ke eng seo bana babo rena le dikgaetšedi ba se dirilego go fenya mathata a le gona Jehofa o ba thušitše bjang?
13. Jehofa o šegofaditše bjang maikemišetšo le sebete seo Artem a se bontšhitšego sa go swara segopotšo ge a be a le kgolegong?
13 Kgolegong. Bana babo rena bao ba lego kgolegong ka baka la tumelo ya bona ba dira sohle seo ba ka se kgonago gore ba gopole lehu la Jesu. Nagana ka mohlala wa Artem. Nakong ya Segopotšo ka 2020, o ile a bewa ka seleng yeo e ka kgonago go bea batho ba bahlano. Go sa šetšwe gore o kgolegong, o ile a kgoboketša dilo tšeo a tlago go di diriša bjalo ka diswantšhetšo ke moka a lokišetša polelo yeo a tlago go e nea gore a holege. Eupša batho bao a bego a dula le bona ka seleng ba be ba kgoga e bile ba rogana kudu. O ile a dira’ng? O ile a ba kgopela ge e ba ba ka tlogela go rogana goba go kgoga ka iri e tee feela. Artem o ile a makatšwa ke ge batho bao ba dumela gore ba ka se ke ba kgoga goba go rogana nakong ya Segopotšo. Artem o re: “Ke ile ka leka go ba hlalosetša ka Segopotšo.” Le ge ba ile ba re ga ba nyake go kwa selo ka tiragalo ye, ka morago ga go bona kamoo Artem a swarago Segopotšo se ka gona ba ile ba mmotšiša dipotšišo.
14. Ke maiteko afe ao a ilego a dirwa gore go swarwe segopotšo go sa šetšwe leuba la bolwetši bja COVID-19?
14 Leuba la bolwetši bja COVID-19. Ge leuba la bolwetši bjo le thoma, bahlanka ba Jehofa ba be ba ka se kgone go kopana gore ba sware segopotšo. Eupša seo ga se sa ba thibela gore ba sware segopotšo. d Diphuthego tšeo di nago le inthanete di ile tša swara segopotšo ka bidio. Eupša go diregile eng ka batho ba dimilione bao ba se nago inthanete? Dinageng tše dingwe go ile gwa dirwa tokišetšo ya gore batho ba bogele le go kwa segopotšo dithelebišeneng le radiong. Go tlaleletša moo, diofisi tša makala di ile tša rekhota polelo ya segopotšo ka maleme a fetago a 500 gore le bao ba dulago dinageng tša kgole ba kgone go swara segopotšo. Bana babo rena bao ba botegago ba ile ba dira ditokišetšo tša go rekhota polelo ya segopotšo gore e newe bao ba e hlokago.
15. O ithutile eng mohlaleng wa morutwana wa Beibele yo a bitšwago Sue?
15 Go ganetšwa ke ba lapa. Go ba bangwe teko yeo e ka dirago gore ba se be gona segopotšong, ke go ganetšwa ke ba lapa. Nagana ka mohlala wa morutwana wa Beibele e lego Sue. Ka 2021, letšatši pele ga segopotšo, Sue o ile a botša motho yo a ithutago le yena Beibele gore a ka se kgone go ba gona segopotšong ka ge a ganetšwa ke ba lapa. Motho yo a ithutago le yena Beibele o ile a mmalela lengwalo la Luka 22:44. Ka morago ga moo o ile a mo hlalosetša gore re kopana le mathata re swanetše go latela mohlala wa Jesu ka go batamela Jehofa ka thapelo gomme re mmote. Letšatši le le latelago Sue o ile a lokišetša senkgwa le beine ke moka a bogela temana ya letšatši la segopotšo go jw.org. Bošegong bjoo ge a be a le ka kamoreng ya gagwe, o ile a bogela segopotšo ka founo. Ka morago ga moo Sue o ile a ngwalela motho yo a ithutago le yena Beibele gore: “Maabane o nkgothaditše kudu. Ke dirile sohle seo nka se kgonago gore ke be gona segopotšong gomme Jehofa o ile a nthuša. Ke palelwa le ke go hlalosa kamoo ke ikwago ka gona!” Na o nagana gore Jehofa a ka go thuša ge e ba le wena o ka kopana le bothata bjo bo swanago?
16. Ke ka baka la’ng re kgodišegile gore Jehofa o tlo šegofatša maiteko a rena a go ba gona segopotšong? (Baroma 8:31, 32)
16 Jehofa o tšeela godimo kudu maiteko a rena a go gopola lehu la Jesu. Re ka kgodišega gore re ka bontšha gore re leboga seo a re diretšego sona. (Bala Baroma 8:31, 32.) A re ikemišetšeng gore re be gona segopotšong ngwageng o, le go dira sohle seo re ka se kgonago gore re botše batho ba bangwe.
KOPELO 18 Go Leboga Topollo
a Ka Labobedi la di 4 tša April 2023, batho ba dimilione lefaseng ka moka ba tla be ba gopola lehu la Jesu Kriste. Batho ba bantši e tla be e le la mathomo ba eba gona. Ba bangwe bao ba bego ba hlankela Jehofa ka mafolofolo nakong e fetilego, ba tlo ba gona segopotšong ka morago ga go fetša mengwaga e mentši ba sa tle. Ba bangwe ba tlo kopana la mathata a mantši gore ba feleletše ba etla segopotšong. Go sa šetšwe gore maemo a gago ke afe, o ka kgodišega gore Jehofa o tlo thaba ge o ka ba gona.
b Batho bao ba tsenago dikereke ba dumela gore ka nako ya segopotšo, senkgwa se fetoga mmele wa Jesu wa kgonthe le beine e fetoga madi a Jesu a kgonthe. Ba nagana gore mmele wa Jesu o fetoga sehlabelo nako e nngwe le e nngwe ge ba gopola lehu la gagwe.
c Maina a mangwe a fetotšwe.
d Bona dihlogo tše di lego go jw.org tše di rego “2021 Memorial Commemoration.”
