1-2. (a) Re ka ikwa bjang ge re naganišiša ka bophelo le tirelo ya Jesu? (b) Re tlo ithuta ka’ng sehlogong se?

 GE MOTHO yo re mo ratago a hlokofala re mo gopola kudu! Mathomong re ka kwa bohloko ge re nagana ka motho yoo pele a ka hlokofala, kudu ge e ba a ile a tlaišega pele a ka hlokofala. Eupša ge nako e dutše e eya re ka thoma go thaba ge re nagana ka seo motho yoo a ilego a re ruta sona goba a re kgothatša, goba seo a ilego a se dira gore re thabe.

² Ka tsela e swanago re kwa bohloko ge re bala kamoo Jesu a ilego a tlaišega le go hwa ka gona. Nakong ya segopotšo re nagana kudu ka bohlokwa bja sehlabelo sa Jesu sa topollo. (1 Bakor. 11:24, 25) Le ga go le bjalo re a thaba ge re naganišiša ka dilo tšeo Jesu a di boletšego le go di dira ge a be a le mo lefaseng. Re kgothatšwa gape le ke go naganišiša ka seo Jesu a se dirago gona bjale le seo a tlago go re direla sona nakong e tlago. Go naganišiša ka dilo tše le kamoo a re ratago ka gona go ka dira gore re nyake go mo leboga ka ditiro, ka ge re tla bona sehlogong se.

3. Re na le mabaka afe a go bontšha gore re leboga topollo?

³ Re a thaba le go leboga ge re naganišiša ka bophelo le lehu la Jesu. Ge Jesu a be a le mo lefaseng, o ile a ruta batho ka ditšhegofatšo tšeo Mmušo wa Modimo o tlago go di tliša mo lefaseng. Re tloga re leboga se. Re leboga topollo ka gobane e dira gore re be le segwera se sebotse le Jehofa le Jesu. Bao  ba bontšhago tumelo go Jesu ba na le kholofelo ya go tlo phela ka mo go sa felego le go bona gape baratiwa ba bona bao ba hlokofetšego. (Joh. 5:28, 29; Baroma 6:23) Ga go seo re se dirilego gore re swanelwe ke ditšhegofatšo tše, le gona re ka se kgone go lefa Modimo le Jesu ka seo ba re diretšego sona. (Baroma 5:8, 20, 21) Eupša re ka ba bontšha gore re tloga re leboga kudu. Re ka ba bontšha seo bjang?

4. Maria Magdalena o bontšhitše bjang gore o leboga Jesu ka seo a mo diretšego sona? (Bona seswantšho.)

⁴ Nagana ka mohlala wa mosadi wa Mojuda yo e lego Maria Magdalena. O be a le maemong a bohloko ka gobane o be a tlaišwa ke batemona ba šupago. O swanetše goba a ile a nagana gore a ka se kgone go hwetša thušo. Nagana kamoo a ilego a leboga ka gona ge Jesu a tloša batemona bao go yena! O bontšhitše gore o leboga Jesu ka go ba molatedi wa gagwe le ka go diriša nako, matla le dilo tšeo a nago le tšona go thekga Jesu bodireding bja gagwe. (Luka 8:1-3) Le ge Maria a ile a bontšha gore o leboga seo Jesu a mo diretšego sona, go ka direga gore o be a sa tsebe gore Jesu o tlo mo direla mo gontši nakong e tlago. O be a tlo neela bophelo bja gagwe bakeng sa batho, “gore yo mongwe le yo mongwe yo a dumelago go yena” a thabele bophelo bjo bo sa felego. (Joh. 3:16) Maria o bontšhitše gape gore o leboga Jesu ka go mmotegela. Ge Jesu a be a tlaišwa koteng ya tlhokofatšo, Maria o be a le kgauswi le yena gomme a mmontšha thekgo gotee le ba bangwe. (Joh. 19:25) Ka morago ga gore Jesu a hwe, Maria le basadi ba bangwe ba babedi ba ile ba reka dinoko gore ba tlotše setopo sa gagwe. (Mar. 16:1, 2) Potego ya Maria e ile ya putswa kudu. O ile a thabela go kopana le Jesu yo a tsošitšwego le go boledišana le yena, e lego tokelo yeo barutiwa ba bantši ba sa kago ba ba le yona.—Joh. 20:11-18.

5. Re ka bontšha bjang gore re leboga dilo ka moka tšeo Jehofa le Jesu ba re diretšego tšona?

 ⁵ Le rena re ka bontšha gore re leboga dilo ka moka tšeo Jehofa le Jesu ba re diretšego tšona ka go diriša nako, matla le tšhelete goba dilo tšeo re nago le tšona go hlankela Jehofa. Ka mohlala re ka thuša ka go aga meago ya mokgatlo le go kgonthišetša gore e dula e le boemong bjo bobotse.

6. Ke ka baka la’ng re ka re topollo ke mpho yeo Modimo a e neilego motho ka o tee ka o tee?

⁶ Ge re nagana kamoo Jehofa le Jesu ba re ratago ka gona seo se dira gore re ba rate. (1 Joh. 4:10, 19) Re ba rata le go feta ge re lemoga gore Jesu o hwetše motho ka o tee ka o tee. Moapostola Paulo o ile a hlalosa kamoo a lebogago mpho ye ka gona lengwalong leo a le ngwaletšego Bagalatia ge a be a re: “Morwa wa Modimo, yena yo a nthatilego gomme a ikgafela nna.” (Bagal. 2:20) Ka baka la topollo, Jehofa o go gogetše go yena gore o be mogwera wa gagwe. (Joh. 6:44) Na ga o thabišwe ke go tseba gore Jehofa o bone selo se sebotse go wena moo a ilego a lefa tefo e kgolo gore o be yo mongwe wa bagwera ba gagwe? Na se ga se dire gore o rate Jehofa le Jesu kudu? Re swanetše go ipotšiša gore, ‘Na lerato le le ntutueletša gore ke dire eng?’

7. Ka ge re bone seswantšhong, ka moka ga rena re ka bontšha bjang gore re rata Jehofa le Jesu? (2 Bakorinthe 5:14, 15; 6:1, 2)

⁷ Lerato leo re ratago Modimo le Jesu ka lona le dira gore re bontšhe ba bangwe lerato. (Bala 2 Bakorinthe 5:14, 15; 6:1, 2.) Tsela e nngwe yeo re bontšhago lerato le ka yona ke ka go ba mafolofolo modirong wa go bolela ditaba tše dibotse. Re bolela le batho ka moka bao re kopanago le bona. Ga re kgetholle batho go ya ka merafo ya bona, meloko ya bona, maemo a bona a tša ditšhelete  goba tsela yeo ba godišitšwego ka yona. Ge re dira bjalo re tla be re phethagatša thato ya Jehofa ya gore “mehuta yohle ya batho e phološwe gomme e fihle tsebong e nepagetšego ya therešo.”—1 Tim. 2:4.

8. Re ka bontšha bjang gore re rata bana babo rena le dikgaetšedi?

⁸ Re bontšha gape gore re rata Modimo le Jesu ka go bontšha bana babo rena le dikgaetšedi gore re a ba rata. (1 Joh. 4:21) Re tloga re na le taba le bona e bile re a ba thekga ge ba na le mathata. Re a ba homotša ge ba hlokofaletšwe ke motho yo ba mo ratago, re a ba etela ge ba babja e bile re a ba kgothatša ge ba nyamile. (2 Bakor. 1:3-7; 1 Bathes. 5:11, 14) Re dula re ba rapelela re gopola gore “topo ya moloki e na le matla e bile e a šoma.”—Jak. 5:16.

9. Ke tsela efe e nngwe gape yeo re ka bontšhago gore re rata bana babo rena le dikgaetšedi?

⁹ Re bontšha gape gore re rata bana babo rena le dikgaetšedi ka go šoma ka thata gore re be le khutšo le bona. Re leka go ekiša mohlala wa Jehofa wa go lebalela ba bangwe. Ge e ba Jehofa a ile a dumelela Morwa wa gagwe a hwela dibe tša rena, gona le rena re swanetše go dula re ikemišeditše go lebalela bana babo rena le dikgaetšedi bao ba re senyeditšego. Ga re nyake go swana le mohlanka yo kgopo yo go bolelwago ka yena go e nngwe ya dipapišo tša Jesu. Le ge mong wa mohlanka yo a ile a phumola sekoloto sa gagwe se segolo, mohlanka yo o ile a palelwa ke go phumola sekoloto se senyenyane sa mohlankagotee le yena. (Mat. 18:23-35) Ge e ba o ena le diphapano le motho yo mongwe ka phuthegong, na o ka se be wa mathomo wa go dira khutšo pele o etla segopotšong? (Mat. 5:23, 24) Go dira bjalo go tla bontšha gore o tloga o rata Jehofa le Jesu.

10-11. Bagolo ba ka bontšha bjang gore ba rata Jehofa le Jesu? (1 Petro 5:1, 2)

¹⁰ Bagolo ba ka bontšha bjang gore ba rata Jehofa le Jesu? Tsela e bohlokwa ke ka go hlokomela dinyakwa tša dinku tša Jesu. (Bala 1 Petro 5:1, 2.) Jesu o dirile gore se se kwagale ge a be a bolela le moapostola Petro. Ka morago ga gore Petro a latole Jesu ka makga a mararo, o be a nyaka go mmontšha gore o tloga a mo rata. Ka morago ga gore Jesu a tsošwe o ile a botšiša Petro gore: “Simone morwa wa Johane, na o a nthata?” Re ka kgodišega gore Petro o be a ka dira dilo ka moka go bontšha gore o rata Mong wa gagwe. Jesu o ile a botša Petro gore: “Fepa dinku tša ka tše dinyenyane.” (Joh. 21:15-17) Petro o ile a fetša bophelo bja gagwe ka moka a hlokometše dinku tša Mong wa gagwe le go bontšha gore o tloga a mo rata.

¹¹ Bagolo, nakong ya segopotšo le ka dira’ng go bontšha gore le diriša mantšu ao Jesu a a boditšego Petro? Le ka bontšha gore le tloga le rata Jehofa ka go dula le dira maeto a bodiši le go thuša bao ba se sa hlwago ba hlankela Jehofa gore ba boele go yena. (Hesek. 34:11, 12) Le ka bontšha kgahlego go barutwana ba Beibele le go bao ba tlilego segopotšong la mathomo ka go leka ka thata gore ba ikwe ba amogelegile.

12. Ke ka baka la’ng go naganišiša ka mantšu ao Jesu a a boletšego bošegong bja pele ga ge a ka hwa go re nea sebete? (Johane 16:32, 33)

¹² Bošegong bja pele ga ge Jesu a ka hwa, o boditše barutiwa ba gagwe gore: “Mo lefaseng le a tlaišega, eupša betang dipelo! Ke fentše lefase.” (Bala Johane 16:32, 33.) Ke eng seo se thušitšego Jesu gore a kgone go lebeletšana le manaba a gagwe ka sebete le  gore a dule a botega go fihla lehung? O be a ithekgile ka Jehofa. Ka ge Jesu a be a tseba gore balatedi ba gagwe le bona ba tlo lebeletšana le diteko tše di swanago, o ile a kgopela Jehofa gore a ba šireletše. (Joh. 17:11) Ke ka baka la’ng se se re nea sebete? Ka gobane Jehofa ke yo matla go feta manaba a rena. (1 Joh. 4:4) O bona dilo ka moka. Re kgodišegile gore ge re ka ithekga ka Jehofa, re ka kgona go fenya dipoifo tša rena gomme ra ba le sebete.

13. Josefa wa Arimathea o ile a bontšha bjang sebete?

¹³ Nagana ka mohlala wa Josefa wa Arimathea. Bajuda ba be ba mo hlompha kudu. E be e le setho sa lekgotla la Sanhedrine, e lego kgoro e phagamego ya Bajuda. Eupša nakong ya bodiredi bja Jesu, Josefa o be a se na sebete. Johane o re Josefa e be e le “morutiwa wa Jesu ka sephiring ka baka la go boifa ga gagwe Bajuda.” (Joh. 19:38) Le ge Josefa a be a thabela molaetša wa Jesu, eupša o ile a ikuta a se nyake go bontšha gore o na le tumelo go Jesu. O be a tšhaba gore a ka lahlegelwa ke maemo a gagwe setšhabeng. Beibele e re botša gore ka morago ga gore Jesu a hwe, Josefa o ile “a beta pelo a ya pele ga Pilato a kgopela setopo sa Jesu.” (Mar. 15:42, 43) Ka morago ga moo Josefa o ile a se sa hlwa a ikuta.

14. O swanetše go dira’ng ge e ba o tšhaba batho?

¹⁴ Na le wena o boifa batho go swana le Josefa? Ge o le sekolong goba mošomong na o hlabišwa dihlong ke gore batho ba go tsebe o le yo mongwe wa Dihlatse tša Jehofa? Na o tšhaba go ba mogoeledi goba go kolobetšwa ka gobane o tshwenyegile ka gore ba bangwe ba ka nagana eng ka wena? O se ke wa dumelela maikwelo a bjalo a go thibela go dira seo se lokilego. Rapela Jehofa go tšwa pelong. Mo kgopele gore a go fe sebete sa gore o dire thato ya gagwe. Ge o bona kamoo Jehofa a arabago dithapelo tša gago ka gona o tlo ba le sebete gomme wa matlafala.—Jes. 41:10, 13.

15. Lethabo leo barutiwa ba bilego le lona ka morago ga gore Jesu a iponagatše go bona le ile la ba tutueletša go dira’ng? (Luka 24:52, 53)

¹⁵ Barutiwa ba be ba nyamile ge Jesu a ehwa. Ipone o le boemong bja bona. Ba be ba se ba lahlegelwa ke mogwera wa bona feela, eupša ba ile ba ikwa eka ba lahlegetšwe ke kholofelo ya bona. (Luka 24:17-21) Ge Jesu a be a iponagatša go bona o ile a ba thuša go  kwešiša kamoo a ilego a phethagatša boporofeta bja Beibele ka gona. O ile a ba nea le mošomo o bohlokwa woo ba swanetšego go o dira. (Luka 24:26, 27, 45-48) Ka morago ga matšatši a 40 Jesu a rotogetše legodimong, barutiwa ba gagwe ba ile ba thaba. Ba be ba thabišwa ke gore Mong wa bona o a phela le gore o be a tla ba thuša gore ba phethagatše mošomo woo a ba neilego wona. Ka ge ba be ba thabile, ba ile ba hlankela Jehofa ba sa kgaotše.—Bala Luka 24:52, 53; Dit. 5:42.

16. Re ka ekiša barutiwa ba Jesu bjang?

¹⁶ Re ka ekiša barutiwa ba Jesu bjang? Re ka hwetša lethabo ge re hlankela Jehofa ka mehla e sego nakong ya segopotšo feela. E le gore re dire se, re swanetše go etiša Mmušo wa Modimo pele maphelong a rena. Ka mohlala ba bantši ba ile ba beakanya lenaneo la bona la mošomo wa boiphedišo gore ba kgone go ba gona tšhemong, dibokeng le go ba le borapedi bja lapa ka mehla. Ba bangwe ba ile ba itima dilo tše di bonagalago tšeo ba bangwe ba di bonago di le bohlokwa e le gore ba kgone go dira mo gontši ka phuthegong goba go ya mo go nago le tlhokagalo ya bagoeledi. Re swanetše go kgotlelela ge re dutše re hlankela Jehofa ka gobane o re tshepiša gore o tlo re šegofatša ge e ba re etiša Mmušo wa gagwe pele maphelong a rena.—Die. 10:22; Mat. 6:32, 33.

17. O ikemišeditše go dira’ng sehleng se sa segopotšo? (Bona seswantšho.)

¹⁷ Re fela pelo ya go ba gona segopotšong ka Labobedi la di 4 tša April. Eupša o se ke wa emela nako yeo e fihla pele o ka naganišiša ka bophelo le lehu la Jesu le lerato leo Jehofa le Jesu ba re bontšhitšego lona. Dula o naganišiša ka dilo tše sehleng sa segopotšo ka moka. Ka mohlala, bea nako ka thoko gore o bale le go naganišiša ka ditiragalo tšeo di lego tšhateng ya Pukwana ya Seboka ya April 2019 letlakala 4. Ge o dutše o bala, nyaka ditemana tšeo di tlago go go thuša go ba le tebogo, lerato, sebete le lethabo. Ke moka, nyaka ditsela tšeo ka tšona o bontšhago gore o tloga o leboga. O ka kgodišega gore Jesu o tlo thabela dilo ka moka tšeo o di dirago gore o mo gopole sehleng sa Segopotšo.—Kut. 2:19.