1. Ke ka baka la’ng ka dinako tše dingwe re ka ikwa re tšhoga?

 MOTHO yo mongwe le yo mongwe o fela a ikwa a boifa. Ke nnete gore ka ge re ithutile Beibele ga re tšhabe bahu, batemona goba seo se ka re diragalelago nakong e tlago. Eupša re phela dinakong tše thata tšeo di nago le “dilo tše di boifišago” go swana le dintwa, bosenyi le malwetši. (Luka 21:11) Re ka ba re tšhaba batho go akaretša mebušo yeo e re gatelelago goba ditho tša lapa tšeo di ganetšanago le borapedi bja therešo. Ba bangwe ba tshwenywa ke gore ba ka se kgone go kgotlelela bothata bjo ba lebeletšanego le bjona gona bjale goba bjo ba ka tlago ba lebeletšana le bjona nakong e tlago.

2. Hlalosa boemo bja Dafida nakong ya ge a be a le Gathe.

² Dafida le yena o ile a tšhoga. Ka mohlala, ge Kgoši Saulo a be a mo rakediša e bile a nyaka go mmolaya, Dafida o ile a tšhabela nageng ya Bafilisita kua Gathe. Ka moragonyana, Akishe kgoši ya Gathe o ile a kwa gore Dafida e be e le lešole le matla leo le ilego la binelwa ka gobane o be a bolaile Bafilisita ba “dikete tše masome.” Dafida o ile “a boifa kudu.” (1 Sam. 21:​10-12) O be a tshwenyegile ka seo Akishe a bego a ka mo dira sona. Dafida o ile a fenya bjang letšhogo leo a bego a na le lona?

3. Go ya ka Psalme 56:​1-3, 11, Dafida o ile a fenya bjang letšhogo?

³ Go Psalme 56, Dafida o bolela kamoo a bego a ikwa ka gona ge a be a le Gathe. Psalme yeo e bolela kamoo Dafida a bego a tšhogile ka gona e bile e bolela le gore Dafida o ile a kgona bjang go fenya letšhogo leo. Ge Dafida a be a ikwa a tšhogile o ile a tshepa Jehofa. (Bala Psalme 56:​1-3, 11.) Dafida o be a na le mabaka a mabotse a go tshepa Jehofa. Jehofa o ile a thuša Dafida go hwetša tsela yeo e sa tlwaelegago eupša yeo e ilego ya  mo thuša gore a phologe: O ile a itira segaswi! Akishe o ile a thoma go tenwa ke Dafida gomme a se sa hlwa a mo lebelela e le motho yo kotsi gomme seo se ile sa thuša Dafida gore a kgone go phologa.—1 Sam. 21:13–22:1.

4. Re ka tiiša bjang tsela yeo re tshepago Jehofa ka yona? Hlalosa.

⁴ Le rena re ka fenya letšhogo ka go tshepa Jehofa. Eupša re ka tiiša tsela yeo re tshepago Jehofa ka yona bjang kudukudu ge re tšhogile? Nagana ka mohlala wo. Ge o ekwa gore o na le bolwetši bjo itšego, mathomong o ka ikwa o tšhogile. Eupša ge e ba o tshepa ngaka ya gago, seo se ka dira gore o se sa tšhoga kudu. Ngaka yeo e ka ba e thušitše balwetši ba bantšhi bao ba nago le bolwetši bjoo o nago le bjona. E ka go theetša ka kelohloko gomme ya go kgonthišetša gore e tloga e kwešiša kamoo o ikwago ka gona. E ka ba ya šišinya kalafi yeo e ilego ya thuša batho ba bantšhi. Ka mo go swanago, re ka tiiša tsela yeo re tshepago Jehofa ka yona ka seo a se dirilego, seo a se dirago gona bjale le seo a tlago go re direla sona nakong e tlago. Se ke seo Dafida a se dirilego. Ge re dutše re naganišiša ka mantšu ao a buduletšwego ao a lego go Psalme 56, nagana kamoo le wena o ka tiišago tsela yeo o tshepago Jehofa ka yona ka go fenya letšhogo.

KE DILO DIFE TŠEO JEHOFA A ŠETŠEGO A DI DIRILE?

5. Dafida o ile a naganišiša ka’ng gore a kgone go fenya letšhogo? (Psalme 56:​12, 13)

⁵ Ge bophelo bja Dafida bo be bo le kotsing, o ile a naganišiša ka dilo tšeo Jehofa a šetšego a di dirile. (Bala Psalme 56:​12, 13.) Dafida o be a dula a naganišiša ka dilo tšeo Jehofa a di dirilego bophelong bja gagwe ka moka. Ka mohlala, ka dinako tše dingwe o be a naganišiša ka mediro ya Jehofa gomme se sa mo gopotša gore Jehofa ke Ramatlaohle le gore o rata batho kudu. (Ps. 65:​6-9) Le gona o ile a naganišiša ka dilo tšeo Jehofa a šetšego a di diretše batho ba bangwe. (Ps. 31:19; 37:​25, 26) O ile a ba a naganišiša ka dilo tšeo Jehofa a šetšego a mo diretše tšona. Jehofa o ile a thekga Dafida le go mo šireletša go tloga e sa le yo monyenyane. (Ps. 22:​9, 10) Nagana kamoo go naganišiša ga Dafida go ilego gwa mo thuša ka gona gore a tshepe Jehofa kudu!

6. Ge re ikwa re tšhoga re tlo thušwa ke’ng gore re tshepe Jehofa?

 ⁶ Ge o ikwa o tšhoga, ipotšiše gore, ‘Ke’ng seo Jehofa a šetšego a se dirile?’ Naganišiša ka dilo tšeo a di bopilego. Ka mohlala ge re “[šetša] ka kelohloko” kamoo Jehofa a hlokomelago dinonyana le matšoba e lego dilo tšeo e sego tša bopša ka seswantšho sa gagwe e bile di sa kgone go mo hlankela, se se tlo re thuša go tshepa gore ka nnete le rena Jehofa o tlo re hlokomela. (Mat. 6:​25-32) Bona gape le seo Jehofa a se diretšego bahlanka ba gagwe. O ka ithuta ka mohlala wa motho wa ka Beibeleng yo a bontšhitšego tumelo goba o ka bala ka phihlelo ya mohlanka wa Jehofa wa lehono. a Go oketša moo naganišiša kamoo Jehofa a šetšego a go hlokometše ka gona. O go gogetše bjang therešong? (Joh. 6:44) O arabile bjang dithapelo tša gago? (1 Joh. 5:14) O holwa bjang ke sehlabelo sa morwa wa gagwe yo a rategago letšatši le lengwe le le lengwe?—Baef. 1:7; Baheb. 4:​14-16.

7. Phihlelo ya moporofeta Daniele e ile ya thuša bjang Vanessa gore a kgone go fenya poifo yeo a bego a na le yona?

⁷ Kgaetšedi Vanessa, b wa kua Haiti o be a lebeletšane le boemo bjo bo tšhošago. Monna yo mongwe wa moo a dulago gona o be a dula a mo founela e bile a mo romela melaetša letšatši le lengwe le le lengwe a mo gapeletša gore a ratane le yena. Vanessa o ile a gana. Eupša monna yoo o ile a thoma go kwata kudu e bile a mo tšhošetša. Vanessa o re: “Ke be ke tšhogile”. Vanessa o ile a fenya bjang letšhogo leo? O ile a leka ka thata go itšhireletša. Mogolo yo mongwe o ile a mo thuša gore a founele ba molao. Eupša Vanessa o ile a nagana le kamoo Jehofa a šireleditšego bahlanka ba gagwe ba nakong e fetilego ka gona. O re: “Motho wa mathomo yo ke ilego ka nagana ka yena ke moporofeta Daniele. O ile a lahlelwa ka moleteng wa ditau tšeo di bego di swerwe ke tlala le ge a be a se na molato. Eupša Jehofa o ile a mo šireletša. Ke ile ka kgopela Jehofa gore a ntšhireletše go boemo bjoo ke lego go bjona. Ke moka ka morago ke ile ka se sa tšhoga.”—Dan. 6:​12-22.

JEHOFA O DIRA’NG GONA BJALE?

8. Dafida o be a kgodišegile ka’ng? (Psalme 56:8)

⁸ Le ge Dafida a be a le kotsing kua Gathe, ga se a ka a šetša kudu dilo tšeo di mo dirago gore a tšhoge. Go e na le moo, o ile a šetša seo Jehofa a bego a mo direla sona ka nako yeo. Dafida o be a bona gore Jehofa o a mo hlokomela le go mo šireletša e bile o be a kwešiša kamoo a ikwago ka gona. (Bala Psalme 56:8.) Dafida le yena o be a na le bagwera ba go swana le Jonathane le Moprista yo a Phagamego Ahimeleke, bao ba ilego ba mo thekga le go mo thuša. (1 Sam. 20:​41, 42; 21:​6, 8, 9) Le ge Kgoši Saulo a be a nyaka go hlasela Dafida, eupša Dafida o ile a kgona go phološa bophelo bja gagwe. Dafida o be a kgodišegile gore Jehofa o tseba gabotse bothata bjo a bego a lebeletšane le bjona le kamoo bothata bjoo bo bego bjo mo tshwenya ka gona.

9. Jehofa o bona’ng go yo mongwe le yo mongwe wa rena?

⁹ Ge o ka kopana le bothata bjo bo dirago gore o tšhoge, gopola gore Jehofa o kwešiša gabotse bothata bjoo le gore bothata bjoo bo dira gore o ikwe bjang. Ka mohlala, Jehofa o be a sa bone feela gore Baisiraele ba a tlaišega kua Egepeta eupša o be a “tseba mahloko a bona gabotse.” (Ek. 3:7) Dafida o ile a opela ka gore Jehofa o bone “mohlako wa [gagwe]”  le ‘tlalelo ya gagwe.’ (Ps. 31:7) Le gona ge bahlanka ba Modimo ba be ba tlaišega le ge e ka ba ka lebaka la ditlamorago tša diphetho tša bona tše mpe, Modimo “le yena o be a tlalelwa.” (Jes. 63:9) Ge o tšhogile, Jehofa o kwešiša gore o ikwa bjang le gona o fela pelo ya go go thuša gore o fenye letšhogo leo.

10. Ke ka baka la’ng o kgodišegile gore Jehofa o a go hlokomela le gore o tlo go thuša go lebeletšana le mathata a gago?

¹⁰ O ka ipotšiša kamoo Jehofa a go thekgago ka gona ge o lebeletšane le boemo bjo bo tšhošago. Ka gona mo kgopele gore a go bontšhe tsela yeo a go thušago ka yona. (2 Dikg. 6:​15-17) Ke moka o ipotšiše ge e ba o ile a wa tiišwa ke polelo goba karabo yeo o e kwelego dibokeng. Na dikgatišo goba dibidio le dikoša di ile tša go kgothatša? Na go na le motho yo a ilego a go botša ka temana ya Beibele yeo e go kgodišago? Re ka tšeela fase lerato la rena la borwarre le dijo tša moya tšeo re di hwetšago mola e le gore ke dimpho tše dibotse tšeo re di hwetšago go Jehofa. (Jes. 65:13; Mar. 10:​29, 30) Di bontšha gore Jehofa o tloga a na le taba le wena. (Jes. 49:​14-16) Le gore o swanelwa ke gore o mo tshepe.

11. Aida o thušitšwe ke’ng gore a fenye letšhogo?

¹¹ Aida yo a dulago Senegal o bone kamoo Jehofa a bego a mo hlokomela ka gona ge a be a na le mathata. Ka ge e be e le ngwana wa mathomo, batswadi ba gagwe ba be ba letetše gore a dire tšhelete e ntšhi gore a kgone go ba hlokomela le go itlhokomela. Ka morago ga gore a nolofatše bophelo bja gagwe gore e be mmulamadibogo, o ile a thoma go ba le mathata a ditšhelete. Lapa la gabo le ile la thoma go mo kwatela. Le ile la ba la se sa bolela ka yena gabotse. O re: “Ke be ke tšhogile gore nka se kgone go hlokomela batswadi ba ka le gore batho ka moka ba be ba tlo thoma go ntlhanogela. Ke ile ka ba ka bea Jehofa molato gore o tlogeletše dilo gore di mpefale ka tsela ye.” Ka morago o ile a kwa polelo dibokeng. O tšwela pele ka gore: “Seboledi se ile sa re gopotša gore Jehofa o tseba dilo ka moka tšeo di re kwešago bohloko. Ganyenyane-ganyenyane bagolo le batho ba ka phuthegong ba ile ba nthuša go bona gore Jehofa o sa nthata. Ke ile ka thoma go rapela Jehofa ke kgodišegile go feta mathomong gore o tlo araba dithapelo tša ka gomme ka ba le khutšo.” Ge nako e dutše e ya Aida o ile a hwetša mošomo wo o  bego o tlo kgona go mo hlokomela ge e le mmulamadibogo e bile wa mo thuša le gore a kgone go hlokomela batswadi. O re: “Ke ithutile go tshepa Jehofa ka mo go feletšego. Gona bjale ge ke fetša go rapela ga ke sa tšhoga”

JEHOFA O TLO RE DIRELA ENG NAKONG E TLAGO?

12. Go ya ka Psalme 56:​9, Dafida o be a kgodišegile ka’ng?

¹² Bala Psalme 56:9. Temana ye e re botša ka tsela e nngwe yeo Dafida a ilego a fenya letšhogo ka yona. Le ge bophelo bja gagwe bo be bo le kotsing o ile a naganišiša ka dilo tšeo Jehofa a bego a tlo mo direla tšona. Dafida o be a tseba gore Jehofa o tlo mo phološa ka nako ya maleba. Le gona Jehofa o be a šetše a boletše gore Dafida e be e tlo ba kgoši e latelago ya Isiraele. (1 Sam. 16:​1, 13) Go Dafida go be go swana le ge eka dilo ka moka tšeo Jehofa a rilego di tlo direga, di šetše di diragetše.

13. Re ka kgodišega ka gore Jehofa o tlo dira’ng?

¹³ Jehofa o tshepišitše go go direla’ng? Ga re letele gore Jehofa a re šireletše go mathata a rena ka moka. c Eupša go sa šetšwe gore o na le mathata afe tshepedišong ye, Jehofa o tlo a tloša ka moka lefaseng le leswa. (Jes. 25:​7-9) Re kgodišegile gore mmopi wa rena o na le matla a go tsoša bahu, a go re fodiša le go fediša baganetši ba rena ka moka.—1 Joh. 4:4.

14. Re ka naganišiša ka’ng?

¹⁴ Ge o ikwa o tšhogile, naganišiša ka dilo tšeo Jehofa a tlago go di dira nakong e tlago. Nagana gore o tlo ikwa bjang ge Sathane a se sa le gona, ba babe ba se sa le gona gomme go tletše batho ba go loka le ge go se phethagale go hwelela ganyenyane-ganyenyane. Pontšho yeo e tšweletšego kopanong ya selete ya 2014 e bontšhitše kamoo re ka naganišišago ka bokamoso bja rena ka gona. Tate o be a boledišana le lapa la gagwe ka lengwalo la 2 Timotheo 3:​1-5. O itše mantšu a lengwalo le e be e tla ba a fapanego ge nkabe a be a bolela kamoo Paradeise e tlo bago ka gona. Le be le tlo balega ka tsela ye: “Lefaseng le leswa go tla ba le dinako tše di thabišago kudu. Gobane batho ba tla rata ba bangwe, ba rata dilo tša moya, ya ba bao ba ipoeditšego, bao ba ikokobeditšego, bao ba tumišago Modimo, bao ka kwago batswadi, bao ba botegago, bao ba ratago malapa a bona kudu, bao ba dumelelanago, bao ba bolelago botse ka batho ba bangwe, bao ba nago le boitshwaro, bao ba lego boleta, bao ba ratago dilo tše dibotse, bao ba tshepagalago, ba bonolo, bao ba sa ikgantšhego, bao ba ratago Modimo go e na le go rata maipshino, bao ba ineetšego go Modimo ka mo go feletšego, ba bjalo o be kgauswi le bona.” Na o boledišana le ba lapa la gago goba bana beno le dikgaetšedi ka gore lefaseng le leswa go tla be go le bjang?

15. Le ge Tanja a be a tšhogile, o ile a thušwa ke’ng go fenya letšhogo?

¹⁵ Kgaetšedi Tanja yo a dulago Leboa la Macedonia o fentše letšhogo leo a bego a na le lona ka go naganišiša ka ditšhegofatšo tša nakong e tlago. Batswadi ba gagwe ba be ba mo ganetša gore a ithute Beibele. Tanja o re: “Tše dingwe tša dilo tšeo ke bego ke boifa gore di tlo direga di ile tša direga. Mma o be a mpetha ka morago ga diboka tše dingwe le tše dingwe. Batswadi ba ka ba be ba ntšhošetša ka gore ba tlo mpolaya ge e ba nka ba yo mongwe wa Dihlatse tša Jehofa.” Mafelelong Tanja o ile a rakwa ka gae. O ile a dira’ng? O re: “Ke ile ka šetša kudu kamoo ke tlo thabago ka gona ge ke dula ke botega ka mehla. Ke ile ka nagana le kamoo Jehofa a tlago go mputsa ka gona lefaseng le leswa ka baka la dilo ka moka tšeo di ka ntahlegelago tshepedišong ya gona bjale ya  dilo le kamoo dilo ka moka tše mpe di tla bego di lebetšwe ka gona.” Tanja o ile a dula a botega le gona Jehofa o ile a mo thuša gore a hwetše lefelo la go dula. Lehono Tanja o nyalane le ngwanabo rena yo a botegago le gona ba hlankela ba thabile tirelong ya nako e tletšego.

TIIŠA TSELA YEO O TSHEPAGO JEHOFA KA YONA LEHONO

16. Re tlo thušwa ke’ng go dula re na le sebete ge re bona ditiragalo tšeo go boletšwego ka tšona go Luka 21:​26-28?

¹⁶ Nakong ya masetlapelo a magolo, “batho ba [tlo] idibala ka baka la poifo” Eupša batho ba Modimo ba tlo dula ba tiile e bile ba na le sebete. (Bala Luka 21:​26-28.) Ke ka baka la’ng rena re ka se boife? Ka gobane re tla be re šetše re ithutile go tshepa Jehofa. Tanja yo re boletšego ka yena pejana o hlalosa gore maemo ao a fetilego go ona pejana a mo thušitše go lebeletšana le maemo a mangwe a thata. O re: “Ke ithutile gore Jehofa o tlo re thuša gore re kgotlelele maemo a thata e bile o tlo re šegofatša. Ka dinako tše dingwe go ka bonagala eka batho ba laola dilo, eupša nnete ke gore Jehofa o na le matla a go feta a bona. Le ge re ka kopana le maemo a thata, a tlo feta.”

17. Temana ya rena ya ngwaga wa 2024 e tlo re thuša bjang? (Bona seswantšho sa letlakala la ka ntle.)

¹⁷ Go tšhoga ke selo seo se tlwaelegilego lehono. Eupša go swana le Dafida ga re dumelele go fenywa ke letšhogo. Temana ya rena ya 2024 e na le mantšu ao a lego thapelong ya Dafida ao a rego: “Ge ke boifa, ke ithekga ka wena.” (Ps. 56:3) Seithuti se sengwe sa Beibele ge se bolela ka temana ye se re: “Dafida ga se a dulela go nagana ka dilo tšeo di ka dirago gore a dule a tšhoga goba ka mathata a gagwe, go ena le moo o ile a dula a botile Jehofa yo a tlago go mo phološa.” Nagana ka temana ya rena ya ngwaga dikgweding tšeo di tlago kudukudu ge o lebeletšane le maemo ao a tšhošago. Iphe nako ya go naganišiša ka dilo tšeo Jehofa a di dirilego nakong ya kgale, gona bjale le dilo tšeo a tlago go di dira nakong e tlago. Ke moka go swana le Dafida le wena o ka bolela mantšu ao a rego: “Ke tshepile Modimo, ka gona ga ke boife selo.”—Ps. 56:4.