1-2. Ke mathata afe ao bahlanka ba Jehofa ba ka kopanago le ona?

 RE KA welwa ke mathata re sa letela gomme bophelo bja rena bja hlakahlakana. Ka mohlala, ngwanabo rena yo a botegago e lego Luis, a o ile a hwetša gore o na le mohuta o sa tlwaelegago wa bolwetši bja kankere. Ngaka e ile ya mmotša gore o šaletšwe ke dikgwedi tše sego kae gore a hlokofale. Monika le monna wa gagwe ba be ba swaregile ka go hlankela Jehofa. Ka letšatši le lengwe, Monika o ile a lemoga gore monna wa gagwe yo e lego mogolo, o be a dutše a dira sebe ka mengwaga e mentšhi. Olivia, e lego kgaetšedi yo a sego lenyalong o ile a swanelwa ke go tlogela legae la gagwe ka gobane go be go tlo ba le ledimo le kotsi mo a bego a dula gona. Ge a boa o ile a hwetša ntlo ya gagwe e senyegile. Maphelo a batho ba a ile a fetoga ka ponyo ya leihlo. Na le wena o ile wa ikhwetša o diragaletšwe ke selo se sebe gomme bophelo bja gago bo hlakahlakane?

² Bjalo ka bahlanka ba Jehofa ba botegago, re welwa ke mathata e bile re a babja go swana le batho ka moka. Re ka swanelwa le ke go kgotlelela go ganetšwa goba go tlaišwa ke batho bao ba hloilego bahlanka ba Modimo. Le ge Jehofa a ka se thibele mathata ao gore a se ke a direga, eupša o tshepiša gore o tlo re thuša. (Jes. 41:10) Ge Jehofa a re thuša re tlo kgona go thaba, go kgotlelela le go dula re mmotegela le ge re kopana le mathata. Sehlogong se, re tlo boledišana ka ditsela tše nne tšeo Jehofa a re thušago ka tšona ge re kopana  le mathata. Re tlo kwa le gore re ka dira eng gore re holwe ke thušo yeo Jehofa a re neago yona.

JEHOFA O TLO GO HLOKOMELA

3. Re ka thatafalelwa ke go dira’ng ge re welwa ke mathata?

³ Bothata. Ge re welwa ke mathata, re ka ikhwetša re sa kgone go nagana gabotse goba go dira diphetho tše dibotse. Ka baka la’ng? Ka gobane re ka no ba re kwele bohloko kudu. Menagano ya rena e ka no ba e imelwa ke dipelaelo. Re ka ikwa re gakanegile re sa tsebe gore re dire eng. Ekwa kamoo dikgaetšedi tše pedi tšeo re boletšego ka tšona pejana di ilego tša ikwa ka gona ka morago ga gore di welwe ke mathata. Olivia o re: “Ka morago ga gore ledimo le senye legae la ka, ke ile ka ikwa ke lahlegile e bile ke imetšwe.” Monika ge a bolela ka go se botege ga monna wa gagwe o re: “Ke be ke nyamile kudu. Ke ile ka kwa eka motho o ntlhabile ka lerumo pelong. Go ile gwa thoma go ba boima go dira mediro ya letšatši le letšatši. Ke be ke diragaletšwe ke selo seo ke bego ke se ka se letela.” Jehofa o tshepiša go re thuša bjang ge re kopana le mathata?

4. Ke’ng seo Jehofa a re tshepišago sona go ya ka Bafilipi 4:​6, 7?

⁴ Seo Jehofa a se dirago. O tshepiša go re nea seo Beibele e se bitšago “Khutšo ya Modimo.” (Bala Bafilipi 4:​6, 7.) Khutšo ye e dira gore re kgone go dula re išitše maswafo fase, le gona seo se direga ka baka la segwera se sebotse seo re nago le sona le Jehofa. Khutšo ye “e feta kwešišo yohle ya batho,” e bile ke ye e kgahlišago kudu go feta kamoo re ka naganago ka gona. Na o kile wa ikwa o išitše maswafo fase ka morago ga gore o rapele Jehofa go tšwa pelong? Seo se kgonega ka gobane Jehofa a go neile “Khutšo ya Modimo.”

5. Khutšo ya Modimo e diša bjang menagano ya rena le dipelo tša rena?

⁵ Lengwalo la Bafilipi 4:7 le tšwela pele ka gore khutšo ya Modimo e tlo “diša” goba ya šireletša “dipelo tša lena le matla a lena a monagano.” Lentšu “diša” le be le šupa go mašole ao a bego a šireletša motse gore o se ke wa hlaselwa ke manaba. Batho bao ba bego ba dula motseng ba be ba ikwa ba šireletšegile ka ge ba tseba gore mašole a hlokometše motse wa bona. Ka mo go swanago, ge khutšo ya Modimo e diša dipelo tša rena le menagano, re kgona go dula re išitše maswafo fase re tseba gore re šireletšegile. (Ps. 4:8) Go swana le Hanna, le rena re ka ikwa re na le khutšo le ge maemo a rena a ka se fetoge le semeetseng. (1 Sam. 1:​16-18) Re kgona go  nagana gabotse le go dira diphetho tše di kaone ge re išitše maswafo fase.

6. Re ka dira’ng gore re holwe ke khutšo ya Modimo? (Bona le seswantšho)

⁶ Seo re swanetšego go se dira. Ge o ikwa o nyamile, kgopela Jehofa gore a go thuše. Bjang? Rapela go fihlela o hwetša khutšo ya Modimo. (Luka 11:9; 1 Bathes. 5:17) Luis, yo re boletšego ka yena pejana, o hlalositše gore yena le mosadi wa gagwe e lego Ana, ba ile dira eng gore ba kgone go kgotlelela ge ba ekwa gore o šaletše ke dikgwedi tše sego kae gore a hlokofale. O itše: “Nakong e bjalo go ba boima go dira diphetho tša mabapi le go itlhokomela le go dira diphetho ka dilo tše dingwe. Go rapela go re thušitše go kgotlelela nakong yeo e thata.” Luis le mosadi wa gagwe ba re ba ile ba rapela go tšwa pelong ka makga a mmalwa ba kgopela Jehofa gore a ba nee khutšo ya monagano, a ba thuše go dula ba išitše maswafo fase le gore a ba nee bohlale gore ba kgone go dira diphetho tše dibotse. Ba ile ba bona gore o a ba thuša. Ge o kopana le mathata, phegelela thapelong, gomme o tla bona ge khutšo ya Jehofa e diša pelo ya gago le monagano.—Baroma 12:12.

JEHOFA O TLO GO MATLAFATŠA

7. Re ka ikwa bjang ge re welwa ke mathata?

⁷ Bothata. Ge re na le mathata re ka no se kgone go nagana goba go dira dilo ka tsela yeo re tlwaetšego go di dira ka yona ka mehla. Re ka ikhwetša re tšeatšea ke maikwelo. Ana, yo re boletšego ka yena pejana o bolela gore o ile a ba le maikwelo a fapafapanego ka morago ga gore Luis a hlokofale. O itše: “Ke ikwa ke nyama ka mehla ge ke thoma go lewa ke bodutu. Ka dinako tše dingwe ke galefišwa le ke gore Luis ga a sa le gona.” Ana o be a ikwa a le noši e bile a hlakahlakana ge a swanetše go dira diphetho tšeo Luis a bego a di dira gabonolo. O be a fela a ikwa okare o ka gare ga lewatle leo le nago le ledimo le legolo. Jehofa o re thuša bjang ge a bona re ikwa re hlakahlakane ka tsela yeo?

8. Lengwalo la 1 Petro 5:10 le re kgonthišetša ka’ng?

⁸ Seo Jehofa a se dirago. O re tshepiša gore o tla re matlafatša. (Bala 1 Petro 5:10.) Ge go ka tsoga moya ka lewatleng, sekepe se ka thoma go tšewa tšewa ke moya. Dikepe tše dintšhi di na le tshetledi yeo e ka di thušago gore di se ke tša tšewa ke moya. Tshetledi yeo e kgona go dira gore sekepe se seke sa nwelela le go dira gore banamedi ba ikwe ba bolokegile. Eupša tshetledi e kgona go šoma gabotse ge sekepe se sepela. Ka mo go swanago, Jehofa o tlo re matlafatša ge re tšwela pele re mmotegela le go mo hlankela ka go botega le ge re na le mathata.

9. Dithulusi tša go dira nyakišišo di ka re thuša bjang? (Bona le seswantšho)

 ⁹ Seo re swanetšego go se dira. Ge o imelwa ke mathata, dira sohle seo o ka se kgonago gore o tšwele pele o hlankela Jehofa. Le ge o ka se kgone go dira dilo ka moka tšeo o bego o kgona go di dira nakong e fetilego, gopola gore Jehofa o a kwešiša. (Bapiša le Luka 21:​1-4.) E nngwe ya dilo tšeo o ka di dirago ge o hlankela Jehofa, ke go beela nako ka thoko ya gore o be le thuto ya motho ka noši le go naganišiša. Ka baka la’ng? Jehofa o diriša mokgatlo wa gagwe go re nea dibidio le dikgatišo tšeo di theilwego Beibeleng gore di kgone go re thuša dinakong tša mathata. O ka diriša dithulusi tša go dira nyakišišo tšeo di hwetšagalago ka leleme la geno, tše bjalo ka JW Library^®, Watch Tower Publications Index, le Tlhahlo ya go dira Nyakišišo ya Dihlatse tša Jehofa. Monika yo re boletšego ka yena pejana o re ka mehla ge a ikwa a hlakahlakana, o diriša dithulusi tše tša go dira nyakišišo gore di kgone go mo thuša. Ka mohlala, o ile a nyaka polelwana “go befelwa.” Ka dinako tše dingwe o be a nyaka polelwana “go se botege,” ke moka a bale go fihlela a ikwa a le kaone. O re: “Ke thomile ke bala ka dilo tšeo di ka nkgothatšago, eupša ka mehla ge ke bala, ke kwa okare Jehofa o a nkgokarela. Ke lemogile gore Jehofa o kwešiša kamoo ke ikwago ka gona e bile o a nthuša.” Ruri tsela yeo Jehofa a re thušago ka yona, e dira gore re dule re išitše maswafo fase.—Ps. 119:​143, 144.

JEHOFA O TLO GO THEKGA

10. Re ka ikwa bjang ka morago ga go welwa ke bothata?

¹⁰ Bothata. Ka morago ga gore re welwe ke bothata, re ka ikwa re felelwa ke matla. Re ka ikwa go swana le ramabelo yo a bego a kgona go kitima gabotse eupša ga bjale a gobetše, a se sa kgona go kitima gabotse e bile a hlotša. Re ka no palelwa ke go phetha dikabelo tšeo re bego re kgona go di dira gabonolo goba ra se sa thabela go dira dilo tšeo re bego re thabela go di dira. Go swana le Eliya, re ka thatafalelwa ke go tsoga, gomme ra no nyaka go robala. (1 Dikg. 19:​5-7) Jehofa o tshepiša go re direla’ng ge re ikwa re se na matla?

11. Tsela e nngwe yeo Jehofa a re thušago ka yona ke efe? (Psalme 94:18)

¹¹ Seo Jehofa a se dirago. O tshepiša gore o tlo re thekga. (Bala Psalme 94:18.) Go swana le ge ramabelo yola a gobetšego a hloka go thekgwa gore a kgone go sepela, le rena  re ka hloka gore Jehofa a re thekge gore re kgone go tšwela pele tirelong ya gagwe. Jehofa o re kgonthišetša ka gore: “Nna Jehofa Modimo wa gago ke go swere ka seatla sa ka sa le letona, Yena yo a rego go wena: ‘O se ke wa boifa. Ke tla go thuša.’” (Jes. 41:13) Jehofa o ile a thuša le Kgoši Dafida. Ge Dafida a be a na le mathata e bile a elwa le manaba a gagwe, o ile a re go Jehofa: “O nthekga ka letsogo la gago le letona.” (Ps. 18:35) Rena Jehofa o re thekga bjang lehono?

12. Jehofa a ka diriša bomang go re thuša ge re se na matla?

¹² Gantšhi Jehofa o re thekga ka go diriša ba bangwe gore ba re thuše. Ka mohlala, ge Dafida a be a se na matla, mogwera wa gagwe e lego Jonathane o ile a mo etela gomme a mo thekga le go mo kgothatša. (1 Sam. 23:​16, 17) Ka mo go swanago, Jehofa o ile a kgetha Elisha gore a thuše Eliya. (1 Dikg. 19:​16, 21; 2 Dikg. 2:2) Lehono Jehofa a ka diriša, ba leloko, bagwera goba bagolo go re thekga. Eupša ge re nyamile re ka nyaka go ipea lekatana, ra se nyake motho kgauswi le rena. Go tlwaelegile go ikwa ka tsela yeo. Re ka dira’ng gore re amogele thekgo yeo Jehofa a re neago yona?

13. Re ka dira’ng gore re holwe ke thekgo yeo Jehofa a re neago yona? (Bona le seswantšho)

¹³ Seo re swanetšego go se dira. Leka ka thata gore o se ke wa ipea lekatana. Ge re ka ipea lekatana, tsela yeo re naganago ka yona e tlo fokola, ra thoma go inaganela re nnoši ra ba ra nagana kudu ka mathata a rena. Tsela ye ya go nagana e ka re šitiša go dira diphetho tše di kaone. (Die. 18:1) Re a tseba gore ka dinako tše dingwe go ka nyakega gore re be noši, kudukudu ge re na le mathata. Eupša ge re ka ipea lekatana ka nako e telele re ka palelwa ke go hwetša thušo yeo Jehofa a re neago yona. Ka gona, ge ba lapa, bagwera le bagolo ba leka go go thuša, amogela thušo ya bona le ge go ka se be bonolo. Ba lebelele e le tsela yeo Jehofa a go thekgago ka yona.—Die. 17:17; Jes. 32:​1, 2.   

JEHOFA O TLO GO HOMOTŠA

14. Re ka kopana le maemo afe ao a tšhošago?

¹⁴ Bothata. Ka dinako tše dingwe re ka ikwa re tšhoga. Beibele e bolela ka bahlanka ba botegago ba Jehofa ba nakong e fetilego bao ka dinako tše dingwe ba bego ba tšhoga goba ba boifa ka baka la mathata goba manaba a bona. (Ps. 18:4; 55:​1, 5) Ka mo go  swanago, le rena re ka ganetšwa ge re le sekolong, re le ka gae, mošomong goba ra ganetšwa ke ba mmušo. Ka dinako tše dingwe re ka ba re boifa gore re tlo hlokofala ka ge re babja. Ka dinako tšeo re ka ikwa re se na matla go swana le ngwana yo monyenyane. Jehofa o re thuša bjang dinakong tše bjalo?

15. Lengwalo la Psalme 94:19 le re kgonthišetša ka’ng?

¹⁵ Seo Jehofa a se dirago. O a re homotša le go re okobatša. (Bala Psalme 94:19.) Psalme ye e ka dira gore re nagane ka ngwana yo monyenyane wa mosetsana yo a tšhogilego e bile a palelwa ke go robala ka baka la ledimo le matla. Re ka nagana ka tatagwe a tsena ka phapošing ya gagwe, a mo kuka gomme a dula le yena go fihlela a swarwa ke boroko. Le ge ledimo leo le ka se fele, go ba le tatagwe go dira gore a ikwe a bolokegile. Mathata ao re kopanago le ona a ka swantšhwa le ledimo le matla gomme go ka nyakega gore Tatago rena wa legodimong a re kuke gore re ikwe re bolokegile. Re ka dira’ng gore re amogele khomotšo yeo Jehofa a re neago yona?

16. Re ka dira’ng gore re holwe ke khomotšo yeo Jehofa a re neago yona? (Bona le seswantšho)

¹⁶ Seo re swanetšego go se dira. Fetša nako o na le Jehofa ka go dula o rapela le go bala Lentšu la gagwe. (Ps. 77:​1, 12-14) Ge o ka dira bjalo o tlo kgona go ya go Tatago wa legodimong ge o ikwa o gateletšegile. Botša Jehofa ka dilo tšeo di go tšhošago le tšeo di go tshwenyago. Mo dumelele gore a bolele le wena le go go kgothatša a diriša Mangwalo. (Ps. 119:28) O ka hwetša gore dikarolo tše dingwe tša Mangwalo di ka go kgothatša ge o ikwa o boifa. Ka mohlala, o ka kgothatšwa ke mangwalo a swanago le Jobo, Dipsalme le Diema gotee le mantšu ao Jesu a a bolelago go Mateo Kgaolo 6. Ge o dutše o rapela Jehofa le go bala Lentšu la gagwe, o tlo bona ge a go homotša.

17. Re ka kgodišega ka’ng?

¹⁷ Re ka kgodišega gore Jehofa o tlo dula a re thekga ge re kopana le mathata bophelong. O tlo dula a na le rena. (Ps. 23:4; 94:14) Jehofa o tshepiša gore o tlo re hlokomela, a re matlafatša, a re thekga le go re homotša. Lengwalo la Jesaya 26:3 ge le bolela ka Jehofa le re: “Ba monagano o tsepamego o tla ba šireletša ka khutšo ya neng le neng, ka gobane motho a go botile.” Dula o bota Jehofa gomme o amogele dilo ka moka tšeo a go thušago ka tšona. Ge o ka dira bjalo, o tlo kgona go kgotlelela mathata ao o ka kopanago le ona.