LENTŠU “koloi” leo le dirišitšwego ka go Phetolelo ya Lefase le Leswa, le ka šupa go dikoloi tša go fapafapana. (Dit. 8:​28, 29, 38) Lega go le bjalo, go bonagala Moethiopia yo a be a sepela ka koloi e kgolo go feta koloi ya mašole goba ya mabelo. A re kwe mabaka ao a dirilego gore re fihlelele phetho ye.

Moethiopia yo ebe e le letona leo le nago le maemo a godimo leo le bego le tšere leeto le letelele. E be e le “monna yo a nago le matla tlase ga Kandase kgošigadi ya Baethiopia le yo a bego a okametše matlotlo a gagwe ka moka.” (Dit. 8:27) Ethiopia ya kgale e be e akaretša Sudan ya mehleng yeno le karolo ya borwa ya Egepeta ya lehono. Le ge monna yo a be a diriša dikoloi tša go se swane bakeng sa leeto la gagwe, a ka ba a be a na le dilo ka moka tšeo a bego a ka di hloka leetong la gagwe le le telele. Dikoloi tšeo di bego di dirišwa lekgolong la pele la mengwaga C.E. go nametša banamedi, e be e le tša maotwana a mane tšeo di bego di na le tente. Puku ya An Exegetical Commentary e re: ‘Dikoloi tša mohuta wo, di be di kgona go nametša batho le merwalo ya bona, e bile ba kgone go sepela ba iketlile le gore ba kgone go sepela maeto a matelele.’

Monna wa Moethiopia o be a bala ge Filipi a be a eya go yena. Pego ye e re; “Filipi a kitima go bapa le yona, a mo kwa a bala puku ya moporofeta Jesaya ka go hlaboša.” (Dit. 8:30) Dikoloi tše, e be e se tša mabelo. Ka ge koloi yeo e be e sa kitime, molaki o be a kgona go bala ge e dutše e sepela e bile Filipi o ile a kgona go kitima ka maoto go bapa le yona go fihlela a e swara.

Moethiopia yoo o ile “a lopa Filipi gore a namele a dule fase le yena.” (Dit. 8:31) Batho bao ba bego ba sepela ka koloi ya mabelo, ba be ba ema ka maoto. Koloi ya go tšea maeto, e be e na le madulo a lekanego gore Filipi le monna yoo ba ka kgona go dula fase ka moka ga bona.

Ka baka la pego yeo e lego go Ditiro kgaolo 8 le bohlatse bja kgale bjoo bo lego gona, dikgatišo tša rena matšatši a, di bontšha molaki wa Moethiopia a nametše koloi e kgolo go feta ya mašole goba ya mabelo.