1. Ke ka baka la’ng segopotšo e le letšatši le bohlokwa mo ngwageng? (Luka 22:​19, 20)

 GO BAHLANKA ba Jehofa, segopotšo sa lehu la Kriste ke letšatši le bohlokwa kudu mo ngwageng. Ke tiragalo e nnoši yeo Jesu a boletšego ka yona ka go lebanya gore balatedi ba gagwe ba dule ba e gopola. (Bala Luka 22:​19, 20.) Re na le mabaka a mantšhi a kwagalago a gore re lebelele pele segopotšong. A re boledišaneng ka a mangwe a ona.

2. Re na le mabaka afe a mangwe a go fela pelo ya go ba gona segopotšong?

² Segopotšo se re thuša go nagana ka bohlokwa bja topollo. Se re thuša go nagana ka ditsela tšeo ka tšona re ka bontšhago gore re leboga sehlabelo sa Jesu. (2 Bakor. 5:​14, 15) Re ba le sebaka sa go thabela go ‘kgothatšana’ le bana babo rena le dikgaetšedi. (Baroma 1:12) Ngwaga o mongwe le o mongwe, batho bao ba fodilego moyeng ba tla segopotšong. Ba bangwe ba boela go Jehofa ka baka la tsela e borutho yeo ba amogetšwego ka yona. Batho ba bantšhi bao ba thabelago, ba nyaka go hlankela Jehofa ka baka la dilo tšeo ba di kwago le tšeo ba di bonago moo. Ke ka baka leo Segopotšo e lego selo sa bohlokwa kudu go rena!

3. Segopotšo se dira bjang gore bana babo rena le dikgaetšedi ba be le botee lefaseng ka moka? (Bona le seswantšho)

³ Bona kamoo segopotšo se dirago gore bana babo rena le dikgaetšedi ba be le botee lefaseng ka moka. Dihlatse tša Jehofa lefaseng ka moka di bokana gotee ka morago ga ge letšatši le sobetše. Ka moka ga rena re kwa polelo yeo e gatelelago bohlokwa bja topollo. Re opela dikopelo tše pedi tša tumišo, ra sepediša diswantšhetšo le gore “amene” ka dipelo tša rena ka moka go dithapelo tše nne. Pele diiri tše e ka bago tše 24 di ka fela, diphuthego lefaseng ka moka di tla be di šetše di swere  segopotšo. O ka nagana kamoo Jehofa le Jesu ba ikwago ka gona ge ba re bona re bokane gotee gore re ba hlomphe ka tsela ye.

4. Re tlo boledišana ka’ng sehlogong se?

⁴ Sehlogong se re tlo boledišana ka dipotšišo tše di latelago: Re ka itokišeletša bjang letšatši la segopotšo? Re ka thuša batho ba bangwe bjang gore ba holege ge ba le segopotšong? Le gona, re ka thuša bjang bao ba fodilego moyeng? Dikarabo tša dipotšišo tše di tlo re thuša gore re itokišeletše goba gona tiragalong ye e bohlokwa.

RE KA ITOKIŠELETŠA BJANG GO BA GONA SEGOPOTŠONG?

5. (a) Ke ka baka la’ng re swanetše go naganišiša ka bohlokwa bja topollo? (Psalme 49:​7, 8) (b) O ithutile eng bidiong yeo e rego Ke ka Baka la’ng Jesu a Ile a hwa?

⁵ Tsela e nngwe e bohlokwa yeo re ka itokišeletšago go ba gona segopotšong, ke ka go naganišiša ka bohlokwa bja sehlabelo sa topollo sa Jesu Kriste. Re ka se kgone go itokolla sebeng le lehung. (Bala Psalme 49:​7, 8; bona le bidio yeo e rego, Ke ka Baka la Eng Jesu a Ile a hwa?) a Jehofa o ile a dira tokišetšo ya gore Jesu a tle mo lefaseng gore a re hwele e lego selo seo go bego go se bonolo gore yena le Morwa wa gagwe ba se dire. (Baroma 6:23) Ge re dutše re naganišiša ka seo Jehofa le Jesu ba re diretšego sona, re tlo leboga topollo le go feta. Re tlo boledišana ka dilo tše mmalwa tšeo Jehofa le Jesu ba re diretšego tšona eupša go be go se bonolo gore ba ka di dira. Sa pele, ke eng seo topollo e se akaretšago?

6. Topollo e be e akaretša’ng?

⁶ Topollo ke tefo yeo e lefšago go rekolla selo se sengwe. Motho wa mathomo e lego Adama o bopilwe a phethagetše. Ge a be a dira sebe, o ile a senya mpho ya bophelo bjo bo sa felego yeo a bego a na le yona le yeo bana ba gagwe ba bego ba tla ba le yona. E le gore Jesu a rekolle seo Adama a se lobilego, o ile a swanelwa ke go neela bophelo bja gagwe bjo bo phethagetšego e le sehlabelo. Nakong ya ge Jesu a be a le mo lefaseng, “ga se a ka a dira sebe, le gona ga se gwa hwetšwa bofora molomong wa gagwe.” (1 Pet. 2:22) Nakong ya ge Jesu a ehwa, o be a phethagetše go no swana le ge Adama a be a phethagetše ge a be a dira sebe. Ka gona sehlabelo sa gagwe se kgonne go rekolla seo Adama a se lobilego.—1 Bakor. 15:45; 1 Tim. 2:6.

7. Ke diteko dife tšeo Jesu a ilego a kopana le tšona ge a be a le mo lefaseng?

⁷ Jesu o be a dula a theetša Tatagwe wa legodimong go sa šetšwe diteko tše dintšhi tšeo a ilego a lebeletšana le tšona ge a be a le mo lefaseng. Ge Jesu e be e sa le ngwana o be a swanetše go ikokobeletša bolaodi bja batswadi ba gagwe bao ba sa phethagalago le ge yena a be a phethagetše. (Luka 2:51) Ge e be e le moswa, o be a swanetše go gana kgateletšo le ge e le efe yeo e bego e ka mo dira gore a se ke a theetša goba a botega. Ge e be e le yo mogolo o be a swanetše go gana diteko tša Sathane Diabolo go akaretša le nakong ya ge Sathane a be a leka potego ya Jesu ka go lebanya. (Mat. 4:​1-11) Sathane o be a ikemišeditše go dira gore Jesu a wele sebeng e le gore a se ke a kgona go lefa tefo ya topollo.

8. Ke diteko dife tše dingwe tšeo Jesu a ilego a di kgotlelela?

⁸ Nakong ya bodiredi bja Jesu mo lefaseng, o ile a kgotlelela diteko tše dintšhi. O be a tlaišwa e bile a tšhošetšwa ka gore o tlo bolawa. (Luka 4:​28, 29; 13:31) Le gona o be a swanetše go kgotlelela mafokodi a balatedi ba gagwe. (Mar. 9:​33, 34) O ile a tlaišwa le go rogakwa. Le gona o ile a bolawa ka tsela e bohloko le yeo e lešago dihlong. (Baheb. 12:​1-3) O ile  a swanelwa ke go kgotlelela karolo ya mafelelo ya bophelo bja gagwe a nnoši, e bile Jehofa ga se a mo šireletša ka mohlolo. b—Mat. 27:46.

9. Re ikwa bjang ka sehlabelo sa Jesu? (1 Petro 1:8)

⁹ Go molaleng gore Jesu o ile a swanelwa ke go dira dilo tše dintšhi gore a lefe topollo. Na ga re ikwe re rata Jesu le go feta ge re naganišiša ka dilo tšeo a ilego a di dira gore a re hwele?—Bala 1 Petro 1:8.

10. Jehofa o ile a swanelwa ke go dira’ng gore go be le topollo?

¹⁰ Jehofa yena o dirile’ng gore Jesu a kgone go lefa topollo? Jehofa le Jesu ba na le segwera sa kgauswiuswi seo se lego gona magareng ga tate le morwa. (Die. 8:30) Nagana kamoo Jehofa a ilego a ikwa ka gona ge a bona Jesu a kgotleletše diteko tše dintšhi mo lefaseng. Go molaleng gore Jehofa o ile a kwa bohloko bjo bo tseneletšego ge a bona Morwa wa gagwe a sa swarwe gabotse, batho ba sa mo amogele e bile a lekwa.

11. Nea mohlala wo o bontšhago gore Jehofa a ka ba a ile a ikwa bjang nakong ya ge Jesu a bolawa.

¹¹ Motswadi yo mongwe le yo mongwe yo a ilego a hlokofalelwa ke ngwana, o kwešiša gabotse bohloko bjo bo bago gona ge ngwana a hlokofala. Re na le tumelo e tiilego ya gore bahu ba tlo tsošwa, eupša seo ga se tloše bohloko bjo bo bago gona ge motho yo re mo ratago a hlokofala. Mohlala wo o re thuša go kwešiša gabotse kamoo Jehofa a bego a ikwa ka gona ge a bona Morwa wa gagwe yo a mo ratago a tlaišega le go hwa ka 33 C.E. c—Mat. 3:17.

12. Re ka dira’ng ge nako ya Segopotšo e batamela?

¹² Pele letšatši la segopotšo le fihla, o ka ba le thuto ya motho ka noši goba la ba le borapedi bja lapa bjo bo bolelago kudu ka topollo. O ka diriša Tlhahlo ya go Dira Nyakišišo ya Dihlatse tša Jehofa goba dikgatišo tše dingwe tšeo di theilwego Beibeleng tšeo di bolelago ka topollo ka mo go tseneletšego. d Le gona latela mmalo wa Beibele wa segopotšo wo o lego go Pukwana ya Seboka sa Bophelo bja Rena le Bodiredi bja Bokriste. Ka letšatši la segopotšo, kgonthišetša gore o bogela bidio yeo e kgethegilego ya borapedi bja mesong. Ge re dutše re itokišeletša segopotšo, re tlo ba boemong bjo bobotse bja go thuša ba bangwe gore le bona ba holege.—Esera 7:10.

 THUŠA BATHO BA BANGWE GORE BA HOLEGE

13. Ke selo sefe sa pele seo re ka se dirago gore batho ba holwe ke segopotšo?

¹³ Re ka thuša batho ba bangwe bjang gore ba holwe ke go ba gona segopotšong? Re ka thoma pele ka go ba mema. Go tlaleletša go batho bao re ba memago ge re le tšhemong, re ka mema le batho ba bangwe ba bantšhi. E ka ba ba gabo rena, bao re šomago le bona, bao re tsenago le bona sekolo le ba bangwe. Le ge re se na dikgatišo tše dintšhi tšeo re ka memago batho go tla segopotšong ka tšona, re ka abelana le bona linki yeo go yona ba tlago go hwetša memo ya segopotšo. Ga re tsebe gore go ka arabela ba bakae.—Mmo. 11:6.

14. Nea mohlala wo o bontšhago bohlokwa bja go mema batho ka go lebanya.

¹⁴ O se ke wa nyatša go mema batho ba o ba tsebago segopotšong. Ka letšatši le lengwe kgaetšedi yo a dulago ka lapeng la batho bao ba yago madumeding a go se swane o be a maketše ge monna wa gagwe a be a mmotša gore o tlo ya le yena segopotšong. O be a makaditšwe ke eng? O be a makaditšwe ke gore o be a ile a mema monna wa gagwe ka makga a mmalwa nakong e fetilego eupša ga se a ka a tla. Ke eng seo se bego se fapane nakong ye? Monna wa gagwe o hlalosa gore o hweditše sememo ka go lebanya seo a ilego a se newa ke ngwanabo rena yo a dulago moo yo a bego a mo tlwaetše. Monna yoo o ile a ba gona segopotšong ngwaga woo le mengwaga e mengwe ka morago.

15. Re nyaka go dula re gopola eng ge re mema batho gore ba tle segopotšong?

¹⁵ Dula o gopola gore batho bao re ba memago ba ka ba le dipotšišo, kudukudu ge e ba ba se ba ka ba tla dibokeng tša rena. Re dira gabotse ge re nagana ka dipotšišo tšeo ba ka di botšišago le go itokišeletša go di araba. (Bakol. 4:6) Ka mohlala, batho ba bangwe ba ka botšiša gore: ‘Na go tlo direga eng tiragalong yeo?’ ‘E tlo tšea nako e kae?’ ‘Na go na le tsela yeo ba aparago ka yona?’ ‘Na go tsenwa ka tšhelete?’ ‘Na go ntšhiwa koleke?’ Ge re mema motho gore a tle segopotšong re ka mmotšiša gore: “Na o na le dipotšišo?” Ka morago ra araba dipotšišo tšeo a tla bego a na le tšona. Re ka diriša bidio yeo e rego Gopola Lehu la Jesu le  yeo e rego Ke Eng Seo se Diregago Holong ya Mmušo? go thuša motho yoo go kwešiša gore diboka tša rena di swarwa bjang. Thuto 28 ka pukung ya Thabela Bophelo go ya go Ile! e re nea dintlha tše sego kae tšeo re ka ba abelago tšona.

16. Ke dipotšišo dife tše dingwe tšeo batho bao ba tlago segopotšong ba ka bago le tšona?

¹⁶ Ka morago ga gore bao ba thabelago ba be gona segopotšong, ba ka ba le dipotšišo tše dingwe gape. Ba ka ipotšiša gore ke ka baka la’ng e le batho ba banyenyane feela (ge e ba ba le gona) bao ba jago le go nwa diswantšhetšo. Ba ka ipotšiša gape gore re ba gona segopotšong gakae. Ba ka nyaka le go tseba ge e ba diboka ka moka tša Dihlatse tša Jehofa di swarwa ka tsela yeo. Le ge dintlha tše ka moka go bolelwa ka tšona nakong ya segopotšo, eupša baotho bao ba sa thomago go tla, ba ka nyaka go hlalosetšwa ka mo go oketšegilego. Kgatišo yeo e lego go jw.org/nso yeo e rego “Go Reng Dihlatse tša Jehofa di Swara Selalelo sa Morena go Fapana le Dikereke tše Dingwe?” e ka re thuša go araba dipotšišo tše dingwe tšeo ba nago le tšona. Re nyaka go dira sohle seo re ka seo kgonago, pele ga segopotšo, nakong ya segopotšo le ka morago ga segopotšo go thuša bao ba nago le “tshekamelo e swanetšego” gore ba holwe ke tiragalo ye.—Dit. 13:48.

GO THUŠA BAO BA FODILEGO MOYENG

17. Bagolo ba ka thuša bjang batho bao ba fodilego moyeng? (Hesekiele 34:​12, 16)

¹⁷ Bagolo ba ka thuša bjang bao ba fodilego moyeng nakong ya segopotšo? Ba ka ba bontšha gore ba a ba rata. (Bala Hesekiele 34:​12, 16.) Pele letšatši la segopotšo le ka fihla, kgonthišetšang gore le founela ba bantšhi ka mo go ka kgonegago. Ba bontšheng gore le a ba rata le gore le tloga le na le taba le bona e bile le nyaka go ba thuša ka tsela yeo go ka kgonegago ka yona. Ba memeng gore ba tle segopotšong. Ge e ba ba ka tla, le ba amogeleng ka borutho. Ka morago ga segopotšo, dulang le bolela le bana babo rena ba le dikgaetšedi gomme le ba neeng dilo tšohle tšeo ba di hlokago gore ba boele go Jehofa.—1 Pet. 2:25.

18. Ka moka ga rena re ka dira’ng go thuša bao ba fodilego moyeng? (Baroma 12:10)

 ¹⁸ Bohle ka phuthegong ba ka thuša bao ba fodilego moyeng bao ba lego gona segopotšong. Bjang? Ka go ba bontšha lerato, botho le tlhompho. (Bala Baroma 12:10.) Gopola gore dinku tše di ka ba di be di thatafalelwa ke go tla dibokeng. Mohlomongwe ba ka ba ba be ba tšhoga gore ba ka se amogelwe gabotse. e Ka gona phemang go ba tsenyetša mahlo a batho ka go ba botšiša dipotšišo tšeo di ka ba lešago dihlong goba la ba botša mantšu ao a ka ba kwešago bohloko. (1 Bathes. 5:11) Bana babo rena ba le dikgaetšedi ke badumedigotee le rena. Re thabela go hlankela Jehofa re na le bona gape!—Ps. 119:176; Dit. 20:35.

19. Re tlo holega bjang ge re gopola lehu la Jesu?

¹⁹ Re thabela gore Jesu o re boditše gore re gopole lehu la gagwe ngwaga o mongwe le o mongwe. Le gona re kwešiša gore ke ka baka la eng seo se le bohlokwa. Ge re eba gona segopotšong re a holega e bile re hola le batho ba bangwe ka ditsela tše dintšhi. (Jes. 48:​17, 18) Re rata Jehofa le Jesu kudu. Re bontšha gore re leboga kudu seo ba re diretšego sona. Re tiiša segwera sa rena le bana babo rena le dikgaetšedi. Le gona re thuša ba bangwe gore ba ithute gore ba ka thabela ditšhegofatšo tšeo di tlišwago ke sehlabelo sa topollo. Ka gona a re direng sohle seo re ka se kgonago gore re be gona segopotšong e lego letšatši le bohlokwa ngwageng wo!