Ba bangwe ba bana babo rena ba goletše ditšong tšeo di sa swarego basadi gabotse e bile di ba tšeago e se selo. Ka mohlala, molebeledi wa tikologo yo a hlankelago Bolivia e lego Hans o re: “Banna ba bangwe ba goletše ditšong tšeo di kgothaletšago banna gore ba ikgantšhe kudu. Banna ba ba ipotša gore ba bohlokwa kudu go feta basadi e bile gantšhi ba a ba nyatša.” Shengxian e lego mogolo yo a dulago Taiwan o re: “Mo ke dulago gona banna ba bantšhi ba re basadi ga se ba swanela go tsenatsena ditaba tša bona. Ge e ba monna a ka bolela seo mosadi wa gagwe a se naganago, dithaka tša gagwe di tlo re o kwa ka mosadi.” Banna ba bangwe ga ba bontšhe phatlalatša gore ba nyatša basadi. Ka mohlala, ba ka dira metlae yeo e nyatšago basadi.

Re leboga gore ga go na monna yoo a ka palelwago ke go fetoga ka baka la setšo seo a goletšego go sona. A ka kgona go fenya kgopolo ya gore banna ba bohlokwa go feta basadi. (Baef. 4:​22-24) Banna ba ka kgona go dira se ka go ekiša mohlala wa Jehofa. Sehlogong se, re tlo boledišana ka gore Jehofa o swara basadi bjang, kamoo bana babo rena ba ka ithutago go swara basadi go swana le Jehofa le kamoo bagolo ba beago mohlala tabeng ya go hlompha dikgaetšedi.

JEHOFA O SWARA BASADI BJANG?

Jehofa o re beela mohlala o mobotse wa go swara basadi. Ka ge e le Tate yo a nago le kwelobohloko, o rata batho ka moka. (Joh. 3:16) Le gona dikgaetšedi tše di botegago di bjalo ka barwedi ba gagwe ba bohlokwa. A re boledišaneng ka ditsela tšeo Jehofa a bontšhago gore o hlompha basadi.

Ga a ba kgetholle. Jehofa o bopile banna le basadi ka seswantšho sa gagwe. (Gen. 1:27) Ga se a  bopa banna ba hlalefile kudu goba ba na le ditalente tše dintšhi go feta basadi, e bile o rata banna le basadi go lekana. (2 Dikor. 19:7) O bopile banna le basadi gore ba kgone go kwešiša ditherešo tša Beibele go swana e bile ka moka ba kgone go ekiša dika tša gagwe tše dibotse. Le gona Jehofa o tšeela godimo banna le basadi bao ba botegago go sa šetšwe gore ba na le kholofelo ya go tlo phela paradeiseng mo lefaseng goba go yo hlankela e le dikgošana le baprista legodimong. (2 Pet. 1:1) Go bonagala gabotse gore Jehofa ga a kgetholle basadi.

O a ba theetša. Jehofa o tshwenyega ka maikwelo a basadi le mathata ao ba nago le ona. Ka mohlala, o ile a theetša le go araba dithapelo tša Ragele le Hanna. (Gen. 30:22; 1 Sam. 1:​10, 11, 19, 20) Jehofa o ile a šušumetša batho bao ba bego ba ngwala Beibele gore ba ngwale ka dipego tša banna bao ba ilego ba theetša basadi. Ka mohlala, Aborahama o ile a kwa taelo ya Jehofa ya gore a theetše mosadi wa gagwe e lego Sara. (Gen. 21:​12-14) Kgoši Dafida o ile a theetša Abigaile. Le gona, o ile a bona gore Jehofa ke yena a rometšego Abigaile gore a tle a bolele le yena. (1 Sam. 25:​32-35) Jesu yo a ilego a bonagatša dika tša Tatagwe ka tsela e phethagetšego, o ile a kwa mmagwe e lego Maria. (Joh. 2:​3-10) Mehlala ye e re bontšha gore tsela e nngwe yeo Jehofa a bontšhago gore o hlompha basadi ke ka go ba theetša.

O a ba tshepa. Ka mohlala, Jehofa o ile a fa Efa kabelo ya gore a thuše go hlokomela lefase ka moka. (Gen. 1:28) Ka go dira bjalo, Jehofa o ile a bontšha gore o be a sa tšee Efa e se selo ge a bapetšwa le Adama, eupša o be a mo tšea e le mothuši wa Adama. Jehofa o ile a bontšha gore o tshepa baporofeta ba basadi e lego Debora le Huluda gore ba eletše batho ba gagwe go akaretša moahlodi le kgoši. (Baa. 4:​4-9; 2 Dikg. 22:​14-20) Lehono, Jehofa o a tshepa gore basadi ba Bakriste ba ka kgona go dira mošomo woo a ba filego wona. Dikgaetšedi tšeo tše di botegago di hlankela e le bagoeledi, babulamadibogo le baromiwa. Di thuša go hlama, go aga le go hlokomela Diholo tša Mmušo le meago ya mokgatlo. Tše dingwe tša dikgaetšedi tšeo di hlankela Bethele, mola tše dingwe di hlankela diofising tša bofetoledi. Dikgaetšedi tše di swana le mašole a mantšhi ao Jehofa a a dirišago go phetha thato ya gagwe. (Ps. 68:11) Go molaleng gore Jehofa ga a lebelele basadi ba nyatšega goba ba ka se kgone go dira mošomo wa gagwe.

BANA BABO RENA BA KA ITHUTA BJANG GO SWARA BASADI GO SWANA LE JEHOFA?

Bana babo rena, gore re sware dikgaetšedi tša Bakriste go swana le Jehofa, re swanetše go hlahloba ka kelohloko tsela yeo re naganago ka yona le yeo re dirago dilo ka yona. E le gore re kgone go dira seo, re hloka thušo. Go no swana le ge motšhene wa X-ray o ka thuša ngaka go bona ge e ba pelo ya molwetši e phetše gabotse goba e babja, Beibele e ka re thuša go bona ge e ba re na le maikwelo a fošagetšego ka basadi ao a iphihlilego ka gare ga rena. Mogwera wa nnete le yena a ka re thuša go dira bjalo. Re ka thušwa ke eng gore re hwetše thušo yeo?

Botšiša mogwera wa nnete. (Die. 18:17) Re ka botšiša mogwera wa nnete yo re mo tshepago le yo a lego botho e bile a na le tekatekano dipotšišo tša go swana le gore: “O bona o ka re ke swara bjang dikgaetšedi? Na di a kgona go bona gore ke a di hlompha? Na nka kaonefatša tsela yeo ke di swarago ka yona?” Ge e ba mogwera wa gago a go bontšha selo seo o ka šomelago go sona, o se ke wa ikemelela. Go e na le moo ikemišetše go dira diphetogo.

Ithute Lentšu la Modimo. Tsela e kaone ya go bona ge e ba re swara dikgaetšedi gabotse ke ka go hlahloba tsela yeo re itshwarago ka yona le dilo tšeo re di dirago re thušwa ke Lentšu la Modimo. (Heb. 4:12) Ge re ithuta Beibele, re ithuta ka banna bao ba ilego ba swara basadi gabotse le bao ba sa kago ba ba swara gabotse. Ke moka re ka bapiša seo ba se dirilego le seo rena re se dirago. Go oketša moo, go bapiša ditemana tša Beibele go ka re thuša gore re se ke ra diriša Mangwalo gampe re sa tsebe gomme ra thekga kgopolo e fošagetšego yeo re nago le yona ka basadi. Ka mohlala, go ya ka 1 Petro 3:​7, basadi ba swanetše go “godišwa go etša sebjana se se fokolago.” b Na se se bolela gore mosadi o a nyatšega, ga a na bohlale goba bokgoni bja go swana le bja  monna? Aowa! Bapetša mantšu a Petro le seo Bagalatia 3:​26-29 e se bolelago ge e re, Jehofa o kgethile banna le basadi gore ba yo buša le Jesu legodimong. Ge re ithuta Lentšu la Modimo e bile re botšiša mogwera wa nnete gore a re botše gore o bona eka re swara basadi bjang, re tlo ithuta kamoo re ka kgonago go hlompha basadi le go ba swara gabotse.

BAGOLO BA BONTŠHA BJANG GORE BA HLOMPHA DIKGAETŠEDI?

Bana babo rena ka phuthegong le bona ba ka ithuta go swara dikgaetšedi ka tlhompho ka go latela mohlala o mobotse wa bagolo bao ba nago le lerato. Bagolo ba bea bjang mohlala wa go bontšha gore ba hlompha dikgaetšedi? A re boleleng ka ditsela tše di latelago.

Ba reta dikgaetšedi. Moapostola Paulo o ile a beela bagolo mohlala o mobotse woo ba ka o ekišago. O ile a reta dikgaetšedi tše mmalwa ka lengwalong leo a bego a le ngwaletše phuthego ya Roma. (Baroma 16:12) E no nagana gore dikgaetšedi tšeo di ile tša ikwa bjang ge lengwalo leo la Paulo le be le balelwa phuthego. Ka mo go swanago, bagolo ba reta dikgaetšedi ka baka la dika tša bona tše dibotse le mošomo woo ba o direlago Jehofa. Se se dira gore dikgaetšedi di kwe gore phuthego e a di hlompha e bile e di tšeela godimo. Mantšu a kgothatšago a mogolo e ka no ba seo dikgaetšedi tše di se hlokago ge di dutše di hlankela Jehofa ka go botega.—Die. 15:23.

Ge bagolo ba reta dikgaetšedi, ba di botša ka go lebanya gore ba di reta ka baka la eng e bile ba dira bjalo ka pelo ka moka. Ka baka la’ng? Kgaetšedi yo a bitšwago Jessica o re: “Go bose ge bana babo rena ba botša kgaetšedi gore, ‘o dirile mošomo o mobotse.’ Eupša re kgothatšega le go feta ge bana babo rena ba re botša ka go lebanya gore ba re reta ka baka la eng, go swana le ge ba re retela gore re ruta bana ba rena gore ba se dire lešata ka dibokeng goba ba re retela gore re ipha nako ya go lata barutwana ba rena ba Beibele gore ba tle dibokeng.” Ge  bagolo ba reta dikgaetšedi ka baka la selo se itšego, ba dira gore dikgaetšedi di ikwe di le bohlokwa ka phuthegong.

Ba theetša dikgaetšedi. Bagolo bao ba ikokobeditšego ba a lemoga gore ga se bona feela ba nago le dikgopolo tše dibotse. Bagolo ba bjalo ba kgopela ditšhišinyo tša dikgaetšedi gomme ba di theetša ka kelohloko ge di bolela. Ge bagolo ba dira bjalo, ba kgothatša dikgaetšedi e bile le bona ba a holega. Bjang? Mogolo yo a bitšwago Gerardo yo a hlankelago Bethele o re: “Ke lemogile gore ge ke kgopela dikgaetšedi ditšhišinyo, seo se nthuša gore ke kgone go dira mošomo wa ka gabotse. Gantšhi dikgaetšedi tšeo, di ba di dirile mošomo woo ka nako e telele go feta bana babo rena.” Ka phuthegong, dikgaetšedi tše dintšhi di hlankela e le babulamadibogo, ka gona ba tseba batho ba tšhemong ya gabo bona gabotse. Mogolo yo a bitšwago Bryan o re: “Dikgaetšedi tša rena di na le dika tše dibotse le bokgoni bjoo bo ka holago mokgatlo wa rena. Ka baka leo, phihlelo ya bona e ka re hola kudu!”

Bagolo ba bohlale ga ba kitimele go gana ditšhišinyo tša dikgaetšedi. Ka baka la eng? Mogolo yo a bitšwago Edward o re: “Tšhišinyo ya kgaetšedi le phihlelo ya gagwe di ka thuša ngwanabo rena gore a kwešiše taba gabotse e bile e ka mo thuša gore a kwešiše maikwelo a ba bangwe gabotse.” (Die. 1:5) Le ge mogolo a ka se diriše tšhišinyo ya kgaetšedi, a ka leboga tšhišinyo ya kgaetšedi yoo le pono ya gagwe.

Ba tlwaetša dikgaetšedi. Bagolo ba bohlale ba nyakana le dibaka tša go tlwaetša dikgaetšedi. Ka mohlala, ba ka ruta dikgaetšedi go swara seboka sa tšhemo gore ba kgone go se swara ge go se na ngwanabo rena yo a kolobeditšwego. Ba ka ba tlwaetša gore ba kgone go diriša dithulusi goba metšhene e le gore ba kgone go thuša ka go aga le go hlokomela meago ya mokgatlo wa rena. Balebeledi ba Bethele ba tlwaeditše dikgaetšedi gore di kgone go dira mešomo e mentšhi ya go swana le go hlokomela le go lokiša dilo, go reka dilo, go šoma ka tša ditšhelete, go dira mananeo a dikhomphutha le mešomo e mengwe. Ge bagolo ba tlwaetša dikgaetšedi ba bontšha gore ba lebelela dikgaetšedi di na le bokgoni e bile di tshepega.

Dikgaetšedi tše dintšhi di diriša tlwaetšo yeo di e hweditšego go bagolo go hola ba bangwe. Ka mohlala, dikgaetšedi tše dingwe di diriša tlwaetšo ya go aga yeo di e hweditšego go thuša ba bangwe go aga leswa magae a bona ka morago ga gore go be le kotsi ya tlhago. Dikgaetšedi tše dingwe di diriša bokgoni bjoo di bo rutilwego bja go nea bohlatse mafelong a batho bohle go thuša dikgaetšedi tše dingwe gore le tšona di kgone go nea bohlatse mafelong a batho bohle. Dikgaetšedi di ikwa bjang ka bagolo bao ba di tlwaeditšego? Kgaetšedi yo a bitšwago Jennifer o re: “Ge ke be ke šoma go aga e nngwe ya Diholo tša Mmušo, molebeledi yo mongwe o ile a tšea nako ya gagwe e le gore a ntlwaetše. O ile a lemoga mošomo wo ke bego ke o dira gomme a ntheta ka baka la ona. Ke thabetše go šoma le yena ka gobane o be a dira gore ke ikwe ke le bohlokwa e bile ke tshepiwa.”

RE HOLEGA BJANG GE RE SWARA BASADI BJALO KA DIKGAETŠEDI TŠA RENA

Re rata dikgaetšedi tša rena tše di botegago bjalo ka ge Jehofa a di rata! Ka gona re ba swara bjalo ka batho ba malapeng a gabo rena. (1 Tim. 5:​1, 2) Re ba tšeela godimo e bile re thabela go šoma gotee le bona. Le gona re a thaba ge re bona gore ba a bona gore re a ba rata e bile re a ba thekga. Kgaetšedi yo a bitšwago Vanessa o re: “Ke leboga Jehofa ka ge ke le karolo ya mokgatlo wa gagwe woo o tletšego ka bana babo rena bao ba nkgothaditšego kudu.” Kgaetšedi yo a lego Taiwan o re: “Ke leboga Jehofa le mokgatlo wa gagwe ka ge ba tšeela basadi godimo e bile ba hlompha maikwelo a rena. Se se tiiša tumelo ya ka e bile se ntira gore ke leboge le go feta tokelo yeo ke nago le yona ya go ba karolo ya mokgatlo wa Jehofa.”

Jehofa o swanetše go ba a ikgantšha ka banna ba botegago ba Bakriste bao ba lekago ka thata go swara basadi ka tsela yeo yena a ba swarago ka yona! (Die. 27:11) Mogolo yo a bitšwago Benjamin yo a lego Scotland o re: “Banna ba bantšhi lefaseng lehono ga ba hlomphe basadi le gatee. Ka baka leo, ge basadi ba etla Holong ya Mmušo re nyaka go ba dira gore ba ikwe ba hlomphiwa le go ratwa.” A re direng sohle seo re ka se kgonago go ekiša Jehofa ka go swara dikgaetšedi tša rena tše di rategago ka lerato le tlhompho yeo e di swanetšego.—Baroma 12:10.