SEHLOGO SE ITHUTWAGO 2
KOPELO 132 Bjale re Nama e Tee
Banna, Ratang Basadi ba Lena le go ba Hlompha
“Lena banna, . . . ba godišeng.”—1 PET. 3:7.
SEO RE TLAGO GO ITHUTA SONA
Re tlo kwa gore banna ba ka bontšha bjang gore ba rata basadi ba bona le go ba hlompha ka dilo tšeo ba di dirago le tšeo ba di bolelago.
1. Ke ka baka la’ng Jehofa a re file mpho e botse ya lenyalo?
JEHOFA ke “Modimo yo a thabilego,” ebile o nyaka gore le rena re thabe. (1 Tim. 1:11) Go na le dilo tše dintšhi tšeo a re filego tšona e le gore re thabele bophelo. (Jak. 1:17) E nngwe ya dilo tšeo ke lenyalo. Ge monna le mosadi ba nyalana, ba tshepišana gore ba tlo ratana le go hlomphana. Ge ba ka dula na ratana le go hlomphana ba tlo thaba.—Die. 5:18.
2. Go direga’ng manyalong a mantšhi lehono?
2 Go a nyamiša go bona gore banyalani ba bantšhi ga ba sa swarana ka tsela yeo ba tshepišanego gore ba tla swarana ka yona ge ba be ba nyalana. Se se dira gore ba se ke ba thaba. Pego ya mokgatlo wa World Health Organization e bontšha gore banna ba bantšhi ba tlaiša basadi ba bona ka go ba betha, go ba hlaba ka mantšu le ka go ba kweša bohloko maikwelong. Banna ba bangwe ba swara basadi ba bona gabotse ge ba le gare ga batho, eupša ge ba le gae ba ba tlaiša. Malapa a mantšhi a thubega ka baka la gore banna ba bantšhi ba lebelela diswantšho le dibidio tša batho ba sa aparago.
3. Ke dilo dife tšeo di ka dirago gore monna a tlaiše mosadi wa gagwe?
3 Ke eng seo se ka dirago gore banna ba bangwe ba tlaiše basadi ba bona? Ba ka ba ba godišitšwe lapeng leo tatago bona a bego a tlaiša mmago bona gomme ba nagana gore ga se phošo go dira bjalo. Ba bangwe ba tlaiša basadi ka baka la setšo. Ba rutilwe gore monna wa nnete o swanetše go bontšha mosadi gore go lla sa mang seeta. Banna ba bangwe ga ba kgone go laola kamoo ba ikwago ka gona. Banna ba bangwe bao ba tlwaetšego go bogela diswantšho le dibidio tša batho ba sa aparago, ba ka feleletša ba lebeletše basadi le thobalano ka tsela yeo e sego yona. Dipego tše dingwe di bontšha gore nakong ya COVID-19 banna ba bantšhi ba ile ba thoma go tlaiša basadi ba bona. Le ga go le bjalo monna ga se a swanela go tlaiša mosadi wa gagwe le gatee.
4. Banna ba Bakriste ba swanetše go hlokomela gore ba se ke ba dira’ng, gona ka baka la’ng?
4 Banna ba Bakriste ba swanetše go hlokomela gore ba se ke ba nagana le go lebelela basadi ka tsela e fošagetšego. a Ka baka la’ng? Ka gobane motho a ka thoma go dira dilo tše itšego ka baka la tsela yeo a naganago ka yona. Moapostola Paulo o ile a kgothaletša Bakriste ba tloditšwego ba kua Roma gore ba lese go “bopega ka sebopego sa tshepedišo ye ya dilo.” (Baroma 12:1, 2) Ge Paulo a be a ngwalela Bakriste ba Roma lengwalo leo, e be e le kgale phuthego yeo e le gona. Mantšu a Paulo a be a bontšha gore ba bangwe ka phuthegong ba be ba sa dira dilo goba go nagana go swana le batho bao e sego Bakriste. Ke ka baka leo a ilego a ba kgothaletša gore ba fetoše tsela yeo ba naganago le go dira dilo ka yona. Keletšo ye e sa šoma go banna ba Bakriste le lehono. Eupša sa go nyamiša ke gore go sa na le banna ba bangwe bao ba naganago go swana le batho bao ba sa hlankelego Modimo gomme ba tlaiša basadi ba bona. b Jehofa o letetše gore banna ba sware bjang basadi ba bona? Lengwalo la sehlogo se le tla re thuša go hwetša karabo.
5. Monna o swanetše go swara bjang Mosadi wa gagwe? (1 Petro 3:7)
5 Bala 1 Petro 3:7. Jehofa o nyaka gore banna ba hlomphe basadi ba bona. Monna yo a hlomphago mosadi wa gagwe, o tla mo swara gabotse le go mo rata. Sehlogong se, re tlo bona kamoo banna ba ka bontšhago ka gona gore ba hlompha basadi ba bona. A re thomeng pele ka go bolela ka dilo tšeo di bontšhago gore monna ga a hlomphe mosadi wa gagwe.
O SE KE WA DIRA DILO TŠEO DI KWEŠAGO MOSADI WA GAGO BOHLOKO
6. Jehofa o ikwa bjang ka banna bao ba bethago ba basadi ba bona? (Bakolose 3:19)
6 Go betha mosadi. Jehofa o hloile batho bao ba ratago bošoro. (Ps. 11:5) O hloile banna bao ba tlaišago basadi ba bona. (Mal. 2:16; bala Bakolose 3:19.) Lengwalo la 1 Petro 3:7, le re botša gore ge e ba monna a sa sware mosadi wa gagwe gabotse, o senya segwera sa gagwe le Modimo. Jehofa a ka no se theetše le dithapelo tša gagwe.
7. Ke polelo ya mohuta mang yeo banna ba swanetšego go e phema ge ba bolela le basadi ba bona? (Baefeso 4:31) (Bona le “Tlhaloso ya Mantšu a Itšego.”)
7 Go hlaba mosadi ka mantšu. Banna ba bangwe ba kweša basadi ba bona bohloko ka go ba kgadimola le go ba hlabela mašata. Jehofa o hloile batho ba go “galefa, go kwata, go hlaba mašata le go hlabana ka mantšu.” c (Bala Baefeso 4:31, 32.) Tseba gore Jehofa o kwa dilo ka moka tšeo re di bolelago. Jehofa o na le taba le tsela yeo banna ba bolelago le basadi ba bona ka yona le ge ba nnoši. Monna yo a hlabago mosadi wa gagwe ka mantšu o senya lenyalo la gagwe le segwera sa gagwe le Jehofa.—Jak. 1:26.
8. Jehofa o ikwa bjang ge batho ba bogela diswantšho le dibidio tša batho bao ba sa aparago?
8 Go bogela diswantšho le dibidio tša batho bao ba sa aparago. Jehofa o ikwa bjang ka diswantšho le dibidio tša batho bao ba sa aparago? O di hloile. Monna yo a bogelago dilo tšeo o senya segwera sa gagwe le Jehofa ebile o dira gore mosadi wa gagwe a nyatšege. d Jehofa o letetše gore monna a dule a botegela mosadi wa gagwe ka dilo tšeo a di naganago le tšeo a di bolelago. Jesu o boletše gore monna yo a lebelelago mosadi yo mongwe gore a mo kganyoge, o šetše a dirile bohlotlolo le yena “pelong ya gagwe.” e—Mat. 5:28, 29.
9. Ke ka baka la’ng Jehofa a hloile monna yo a gapeletšago mosadi wa gagwe gore a be le thobalano yeo e dirago gore a ikwe a nyatšega?
9 Go ba le thobalano yeo ka morago e ka dirago gore mosadi a ikwe a nyatšega. Banna ba bangwe ba gapeletša basadi ba bona gore ba be le thobalano yeo e dirago gore ka morago ba ikwe ba nyatšega, ba sa hlweka goba ba sa ratwe. Jehofa o hloile banna bao ba sa naganelego basadi ba bona. O letetše gore banna ba rate basadi ba bona le go hlompha tsela yeo ba ikwago ka yona. (Baef. 5:28, 29) Monna wa Mokriste o swanetše go dira eng ge e ba a šetše a thomile go gapeletša mosadi wa gagwe go dira dilo tše a sa di nyakego, go mo tlaiša goba go bogela diswantšho le dibidio tša batho bao ba sa aparago? A ka dira eng gore a fetoše mekgwa ya gagwe le tsela yeo a naganago ka yona?
DILO TŠEO BANNA BA KA DI DIRAGO GORE LAHLE MEKGWA YE MEBE
10. Banna ba ka ithuta’ng go Jesu?
10 Banna ba ka thušwa ke eng gore ba tlogele go tlaiša basadi ba bona le go dira gore ba ikwe ba nyatšega? Ba ka ekiša Jesu. Le ge Jesu a se ka a nyala, tsela yeo a bego a swara barutiwa ba gagwe ka yona e ka ruta banna kamoo ba swanetšego go swara basadi ba bona ka gona. (Baef. 5:25) Ka mohlala, banna ba Bakriste ba ka ithuta go bolela le basadi ba bona tseleng yeo Jesu a bego a bolela le barutiwa ba gagwe ka yona le go ba swara ka yona.
11. Jesu o be a swara bjang baapostola ba gagwe?
11 Jesu o be a swara baapostola ba gagwe ka botho le go ba hlompha. O be a sa ba gatelele goba go dira gore ba ikwe ba nyatšega. Le ge e be ele Morutiši le Morena wa bona, ga se a ka a šomiša matla a gagwe go ba gatelela. Go ena le moo, o be a ba hlankela ka botho. (Joh. 13:12-17) Jesu o boditše balatedi ba gagwe gore: “Le ithute go nna, gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mat. 11:28-30) Jesu o be a le boleta. Ge motho a le boleta ga se gore o a nyatšega. Go ena le moo, o bontšha gore o kgona go itshwara. Ge batho ba bangwe ba mo kwatiša o dula a išitše maswafo fase le go laola tsela yeo a arabelago ka yona.
12. Jesu o be a bolela bjang le batho ba bangwe?
12 Jesu o be a homotša batho ba bangwe le go ba kgothatša. O be a sa omanye balatedi ba gagwe. (Luka 8:47, 48) Le ge batho bao ba bego ba mo ganetša ba mo roga le go mo kgotlakgotla, “ga se a ka a ithogela.” (1 Pet. 2:21-23) Ka dinako tše dingwe Jesu o be a kgetha go homola go ena le gore a fetole ka bogale. (Mat. 27:12-14) Ruri o beetše banna ba Bakriste mohlala o mobotse kudu!
13. Banna ba ka “kgomarela bjang basadi ba bona”? (Mateo 19:4-6) (Bona le seswantšho.)
13 Jesu o boditše banna gore ba swanetše go botegela basadi ba bona. O boletše mantšu ao a boletšwego ke Jehofa a gore monna o swanetše go “kgomarela mosadi wa gagwe.” (Bala Mateo 19:4-6.) Lediri la Segerika leo le dirišitšwego temaneng ye e lego “go kgomarela” le ka hlaloswa e le “sekgomaretši.” Ka gona, lerato la monna le mosadi le swanetše go tia bjalo ka selo seo se kgomareditšwego. Gantšhi dilo tšeo di kgomareditšwego di a senyega ge di ka kgomarollwa. Ka gona, ge monna le mosadi ba ka kgaogana, ba tlo kwa bohloko kudu. Monna yo a ratago mosadi wa gagwe a ka se tsoge a lebeletše diswantšho le dibidio tša batho bao ba sa aparago. A ka se lebele “dilo tšeo di se nago mohola.” (Ps. 119:37) Ge e le gabotse a ka se tsoge a kganyogile mosadi yo mongwe ntle le wa gagwe.—Jobo 31:1.
14. Monna yo a tlaišago mosadi wa gagwe o swanetše go dira’ng gore a lokiše segwera sa gagwe le Jehofa le go lokiša ditaba le mosadi wa gagwe?
14 Monna yo a tlaišago mosadi wa gagwe o swanetše go šoma ka thata go lokiša segwera sa gagwe le Jehofa le go lokiša ditaba le mosadi wa gagwe. O swanetše go dira eng? O swanetše go dira dilo tše di latelago. 1. O swanetše go thoma pele ka go lemoga gore o na le bothata. A tsebe gore Jehofa o bona dilo ka moka. (Ps. 44:21; Mmo. 12:14; Baheb. 4:13) 2. O swanetše go tlogela go tlaiša mosadi wa gagwe ebile a itshware gabotse. (Die. 28:13) 3. O swanetše go kgopela mosadi wa gagwe tshwarelo le go kgopela Jehofa gore a mo lebalele. (Dit. 3:19) O swanetše go lopa Jehofa gore a mo thuše go fetola tsela yeo a naganago ka yona, a bolelago ka yona le go dira dilo ka yona. (Ps. 51:10-12; 2 Bakor. 10:5; Bafil. 2:13) 4. O swanetše go phela ka go dumelelana le seo a se rapelelago ka go hloya bošoro le go hlaba batho ba bangwe ka mantšu. (Ps. 97:10) 5. O swanetše go kgopela bagolo gore ba mo thuše. (Jak. 5:14-16) 6. O swanetše go tseba gore ge a lekega go boela mekgweng ya kgale a ka dira eng. Monna yo a bogelago diswantšho le dibidio tša batho bao ba sa aparago le yena o swanetše go latela megato ye gore a kgone go thušega. Jehofa o tlo mo thuša gore a fetole mekgwa ya gagwe. (Ps. 37:5) Monna o swanetše go hloya dilo tšeo di kwešago mosadi wa gagwe bohloko. O swanetše le go ithuta go hlompha mosadi wa gagwe. A ka dira seo bjang?
BONTŠHA MOSADI WA GAGO GORE O A MO RATA
15. Monna a ka bontšha mosadi wa gagwe bjang gore o a mo rata?
15 Bontšha mosadi wa gago gore o a mo rata. Bana babo rena ba bangwe bao ba nyetšego ba dira selo se itšego letšatši le lengwe le lengwe go bontšha basadi ba bona gore ba a ba rata. (1 Joh. 3:18) Banna ba ka bontšha basadi ba bona gore ba a ba rata ka ditsela tše bonolo tše bjalo ka go ba swara ka letsogo goba ka go ba gokarela. A ka mo ngwalela molaetša a mmotša kamoo a mo gopotšego ka gona goba a mmotšiša gore letšatši la gagwe le sepela bjang. A ka fela a mo ngwalela karata a mmotša gore o mo rata bjang. Ge monna a ka dira dilo tše o tla be a bontšha gore o rata mosadi wa gagwe ebile o tiiša lenyalo la bona.
16. Ke ka baka la’ng monna a swanetše go reta mosadi wa gagwe?
16 Botša mosadi wa gago gore o bohlokwa kudu. Monna yo a ratago mosadi wa gagwe o dula a mo reta ka dilo tšeo a di dirago le go mo kgothatša. Tsela e nngwe yeo a ka dirago seo ka yona ke ka go mo leboga ka dilo tšeo a di dirago gore a mo thekge. (Bakol. 3:15) Mosadi o ikwa a ratwa kudu ge monna wa gagwe a mo reta. Mosadi yoo o ikwa a bolokegile, a ratwa ebile a hlomphiwa.—Die. 31:28.
17. Monna a ka bontšha bjang gore o hlompha mosadi wa gagwe?
17 Eba botho ebile o hlomphe mosadi wa gago. Monna yo a ratago mosadi wa gagwe o mo tšeela godimo. O mo lebelela e le mpho e botse kudu yeo e tšwago go Jehofa. (Die. 18:22; 31:10) Seo se dira gore a mo sware gabotse le ge ba sa bonwe ke batho ebile o a mo hlompha ge ba eba le thobalano. A ka se mo gapeletše gore a be le thobalano yeo e dirago gore a ikwe a se a lokologa, a ikwe a nyatšega goba yeo e ka tshwenyago letswalo la gagwe. f Le yena o tlo dira sohle seo a ka se kgonago gore a dule a na le letswalo leo le hlwekilego pele ga Jehofa.—Dit. 24:16.
18. Banna ba swanetše go ikemišetša go dira’ng? (Bona le lepokisi leo le rego “ Dilo tše Nne Tšeo di ka Thušago Monna Gore a Hlomphe Mosadi wa Gagwe.”)
18 Banna, Jehofa o a thaba ge a bona le dira sohle seo le ka se kgonago gore le hlomphe basadi ba lena ka dilo tšeo le di bolelago le tšeo le di dirago. Ikemišetše go dira dilo tšeo di ka se mo kwešego bohloko, o be botho, o mo hlomphe ebile o mmontšhe gore o a mo rata. Ge o dira bjalo o tla be o bontšha gore o a mo rata ebile o mo tšeela godimo. Ge o ka dula o hlompha mosadi wa gago o tlo ba le segwera seo se tiilego le Jehofa.—Ps. 25:14.
KOPELO 131 “Se Modimo a se Tlemagantšego Jokong”
a Banna ba ka holega ge ba ka bala sehlogo seo se rego “Na o Swara Basadi go Swana le Jehofa?” ka go Morokami wa January 2024.
b Ge e ba molekane wa gago a ile a go tlaiša, o ka bala sehlogo seo se rego “Thušo Bakeng sa Bao ba Tlaišwago ka Lapeng” seo se tšwelelago ka tlase ga “Dihlogo tše Dingwe” go jw.org/nso le go JW Library.
c TLHALOSO YA MANTŠU A MANGWE: “Mantšu a go hlaba” a akaretša go bolela dilo tšeo di kwešago motho bohloko goba go mmitša ka maina.
d Bala sehlogo seo se rego “Go Bogela Diswantšho le Dibidio tša Batho Bao ba sa Aparago go ka Senya Lenyalo la Gago” go jw.org/nso le go JW Library.
e Ge e ba monna wa gago a bogela diswantšho le dibidio tša batho bao ba sa aparago o ka bala sehlogo seo se rego “O ka Dira’ng ge Eba Molekane wa Gago a Bogela Diswantšho le Dibidio tša Batho ba sa Aparago?” ka go Morokami wa August 2023.
f Beibele ga e re botše gore ke mekgwa efe ya thobalano gare ga monna le mosadi yeo go ka bolelwago gore e hlwekile goba ga se ya hlweka. Banyalani ba Bakriste ba ka dira phetho yeo e bontšhago gore ba nyaka go kgahliša Jehofa, ba nyaka go kgotsofatšana ebile ba nyaka go dula ba na le letswalo leo le hlwekilego. Banyalani ga se ba swanela go boledišana le batho ba bangwe ka seo bona ba phethilego go se dira.
g TLHALOSO YA SESWANTŠHO: Ngwanabo rena o mošomong gomme batho bao a šomago le bona ba leka go mmontšha diswantšho tša batho ba sa aparago.