SEHLOGO SE ITHUTWAGO 3
KOPELO 35 “Le Kgonthišetše Dilo tše Bohlokwa Kudu”
Dira Diphetho Tšeo di Kgahlišago Jehofa
“Go boifa Jehofa ke mathomo a bohlale, go tseba yo Mokgethwakgethwa ke go ba le kwešišo.”—DIE. 9:10.
SEO RE TLAGO GO ITHUTA SONA
Re tlo ithuta kamoo tsebo, kwešišo le temogo di ka re thušago go dira diphetho tše bohlale.
1. Re swanetše go dira’ng letšatši le lengwe le le lengwe?
LETŠATŠI le lengwe le le lengwe re swanetše go dira diphetho. Diphetho tše dingwe go bonolo go di dira, go swana le go kgetha gore o tlo ja eng mesong le gore o tlo robala nako mang. Diphetho tše dingwe tšona go thata go di dira. Diphetho tše dingwe tšeo re di dirago di ka kgoma maphelo a rena, lethabo la rena, malapa a rena le tsela yeo re hlankelago Jehofa ka yona. Re nyaka gore diphetho tšeo re di dirago di re hole le go hola ba gabo rena. Sa bohlokwa le go feta ke gore diphetho tšeo re di dirago di swanetše go kgahliša Jehofa.—Baroma 12:1, 2.
2. Ke dilo dife tšeo di ka go thušago go dira diphetho tše bohlale?
2 O kgona go dira diphetho tše bohlale ge e ba o ka hwetša ditaba ka botlalo, wa naganišiša ka tsela yeo Jehofa a lebelelago dilo ka yona le go nagana pele o ka dira phetho e itšego. Sehlogong se, re tlo boledišana ka dilo tšeo o swanetšego go di dira le go bona kamoo di ka re thušago ka gona gore re tlwaetše matla a rena a go nagana.—Die. 2:11.
HWETŠA DITABA KA BOTLALO
3. Ke mohlala ofe wo o bontšhago bohlokwa bja go hwetša ditaba ka botlalo pele re dira diphetho?
3 Selo sa mathomo seo se ka go thušago go dira diphetho gabotse ke go hwetša ditaba ka botlalo. Ke ka baka la’ng seo se le bohlokwa? A re re motho o ya ngakeng ka ge a babja kudu. Na ngaka yeo e ka no thoma ka go botša motho yoo gore o bolawa ke eng le go mo nea dihlare ntle le go mo hlahloba goba go mmotšiša dipotšišo? Le gatee. Le wena o ka ekiša ngaka yeo ka go tseba ditaba ka botlalo pele o dira phetho e itšego. O ka dira seo bjang?
4. Lengwalo la Diema 18:13 le ka go thuša bjang gore o hwetše ditaba ka botlalo? (Bona le seswantšho.)
4 O ka botšiša dipotšišo gore o hwetše ditaba ka botlalo. A re re motho o go mema pokanong ya segwera. Na o tla ya? Ge e ba o sa tlwaelana kudu le motho yo a go memago goba o sa tsebe seo se tlo diregago pokanong yeo, o ka mmotšiša dipotšišo tša go swana le gore: “Pokano ye e tlo direga neng le gona kae? Go tlo tla batho ba ba kae? Mohlokomedi e tla be e le mang? Go tlo tla bo mang? Go tla be go direga’ng? Na go tla be go na le bjala?” Go hwetša dikarabo tša dipotšišo tše go tlo go thuša gore o dira diphetho tše bohlale.—Bala Diema 18:13.
Botšiša dipotšišo gore o kgone go dira diphetho tše bohlale (Bona serapa 4) a
5. O swanetše go dira’ng ka morago ga gore o hwetše ditaba ka botlalo?
5 Ka morago ga gore o hwetše ditaba ka botlalo, nagana ka dilo tšeo di ka diregago. Ka mohlala, o ka lemoga gore pokanong yeo go tla be go na le batho bao ba sa phelego ka melao ya motheo ya Beibele goba go tla be go se na le motho yo a hlokomelago gore bjala bo nwewa bjang. O ka lemoga le gore pokano yeo e ka fetoga monyanya wa mašata. (1 Pet. 4:3) Ka dinako tše dingwe o ka hwetša gore pokano yeo e thulana le lenaneo la gago la go ya dibokeng goba tirelong ya tšhemo. Ka morago ga gore o naganišiše ka seo se ka diregago o tlo kgona go dira phetho e bohlale. Eupša go na le selo se sengwe gape seo o swanetšego go se dira. Ka ge bjale o tseba seo se ka diregago, o swanetše go ipotšiša gore Jehofa yena o ikwa bjang.—Die. 2:6.
NAGANIŠIŠA KAMOO JEHOFA A LEBELELAGO DILO KA GONA
6. Ke ka baka la’ng re swanetše go kgopela Jehofa gore a re thuše? (Jakobo 1:5)
6 Kgopela Jehofa gore a go thuše go kwešiša ka moo a lebelelago dilo ka gona. Jehofa o tshepiša go re nea bohlale bjo bo re thušago gore dira diphetho tšeo di mo kgahlišago. O re nea bohlale bjoo “ ka ntle le go [re] goboša.”—Bala Jakobo 1:5.
7. O ka dira’ng gore o ithute go bona dilo kamoo Jehofa a di lebelelago ka gona?
7 Ka morago ga go rapela Jehofa gore a go thuše, leka go bona ka tsela yeo a go thušago ka yona. Ge o ka re o le lefelong leo o sa le tsebego gomme wa timela, o tlo kgopela motho yo a dulago moo gore a go thuše. Eupša o ka se sepele pele a fetša go botša gore o swanetše go tšea tsela efe gore o fihle mo o yago. Ka mo go swanago, ka morago ga gore o kgopele Jehofa gore a go nee bohlale, leka go hwetša dikarabo ka go nyakišiša ka melao ya Beibele le melao ya motheo yeo e sepedišanago le phetho yeo o swanetšego go e dira. Ka mohlala, ge e ba o dira phetho ya ge eba o tlo ba gona pokanong yeo re boletšego ka yona pejana, o ka naganišiša ka melao ya motheo ya Beibele yeo e bolelago ka menyanya ya mašata, go gwerana le batho bao ba sa phelego ka melao ya Beibele le go etiša Mmušo wa Modimo pele.—Mat. 6:33; Baroma 13:13; 1 Bakor. 15:33.
8. O ka dira’ng gore o hwetše dilo tšeo di ka go thušago? (Bona le seswantšho.)
8 Ka dinako tše dingwe o ka hloka thušo gore o hwetše ditaba ka botlalo. O ka kgopela keletšo go ngwanabo rena goba kgaetšedi yo a nago le phihlelo. Le gona, go itirela nyakišišo go tlo go hola kudu. Dithulusi tša rena tša go ithuta tše bjalo ka puku ya Tlhahlo ya go Dira Nyakišišo ya Dihlatse tša Jehofa le ya Mangwalo ao a ka re Thušago Bophelong di ka go thuša kudu. Gopola gore morero o mogolo ke go dira diphetho tšeo di kgahlišago Jehofa.
Naganišiša kamoo Jehofa a lebelelago dilo ka gona (Bona serapa 8) b
9. Ke’ng seo se ka nthušago go tseba ge e ba phetho yeo ke e dirago e tlo kgahliša Jehofa? (Baefeso 5:17)
9 Ke’ng seo se ka nthušago go tseba ge e ba phetho yeo ke e dirago e tlo kgahliša Jehofa? Re swanetše go thoma pele ka go tseba Jehofa gabotse. Beibele e re: “Go tseba yo Mokgethwakgethwa ke go ba le kwešišo.” (Die. 9:10) Go tseba dika tša Jehofa, merero ya gagwe le dilo tšeo a di ratago goba a di hloilego go tlo re thuša gore re kwešiše dilo gabotse. Ipotšiše gore, ‘Dilo tšeo ke di tsebago ka Jehofa di nthuša bjang gore ke dire diphetho tšeo di mo kgahlišago?’—Bala Baefeso 5:17.
10. Ke ka baka la’ng go latela melao ya motheo ya Beibele go le bohlokwa kudu go feta tsela yeo batho ba lebelelago dilo ka yona?
10 Ka dinako tše dingwe re ka swanelwa ke go nyamiša batho bao re ba ratago gore re kgone go kgahliša Jehofa. Ka mohlala, batswadi bao ba ratago morwedi wa bona ba ka nyaka gore a nyalwe ke monna wa go ba le tšhelete goba yo a ka kgonago go patela magadi a mantšhi, le ge a sa hlankele Jehofa gabotse. Re a tseba gore ba nyaka gore ngwana wa bona a hlokomelwe, eupša ke mang a tlo mo thušago gore a hlankele Jehofa gabotse? Jehofa yena o ikwa bjang? Lengwalong la Mateo 6:33 go na le karabo. Temaneng yeo Bakriste ba kgothaletšwa go “tsoma Mmušo pele.” Le ge re rata batswadi ba rena le batho ba moo re dulago gona, selo sa bohlokwa kudu go rena ke go kgahliša Jehofa.
NAGANIŠIŠA KA DIPHETHO TŠEO O DI DIRAGO
11. Ke dika dife tšeo go bolelwago ka tšona go Bafilipi 1:9, 10 tšeo di ka go thušago go naganišiša ka diphetho tšeo o swanetšego go di dira?
11 Ka morago ga gore o tsebe melao ya motheo ya Beibele yeo e sepedišanago le diphetho tšeo o swanetšego go di dira, o swanetše go naganišiša gabotse. (Bala Bafilipi 1:9, 10.) Go ba le temogo go tlo go thuša go bona gore phetho yeo o e dirago e tlo ba le mafelelo afe. Ka di nako tše dingwe go ka ba bonolo go dira phetho e itšego, eupša ga se ka mehla go bago bjalo. Go ba le temogo go tlo go thuša gore o kgone go dira diphetho tše bohlale le maemong a thata.
12-13. Go ba le temogo go ka go thuša bjang ge o nyaka mošomo?
12 Nagana ka mohlala wo. A re re o nyaka mošomo gore o kgone go hlokomela lapa la gago. Go na le mešomo e mebedi yeo o ka kgethago go yona. O hlahloba gore ke mošomo wa mohuta mang, dinako tša ona, nako yeo o ka e fetšago o eya mošomong le dilo tše dingwe. O lemoga gore mešomo ye ka bobedi ga e thulane le melao ya motheo ya Beibele. Mohlomongwe o rata o mongwe wa mešomo yeo ka gobane ke mohuta wa mošomo wo o ratago goba ka gobane o patela gabotse. Eupša go na le dilo tše dingwe tšeo o swanetšego go nagana ka tšona pele o ka dira phetho.
13 Ka mohlala, o ka ipotšiša gore na mošomo wo ke o kgethago o tlo ntšhitiša go ya dibokeng? Na o tla ntšhitiša go hlokomela lapa laka le go dira gore ba hlankele Jehofa gabotse? Go ipotšiša dipotšišo tše go tlo go thuša gore o kgone go tseba “dilo tšeo di lego bohlokwa kudu,” e lego go hlankela Jehofa le dilo tšeo lapa la gago le di hlokago go ena le go nagana kudu ka tšhelete yeo o ka e hwetšago mošomong wo o kgethago. Mafelelong o tla kgona go dira phetho yeo Jehofa a tla e šegofatšago.
14. Go ba le temogo le go rata batho ba bangwe go ka go thuša bjang gore o se ke wa ba kgopiša?
14 Go ba le temogo go go thuša gore o nagane kamoo diphetho tšeo o di dirago di ka kgomago batho ba bangwe ka gona, gomme seo sa go thuša gore o pheme go “kgopiša ba bangwe.” (Bafil. 1:10) Se se ka ba bohlokwa le ge o dira diphetho tša ka moo o aparago ka gona le go itokiša. Ka mohlala, o ka ba o rata moaparo o itšego goba go itokiša ka tsela itšego, eupša wa hwetša mokgwa woo o o ratago o kgopiša batho ba bangwe. Go ba le temogo go tlo go thuša gore o hlomphe maikwelo a batho ba bangwe. Go rata batho go tlo go thuša gore o se ke wa dira dilo tšeo di holago wena feela. (1 Bakor. 10:23, 24, 32; 1 Tim. 2:9, 10) O tlo kgona go dira diphetho tšeo di bontšhago gore o rata batho bao ebile o a ba hlompha.
15. Ke dilo dife tšeo o swanetšego go naganišiša ka tšona pele o dira phetho e kgolo?
15 Pele o ka dira phetho e kgolo, naganišiša ka dilo tšeo di ka diregago pele o ka dira phetho yeo. Jesu o re rutile go “bala ditshenyegelo.” (Luka 14:28) Nagana ka dilo ka moka tšeo di ka dirago gore phetho yeo e atlege. Ka dinako tše dingwe o ka swanelwa ke go bolela le ba leloko go kwa gore ke’ng seo ba ka se dirago gore ba go thekge. Ke ka baka la’ng go naganišiša ka tsela ye gole bohlokwa? Ge o ka naganišiša gabotse o tlo kgona go bona ge e ba o ka swanelwa ke go fetoša phetho yeo goba wa tšwela pela ka yona. Le gona, ge o ka boledišana le ba leloko gomme wa theetša seo ba se naganago o tlo kgona go dira phetho e botse yeo e atlegago. Die. 15:22.
DIRA PHETHO YEO E ATLEGAGO
16. Ke dilo dife tšeo di ka go thušago gore phetho yeo o e dirago e atlege? (Bona le lepokisi leo le rego “ Kamoo o ka Dirago Diphetho tše Bohlale
16 Ge o ka diriša dilo tšeo re boletšego ka tšona sehlogong se, o tlo kgona go dira diphetho tše bohlale. Ka morago ga go hwetša ditaba ka botlalo le go naganišiša ka melao ya motheo o tlo kgona go dira diphetho tšeo di kgahlišago Jehofa. O ka rapela Jehofa gore a go thuše gore diphetho tšeo o di dirago di atlege.
17. Ke dilo dife tše bohlokwa tšeo di ka go thušago go dira diphetho tše bohlale?
17 Le ge o ile wa dira diphetho tše bohlale nakong e fetilego, gopola gore ga se wa swanela go ithekga ka bohlale bja gago, eupša o ithekge ka Jehofa. Ke yena feela a ka go neago tsebo, kwešišo le temogo e lego dilo tšeo di dirago gore o be bohlale. (Die. 2:1-5) Jehofa a ka go thuša gore o dire diphetho tšeo di mo kgahlago.—Ps. 23:2, 3.
KOPELO 28 Go ba Mogwera wa Jehofa
