1. Ke’ng seo re ka se dirago go thabiša Jehofa?

 NAGANA o e fa motho mpho e botse le yeo e ka mo holago. O ka nyama ge e ba o ka hwetša motho yoo a tšere mpho yeo a e phaetše ka thoko ebile a sa e diriše. Eupša o be o ka thaba kudu ge o ka hwetša motho yoo a diriša mpho yeo go bontšha gore o a go leboga. Mohlala wo o re ruta’ng ka Jehofa? Jehofa o re file Morwa wa gagwe gore a re hwele. Jehofa o thaba kudu ge re bontšha gore re leboga topollo le tsela yeo a re ratago ka yona.—Joh. 3:16; Baroma 5:7, 8.

 2. Re tlo ithuta’ng sehlogong se?

² Ge nako e dutše e ya, re ka thoma go tšeela fase mpho yeo Jehofa a re filego yona ya topollo. Go dira bjalo go no swana le go beela mpho yeo ya Jehofa ka thoko. Re ka no ba re sa thabela gore re na le mpho yeo, eupša ge nako e dutše e eya, ra se sa ba le taba le yona. Go re seo se se ke sa direga, re swanetše gore re dule re nagana ka seo Jehofa le Jesu ba re diretšego sona. Sehlogo se tlo re thuša go dira sona seo. Re tlo ithuta gore topollo e ka re hola bjang go na bjale le nakong e tlago. Re tlo ithuta le gore re ka bontšha bjang gore re leboga gore Jehofa o a re rata, kudukudu nakong ye ya Segopotšo.

 TOPOLLO E RE HOLA BJANG GONA BJALE?

 3. Topollo e re hola bjang gona bjale?

³ Sehlabelo sa Jesu Kriste se šetše se re hola. Ka mohlala, Jehofa o kgona go re lebalela ka ge Jesu a re hwetše. Jehofa ga a gapeletšege go re lebalela. O re lebalela ka gobane a re rata. Ke kamoo mopsalme a ilego a opela ka gore: “Gobane wena Jehofa o lokile e bile o dula o ikemišeditše go lebalela.”—Ps. 86:5; 103:3, 10-13.

 4. Ke ka baka la’ng Jehofa a dirile gore go be le topollo? (Luka 5:32; 1 Timotheo 1:15)

⁴ Ba bangwe ba ka ikwa ba sa swanelwe ke go lebalelwa ke Jehofa. Ke nnete gore ge e le gabotse ka moka ga rena ga re swanelege. Moapostola Paulo le yena o be a tseba gore ga a “swanelwe ke go bitšwa moapostola.” O ile a bolela le gore: “Eupša ke seo ke lego sona ka botho bjo bogolo bja Modimo.” (1 Bakor. 15:9, 10) Jehofa o a re lebalela ge re itshola. Ka baka la’ng? O re lebalela ka gobane a re rata, e sego ka gobane a gapeletšega. Ge e ba o ikwa o se na mohola goba o nyamišwa ke dilo tšeo o di dirilego, gopola gore Jehofa o rometše Morwa wa gagwe gore a tle a hwele badiradibe bao ba itsholago.—Bala Luka 5:32; 1 Timotheo 1:15.

 5. Na Jehofa o a gapeletšega gore a re lebalele?

⁵ Ga se ra swanela go nagana gore Jehofa o swanetše go re lebalela ka gobane ke kgale re mo hlankela. Re a tseba gore Jehofa o gopola dilo ka moka tšeo re ilego ra mo direla tšona. (Heb. 6:10) O re file Morwa wa gagwe e le mpho, e sego ka gobane a re kolota. Ge e ba re nagana gore Jehofa o gapeletšega go re lebalela ka gobane e le kgale re mo hlankela, gona re a iphora ebile ga re bontšhe gore re leboga seo Jesu Kriste a re diretšego sona.—Bapiša le Bagalatia 2:21.

 6. Ke ka baka la’ng moapostola Paulo a ile a ntšha ka ga tšhwene ge a be a hlankela Jehofa?

⁶ Paulo o be a tseba gore Jehofa ga a gapeletšege go mo lebalela. Gona ke ka baka la’ng a ntšha ka ga tšhwene ge a be a hlankela Jehofa? O be a nyaka go bontšha Jehofa gore o leboga dilo ka moka tšeo a mo diretšego tšona. (Baef. 3:7) Le rena re ekiša moapostola Paulo ka go hlankela Jehofa ka gobane re mo rata ebile re bontšha gore re leboga dilo ka moka tšeo a re diretšego tšona.

 7. Ke ka tsela efe e nngwe yeo topollo e re holago ka yona gona bjale? (Baroma 5:1; Jakobo 2:23)

⁷ Tsela e nngwe yeo topollo e re holago ka yona gona bjale ke gore re kgona go ba le segwera seo se tiilego le Jehofa. a Sehlogong se se fetilego, re kwele gore ka moka ga rena re ile ra swanelwa ke go ithuta go rata Modimo. Topollo e dirile gore re kgone go ba le khutšo le Modimo le go ba le segwera se se tiilego le yena.—Bala Baroma 5:1; Jakobo 2:23.

 8. Ke ka baka la’ng re swanetše go leboga gore re kgona go boledišana le Jehofa ka thapelo?

⁸ Thapelo ke mpho e botse yeo e dirago gore re kgone go ba le segwera se se tiilego le Jehofa. Jehofa o kwa dithapelo tša rena ge re le dibokeng le ge re nnoši. Ge re rapela re ikwa re imologile, eupša go sa na le dilo tše dintšhi tšeo go rapela go re holago ka tšona. Go rapela go dira gore re be le segwera se se tiilego le Modimo. (Ps. 65:2; Jak. 4:8; 1 Joh. 5:14) Ge Jesu a be a le mo lefaseng o be a dula a rapela ka gobane a tseba gore Jehofa o dula a mo theeditše, ebile o be a tseba gore go rapela go tlo dira gore a be le segwera se se  tiilego le Jehofa. (Luka 5:16) Re leboga gore topollo e dira gore re kgone go boledišana le Jehofa le go ba le segwera se se tiilego le yena.

TOPOLLO E TLO RE HOLA BJANG NAKONG E TLAGO?

 9. Topollo e tlo hola bjang bahlanka ba Modimo bao ba botegago nakong e tlago?

⁹ Topollo e tlo hola bjang bahlanka ba Modimo bao ba botegago nakong e tlago? Ba tlo phela go ya go ile. Batho ba bantšhi ba bolela gore seo ga se kgonege ka gore ke kgale batho ba hlokofala. Eupša morero wa Jehofa e be e le gore batho ba phele go ya go ile. Ge nkabe Adama e se a dira sebe, batho ba be ba tlo bona gore go a kgonega go phela go ya go ile. Le ge gona bjale go ka ba thatanyana go tshepa gore re tlo phela go ya go ile, go gopola gore Jehofa o rometše Morwa wa gagwe gore a re hwele go tlo re thuša go tshepa gore go phela go ya go ile go a kgonega.—Baroma 8:32.

10. Batlotšwa le dinku tše dingwe ba fela pelo ya go bona go direga eng?

¹⁰ Le ge gona bjale re hlokofala, Jehofa o nyaka gore re dule re nagana ka go tlo phela ka mo go sa felego. Batlotšwa ba fela pelo ya go ya legodimong le go buša le Jesu. (Kut. 20:6) Ba dinku tše dingwe, bona ba fela pelo ya go tlo phela lefaseng moo go se nago manyami goba bohloko. (Kut. 21:3, 4) Na o fela pelo ya go tlo phela mo lefaseng go ya go ile? Tseba gore o bohlokwa go no swana le batho bao ba tlago go phela legodimong. Jehofa o be a bopile batho gore ba tle ba ipshine ka go phela mo lefaseng go ya go ile.

11-12. Ke di tšhegofatšo dife tše dingwe tšeo re tlago go di thabela lefaseng le leswa? (Bona le seswantšho.)

¹¹ Nagana gore bophelo bo tlo ba bjang paradeiseng. Re ka se sa babja le go hwa. (Jes. 25:8; 33:24) Jehofa o tlo re fa dilo ka moka tše dibotse tšeo re di nyakago. Ke eng seo o nyakago go ithuta sona lefaseng le leswa? Na o ka thabela go ithuta ka diphoofolo, mmino goba o ka thabela go ithuta go thala diswantšho?  Re a tseba gore lefaseng le leswa re tlo hloka batho ba go aga le go lema. Go tlo hlokega le batho ba go apea, ba go hlokomela meago le mašemo ao. (Jes. 35:1; 65:21) Ge re tla be re phela paradeiseng re tlo ba le nako e ntšhi ya go ithuta ka dilo tšeo re di ratago.

¹² Re tlo thabela go amogela batho ba ga bo rena bao ba hlokofetšego ba tsošitšwe bahung. (Dit. 24:15) Re tlo thabela le go ithuta ka dilo tše dintšhi tšeo Jehofa a di bopilego. (Ps. 104:24; Jes. 11:9) Re tlo ipshina ka go hlankela Jehofa ebile go ka se sa hlokega gore re mo kgopele gore a re lebalele. Na o ka thabela go phela paradeiseng goba go no phela ka tsela yeo wena o e nyakago gona bjale? (Baheb. 11:25) Re a tshepa gore o ka thabela go phela paradeiseng. Ditšhegofatšo tšeo re tlago go di hwetša lefaseng le leswa di phala kgole dilo ka moka tšeo re nago le tšona gona bjale. Lefase le leswa ga se toro. Re tla be re phela moo letšatši le lengwe le le lengwe. Seo se tlo kgonega ka gobane Jehofa o re neile Morwa wa gagwe gore a re hwele.

RE KA BONTŠHA BJANG GORE RE LEBOGA SEO JEHOFA A RE DIRETŠEGO SONA?

13. Re ka bontšha bjang gore re leboga seo Jehofa a re diretšego sona? (2 Bakorinthe 6:1)

¹³ Re ka bontšha bjang gore re leboga topollo? Ka go etiša Mmušo wa Modimo pele. (Mat. 6:33) Jesu o “hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.” (2 Bakor. 5:15) Ka ge Jehofa a dula a re direla dilo tše dibotse le go re lebalela, re swanetše go leboga dilo ka moka tšeo a re direlago tšona.—Bala 2 Bakorinthe 6:1.

14. Re ka bontšha bjang gore re tshepa tlhahlo ya Jehofa?

¹⁴ Re bontšha gore re rata Jehofa ka go latela tlhahlo yeo a re filego yona. Bjang? Pele re ka dira phetho e itšego, ya go swana le gore re ka kgetha mošomo wa mohuta mang goba go ithutela eng re swanetše go thoma ka go nagana gore Jehofa o nyaka gore re dire eng. (1 Bakor. 10:31; 2 Bakor. 5:7) Ge re dira dilo ka moka tšeo Jehofa a re kgopelago gore re di dire, tumelo ya rena le segwera sa rena le yena di a tia. Le kholofelo ya rena ya go phela go ya go ile e ya tia.—Baroma 5:3-5; Jak. 2:21, 22.

15. Re ka bontšha bjang gore re leboga seo Jehofa a re diretšego sona nakong ya Segopotšo?

¹⁵ Go na le ditsela tše dingwe tšeo re ka bontšhago gore re leboga seo Jehofa a re diretšego sona. Re ka bontšha gore re leboga Jehofa ka go diriša nako ya rena ka bohlale nakong ya Segopotšo. Re ka laletša ba bangwe gore ba tle Segopotšong. (1 Tim. 2:4) Hlalosetša batho bao o ba memago gore go tlo direga eng Segopotšong. Ba bontšhe bidio ye e rego, Ke ka Baka la Eng Jesu a Ile  a hwa? le yeo e rego, Gopola Lehu la Jesu go jw.org/nso. Bagolo ba swanetše go laletša batho bao ba fodilego moyeng. Go ba le lethabo le legolo kua legodimong ge motho a boela ka phuthegong ebile le rena re a thaba. (Luka 15:4-7) Ge re tla be re le Segopotšong re swanetše go dumediša batho ka moka kudukudu bao e lego baeng goba bao e lego kgale ba sa tle dibokeng. Re nyaka gore ba ikwe ba le gae ga mahlaku.—Baroma 12:13

16. Ke ka baka la’ng re swanetše go naganišiša ka go oketša tirelo ya rena nakong ya Segopotšo?

¹⁶ Na o ka kgona go oketša tirelo ya gago nakong ya Segopotšo? Ge re ka dira seo re tla be re bontšha gore re leboga seo Jehofa le Jesu ba re diretšego sona. Ge re ka fetša nako e ntšhi re hlankela Jehofa, re tlo kgona go bona gore o a re thekga gomme seo sa dira gore re mo tshepe le go feta. (1 Bakor. 3:9) Le gona bala mmalo wa Beibele wa Segopotšo woo o lego ka pukwaneng ya Go Hlahloba Mangwalo ka Mehla goba wo o tšwelelago ka gare ga Pukwana ya Bophelo bja Rena le Bodiredi bja Bokriste. O ka diriša mmalo woo wa Beibele go dira nyakišišo.

17. Ke eng seo se thabišago Jehofa? (Bona le lepokisi leo le rego “ Ditsela Tšeo di Bontšhago Gore re Leboga Seo Jehofa a re Diretšego Sona.”)

¹⁷ Maemo a gago a ka no se go dumelele gore o dire dilo ka moka tšeo re boletšego ka tšona. Jehofa ga a re bapetše le batho ba bangwe, o bona seo se lego ka pelong. O a thaba ge a bona gore o dira sohle seo o ka se kgonago go leboga mpho ya topollo.—1 Sam. 16:7; Mar. 12:41-44.

18. Ke ka baka la’ng re swanetše go leboga Jehofa le Jesu ka baka la seo ba re diretšego sona?

¹⁸ Topollo ke yona e dirilego gore Jehofa a kgone go re lebalela dibe tša rena, gore re be le segwera se se botse le yena le gore re tle re phele go ya ile. Anke re dule re leboga Jehofa ka lerato leo a re bontšhitšego lona le ka dilo tše dibotse tšeo a re šegofatšago ka tšona. (1 Joh. 4:19) Le gona, a re duleng re leboga lerato leo Jesu a re bontšhitšego lona ka go re hwela.—Joh. 15:13.