SEHLOGO SE ITHUTWAGO 1
KOPELO 2 Leina la Gago ke Jehofa
Efang Jehofa Letago
TEMANA YA RENA YA NGWAGA YA 2025: “Efang Jehofa letago leo le swanelago leina la gagwe.”—PS. 96:8.
SEO RE TLAGO GO ITHUTA SONA
Sehlogong se re tlo ithuta ka dilo tšeo re ka di dirago gore re fe Jehofa letago leo le mo swanelago.
1. Lehono batho ba tshwenyegile ka eng?
LEHONO batho ba bantšhi ba tshwenyegile ka bona fela ebile ga ba na taba le batho ba bangwe. Ka mohlala, ba bantšhi ba diriša Social Media go kgantšha dilo tšeo ba nago le tšona goba tšeo ba kgonnego go di dira. Eupša ke ba sego kae feela bao ba fago Jehofa Modimo letago leo le mo swanelago. Sehlogong se re tlo kwa gore go fa Jehofa letago ke eng le gore ke ka baka la’ng re swanetše go dira seo. Re tlo kwa le ka dilo tšeo re ka di dirago gore re fe Modimo letago leo le mo swanelago le gore yena o tlo tagafatša bjang leina la gagwe nakong e tlago.
GO FA JEHOFA LETAGO KE ENG?
2. Jehofa o ile a bontšha bjang letago la gagwe Thabeng ya Sinai? (Bona le seswantšho sa letlakala la ka ntle.)
2 Letago ke eng? Ka Beibeleng, lentšu letago le ka šupa go selo se sengwe le se sengwe seo se dirago gore motho e be yo a kgahlišago. Jehofa o ile a bontšha letago la gagwe ka tsela e makatšago ka morago ga gore Baisiraele ba lokollwe bokgobeng kua Egepeta. Nagana ka boemo bjo: Baisiraele ba dimilione ba kgobokane Thabeng ya Sinai gore ba tle ba kwe seo Modimo a bego a nyaka go ba botša sona. Go ba le leru le leso leo le khupetšago thaba. Go ba le tšhišinyego e matla ya lefase yeo e latelwago ke muši o moso wo o khupetšago thaba, ke moka ka morago go ba le lešata le legolo la magadima. (Ek. 19:16-18; 24:17; Ps. 68:8) Nagana gore Baisiraele ba ile ba kgahlega bjang ge ba bona Jehofa a bontšha letago la gagwe.
Jehofa o ile a bontšha Baisiraele letago la gagwe ge ba be ba le Thabeng ya Sinai (Bona serapa 2)
3. Go fa Jehofa letago ke eng?
3 Na batho ba ka kgona go fa Jehofa letago? Ee, re ka kgona. Tsela e nngwe yeo re fago Jehofa letago ka yona, ke go botša batho ka matla a gagwe le dika tša gagwe tše di kgahlišago. E bile re fa Jehofa letago ge re mo leboga ka dilo tšeo re kgonago go di dira ka baka la matla ao a re fago ona. (Jes. 26:12) Kgoši Dafida le yena o ile a re beela mohlala o mobotse wa go fa Jehofa letago. Ge Dafida a be a rapela pele ga setšhaba sa Isiraele, o ile a botša Modimo gore: “Wena Jehofa, bogolo, matla, botse, tlhompho le seriti ke tša gago; ka gobane dilo ka moka legodimong le lefaseng ke tša gago.” Ka morago ga thapelo yeo, “phuthego ka moka e ile ya rapela Jehofa Modimo.”—1 Dikor. 29:11, 20.
4. Jesu o ile a nea Jehofa letago bjang?
4 Ge Jesu a be a le mo lefaseng, o ile a fa Tatagwe letago ka go bontšha batho gore Jehofa ke yena a mo fago matla a go dira mehlolo. (Mar. 5:18-20) Le gona, Jesu o ile a nea Jehofa letago ka tsela yeo a bego a bolela ka yena le ka tsela yeo a bego a swara batho ka yona. Ka letšatši le lengwe Jesu o be a ruta Sinagogeng. Gare ga batho bao ba bego ba mo theeditše, go be go na le mosadi yo mongwe yo a bego a tshwenywa ke matemona ka mengwaga e 18. Matemona ao a be a dira gore mosadi yoo a se ke a kgona go ema gabotse. Ruri o be a na le mathata! Jesu o ile a mo kwela bohloko gomme a mmatamela ke moka a bolela le yena ka botho a re: “Wena mosadi, o lokolotšwe bofokoding bja gago.” Ke moka o ile a mmea matsogo gomme mosadi yoo a kgona go ema gabotse, “a tagafatša Modimo.” O be a thabile ka gobane Jehofa o be a mo thušitše gore a boele a phele gabotse. (Luka 13:10-13) Mosadi yoo o be a na le mabaka a kwagalago a go fa Jehofa letago le rena re swanetše go dira seo se swanago.
KE KA BAKA LA’NG RE SWANETŠE GO FA JEHOFA LETAGO?
5. Ke ka baka la’ng re swanetše go hlompha Jehofa?
5 Re fa Jehofa letago ka gobane re a mo hlompha. Re na le mabaka a mantšhi a go mo hlompha. Jehofa ke Ramatlaohle. (Ps. 96:4-7) Bohlale bja gagwe re bo bona dilong tšeo a di dirilego. Ke yena a re bopilego ebile o a re hlokomela. (Kut. 4:11) O a botega. (Kut. 15:4) Dilo ka moka tšeo a di dirago di a atlega ebile o dula a dira dilo ka moka tšeo a di tshepišitšego. (Josh. 23:14) Moporofeta Jeremia o ile a boela ka Jehofa gore: “Gare ga bohle ba bohlale ba ditšhaba le gare ga dikgoši tša tšona ga go yo a swanago le wena.” (Jer. 10:6, 7) Re a bona gore re na le mabaka a kwagalago a gore re hlomphe Tatago rena wa legodimong. Jehofa o nyaka gore re mo hlomphe ebile re mo rate.
6. Ke ka baka la’ng re rata Jehofa?
6 Re fa Jehofa letago ka gobane re a mo rata. Nagana ka dika tše dingwe tša Jehofa tšeo di dirago gore re mo rate. O na le kwelobohloko ebile o a gaugela. (Ps. 103:13; Jes. 49:15) Ge re ekwa bohloko le yena o kwa bohloko. (Sak. 2:8) Go bonolo gore re be bagwera ba gagwe. (Ps. 25:14; Dit. 17:27) O ikokobeditše; “o a inama e le gore a lebelele legodimo le lefase, o thuša motho wa maemo a tlase gore a se sa dula leroleng.” (Ps. 113:6, 7) Ruri dilo tše ka moka di dira gore re nyake go fa Modimo letago.—Ps. 86:12.
7. Ke’ng seo re ka se dirago?
7 Re fa Jehofa letago ka gobane re nyaka gore batho ba bangwe ba mo tsebe. Batho ba bantšhi ga ba tsebe nnete ka Jehofa. Ka baka la’ng? Ka gobane Sathane o phatlalatša maaka ka yena. (2 Bakor. 4:4) Sathane o botša batho gore Jehofa ke yo kgopo, ga a re rate ebile o dira gore batho ba tlaišege. Eupša rena re tseba nnete ka Modimo wa rena. Ka gona, re swanetše go botša batho nnete yeo gomme re mo fe letago. (Jes. 43:10) Psalme 96 e bolela ka go fa Jehofa letago. Ge re dutše re bolela ka tše dingwe tša ditemana tša psalmeng yeo, nagana ka dilo tšeo o ka di dirago gore o fe Modimo letago leo le swanelago leina la gagwe.
RE KA DIRA ENG GORE RE FE JEHOFA LETAGO LEO LE MO SWANELAGO?
8. Re ka fa Jehofa letago ka ditsela dife? (Psalme 96:1-3)
8 Bala Psalme 96:1-3. Re ka fa Jehofa letago ka seo re se bolelago ka yena. Ditemaneng tše, bahlanka ba Jehofa ba kgothaletšwa gore ba ‘opelele Jehofa,’ ba “rete leina la gagwe,” ba “bolele ditaba tše dibotse tša kamoo a phološago batho,” le gore ba “[tsebiše] ditšhaba gore o na le matla a magolo.” Ge re dira dilo tše ka moka re tla ba re efa Tatago rena wa legodimong letago. Bajuda ba botegago le Bakriste ba lekgolong la pele la mengwaga, ba ile ba botša batho dilo ka moka tše dibotse ka Jehofa le go emela leina la gagwe. (Dan. 3:16-18; Dit. 4:29) Rena re ka ba ekiša bjang?
9-10. Re ithuta’ng go kgaetšedi Angelena? (Bona le seswantšho.)
9 A re kweng ka phihlelo ya kgaetšedi Angelena, a yo a dulago United States. O ile a bontšha sebete ge a be a emela leina la Jehofa mo a bego a šoma gona. Ka ge Angelena e be e le mošomi yo moswa o ile a kgopelwa gore a botše batho bao a šomago le bona gore ke yena mang le gore o tšwa kae. O ile a beakanya dinepe tšeo di tlago go bontšha batho bao a šomago le bona gore o thabela go ba yo mongwe wa Dihlatse tša Jehofa. Pele e ka ba nako ya gagwe ya go bolela, motho yo mongwe moo mošomong o ile a bolela gore o godišitšwe e le yo mongwe wa Dihlatse tša Jehofa. O ile a thoma go kwera ditumelo tša rena. Angelena o re: “Ke ile ka tšhoga. Eupša ka ipotša gore: ‘Nka se dumelele motho a bolela maaka ka Jehofa. Ke tlo emela leina la gagwe.’”
10 Ge monna yoo a fetša go bolela Angelena o ile a rapela thapelo e kopana ka pelong. Ke moka o ile a bolela le yena ka botho a re: “Le nna ke godišitšwe go swana le wena. Ke godišitšwe ke le yo mongwe wa Dihlatse tša Jehofa.” Le ge Angelena a be a tšhogile, o ile a kgona go dula a išitše maswafo fase ge a be a hlalosetša batho bao a šomago le bona ka ditumelo tša gagwe le go ba bontšha diswantšho tša ge a thabela go hlankela Jehofa. (1 Pet. 3:15) Go bile le mafelelo afe? Ge a fetša go bolela monna yoo le yena o be a išitše maswafo fase. O boletše le gore le yena o ile a thabela go godišwa e le yo mongwe wa Dihlatse tša Jehofa. Angelena o re: “Re swanetše go emela leina la Jehofa. E tloga e le tokelo e kgolo go bolela nnete ka Modimo wa rena.” Le rena re na le tokelo ya go tumiša Jehofa le go mo fa letago le ge batho ba bangwe ba mo nyatša.
Re ka tagafatša Jehofa ka dilo tšeo re di bolelago, dilo tšeo re di dirago le tsela yeo re itshwarago ka yona (Bona dirapa 9-10) b
11. Bahlanka ba Jehofa ba be ba dutše ba latela bjang molao wa motheo wo o lego go Psalme 96:8?
11 Bala Psalme 96:8. Re ka fa Jehofa letago ka go neelana ka dilo tšeo re nago le tšona. Ke kgale bahlanka ba Jehofa ba mo tumiša ka tsela yeo. (Die. 3:9) Ka mohlala, Baisiraele ba ile ba ntšha meneelo gore go agwe le go hlokomela tempele. (2 Dikg. 12:4, 5; 1 Dikor. 29:3-9) Balatedi ba bangwe ba Kriste ba be ba neelana “ka dilo tša bona” gore yena le baapostola ba kgone go ba le dilo tšeo ba di hlokago. (Luka 8:1-3) Bakriste ba lekgolong la pele la mengwaga le bona ba ile ba ntšha meneelo gore ba kgone go thuša bana babo bona le dikgaetšedi. (Dit. 11:27-29) Lehono, le rena re ka fa Jehofa letago ka go ntšha meneelo.
12. Meneelo ya rena e ka fa Jehofa letago bjang? (Bona le seswantšho.)
12 Ekwa ka phihlelo e nngwe yeo e bontšhago kamoo meneelo ya rena e fago Jehofa letago ka gona. Pego e nngwe ya 2020 e ile ya bontšha gore naga ya Zimbabwe e ile ya ba le komelelo e kgolo. Batho ba bantšhi ba ile ba bolawa ke tlala go akaretša le kgaetšedi yo a bitšwago Prisca. Le ge go be go na le komelelo, Prisca o be a dula a eya tšhemong beke e nngwe le e nngwe, le ge batho ba be ba lema. Baagišane ba gagwe ba be ba mo kwera ge a be a eya tšhemong go ena le go lema. Ba be ba re go yena: “O tlo bolawa ke tlala.” Prisca o be a ba araba ka gore, “Jehofa a ka se tsoge a tlogetše bahlanka ba gagwe.” Ka morago o ile a hwetša dilo tšeo a bego a di hloka go tšwa go bana babo rena le dikgaetšedi. Meneelo ya rena e ile ya mo thuša gore a hwetše dilo tšeo a di hlokago. Baagišane ba gagwe ba ile ba kgahlwa ke seo gomme ba re go yena: “Ka nnete Modimo wa gago ga se a ka a go tlogela, re nyaka go ithuta ka yena.” Baagišane ga gagwe ba šupa ba ile ba thoma go ya dibokeng.
Re ka tagafatša Jehofa ka dilo tšeo re nago le tšona (Bona serapa 12) c
13. Tsela yeo re itshwarago ka yona e fa Jehofa letago bjang? (Psalme 96:9)
13 Bala Psalme 96:9. Re ka fa Jehofa letago ka tsela yeo re itshwarago ka yona. Baperisita bao ba bego ba hlankela tempeleng ya Jehofa ba be ba swanetše go dula ba hlwekile. (Ek. 40:30-32) Selo sa bohlokwa ke gore ba be ba swanetše go itshwara gabotse go feta go hlweka mmeleng. (Ps. 24:3, 4; 1 Pet. 1:15, 16) Re swanetše go šoma ka thata gore re ‘tlogele tsela yeo re bego re phela ka yona kgale,’ e lego go tlogela go itshwara ka tsela e sa hlwekago goba go dira dilo tše di šišimišago, gomme re be “mohuta o moswa wa batho” ka go nagana le go dira dilo tšeo di bontšhago dika tša Jehofa tše dibotse. (Bakol. 3:9, 10) Jehofa a ka kgona go thuša le batho ba babe le bao ba dirago dilo tše di šišimišago gore ba fetole tsela yeo ba dirago dilo ka yona.
14. Re ithuta’ng go Jack? (Bona le seswantšho.)
14 A re boleleng ka mohlala wa Jack, o be a rata dintwa ebile batho ba be ba mo tšhaba, ba ile ba mo nea le leina la The Demon. Jack o ile a ahlolelwa lehu ka ge a be a na le melato e mentšhi. Ge a be a letetše gore letšatši la gore a bolawe le fihle, o ile a amogela go ithuta Beibele le ngwanabo rena yo mongwe yo a bego a etela tronko yeo a bego a le go yona. Le ge Jack a be a rata dintwa ebile batho ba mo tšhaba, o ile a fetoga gomme mafelelong a kolobetšwa. Letšatšing leo a bego a bolawa ka lona, batho bao ba bego ba mo hlokomela ba ile ba lla ka ge ba be ba bona tsela yeo a fetogilego ka yona. Lephodisa le lengwe leo le bego le šoma tronkong yeo le ile la re: “Monna yo batho ba bantšhi ba be ba mo tšhaba eupša gona bjale o lokile kudu.” Ka morago ga gore Jack a bolawe, bana babo rena bao ba bego ba swara diboka tronkong yeo ba ile ba kopana le mogolegwa yo e bego e le la mathomo a e tla dibokeng. O thušitšwe ke eng gore a ye dibokeng? O thušitšwe ke go bona kamoo Jack a ilego a fetoga ka gona ebile a nyaka le go tseba gore a ka dira eng gore a hlankele Jehofa. Tsela yeo re itshwarago ka yona e fa Jehofa letago.—1 Pet. 2:12.
Re ka tagafatša Jehofa ka tsela yeo re itshwarago ka yona (Bona serapa 14) d
JEHOFA O TLO TAGAFATŠA BJANG LEINA LA GAGWE E SE KGALE?
15. Jehofa o tlo tagafatša bjang leina la gagwe e se kgale? (Psalme 96:10-13)
15 Bala Psalme 96:10-13. Ditemana tša mafelelo tša Psalme 96 di hlalosa Jehofa e le Moahlodi le Kgoši ya go loka. Jehofa o tlo tagafatša bjang leina la gagwe e se kgale? Ka go ahlola gabotse. Go se kgale o tlo fediša Babilona o Mogolo ka gobane o tsentše leina la gagwe ka gare ga maraga. (Kut. 17:5, 16; 19:1, 2) Ba bangwe ge ba bona Babilona o Mogolo a fedišwa ba ka tla ba hlankela Jehofa le rena. Ka ntwa ya Haramagedone, Jehofa o tlo fediša batho ka moka ba kgopo le bao ba senyago leina la gagwe gomme a phološa bao ba mo ratago le bao ba ikemišeditšego go mo hlankela. (Mar. 8:38; 2 Bathes. 1:6-10) Ka morago ga Pušo ya Kriste ya mengwaga e sekete, Jehofa o tla ba a kgethagaditše leina la gagwe. (Kut. 20:7-10) Ka nako yeo, “badudi ba lefase ka moka ba tla tseba ka bogolo bja Jehofa go swana le meetse ao a tletšego ka lewatleng.”—Habak. 2:14.
16. O ikemišeditše go dira’ng? (Bona le seswantšho.)
16 Go tlo thabiša kudu go bona ge batho bao ba tla bego ba phela mo lefaseng ba tumiša Jehofa ka tsela yeo e mo swanetšego. Ka ge gona bjale re sa letile, a re direng sohle seo re ka se kgonago go fa Jehofa letago. Sehlopha se Bušago se kgethile Psalme 96:8 yeo e rego: “Efang Jehofa letago leo le swanelago leina la gagwe” gore e be temana ya rena ya ngwaga wa 2025.
Batho ka moka bao ba tla bego ba phela mo lefaseng ba tlo fa Jehofa letago leo le swanelago leina la gagwe (Bona serapa 16)
KOPELO 12 Modimo yo Mogolo, Jehofa
a Maina a mangwe a fetotšwe.
