1. Re holega bjang ge re e ba gona segopotšong sa lehu la Kriste ngwaga o mongwe le o mongwe?

 JEHOFA o re neile mpho e botse kudu ge a be a romela Morwa wa gagwe gore a re hwele. (2 Bakor. 9:15) Lehu leo la Jesu le dira gore re kgone go ba bagwera ba Jehofa. Ebile le dira gore re tle re kgone go phela ka mo go sa felego. Re na le mabaka a mantšhi a gore re leboge Jehofa yo a ilego a re nea topollo ka gobane a re rata kudu. (Baroma 5:8) Jesu o ile a re laela gore re gopole lehu la gagwe ngwaga o mongwe le o mongwe go re thuša gore re dule re leboga topollo le go e tšeela godimo.—Luka 22:19, 20.

 2. Re tlo boledišana ka’ng sehlogong se?

² Ngwageng wo segopotšo se tlo ba ka Mokibelo wa di 12 tša April. Ka moka ga rena re swanetše go dira sohle seo re ka se kgonago gore re be gona. Re tlo holega kudu ge re ka beela nako ka thoko sehleng sa Segopotšo gore naganišiše a ka seo Jehofa le Morwa wa gagwe ba re diretšego sona. Sehlogong se re tlo boledišana ka seo topollo e re rutago sona ka Jehofa le Morwa wa gagwe. Sehlogo se se latelago se tlo re thuša go kwešiša gore re ka holwa bjang ke topollo le gore re ka dira eng go bontšha gore re e tšeela godimo.

TOPOLLO E RE RUTA’NG KA JEHOFA?

 3. Go tlile bjang gore lehu la motho o tee le phološe batho ba dimilione? (Bona le seswantšho.)

³ Topollo e re ruta gore Jehofa ke Modimo wa toka. (Doit. 32:4) Bjang? Nagana ka se: Go se kwe ga Adama go dirile gore ka moka ga rena re be le sebe seo se dirago gore re hwe.  (Baroma 5:12) Jehofa o ile a rulaganya gore a neele Jesu e le topollo gore a kgone go re lokolla sebeng le lehung. Eupša sehlabelo sa motho o tee yo a phethagetšego se ka phološa bjang batho ba dimilione? Moapostola Paulo o ngwadile gore: “Gobane go etša ge ka go se kwe ga motho o tee [e lego Adama] ba bantši ba ile ba dirwa badiradibe, ka mo go swanago ka go kwa ga motho o tee [e lego Jesu] ba bantši ba tla dirwa ba lokilego.” (Baroma 5:19; 1 Tim. 2:6) Ka mantšu a mangwe, ka baka la motho o tee wa go se kwe, ka moka ga rena re bile makgoba a sebe le lehu. Ka gona, go ile gwa nyakega motho o tee yo a phethagetšego wa go kwa gore a re lokolle.

 4. Ke ka baka la’ng Jehofa a se a no dumelela bana ba Adama bao ba nago le dipelo tšeo di lokilego gore ba no phela ka mo go sa felego?

⁴ Na go be go hlokega gore Jesu a hwe e le gore re phologe? Na Jehofa o be a ka se no dumelela bana ba Adama bao ba nago le dipelo tšeo di lokilego gore ba phele ka mo go sa felego? Batho bao ba sa phethagalago ba be ba ka lebelela phetho ya mohuta woo e le e botse kudu. Eupša go dira bjalo go be go ka se bontšhe gore Jehofa o na le toka. Ka ge Jehofa a lokile, o be a swanetše go dira se sengwe ka go se kwe ga Adama.

 5. Ke ka baka la’ng re ka kgodišega gore Jehofa o tlo dula a dira selo seo se lokilego?

⁵ Go be go ka direga eng ge nkabe Jehofa a se a fana ka topollo eupša a no dumelela bana ba Adama bao ba sa phethagalago gore ba phele ka mo go sa felego? Batho ba be ba ka nagana gore Modimo a ka tlogelela le dilo tše dingwe. Ka mohlala, ba be ba ka nagana gore a ka se phethagatše dilo tše dingwe tšeo a di tshepišitšego. Eupša ga se ra swanela go tshwenyega ka seo. Taba ya gore Jehofa o ile a bontšha toka le ge seo se be se ka mo kweša bohloko, e re kgonthišetša gore o tlo dula a dira seo se lokilego.

 6. Ke tsela efe e nngwe yeo topollo e bontšhago ka yona gore Jehofa o a re rata? (1 Joh. 4:9, 10)

⁶ Le ge topollo e re thuša go kwešiša gore Modimo o lokile, e re thuša gape go bona gore o re rata gakaakang. (Joh. 3:16; bala 1 Johane 4:9, 10.) Jehofa o rometše Morwa wa gagwe gore a tle a re hwele ka gobane o nyaka gore re phele ka mo go sa felego ebile o nyaka gore re be karolo ya lapa la gagwe. Ka morago ga gore Adama a dire sebe, Jehofa o ile a mo raka ka lapeng la gagwe. Seo se ile sa dira gore ka moka ga rena re se ke ra ba karolo ya lapa la Jehofa. Eupša ka lebaka la topollo, Jehofa o re lebalela dibe ebile o dira gore re kgone go ba karolo ya lapa la gagwe la  batho bao ba bontšhago tumelo le bao ba kwago. Le gona bjale go a kgonega gore re be le segwera se sebotse le Jehofa le bana babo rena le dikgaetšedi. Ruri Jehofa o re rata kudu.—Baroma 5:10, 11.

 7. Tsela yeo Jesu a ilego a tlaišega ka yona e bontšhitše bjang gore Jehofa o a re rata?

⁷ Re ka kgona go kwešiša gabotse kamoo Jehofa a re ratago ka gona ge re ka naganišiša kamoo topollo e dirilego gore a kwe bohloko ka gona. Sathane o bolela gore ga go na mohlanka wa Modimo yo a ka dulago a mmotegela kudukudu ge dilo di sa sepele gabotse. Jehofa o ile a dumelela gore Jesu a tlaišege pele a ehwa go bontšha gore Sathane o bolela maaka a matala. (Jobo 2:1-5; 1 Pet. 2:21) Jehofa o be a lebeletše nakong ya ge Jesu a rogwa ke batho ba bodumedi, a bethwa ebile a kokotelwa koteng. O be a dutše a lebeletše le ge Morwa wa gagwe a ehwa lehu le sehlogo. (Mat. 27:28-31, 39) Jehofa o be a ka emiša seo se bego se direga ka ge a be a na le matla a go dira bjalo. Ka mohlala, ge baganetši ba Jesu ba be ba re: “[Modimo] a a mo hlakodiše ge e ba a mo rata,” Jehofa nkabe a ile a dira bjalo. (Mat. 27:42, 43) Eupša ge nkabe Jehofa a ile a dira bjalo, go be go ka se be le topollo le gona re be re tlo phela ntle le kholofelo. Ka gona, Jehofa o ile a dumelela Morwa wa gagwe gore a tlaišege pele a ehwa.

 8. Ke ka baka la’ng re ka kgodišega Jehofa o kwele bohloko nakong ya ge Morwa wa gagwe a tlaišega? (Bona le seswantšho.)

⁸ Ga se ra swanela go nagana gore Jehofa ga a na maikwelo ka ge e le Modimo ramatlaohle. Re bopilwe ka seswantšho sa Modimo ebile re na le maikwelo, ka gona go a kwagala go dumela gore Jehofa o na le maikwelo. Beibele e re botša gore o be a kwele “bohloko.” (Ps. 78:40, 41) Nagana le ka mohlala wa Aborahama le Isaka. Gopola gore Aborahama o ile a laelwa gore a neelane ka morwa gagwe a nnoši gore e be sehlabelo. (Gen. 22:9-12; Baheb. 11:17-19) Nagana kamoo Aborahama a ilego a kwa bohloko ka gona ge a be a le kgauswi le go bolaya morwa wa gagwe. Ruri re ka dumela gore Jehofa le yena o ile a kwa bohloko ge a be a lebeletše Morwa wa gagwe a tlaišwa pele a ehwa.—Bogela bidio yeo e lego go jw.org/nso, yeo e rego Ekiša Tumelo ya Bona—Aborahama, Karolo ya Bobedi.

 9. Lengwalo la Baroma 8:32, 38, 39 le go thuša bjang go kwešiša kamoo Jehofa a ratago wena le bana beno le dikgaetšedi?

⁹ Topollo e re ruta gore ga go na motho le o tee yo a ka re ratago kamoo Jehofa a re ratago ka gona. (Bala Baroma 8:32, 38, 39.) Ga go pelaelo gore Jehofa o re rata kudu go feta kamoo re ithatago ka gona. Na o nyaka go  phela ka mo go sa felego? Jehofa o nyaka seo le go feta. Na o nyaka gore dibe tša gago di lebalelwe? Jehofa o nyaka go go lebalela le go feta. O no nyaka re bontšha gore re leboga mpho ye a re neilego yona ka go ba le tumelo le go kwa. Topollo ke tsela e kaone kudu ya go bontšha gore Modimo o a re rata. Ge re fihla lefaseng le leswa re tlo ithuta dilo tše dintšhi kudu ka lerato la Jehofa.—Mmo. 3:11.

TOPOLLO E RE RUTA’NG KA JESU?

10. (a) Ke ka baka la’ng Jesu a be a tshwenyegile kudu nakong ya ge a tlo bolawa? (b) Jesu o ile a kgethagatša leina la Modimo ka ditsela dife? (Bona le lepokisi leo le rego “ Tsela Yeo Jesu a Bego a Itshwara ka Yona e Ile ya Tagafatša Leina la Modimo.”)

¹⁰ Jesu o be a tshwenyegile kudu ka tsela yeo batho ba naganago ka yona ka Tatagwe. (Joh. 14:31) Jesu o be a tshwenyegile ka gobane o be a latofatšwa ka gore o senya Modimo leina gomme seo se be se ka dira gore leina la Tatagwe le nyatšwe. Ke ka baka leo a ilego ka rapela ka gore: “Tate, ge e ba go kgonega, a senwelo se se mphete.” (Mat. 26:39) Jesu o ile a kgethagatša leina la Tatagwe ka go itshwara gabotse go fihlela a ehwa.

11. Jesu o bontšhitše bjang gore o rata batho? (Joh. 13:1)

¹¹ Topollo e re ruta gore Jesu o rata batho, kudukudu batho bao ba mo latelago. (Die. 8:31; bala Johane 13:1.) Ka mohlala, Jesu o be a tseba gore ge a le mo lefaseng o tlo kopana le mathata, kudukudu ge a tlo bolawa ga sehlogo. Eupša o ile a dira dilo tšeo tše thata ka moka, e sego ka gobane Jehofa a mo romile, eupša ka gobane a rata batho. O ile a ya tšhemong, a ruta batho a ba a hlankela ba bangwe. Le bošegong bja pele ga ge a ka bolawa, o ile a ipha nako ya go hlapiša barutiwa ba gagwe maoto, a ba botša mantšu a mafelelo a kgothatšago le go ba nea ditaelo tšeo  ba bego ba swanetše go di latela. (Joh. 13:12-15) Nakong ya ge Jesu a be a le koteng ya tlhokofatšo o ile a ipha nako ya go nea sekebekwa seo se bego se kokotetšwe kgauswi le yena kholofelo le go kgonthišetša gore mmagwe o tlo šala a hlokometšwe. (Luka 23:42, 43; Joh. 19:26, 27) Jesu ga se a no bontšha batho gore o a ba rata ka go ba hwela, eupša o ile a ba swara gabotse le go ba bontšha botho.

12. Jesu o re thuša bjang lehono?

¹² Le ge Jesu a hwile “gatee ya ba moka,” go sa na le dilo tšeo a re thušago ka tšona. (Baroma 6:10) O re thuša bjang? O re thuša ka dilo ka moka tšeo re di hlokago. Ke Kgoši ya rena, ke Moperisita yo a Phagamego ebile ke hlogo ya phuthego. (1 Bakor. 15:25; Baef. 5:23; Baheb. 2:17) O kgoboketša batlotšwa le ba lešaba le legolo gomme o tlo fetša mošomo woo pele masetlapelo a magolo a fela. b (Mat. 25:32; Mar. 13:27) O thuša le mohlanka yo a botegago le wa temogo gore a re nee dilo tšeo re di hlakago gore re kgone go ba le tumelo e tiilego go Jehofa. (Mat. 24:45) Ebile o sa tlo re direla dilo tše dintšhi ge a tla be a buša ka Mengwaga e Sekete. Jehofa o re neile Morwa wa gagwe gore a re thuše ka dilo ka moka tšeo re di hlokago.

O SE KE WA TLOGELA GO ITHUTA

13. Re tlo holega bjang ge re ka dula re naganišiša kamoo Jehofa le Jesu ba re thušago ka gona?

¹³ Go ithuta kamoo Jehofa Modimo le Jesu ba re ratago ka gona, go tlo re thuša go bona dilo tšeo ba re diretšego tšona. Mohlomongwe sehleng sa Segopotšo o ka ithuta ka e nngwe ya Diebangedi. O se ke wa leka go bala dikgaolo tše dintšhi ka nako e tee. Go e na le moo, iketle gore o kgone go bona kamoo Jehofa le Jesu ba go ratago ka gona. Dira sohle seo o ka se kgonago gore o botše batho ba bangwe ka seo o ithutilego sona.

14. Go dira nyakišišo go ka re thuša bjang gore re ithute ka topollo le dilo tše dingwe? (Psalme 119:97) (Bona le seswantšho.)

¹⁴ Ge eba e le kgale o le ka phuthegong, o ka ipotšiša ge eba go na le dilo tše diswa tšeo o ka ithutago tšona ka toka ya Jehofa, lerato la gagwe le ka topollo. Nnete ke gore re ka se tsoge re feditše go ithuta ka dilo tše. Bjale ke eng seo o swanetšego go se dira? Bala le go ithuta ka dilo ka moka tšeo re di hwetšago ka dikgatišong tša rena. Dira nyakišišo ge eba o  ka hwetša selo seo o sa se kwešišego. Ge o dutše o swaregile ka dilo tše dingwe mo letšatšing, naganišiša ka dilo tšeo o ithutilego tšona. Nagana gore dilo tšeo o ithutilego ka tšona di go ruta eng ka Jehofa, Morwa wa gagwe le kamoo ba go ratago ka gona.—Bala Psalme 119:97.

15. Ke ka baka la’ng go le bohlokwa gore re dule re nyaka go ithuta ka dilo tše mpsha tša ka Beibeleng?

¹⁵ O se ke wa fela matla ge o sa hwetše dilo tše mpsha ge o ithuta goba o dira nyakišišo. Ipone o swana le motho yo a nyakago gauta. Ge motho a sa fele pelo a ka fetša diiri goba matšatši a mantšhi pele a ka hwetša gauta. Le ge a ka hwetša gauta e nnyane ga a fele matla ka gobane le yona e bohlokwa. Dilo tšeo re ithutago tšona ka Beibeleng di bohlokwa go feta gauta. (Ps. 119:127; Die. 8:10) O se ke wa fela matla, tšwela pele o bala Beibele gomme o nyake dilo tše mpsha tšeo o ka ithutago tšona.—Ps. 1:2.

16. Re ka ekiša Jehofa le Jesu bjang?

¹⁶ Ge o bala, bona gore o ka diriša bjang dilo tšeo o ithutago tšona. Ka mohlala, o ka ekiša Jehofa ka go swara batho ka moka gabotse. Ekiša Jesu ka go rata Jehofa le batho ba bangwe. Ekiša Jesu ka go dira dilo ka moka tšeo Jehofa a di nyakago le go thuša batho ba bangwe le ge go se bonolo go dira bjalo. Le gona ekiša Jesu ka go botša batho ba bangwe ditaba tše dibotse gore le bona ba kgone go hwetša mpho e botse ya topollo.

17. Re tlo boledišana ka’ng sehlogong seo se latelago?

¹⁷ Ge re dutše re ithuta ka topollo, re tlo rata Jehofa le Morwa wa gagwe le go feta. Ka ge ba bona gore re a ba rata, le bona ba tlo re rata le go feta. (Joh. 14:21; Jak. 4:8) A re duleng re diriša dilo ka moka tšeo Jehofa a re filego tšona gore re ithute ka topollo. Sehlogong se se latelago re tlo boledišana ka dilo tše dingwe tšeo topollo e re holago ka tšona le gore re ka bontšha bjang gore re leboga Jehofa.