1. Ke ka baka la’ng re ka re selo se sengwe le se sengwe ke sa Jehofa? (Bona seswantšho se se lego ka mo godimo.)

SELO se sengwe le se sengwe ke sa Jehofa! Beibele e re: ‘Magodimo ke a Jehofa, ona magodimo a magodimo le lefase gotee le tšohle tšeo di lego go lona.’ (Doit. 10:14; Kut. 4:11) Le gona ka ge Jehofa a re bopile, ka moka ga rena re ba gagwe. (Ps. 100:3) Lega go le bjalo, ga e sa le go tloga kgale, Modimo o ile a kgetha batho ba itšego gore e be batho ba gagwe ka tsela e kgethegilego.

2. Ke bomang bao Beibele e ba hlalosago e le ba Jehofa ka tsela e kgethegilego?

² Ka mohlala, Psalme 135 e hlalosa bahlanka ba botegago ba Jehofa ba mehleng ya Isiraele e le “thoto ya gagwe e kgethegilego.” (Ps. 135:4) Le gona puku ya Hosea e boletše e sa le pele gore batho ba bangwe bao e bego e se Baisiraele e be e tlo ba batho ba Jehofa. (Hos. 2:23) Boporofeta bja Hosea bo ile bja phethagala ge Jehofa a be a kgetha bao e bego e se Bajuda gore ba tle ba buše le Kriste legodimong. (Dit. 10:45; Baroma 9:23-26) “Setšhaba [se] se sekgethwa” ke “leruo le le kgethegilego” la Jehofa ka tsela e kgahlišago. Ditho tša sona di tloditšwe ka moya o mokgethwa gomme di kgethilwe gore di yo phela legodimong. (1 Pet. 2:9, 10) Go thwe’ng ka Bakriste ba bantši bao ba botegago lehono, bao ba nago le kholofelo ya go tlo phela mo lefaseng? Le bona Jehofa  o ba bitša “batho” ba gagwe le “bahlaolwa” ba gagwe.​—Jes. 65:22.

3. (a) Lehono ke bomang bao ba nago le tswalano e kgethegilego le Jehofa? (b) Re tlo ithuta’ng sehlogong se?

³ Lehono, batho bao e lego ditho tša “mohlatswana,” bao ba nago le kholofelo ya go yo phela legodimong, le bao e lego “dinku tše dingwe” bao ba nago le kholofelo ya go tlo phela mo lefaseng, ka moka ga bona ke “mohlape o tee” woo Jehofa a o ratago kudu e bile a o bitšago batho ba gagwe. (Luka 12:32; Joh. 10:16) Ruri re swanetše go bontšha Jehofa gore re a mo leboga ka ge a dirile gore re be le tswalano e kgethegilego le yena. Sehlogong se re tlo ithuta ditsela tša go fapafapana tšeo re ka bontšhago Jehofa gore re leboga tokelo e kgethegilego yeo a re neilego yona.

4. Re ka bontšha bjang gore re leboga Jehofa ka ge a dirile gore re be le tswalano le yena, gona Jesu o dirile bjang se se swanago?

⁴ Re bontšha gore re leboga Jehofa ka go ineela go yena ka dipelo tša rena ka moka. Ge re kolobetšwa, re bontšha batho ka moka gore bjale re ba Jehofa e bile re ikemišeditše go mo kwa ka dinako tšohle. (Baheb. 12:9) Jesu o dirile se se swanago nakong ya ge a be a kolobetšwa, ge e le gabotse o itše go Jehofa: ‘Wena Modimo wa ka, ke nyaka go dira thato ya gago.’ (Ps. 40:7, 8) Jesu o ile a ineela go Jehofa gaešita le ge a belegwe e le wa setšhaba seo Modimo a se kgethilego.

5, 6. (a) Jehofa o ile a ikwa bjang ge Jesu a be a kolobetšwa? (b) Nea mohlala wo o bontšhago gore Jehofa o a thaba ge re ineela go yena le ge dilo ka moka e šetše e le tša gagwe.

⁵ Jehofa o ile a ikwa bjang ge Jesu a be a kolobetšwa? Pego ya Beibele e re: “Jesu ka morago ga ge a kolobeditšwe a rotoga gateetee meetseng, magodimo a bulega, a bona moya wa Modimo o theoga bjalo ka leeba o etla godimo ga gagwe. Bonang! Le gona gwa kwala lentšu le le tšwago magodimong le re: ‘Yo ke Morwa wa ka, morategi, yo ke mo amogetšego.’” (Mat. 3:16, 17) Le ge Jesu e be e šetše e le wa Modimo, Jehofa o ile a thaba kudu ge a bona Morwa wa gagwe a ineela gore a tle a dire thato ya Gagwe ka mo go feletšego. Ka mo go swanago, Jehofa o a thaba ge a bona re ineela go yena, le gona o tlo re šegofatša.​—Ps. 149:4.

⁶ Re ka bapiša taba ye ka tsela ye: A re re monna o bjetše matšoba a mantši a mabotse jarateng ya gagwe. Ka letšatši le lengwe morwedinyana wa gagwe o kga le lengwe la matšoba ao gomme o mo fa lona e le mpho. Na letšoba le ga se la monna yoo? Go tla bjang gore ngwanenyana yo a fe tatagwe selo seo e šetšego e le sa gagwe? Tate yo lerato a ka se nagane ka dipotšišo tša mohuta wo. Go e na le moo, o tlo thabela go amogela mpho yeo ka ge e bontšha gore morwedinyana wa gagwe o a mo rata. O tlo rata letšobana leo kudu go feta matšoba ka moka ao a tletšego ka jarateng ya gagwe. Ka tsela e swanago, Jehofa o thaba kudu ge re ineela go yena ka go rata.​—Ek. 34:14.

7. Maleaki o re thuša bjang go kwešiša kamoo Jehofa a ikwago ka gona ka bao ba mo hlankelago ka go rata?

⁷ Bala Maleaki 3:16. Ge e ba o se wa tšwa o ineela go Jehofa le go kolobetšwa, naganišiša ka go dira bjalo. Ke therešo gore go tloga nakong ya ge o belegwa, o be o šetše o le wa Jehofa, yena Mmopi wa gago. Eupša nagana kamoo Jehofa a tlago go thaba ka gona ge o bontšha gore o mo amogela e le Mmuši wa gago ka go ineela go yena. (Die. 23:15) Jehofa o tseba bao ba mo hlankelago ka go rata, e bile o ngwala maina a bona ka ‘pukung ya gagwe ya kgopotšo.’

8, 9. Jehofa o nyaka gore bao maina a bona a ngwadilwego ka ‘pukung ya gagwe ya kgopotšo’ ba dire’ng?

⁸ Ge e ba re nyaka gore maina a rena a dule a  ngwadilwe ka ‘pukung ya Jehofa ya kgopotšo,’ go na le selo seo re swanetšego go se dira. Maleaki o boletše ka go lebanya gore re swanetše go ‘boifa Jehofa le go naganišiša ka leina la gagwe.’ Ge e ba re ka rapela motho le ge e le ofe goba selo le ge e le sefe, Jehofa o tlo phumola maina a rena ka pukung ya gagwe!​—Ek. 32:33; Ps. 69:28.

⁹ Lega go le bjalo, go ineela go Jehofa go bolela seo se fetago go no mo tshepiša go dira thato ya gagwe goba go kolobetšwa. Dilo tše re no di dira gatee feela gomme tša feta. Eupša go hlankela Jehofa ga go fele. Ge feela re sa phela, re swanetše go hlankela Jehofa le go mo kwa.​—1 Pet. 4:1, 2.

10. Go swanetše go ba le phapano efe magareng ga batho bao ba hlankelago Jehofa le bao ba sa mo hlankelego?

¹⁰ Sehlogong se se fetilego re ithutile ka Kaine, Solomone le Baisiraele. Batho ba ka moka ba be ba ipotša gore ba hlankela Jehofa, eupša ba be ba se ba ineela go yena ka pelo ka moka. Mehlala ye e re ruta gore bao ba tlogago ba nyaka go ba ba Jehofa ga se ba swanela go no bolela gore ba a mo hlankela, eupša ba swanetše go hloya se sebe gomme ba rate se sebotse. (Baroma 12:9) Jehofa o re go tla ba le “phapano magareng ga moloki le yo kgopo le magareng ga yo a hlankelago Modimo le yo a sa mo hlankelego.”​—Mal. 3:18.

11. Ke ka baka la’ng batho ba bangwe ba swanetše go bona gore re ineetše go Jehofa ka mo go feletšego?

¹¹ Tsela e nngwe yeo re ka bontšhago Jehofa gore re a mo leboga ka ge a re kgethile gore re be batho ba gagwe ke ye: “Batho bohle” ba swanetše go bona gore re godile moyeng. (1 Tim. 4:15; Mat. 5:16) Ka gona, ipotšiše gore: ‘Na batho ba bangwe ba a bona gore ke ineetše ka mo go feletšego go Jehofa? Na ga ke lešwe dihlong ke go botša ba bangwe gore ke Hlatse ya Jehofa?’ Nagana kamoo Jehofa a tlago go kwa bohloko ka gona ge re lešwa dihlong ke go botša ba bangwe gore re batho ba gagwe mola a re kgethile.​—Ps. 119:46; bala Mareka 8:38.

12, 13. Ke dilo dife tšeo Bakriste ba bangwe ba di dirago tšeo di dirago gore go be thata go bona ge e ba e le Dihlatse tša Jehofa?

 ¹² Ka manyami, Bakriste ba bangwe ba phela go swana le batho ba lefase. Ka go re’alo, ga o kgone go bona ‘phapano magareng ga yo a hlankelago Jehofa le yo a sa mo hlankelego’ ka ge ba ekiša “moya wa lefase.” (1 Bakor. 2:12) Moya wo o dira gore batho ba nagane feela ka ‘dikganyogo tša bona tša nama.’ (Baef. 2:3) Ka mohlala, ke go tloga kgale re newa keletšo mabapi le moaparo. Eupša go sa na le Bakriste bao ba aparago le go itokiša ka tsela yeo e sego ya bothakga. Ba apara diaparo tšeo di ba swarago le tšeo di bonagatšago tša ka gare. Ba apara diaparo tšeo gaešita le ge ba eya dibokeng le dikopanong. Goba ba kota meriri goba go e dira ka tsela yeo o ka naganago gore ga se Bakriste. (1 Tim. 2:9, 10) Ka baka leo, ge ba le bathong go ka ba thata gore o tsebe gore ke Dihlatse tša Jehofa goba ke batho ba lefase.​—Jak. 4:4.

¹³ Go na le dilo tše dingwe tšeo Bakriste ba bangwe ba di dirago tšeo di bontšhago gore ga ba fapane le batho ba lefase. Ka mohlala, tsela yeo ba binago ka yona le dilo tšeo ba di dirago ge ba le meletlong ga e swanele Bakriste. Mekerong ya poledišano, ba bea dinepe tša bona le go ngwala dilo tšeo di bontšhago gore ga se batho ba moya. Bakriste ba bjalo ba ka no ba ba se ba ka ba kgalemelwa gore ba dirile sebe se segolo ka phuthegong, eupša ba ka dira gore bana babo rena le dikgaetšedi bao ba lekago ka thata gore ba dule ba itshwere gabotse pele ga Jehofa ba lekege.​—Bala 1 Petro 2:11, 12.

14. Re swanetše go dira’ng e le gore re šireletše segwera se sebotse seo re nago le sona le Jehofa?

¹⁴ Dilo tša lefase di diretšwe gore re be le “kganyogo ya nama le kganyogo ya mahlo le pontšho ya bomponeng ya dilo tša motho tša boiphedišo.” (1 Joh. 2:16) Lega go le bjalo, ka ge re le ba Jehofa, Beibele e re eletša gore “re gane dikganyogo tša lefase, re phele ka monagano o hlaphogetšwego le toko le boineelo go Modimo gare ga tshepedišo ye ya dilo ya gona bjale.” (Tito 2:12) Selo se sengwe le se sengwe seo re se dirago se swanetše go bontšha batho gore re ba Jehofa. Ka mohlala, tsela yeo re bolelago ka yona, mokgwa wa rena wa go ja le go nwa, moaparo  wa rena le go itokiša gotee le tsela yeo re šomago ka yona, di swanetše go bontšha gore re ineetše go Jehofa.​—Bala 1 Bakorinthe 10:31, 32.

15. Ke ka baka la’ng re swanetše go swara bana babo rena le dikgaetšedi ka botho le ka lerato?

¹⁵ Tsela yeo re swarago bana babo rena le dikgaetšedi e tla bontšha gore re tšeela godimo segwera seo re nago le sona le Jehofa. Ge e ba re ka dula re gopola gore le bona ke ba Jehofa, re tlo dula re ba swara ka botho le ka lerato. (1 Bathes. 5:15) Jesu o boditše balatedi ba gagwe gore: “Bohle ba tla tseba ka se gore le barutiwa ba ka, ge e ba le ratana.”​—Joh. 13:35.

16. Re ithuta’ng Molaong wa Moshe mabapi le tsela yeo Jehofa a ratago batho ba gagwe?

¹⁶ E le gore re kwešiše tsela yeo re swanetšego go swarana ka yona ka phuthegong, ela hloko mohlala wo. Dibjana tšeo di bego di le ka tempeleng ya Jehofa e be e le tše kgethwa, di be di dirišetšwa feela bakeng sa borapedi bjo bo sekilego. Molao wa Moshe o be o na le melao yeo Baisiraele ba bego ba swanetše go e latela yeo e bego e bontšha kamoo ba bego ba swanetše go hlokomela dibjana tšeo. Bao ba bego ba sa kwe melao yeo, ba be ba ahlolelwa lehu. (Num. 1:50, 51) Ge e ba Jehofa a be a tloga a šireletša dibjana tšeo di bego di sa phele le go phela, gona go thwe’ng ka batho ba gagwe bao ba ineetšego go yena le bao ba mmotegelago, bao a ba kgethilego gore e be ba gagwe! Ge Jehofa a be a bolela ka batho ba gagwe, o itše: “Yo a le kgwathago o kgwatha thaka ya leihlo la ka.”​—Sak. 2:8.

17. Ke’ng seo Jehofa a se bonago le go se theetša?

¹⁷ Maleaki o boletše gore Jehofa o “theetša le go kwa” batho ba Gagwe ge ba boledišana e bile o bona ka tsela yeo ba swaranago ka yona. (Mal. 3:16) Ka nnete “Jehofa o tseba [bao e lego] ba gagwe.” (2 Tim. 2:19) O bona selo le ge e le sefe seo re se dirago le seo re se bolelago. (Baheb. 4:13) Ge re sa bontšhe bana babo rena botho, e ka ba ka seo re se bolelago goba seo re se dirago, Jehofa o a re bona e bile o a re kwa. Ge e ba re amogela bana babo rena, re ba bontšha botho e bile re ba lebalela, re ka kgodišega gore le gona moo o a re bona.​—Baheb. 13:16; 1 Pet. 4:8, 9.

18. Re ka bontšha bjang gore re leboga tokelo yeo Jehofa a re neilego yona ya gore re be batho ba gagwe?

¹⁸ Re nyaka go bontšha Jehofa gore re tloga re mo leboga ka ge a re kgethile gore re be batho ba gagwe. Re a tseba gore ge re be re ineela go yena, re dirile phetho e di phalago ka moka. Le ge re phela “gare ga moloko o kgopamego le o phetlegilego,” re nyaka gore batho ba bone gore re bao ‘ba se nago bosodi le ba hlokago molato, e bile re bonega re le diediši lefaseng.’ (Bafil. 2:15) Ka gona re nyaka go phema selo le ge e le sefe seo Jehofa a se hloilego. (Jak. 4:7) Le gona re swanetše go rata le go hlompha bana babo rena, re gopola gore le bona Jehofa o ba kgethile gore e be batho ba gagwe.​—Rom. 12:10.

19. Jehofa o putsa bjang bao e lego ba gagwe?

¹⁹ Beibele e re tshepiša gore: “Jehofa a ka se lahle batho ba gagwe.” (Ps. 94:14) Taba ye ga se nonwane. Go sa šetšwe gore go direga eng, Jehofa o tla dula a na le rena. Gaešita le ge re ka hwa, Jehofa a ka se tsoge a re lebetše. (Baroma 8:38, 39) Beibele e re: “Ge re phela, re phelela Jehofa, le ge re ehwa, re hwela Jehofa. Ka baka leo, ge re phela le ge re ehwa re ba Jehofa.” (Baroma 14:8) Ruri re fela pelo ya go tlo bona ge Jehofa a tla be a tsoša batho ba gagwe ka moka bao ba ilego ba mmotegela. (Mat. 22:32) Gaešita le ge re sa letile seo, re thabela ditšhegofatšo tše dintši. Go etša ge Beibele e bolela, “go thaba setšhaba seo Modimo wa sona e lego Jehofa, batho bao a ba kgethilego gore e be bohwa bja gagwe.”​—Ps. 33:12.