1. Lehono go bile le phetogo efe tabeng ya bodumedi?

KGALE batho ba bantši ba be ba tsena dikereke. Eupša lehono dilo di fetogile. Batho ba bantši ga ba sa tsena dikereke. Ge e le gabotse dinageng tše dingwe batho ba bantši ga ba ipitše badumedi. *—Mat. 24:12.

2. Ke ka baka la’ng batho ba bangwe ba ka ba ba se na taba le bodumedi?

² Ke ka baka la’ng lehono batho ba bantši ba se na nako ya bodumedi goba ba sa ipitše badumedi? * Ba bangwe ba ka ba ba swaregile ka go nyaka go ithabiša goba ba swaregile ka go rarolla mathata a bona. (Luka 8:14) Mola ba bangwe ba se sa dumela gore Modimo o gona. Ba bangwe ba a dumela gore Modimo o gona eupša ba ka ba ba nagana gore bodumedi ke selo sa kgale, ga bo sa na mohola e bile ga bo dumelelane le saense. Ba ka no kwa mo radiong goba thelebišeneng go bolelwa gore dilo di itirile, goba ba ka no kwa bagwera ba bona le barutiši ba bolela se se swanago. Eupša ga se gantši ba kwago mabaka a kwagalago a go dira gore ba dumele gore ge e le gabotse Modimo o gona. Ba bangwe ba tenwa ke baruti bao ba ratago tšhelete le go laola batho. Dinageng tše dingwe mebušo e bea melao yeo e dirago gore batho ba se ke ba hlankela Modimo ka bolokologi.

3. Morero wa sehlogo se ke ofe?

³ Jesu o re laetše gore re “dire batho ba ditšhaba ka moka barutiwa.” (Mat. 28:19) Re ka thuša bjang batho bao ba sa ipitšego badumedi  go rata Modimo le gore e be barutiwa ba Jesu? Re swanetše go lemoga gore tsela yeo motho a arabelago ka yona molaetšeng wa rena e ka ithekga ka gore o goletše kae. Ka mohlala batho bao ba tšwago Yuropa ba ka no se arabele go swana le batho bao ba tšwago Asia. Ka baka la’ng? Ka gobane kua Yuropa batho ba bantši ba tseba selo se itšego ka Beibele e bile ba kile ba kwa gore Modimo ke yena a bopilego dilo ka moka. Eupša batho ba bantši ba kua Asia bona ga ba tsebe selo ka Beibele e bile ba ka no ba ba sa dumele gore go na le Mmopi. Morero wa sehlogo se ke go re thuša go bona kamoo re ka rutago batho ka moka Beibele go sa šetšwe gore ba tšwa kae goba ba dumela go eng.

4. Ke ka baka la’ng re sa swanela go nagana gore batho ba ka se fetoge?

⁴ O se ke wa Nagana gore Batho ba ka se Fetoge. Ngwaga o mongwe le o mongwe go ba le batho bao e bego e se badumedi bao ba fetogago Dihlatse tša Jehofa. Ba bantši ba bona ba be ba šetše ba itshwere gabotse e bile ba tenwa ke boikaketši bja dikereke. Ba bangwe ba be ba sa itshware gabotse e bile ba bantši ba bona ba be ba na le mekgwa e mebe yeo ba bego ba swanetše go e tlogela. Re ka kgodišega gore Jehofa o tla re thuša go hwetša bao ba “nago le tshekamelo e swanetšego ka bophelo bjo bo sa felego.”—Dit. 13:48; 1 Tim. 2:3, 4.

5. Ke’ng seo gantši se dirago gore batho ba arabele gabotse ge re bolela le bona ka Beibele?

⁵ Eba Botho e Bile o be Šedi. Gantši batho ba arabela gabotse ka baka la tsela yeo re bolelago le bona ka yona, e sego ka baka la seo re ba botšago sona. Ba a thaba ge e ba re le botho, re le šedi e bile re tloga re bontšha gore re na le taba le bona. Ga re ba gapeletše gore ba re theetše. Go e na le moo, re leka go kwešiša gore ke ka baka la eng ba lebelela bodumedi ka tsela yeo ba bo lebelelago ka yona. Ka mohlala, re ka hwetša gore batho ba bangwe ga ba rate go bolela ka bodumedi le batho bao ba sa ba tsebego. Ba bangwe ba ka ba ba nagana gore ga o hlomphe ge o botšiša motho gore o nagana eng ka Modimo. Mola ba bangwe ba ka lewa ke dihlong tša gore batho ba ba bone ba bala Beibele, kudukudu le Dihlatse tša Jehofa. Go sa šetšwe gore mabaka a bona ke afe, re leka go kwešiša kamoo ba ikwago ka gona.—2 Tim. 2:24.

6. Moapostola Paulo o ile a bontšha bjang gore o fetofetoga le maemo, gona re ka mo ekiša bjang?

⁶ Re ka dira eng ge e ba motho yo mongwe a sa rate re diriša mantšu a go swana le “Beibele,” “tlholo,” “Modimo” goba “bodumedi”? Re ka ekiša moapostola Paulo gomme ra fetoša tsela yeo re bolelago le yena ka yona. Ge Paulo a be a bolela le Bajuda, o be a diriša Mangwalo. Eupša ge a be a bolela le boradifilosofi ba Bagerika kua Areopago, ga se a ka a ba botša ge a be a tsopola Mangwalo, o be a no a tsopola. (Dit. 17:2, 3, 22-31) Re ka ekiša Paulo bjang? Ge e ba o kopana le motho yo a sa dumelego seo Beibele e se bolelago, go ka ba kaone gore o no e diriša ntle le go mmotša gore seo o se bolelago se tšwa ka Beibeleng. Ge e ba o bona eka motho yoo a ka se rate ge ba bangwe ba mmona a bala Beibele le wena, o ka leka go diriša mekgwa e mengwe yeo e sa lemogegego e bjalo ka go mmalela yona sedirišweng sa elektroniki.

7. Re ka swanelwa ke go dira’ng gore re ekiše Paulo go etša ge go hlalositšwe go Bakorinthe ba Pele 9:20-23?

⁷ Kwešiša Batho Bao o Bolelago le Bona e Bile o ba Theetše. Re swanetše go leka go kwešiša gore ke ka baka la eng batho bao re kopanago le bona ba ikwa ka tsela yeo ba ikwago ka yona. (Die. 20:5) Nagana gape ka mohlala wa Paulo. O goletše gare ga Bajuda. Ga go pelaelo gore o ile a swanelwa ke go fetoša tsela yeo a bego a bolela ka yona ge a be a bolela le batho bao e bego e se Bajuda, ka gobane ba be ba tseba ganyenyane ka Jehofa le Mangwalo goba ba sa tsebe selo. Re ka swanelwa ke go dira nyakišišo goba ra bolela le batho bao e lego kgale e le bagoeledi ka phuthegong e le gore re kgone go kwešiša batho ba tšhemong ya gabo rena.—Bala 1 Bakorinthe 9:20-23.

8. Tsela e nngwe ya go thoma go boledišana le batho ka Beibele ke efe?

⁸ Morero wa rena ge re bolela ditaba tše dibotse  ke go hwetša batho bao ba “swanelegago.” (Mat. 10:11) E le gore re ba hwetše, re swanetše go ba botšiša gore ba ikwa bjang ka seo re ba botšago sona gomme re ba theetše ka kelohloko ge ba bolela. Ngwanabo rena yo mongwe wa kua Engelane gantši o botšiša batho dipotšišo tša go swana le gore: Banyalani ba ka dira eng gore ba thabe? Batswadi ba ka godiša bjang bana ba bona? Re ka kgotlelela bjang ge re swarwa gampe? Ka morago ga gore a kwe dikarabo tša bona, o ba botšiša gore: “Le nagana eng ka keletšo ye yeo e ngwadilwego mengwaga ya ka godimo ga e 2 000 e fetilego?” Ka morago ga moo, o ba balela mangwalo ao a a kgethilego gabotse a diriša founo ya gagwe, ntle le go ba botša gore o ba balela Beibele.

9. Re ka thuša bjang batho bao gantši ba sa ratego go bolela ka Modimo?

⁹ Re ka thuša batho bao gantši ba sa ratego go bolela ka Modimo ka go bolela le bona ka dilo tšeo di ba kgahlago. Ka mohlala, batho ba bantši ba kgahlwa ke tlhago. Ka gona ge o bolela le motho wa mohuta woo o ka re: “Mohlomongwe o a tseba gore dilo tše dintši tšeo borasaense ba di dirilego, ba di dirile ba ekiša dilo tšeo di šetšego di le gona. Ka mohlala, batho bao ba hlamilego microphone ba ithutile tsela yeo tsebe e šomago ka yona, gomme bao ba hlamilego khamera ba ithutile tsela yeo leihlo le šomago ka yona. Na o nagana gore dilo tšeo di lego gona di itirile goba di dirilwe ke motho yo a itšego?” Ka morago ga gore o theetše karabo ya gagwe ka kelohloko, o ka oketša ka gore: “Ge borasaense ba ithuta tsela yeo mahlo le ditsebe di šomago ka yona, na ga ba ithute go yo a di bopilego? Ke ile ka kgahlwa ke selo se itšego seo mongwadi yo mongwe wa kgale wa direto a se boletšego. O itše: ‘Na Yo a dirilego tsebe a ka palelwa ke go kwa? Goba na Yo a bopilego leihlo a ka palelwa ke go bona? . . . [Ke] Yena yo a rutago batho tsebo.’ Ke moka o ka re, borasaense ba bangwe ba dumelelana le mantšu a.” (Ps. 94:9, 10) Ke moka re ka bontšha motho yoo bidio wepesaeteng ya jw.org/nso ka tlase ga “Dipoledišano le Diphihlelo” dihlogong tšeo di rego, “Seo ba Bangwe ba Bego ba se Nagana ka Gore Bophelo bo Thomile Bjang.” (E lebelele ka tlase ga DIKGATIŠO > DIBIDIO.) Goba re ka mo nea poroutšha yeo e rego Na Dilo tše di Phelago di Bopilwe?

10. Re ka thoma poledišano bjang le motho yo a sa ratego go bolela ka Modimo?

¹⁰ Batho ba bantši ba nyaka go ba le bokamoso bjo bo kgahlišago. Eupša ba bantši ba boifa gore lefase le tlo fedišwa goba batho ba ka se sa kgona go dula go lona. Molebeledi yo mongwe wa tikologo wa kua Norway o re: “Batho bao gantši ba sa ratego go bolela ka Modimo, ga ba na bothata ge re boledišana le bona ka dilo tšeo di diregago mo lefaseng.” Ka morago ga gore molebeledi yoo wa tikologo a dumediše motho yo a boledišanago le yena o mmotšiša gore: “O nagana gore go tla direga  eng ka rena nakong e tlago? Na o nagana gore motho yo mongwe, boradipolotiki goba borasaense ba ka re tlišetša bokamoso bjo bokaone?” Ka morago ga gore a theetše motho yoo ka kelohloko o mmalela lengwalo leo le bolelago ka bokamoso bjo bo kgahlišago goba o no le tsopola. Ba bangwe ba thabela kudu go kwa kholofetšo ya ka Beibeleng ya gore lefase le ka se fedišwe le gore baloki ba tla dula go lona ka mo go sa felego.—Ps. 37:29; Mmo. 1:4.

11. Ke ka baka la’ng re swanetše go diriša mekgwa e fapafapanego ge re bolela le batho, gona re ka ekiša bjang seo Paulo a ilego a se dira seo se hlaloswago go Baroma 1:14-16?

¹¹ Re swanetše go diriša mekgwa e fapafapanego ge re bolela le batho bao re kopanago le bona. Ka baka la’ng? Ka gobane batho ga ba swane. Selo seo se ka kgahlago yo mongwe se ka no se kgahle yo mongwe. Batho ba bangwe ga ba na bothata bja go bolela ka Modimo goba ka Beibele, mola ba bangwe ba nyaka go bolela ka dilo tše dingwe pele ba ka bolela ka Beibele. Go sa šetšwe gore batho ba rata eng, re swanetše go leka sohle seo re ka se kgonago go bolela le batho ba mehuta ka moka ka Beibele. (Bala Baroma 1:14-16.) Re swanetše go dula re gopola gore Jehofa ke yena a dirago gore batho bao ba nyakago go ithuta ka yena ba amogele dilo tšeo re ba rutago tšona.—1 Bakor. 3:6, 7.

12. Re ka dira’ng gore re thuše batho bao ba tšwago dinageng tša Asia bao ba sa kago ba naganišiša ka gore go na le Mmopi?

¹² Bagoeledi ba bantši lefaseng ka moka, ba kopana le batho bao ba tšwago dinageng tša Asia, go akaretša le dinageng tšeo mebušo e sa dumelelego batho go dira mediro ya bodumedi ka bolokologi. Dinageng tše mmalwa tša Asia batho ba bantši ga se ba ka ba no ipha nako ya go naganišiša ka gore Mmopi o gona. Ka gona ba bangwe ba nyaka go tseba ka Modimo gomme ba a dumela ge re kgopela go ithuta Beibele le bona, mola ba bangwe mathomong ba sa nyake go ithuta le rena. Re ka dira’ng gore re thuše batho ba? Bagoeledi ba bangwe bao ba nago le phihlelo ba bile le mafelelo a mabotse ka go thoma pele ka go bolela le batho ka ditaba ka kakaretšo le go ba bontšha gore ba na le taba le bona. Ke moka ge maemo a dumela, e ba gona ba botšago batho bao kamoo melao ya motheo ya Beibele e ba thušitšego ka gona bophelong.

13. Ke’ng seo se ka dirago gore batho ba nyake go ithuta Beibele? (Bona seswantšho sa letlakala la ka ntle.)

¹³ Gantši batho ba bantši ge o bolela le bona ba kgahlwa ke melao ya motheo ya Beibele yeo ba ka e dirišago bophelong. (Mmo. 7:12) Kgaetšedi yo mongwe wa kua New York yoo a etelago batho bao ba bolelago Semandarin o re: “Ke leka go bontšha batho gore ke na le taba le bona gomme ka ba theetša. Ge ke hwetša motho yo a sa tšwago go hudugela New York, gantši ke mmotšiša gore: ‘Na o šetše o tlwaetše lefelo le? Na o hweditše mošomo? Batho ba mo ba go swere bjang?’” Ka dinako tše dingwe se se dira gore re feleletše re bolela ka Beibele. Ge e ba maemo a dumela, kgaetšedi yoo o tšwela pele ka gore: “O nagana gore re ka dira’ng gore re phedišane gabotse le batho? Ke kgopela go go bontšha seema seo se lego ka Beibeleng. Se re: ‘Go thoma ga dikgang go etša ge motho a tšholla meetse; ka gona o tloge pele ga ge ntwa e ka thoma.’ Ke moka o mmotšiša gore, na o nagana gore keletšo ye e ka re thuša go phedišana gabotse le batho?” (Die. 17:14) Ge re boledišana le batho ka tsela ye, seo se tla re thuša gore re tsebe batho bao ba nyakago go ithuta Beibele.

14. Ngwanabo rena yo mongwe yo a tšwago ka Bohlabela bja Asia o thuša bjang batho bao ba rego ga ba dumele gore Modimo o gona?

¹⁴ Re ka re’ng go batho bao ba rego ga ba dumele gore Modimo o gona? Ngwanabo rena yo mongwe yoo a nago le nako e telele a bolela ditaba tše dibotse le batho bao e sego badumedi kua Bohlabela bja Asia o re: “Gantši mo ge motho a re, ‘ga ke dumele gore Modimo o gona,’ o ra gore ga a dumele go medingwana yeo e rapelwago moo. Ka gona gantši ke dumelelana le yena gore medingwana e mentši e dirilwe ke batho e bile ga se ya  kgonthe. Gantši ke bala lengwalo la Jeremia 16:20 leo le rego: ‘Na motho a ka itirela medimo mola yona e se medimo?’ Ke moka ke mmotšiša gore: ‘Re ka tseba bjang Modimo wa kgonthe goba medimo yeo e dirilwego ke batho?’ Ke mo theetša ka kelohloko gomme ke mmalela Jesaya 41:23 yeo e rego: ‘Re botšeng dilo tšeo di tlago go direga ka morago, e le gore re tsebe gore ke lena medimo.’ Ke moka ka mmontšha mohlala wa kamoo Jehofa a boletšego e sa le pele ka dilo tšeo di tlago go direga nakong e tlago.”

15. Re ka ithuta’ng mohlaleng wa ngwanabo rena yo mongwe yo a tšwago ka Bohlabela bja Asia?

¹⁵ Ngwanabo rena yo mongwe yo a tšwago ka Bohlabela bja Asia o dira se se latelago ge a dira maeto a go boela. O re: “Ke bontšha batho bohlale bjo bo tšwago ka Beibeleng, boporofeta bjo bo šetšego bo phethagetše le go boledišana le bona ka lefase, dinaledi le dipolanete. Ke moka ka ba bontšha gore dilo tše ka moka di bontšha gore go na le Mmopi yo a phelago le yo bohlale. Ge motho a thoma go dumela gore go ka direga gore Modimo o gona, ke thoma go mmotša seo Beibele e se rutago ka Jehofa.”

16. Go ya ka Baheberu 11:6, ke ka baka la’ng barutwana ba Beibele ba swanetše go dumela gore Beibele ke Lentšu la Modimo le gore Modimo o gona, gona re ka ba thuša bjang?

¹⁶ Ge re swara dithuto tša Beibele le batho bao ba sa ipitšego badumedi, ka mehla re swanetše go ba kgodiša gore Modimo o gona. (Bala Baheberu 11:6.) Le gona re swanetše go ba thuša gore ba dumele gore Beibele ke Lentšu la Modimo. Se se ka ra gore re ka swanelwa ke go ba ruta dilo tše itšego gantši le gantši. Nako le nako ge re ithuta le bona, re ka swanelwa ke go ahlaahla bohlatse bjo bo bontšhago gore Beibele ke Lentšu la Modimo. Se se ka akaretša gore re fele re bolela ka bokopana ka boporofeta bja Beibele bjo bo šetšego bo phethagetše, ka taba ya gore Beibele e nepagetše tabeng ya histori le saense goba kamoo Beibele e re thušago ka gona.

17. Mafelelo e tla ba afe ge re bontšha batho lerato?

¹⁷ Re thuša batho gore e be barutiwa ba Jesu ka go ba bontšha lerato, go sa šetšwe gore ke batho ba bodumedi goba go se bjalo. (1 Bakor. 13:1) Morero wa rena ge re ba ruta ke go ba bontšha gore Modimo o a ba rata e bile o nyaka gore le bona ba mo rate. Ngwaga le ngwaga batho ba bantši bao ba bego ba sa rate bodumedi ba a kolobetšwa ka gobane ba ithutile go rata Modimo. Ka gona, bontšha batho ka moka lerato gomme o se ke wa nagana gore batho ba ka se fetoge. Ba theetše ge ba bolela. Leka go ba kwešiša, gomme o ba thuše gore e be barutiwa ba Jesu ka go ba beela mohlala.