1-2. (a) Ke ka baka la’ng re sa swanela go makala ge modiro wa rena o thibelwa? (b) Re tlo ithuta ka’ng sehlogong se?

KA 2018 bagoeledi ba fetago ba 223 000 ba be ba dula dinageng tšeo e mengwe ya mediro ya rena e thibetšwego, goba moo modiro wa rena o thibetšwego ka mo go feletšego. Seo ga se re makatše. Ka ge re ithutile sehlogong se se fetilego, Bakriste ba therešo ba letetše go tlaišwa. (2 Tim. 3:12) Go sa šetšwe gore re dula kae, mebušo e ka thibela modiro wa rena re sa letela ka maikemišetšo a gore re se hlankele Jehofa Modimo wa rena gabotse.

² Ge e ba moo o dulago gona mmušo o ka phetha ka go thibela modiro wa rena, re ka ipotšiša dipotšišo tša go swana le gore: ‘Na se se bolela gore Modimo ga a sa re amogela? Na ge modiro wa rena o thibetšwe se se bolela gore ga re sa tlo hlankela Jehofa? Na ke swanetše go hudugela nageng e nngwe e le gore ke hlankele Jehofa ke lokologile?’ Sehlogong se, re tlo araba dipotšišo tše. Le gona re tlo ithuta kamoo re ka tšwelago pele re hlankela Jehofa le ge modiro wa rena o thibetšwe, e bile re kwe le ka dilo tšeo re sego ra swanela go di dira nakong yeo.

3. Go ya ka Bakorinthe ba Bobedi 11:23-27, moapostola Paulo o ile a tlaišwa bjang, gona re ithuta’ng mohlaleng wa gagwe?

³ Ge e ba mmušo o ka thibela modiro wa rena, ka phošo re ka nagana ka gore Modimo ga a sa re amogela. Eupša dula o gopola gore ge re tlaišwa seo ga se re gore Jehofa ga a re amogele. Ka mohlala, nagana ka moapostola Paulo. Ga go na pelaelo gore Jehofa o be a mo amogela. O ile a ba le tokelo ya go ngwala Mangwalo a Bakriste a Segerika a 14, le gona e be e le moapostola go ditšhaba. Eupša o ile a tlaišwa o šoro. (Bala 2 Bakorinthe 11:23-27.) Mohlala wa  moapostola Paulo o re ruta gore Jehofa a ka dumelela bahlanka ba gagwe ba botegago gore ba tlaišwe.

4. Ke ka baka la’ng lefase le re hloile?

⁴ Jesu o hlalositše gore ke ka baka la eng re swanetše go letela go tlaišwa. O boletše gore re tlo hloiwa ka gobane ga re karolo ya lefase. (Joh. 15:18, 19) Ge e ba re tlaišwa, seo ga se bolele gore Jehofa ga a re amogele. Go e na le moo, se bontšha gore re dira se se lokilego.

5. Na go na le motho yo a ka re thibelago go hlankela Jehofa? Hlalosa.

⁵ Ga go na motho yo a ka re thibelago go hlankela Jehofa Modimo wa rena. Ba bantši ba ile ba leka, eupša ba palelwa. Nagana ka seo se ilego sa direga nakong ya Ntwa ya Bobedi ya Lefase. Ka nako yeo, mebušo ya dinageng tše dintši e be e tlaiša batho ba Modimo o šoro. Modiro wa Dihlatse tša Jehofa o ile wa thibelwa ke mmušo wa ma-Nazi kua Jeremane, e bile wa ba wa thibelwa ke mmušo wa kua Australia, wa Canada le mebušo ya dinaga tše dingwe. Eupša ela hloko seo se ilego sa direga. Ka 1939 ge ntwa yeo e be e thoma, lefaseng ka moka go be go na le bagoeledi ba 72 475. Dipalopalo di bontšha gore Jehofa o ile a šegofatša batho ba gagwe. Ge ntwa yeo e be e fela ka 1945, go be go na le bagoeledi ba 156 299 lefaseng ka moka. Palo ya bagoeledi e be e oketšegile ka makga a fetago a mabedi.

6. Go thibelwa ga modiro wa rena go ka ba le mafelelo afe a mabotse? Nea mohlala.

⁶ Re ka nagana gore tlaišo e ka re fetša matla, eupša ge e le gabotse e ka re thuša gore re hlankele Jehofa ka mo go feletšego. Ka mohlala, banyalani ba bangwe bao ba bego ba na le ngwana yo monyenyane ba be ba dula nageng yeo mmušo o bego o thibetše modiro wa rena. Go e na le gore banyalani ba ba tšhoge, ba ile ba tšea bobulamadibogo bja ka mehla. Mosadi o ile a ba a tlogela mošomo wa go patela e le gore a bule madibogo. Monna o itše go thibelwa ga modiro wa rena go ile gwa dira gore batho ba bantši ba nyake go tseba ka Dihlatse tša Jehofa. Se se ile sa dira gore go be bonolo gore a thome dithuto tša Beibele. Go thibelwa ga modiro wa rena go ile gwa ba le mafelelo a mabotse le bathong ba bangwe. Mogolo yo mongwe yo a dulago nageng yona yeo, o ile a bolela gore bana babo rena ba bantši bao ba bego ba tlogetše go hlankela Jehofa ba ile ba thoma go ba gona dibokeng gomme ba swanelega gape go bolela ditaba tše dibotse.

7. (a) Ke’ng seo re ithutago sona go Lefitiko 26:36, 37? (b) Ge modiro wa rena o tla be o thibetšwe, o ikemišeditše go tlo dira’ng?

⁷ Ge manaba a rena a thibela modiro wa rena, a nagana gore a ka re dira gore re tšhoge gomme  seo sa re dira gore re se sa hlankela Jehofa. Go oketša moo, manaba a rena a ka phatlalatša maaka ka rena, a roma maphodisa gore a phuruphutše magae a rena, a re iša dikgorong tša tsheko goba gaešita le go re golega. A nagana gore ge a ka iša ba bangwe ba rena kgolegong, seo se ka re tšhoša gomme ra se sa hlankela Jehofa. Ge e ba re ka a dumelela a re tšhoša, seo se ka re fokodiša moyeng goba ra tlogela go hlankela Jehofa ka mo go feletšego. Ga re nyake go tlo swana le batho bao ba hlaloswago go Lefitiko 26:36, 37. (Bala.) Le gona ga re nyake gore letšhogo le tle le re dire gore re fokole moyeng goba re tlogele go hlankela Jehofa. Re nyaka go bota Jehofa ka mo go feletšego gomme re se ke ra tšhoga goba ra tlalelwa. (Jes. 28:16) Re rapela Jehofa gore a re hlahle. Ka ge re tseba gore Jehofa o a re thekga, re kgodišegile gore gaešita le mebušo e matla e ka se re thibele go hlankela Modimo wa rena ka go mmotegela.—Baheb. 13:6.

8-9. (a) Ke phetho efe yeo Mokriste yo mongwe le yo mongwe a swanetšego go itirela yona goba a e direle lapa la gagwe? (b) Ke’ng seo se ka thušago Mokriste gore a dire phetho e botse?

⁸ Ge e ba mmušo wa nageng yeo o dulago go yona o ka thibela modiro wa rena, o ka ipotšiša ge e ba o swanetše go hudugela nageng e nngwe e le gore o hlankele Jehofa o lokologile. Ye ke phetho yeo o ka se e direlego ke motho yo mongwe. Ba bangwe ba ka holwa ke go naganišiša ka seo Bakriste ba lekgolong la pele ba ilego ba se dira ge ba be ba tlaišwa. Ka morago ga gore manaba a barutiwa ba Jesu a kgatle Stefano ka maswika, barutiwa ba Jesu bao ba bego ba le Jerusalema ba ile ba hudugela Judea le Samaria gaešita le dinageng tša kgole tše bjalo ka Fenikia, Tsipero le Antiokia. (Mat. 10:23; Dit. 8:1; 11:19) Eupša ba bangwe ba ka lemoga gore ka morago ga gore Bakriste ba lekgolong la pele ba thome go tlaišwa gape, moapostola Paulo o ile a kgetha go no dula lefelong leo a bego a le go lona le ge modiro wa go bolela ditaba tše dibotse o be o thibetšwe lefelong leo. O ile a bea bophelo bja gagwe kotsing ka go tšwela pele a bolela ditaba tše dibotse le go matlafatša bana babo le dikgaetšedi bao ba bego ba dula metseng yeo ba bego ba tlaišwa o šoro.—Dit. 14:19-23.

⁹ Re ithuta’ng dipegong tše? Re ithuta gore hlogo e nngwe le e nngwe ya lapa e swanetše go itirela phetho ya ge e ba e swanetše go hudugela nageng yeo modiro wa rena o sego wa thibelwa. Pele ngwanabo rena a ka dira phetho yeo, o swanetše go naganišiša maemo a lapa la gagwe ka thapelo e bile a naganišiše le ka ditlamorago tšeo lapa la gagwe le ka lebeletšanago le tšona le kamoo le ka holegago ka gona. Mokriste yo mongwe le yo mongwe o swanetše go “rwala morwalo wa gagwe” tabeng ye. (Bagal. 6:5) Ga se ra swanela go ahlola ba bangwe ka diphetho tšeo ba di dirago.

10. Ke tlhahlo efe yeo re tlago go e hwetša go bana babo rena ba ofising ya lekala gotee le go bagolo?

¹⁰ O ka kgona bjang go tšwela pele o hlankela Jehofa le ge modiro wa rena o thibetšwe? Ofisi ya lekala yeo e hlokometšego modiro wa nageng yeo o dulago go yona e tla botša bagolo ba phuthegong ya geno dilo tšeo ba swanetšego go di dira le go ba nea ditšhišinyo tšeo ba ka di dirišago e le gore re hwetše dikgatišo tše di phrinthilwego goba tša elektroniki. E bile e tla ba nea ditšhišinyo tša mabapi le kamoo re ka bokanago mmogo le kamoo re ka bolelago ditaba tše dibotse. Ge e ba bana babo rena ba ofising ya lekala maemo a sa ba dumelele go boledišana le bagolo, gona bagolo ba tla thuša wena le phuthego ka moka go tšwela pele le hlankela Jehofa. Ba tla le nea tlhahlo yeo e tšwago ka mangwalong gotee le ka dikgatišong tša rena.—Mat. 28:19, 20; Dit. 5:29; Baheb. 10:24, 25.

11. Ke ka baka la’ng o ka kgodišega gore ge modiro wa rena o thibetšwe o tlo ba le dilo ka moka tšeo o di hlokago gore tumelo ya gago e dule e matlafetše, gona o ka dira’ng gore o šireletše Beibele ya gago le dikgatišo tšeo o nago le tšona?

 ¹¹ Jehofa o holofeditše bahlanka ba gagwe gore o tla ba thuša gore tumelo ya bona e dule e matlafetše. (Jes. 65:13, 14; Luka 12:42-44) Ka gona o ka dula o kgodišegile gore mokgatlo wa gagwe o tla re nea dilo tšeo re di hlokago go re thuša gore re dule re mmotegela. Eupša go na le se sengwe seo o ka se dirago. Ge modiro wa rena o tla be o thibetšwe, hwetša le lefelwana leo o ka fihlago Beibele ya gago goba dikgatišo le ge e le dife tšeo o ka bago o na le tšona. Hlokomela gore o se tlogele dikgatišo tša rena moo di tlago go bonwa ke batho, go sa šetšwe gore di phrinthilwe goba ke tša elektroniki. Ka moka ga rena re swanetše go dira sohle seo re ka se kgonago gore tumelo ya rena e dule e matlafetše.

12. Bagolo ba ka rulaganya bjang diboka gore batho ba se lemoge seo re se dirago?

¹² Na re tla kgona go ba le diboka ge modiro wa rena o thibetšwe? Bagolo ba tlo rulaganya gore re kgone go ya dibokeng. Ba tlo dira bjalo ka tsela yeo manaba a rena a ka se kgonego go lemoga gore re ya dibokeng. Ba tla re laela gore re bokane ka dihlopha tše dinyenyane, le gona go ka direga gore ba dule ba fetofetoša nako le lefelo leo re bokanago go lona. O ka šireletša bana babo rena le dikgaetšedi ka go se dire mašata le ka go bolelela fase ge o tsena le ge o etšwa lefelong leo diboka di tla bego di swaretšwe go lona. Le gona o ka swanelwa ke go apara ka tsela yeo batho ba ka se lemogego gore o ya dibokeng.

13. Re ka ithuta’ng go bana babo rena ba dinageng tšeo di bego di bušwa ke Soviet Union?

¹³ Ge e le mabapi le modiro wa rena wa go bolela ditaba tše dibotse, bana babo rena ba tla botšwa seo ba swanetšego go se dira go ithekgile ka maemo a lefelong la gabo bona. Ka ge re rata Jehofa e bile re thabela go ruta batho ka Mmušo wa gagwe, re tlo hwetša tsela ya go bolela ditaba tše dibotse. (Luka 8:1; Dit. 4:29) Ge setsebi sa histori e lego Emily B. Baran a be a bolela ka modiro wa go bolela ditaba tše dibotse wa Dihlatse tša Jehofa dinageng tšeo di bego di bušwa ke Soviet Union o itše: “Ge mmušo o be o laela Dihlatse tša Jehofa gore ga se tša swanela go botša ba bangwe ditaba tše dibotse, bana babo rena ba ile ba thoma go botša baagišani ba bona, batho bao ba šomago le bona le bagwera ba bona ditaba tše dibotse. Ge Dihlatse tša Jehofa tše dingwe di be di golegwa ka baka la go bolela ditaba tše dibotse, di ile tša no tšwela pele di bolela le bagolegwa.” Gaešita le ge modiro wa rena o be o thibetšwe, bana babo rena ba dinageng tšeo di bego di bušwa ke Soviet Union ga se ba ka ba tlogela go bolela ditaba tše dibotse. Ge e ba modiro wa rena o ka thibelwa lefelong leo o dulago go lona, eka le wena o ka ba ekiša.

14. Ke’ng seo Psalme 39:1 e re thušago gore re se pheme?

¹⁴ Hlokomela seo o se botšago ba bangwe. Nakong ya ge modiro wa rena o thibetšwe, o swanetše go tseba ge e le “nako ya go homola.” (Mmo.  3:7) Ga se ra swanela go bolela ditaba tšeo e lego diphiri, tše bjalo ka maina a bana babo rena le dikgaetšedi, mafelo ao re bokanago go ona, kamoo re bolelago ditaba tše dibotse le kamoo re hwetšago dikgatišo tša rena. Le gona ga se ra swanela go bolela diphiri tšeo le batho bao ba šomago mmušong goba bagwera ba rena le ba leloko bao ba dulago nageng ya gabo rena goba dinageng tše dingwe. Ge e ba re ka dira bjalo, re tlo bea bana babo rena le dikgaetšedi kotsing.—Bala Psalme 39:1.

15. Sathane o tlo leka go re dira’ng, gona re swanetše go dira’ng?

¹⁵ O se ke wa dumelela dilo tše dinyenyane di re aroganya. Sathane o a tseba gore lapa leo le sa kwanego le ka se kgone go ema le tiile. (Mar. 3:24, 25) Ka baka leo, o tlo dula a dira sohle seo a ka se kgonago gore go se be le botee ka phuthegong. Ka go dira bjalo, o nyaka gore re lwe le bana babo rena le dikgaetšedi go e na le go lwa le yena.

16. Kgaetšedi Gertrud Poetzinger o ile a re beela mohlala ofe o mobotse?

¹⁶ Gaešita le batho bao e lego kgale e le Bakriste goba bao ba tiilego tumelong, ba swanetše go itlhokomela gore ba se wele bothateng bjo. Nagana ka mohlala wa dikgaetšedi tše pedi tša batlotšwa e lego Gertrud Poetzinger le Elfriede Löhr. Ba be ba golegilwe le dikgaetšedi tše dingwe dikgolegong tšeo batho ba bego ba tlaišwa go tšona kua Nazi. Kgaetšedi Gertrud o ile a ba le mona ka ge Elfriede a be a kgona go nea dipolelo tše di kgothatšago dikgaetšedi tše dingwe ge ba be ba le kgolegong. Ka morago, kgaetšedi Gertrud o ile a ikwa a le molato gomme a kgopela Jehofa gore a mo thuše. O itše: “Re swanetše go amogela gore batho ba bangwe ba na le bokgoni bja go feta bja rena e bile ba neilwe maikarabelo a mantši go re feta.” O ile a thušwa ke’ng gore a se sa ba le mona? Kgaetšedi Gertrud o ile a dula a nagana ka dika tše dibotse tša kgaetšedi Elfriede le gore ke motho wa go rata batho. Ka go dira bjalo, o ile a boela a ba le segwera se sebotse le Elfriede. Ka moka ga bona mafelelong ba ile ba lokollwa kgolegong yeo ba bego ba tlaišwa go yona, gomme ba hlanketše Jehofa ka go botega go fihlela ba fetša bophelo bja bona bja mo lefaseng. Ge e ba ka moka ga rena re šoma ka thata gore re be le botee le bana babo rena, gona go ka se be le selo seo se re aroganyago.—Bakol. 3:13, 14.

17. Ke ka baka la’ng re swanetše go dula re latela tlhahlo yeo Jehofa a re neago yona a diriša mokgatlo wa gagwe?

¹⁷ Dula o latela tlhahlo yeo re e newago. Ge e ba re latela tlhahlo yeo re e newago ke bana babo rena bao ba botwago le bao ba neilwego maikarabelo, re tlo phema mathata. (1 Pet. 5:5) Ka mohlala, nageng e nngwe yeo modiro wa rena o thibetšwego, bana babo rena bao ba nago le maikarabelo ba ile ba laela bagoeledi gore ba se sepediše dikgatišo tšeo di phrinthilwego ge ba le tšhemong. Eupša ngwanabo rena yo mongwe wa mmulamadibogo yo a bego a nagana gore o tseba seo a se dirago, o ile a se latele tlhahlo yeo gomme a no nea batho dikgatišo. Mafelelo e bile  afe? Gateetee ka morago ga gore yena le ba bangwe ba fetše go nea bohlatse bjo bo sa rulaganyetšwago, maphodisa a ile a ba hlaba ka dipotšišo. Go bonagala maphodisa a be a ba šetše morago gomme a tšama a tšea dikgatišo tšeo bana babo rena bao ba bego ba di neile batho. Re ithuta’ng tabeng ye? Re ithuta gore re swanetše go latela tlhahlo gaešita le ge re sa dumelelane le yona. Ka mehla Jehofa o a thaba ge re dirišana le bana babo rena bao a ba kgethilego gore ba re etelele pele.—Baheb. 13:7, 17.

18. Ke ka baka la’ng re swanetše go phema go itlhamela melao?

¹⁸ O se ke wa itlhamela melao. Ge e ba bagolo ba itlhamela melao, ba tlo dira gore bana babo rena ba thatafalelwe ke bophelo. Ngwanabo rena Juraj Kaminský o gopola seo se ilego sa direga ge modiro wa rena o be o thibetšwe kua Czechoslovakia. O itše: “Ka morago ga gore bagolo ba bantši ba golegwe, ba bangwe ba bagolo bao ba bego ba se ba golegwa ba ile ba šala ba itlhamela melao ya dilo tšeo bagoeledi ba swanetšego go dira le tšeo ba sa swanelago go di dira.” Jehofa ga se a re nea tshwanelo ya go beela bana babo rena melao. Motho yo a beelago bana babo melao ga a ba šireletše, eupša ge e le gabotse o leka go laola tumelo ya bona.—2 Bakor. 1:24.

19. Go ya ka Dikoronika tša Bobedi 32:7, 8, ke ka baka la’ng re se na lebaka la go tšhoga go sa šetšwe seo Sathane a se dirago?

¹⁹ Lenaba la rena le legolo e lego Sathane Diabolo a ka se tlogele go tlaiša bahlanka ba Jehofa ba botegago. (1 Pet. 5:8; Kut. 2:10) Sathane le balatedi ba gagwe ba tlo dula ba leka go thibela modiro wa rena gore re se hlankele Jehofa. Eupša ga re na lebaka la go tšhoga. (Doit. 7:21) Jehofa o na le rena e bile o tla tšwela pele a re thekga gaešita le ge modiro wa rena o thibetšwe.—Bala 2 Dikoronika 32:7, 8.

20. Ka morago ga go ithuta sehlogo se, o ikemišeditše go dira’ng?

²⁰ Eka ka moka ga rena re ka swana le bana babo rena ba lekgolong la pele bao ba ilego ba botša babuši ba bona gore: “Ge e ba go lokile mahlong a Modimo go theetša lena go e na le Modimo, ikahloleleng. Eupša ge e le rena re ka se ke ra tlogela go bolela ka dilo tše re di bonego le tše re di kwelego.”—Dit. 4:19, 20.