KA Beibeleng re bala ka dipego tša batho ba bantši bao ba bego ba botega, bao ba bego ‘ba na le maikwelo a go swana le a rena.’ (Jak. 5:17) Ka mohlala, re kgona go kwešiša kapela gore Paulo o be a era go re’ng ge a be a bolela mantšu ao a lego go Baroma 7:21-24. O itše: “Ge ke kganyoga go dira se se lokilego, se sebe se gona go nna. . . . Ruri ke motho yo a hlomolago pelo!” Go tseba gore batho ba go botega ba go swana le Paulo ba ile ba ikwa ka tsela ye go a re kgothatša ge le rena re elwa le mafokodi a rena ka gobane re a tseba gore taba ye ga e thome ka rena.

Paulo o ile a hlalosa gape kamoo a bego a ikwa ka gona. Go Bagalatia 2:20 o ile a bolela a kgodišegile gore: ‘Jesu o nthatile gomme a ikgafela nna.’ Na le wena o ikwa ka tsela yeo? Mohlomongwe ga se ka mehla o ikwago bjalo.

Ge e ba re ikwa re se na mohola ka baka la dibe tšeo re kilego ra di dira nakong e fetilego, ka dinako tše dingwe re ka thatafalelwa ke go dumela gore Jehofa o a re rata le gore o re lebaletše e le ka kgonthe. Seo se ka dira gore go be thata go dumela gore Jehofa o re file sehlabelo sa Jesu e le mpho. Na ruri Jesu o nyaka re dumela gore Modimo o re file sehlabelo sa gagwe e le mpho? Ge e ba a nyaka, ke’ng seo se ka re thušago go dumela seo? Anke ga bjale re arabeng dipotšišo tše tše pedi.

Jesu o nyaka gore re lebelele sehlabelo sa gagwe e le mpho. Re tseba seo bjang? Nagana ka seo se ilego sa direga go Luka 23:39-43. Monna šo o fegilwe koteng kgauswi le Jesu. O a dumela gore o dirile sebe. Sebe seo a se dirilego se swanetše go ba e be e le se segolo kudu ka gobane dikebekwa tša go swana le yena ke tšona feela di bego di hwetša kotlo ya mohuta wo. Monna yo o tshwenyegile kudu, gomme o kgopela Jesu gore: “O nkgopole ge o tsena Mmušong wa gago.”

Jesu o ile a arabela bjang? E no nagana feela bohloko bjo a bo kwelego ge a be a leka go retološa hlogo gore a lebelele sesenyi seo. Go sa šetšwe gore Jesu o be a ekwa bohloko gakaakang, o a myemyela gomme o kgothatša monna yoo ka go mmotša gore: “Ruri ke go botša lehono, o tla ba le nna Paradeiseng.” Jesu nkabe a ile a no re, ‘Morwa wa Modimo o tlile go tlo nea bophelo bja gagwe gore e be topollo bakeng sa ba bantši.’ (Mat. 20:28) Eupša Jesu ka botho o ile a botša sesenyi seo gore ke ka baka la eng a tlo se hwela. O ile a diriša mašupi “o” le “nna” go bontšha sesenyi seo botho. Le gona o ile a botša monna yoo gore o tla phela paradeiseng mo lefaseng.

Ga go pelaelo gore Jesu o be a nyaka gore monna yoo a kwešiše gore sehlabelo sa gagwe le yena se be se tlo mo hola. Ge e ba Jesu a be a ikwa ka tsela yeo ka sesenyi se seo se sa kago sa ba le sebaka sa go hlankela Modimo, ga go pelaelo gore o tla ikwa ka tsela yeo ka Bakriste bao ba kolobeditšwego bao ba hlankelago Modimo. Gona ke’ng seo se ka re thušago gore re tloge re dumela gore sehlabelo sa Kriste se tla re thuša go sa šetšwe dibe tšeo re di dirilego nakong e fetilego?

Ka ge Jesu a ile a nea Paulo modiro wa go bolela ditaba tše dibotse, Paulo o be a kwešiša gore Jesu o  mo hwetše. Ke ka baka la’ng re re’alo? Paulo o itše: “Ke leboga Kriste Jesu Morena wa rena, yo a mphilego matla, gobane o mpone ke botega ka go nkabela bodiredi, gaešita le ge pele ke be ke le morogaki, motlaiši le motho wa mereba.” (1 Tim. 1:12-14) Ka ge Jesu a ile a nea Paulo kabelo ye ya go botša batho ditaba tše dibotse go sa šetšwe dilo tše mpe tšeo a ilego a di dira, se se ile sa mo kgodiša gore Jesu o be a mo gaugetše, a mo rata e bile a mmota. Ka mo go swanago, le rena Jesu o re file modiro wo wa go botša batho ditaba tše dibotse. (Mat. 28:19, 20) Na taba ya gore Jesu o re file kabelo ya go bolela ditaba tše dibotse le rena e ka re thuša go kwešiša gore o re hwetše?

Albert, yoo a sa tšwago go boela go Jehofa ka morago ga ge a be a kgaotšwe mengwaga e ka bago e 34 o re: “Ke dula ke imelwa ke dibe tša ka. Eupša ge ke le tšhemong ke botša batho ditaba tše dibotse, go swana le Paulo, ke ikwa eka Jesu o mphile ka go lebanya modiro wo wa go bolela ditaba tše dibotse. Modiro wo o a nkaga e bile o ntira gore ke ikwe ke thabile kudu, ke ipone ke sa na le mohola, ke bone bophelo bja ka bo na le morero e bile ke na le bokamoso bjo bobotse.”—Ps. 51:3.

Allan, yoo a bego a rata bošoro e bile a dirile dilo tše dintši tše mpe pele e eba Hlatse ya Jehofa o re: “Ke sa dutše ke nagana ka tsela yeo ke ilego ka kweša batho bohloko. Ka dinako tše dingwe ke ikwa ke gateletšegile. Eupša ke leboga Jehofa gore o dumeletše modiradibe wa go swana le nna gore a botše batho ditaba tše dibotse. Ge ke bona batho ba thabela molaetša wa ditaba tše dibotse, ke bona lerato la Jehofa le kamoo a lokilego ka gona. Ke a bona gore o a ntiriša gore ke thuše batho bao ba dirilego dilo tše mpe go swana le nna.”

Ge re le tšhemong, re direla batho selo se sebotse. Le gona le rena re a holega ka gobane re dula re nagana ka dilo tše dibotse. Re kgodišegile gore Jesu o re bontšhitše kgaugelo, lerato le gore o a re tshepa.

Re sa tlo kwešwa bohloko ke dibe tšeo re di dirilego nakong e fetilego go fihlela lefase le la Sathane le fedišwa. Ka gona re ka dira’ng gore re lwe le maikwelo a bjalo?

Jean, e lego kgaetšedi yoo gantši a lwago le maikwelo a go ikwa a le molato ka baka la ge a be a phela maphelo a mabedi ge e be e sa le yo monyenyane, o re: ‘Ke thabišwa ke go tseba gore Modimo o feta dipelo tša rena.’ (1 Joh. 3:19, 20) Le rena re ka thabišwa ke go tseba gore Jehofa le Jesu ba a kwešiša gore re belegwe re na le sebe. Dula o gopola gore Jehofa le Jesu ga se ba nea sehlabelo sa topollo go batho ba phethagetšego, eupša ka lerato ba se neile badiradibe bao ba itsholago.—1 Tim. 1:15.

Re tloga re kgodišega gore sehlabelo sa topollo se šoma go rena ge ka thapelo re naganišiša ka tsela yeo Jesu a ilego a dirišana le batho ba sa phethagalago le ge re dira sohle se re ka se kgonago go phetha modiro wo a re neilego wona. Ge e ba le wena o ka dira bjalo, o ka bolela go swana le Paulo wa re: ‘Jesu o nthatile gomme a ikgafela nna.’