1. Ke’ng seo moapostola Paulo a ilego a se bolela ka yena?

MOAPOSTOLA PAULO o ile a bolela gore ka dinako tše dingwe o be a fela a ikwa a fokola. O ile a re mmele wa gagwe o be o “onala,” seo se rago gore o be a thatafalelwa ke go dira se se lokilego le gore ga se ka mehla moo Jehofa a bego a araba dithapelo tša gagwe ka tsela yeo a bego a nyaka. (2 Bakor. 4:16; 12:7-9; Baroma 7:21-23) Paulo o ile a ba a bolela le gore baganetši ba gagwe ba be ba mo lebelela e le motho yo a fokolago. * Eupša ga se a ka a dumelela mafokodi a gagwe, goba dilo tše mpe tšeo batho ba bego ba di bolela ka yena, di dira gore a ikwe a fokola.—2 Bakor. 10:10-12, 17, 18.

2. Go ya ka Bakorinthe ba Bobedi 12:9, 10, ke thuto efe ya bohlokwa yeo Paulo a ilego a ithuta yona?

² Ke thuto efe ya bohlokwa kudu yeo Paulo a ilego a ithuta yona? O ile a ithuta gore motho a ka ba le matla le ge a ikwa a fokola. (Bala 2 Bakorinthe 12:9, 10.) Jehofa o ile a botša Paulo gore matla a gagwe “a phethagatšwa bofokoding,” seo se bolela gore Jehofa o be a tlo nea Paulo matla nakong ya ge a be a fokola. Sa pele, a re boneng gore ke ka baka la eng re sa swanela go tšhoga ge baganetši ba rena ba re kwera.

3. Ke ka baka la’ng re ka thabišwa ke dithogako?

³ Ga go na motho yo a ka rego o rata go rogiwa. Ge e ba manaba a rena a re roga, gomme re thoma go tshwenyega kudu ka seo a se bolelago, re ka nyama kudu. (Die. 24:10) Ka gona re  swanetše go dira’ng ge manaba a rena a re roga? Go swana le Paulo, re swanetše go “thabišwa ke . . . dithogako.” (2 Bakor. 12:10) Ka baka la’ng? Ka gobane ge batho ba re roga e bile ba re ganetša, seo se bontšha gore re barutiwa ba nnete ba Jesu. (1 Pet. 4:14) Jesu o ile a bolela e sa le pele gore balatedi ba gagwe ba be ba tlo tlaišwa. (Joh. 15:18-20) Seo se ile sa diragalela Bakriste ba mathomo. Batho bao ba bego ba rata setšo sa Segerika, ba be ba lebelela Bakriste ba se bohlale e bile e le batho ba go se re selo. Le Bajuda ba bangwe ba be ba lebelela Bakriste e le bao ba “sa rutegago le ba tlwaelegilego,” bjalo ka ge ba be ba lebelela moapostola Petro le moapostola Johane. (Dit. 4:13) Batho ba bantši, ba be ba bona Bakriste ba fokola, ka gobane ba be ba se na matla dipolotiking e bile ba sa tsenele bošole. Le gona batho ba be ba sa ba amogele setšhabeng.

4. Bakriste ba mathomo ba ile ba dira’ng ge batho ba be ba bolela dilo tše mpe ka bona?

⁴ Na Bakriste ba mathomo ba ile ba tlogela go hlankela Modimo ka gobane batho ba be ba bolela dilo tše mpe ka bona? Aowa. Ka mohlala, moapostola Petro le moapostola Johane ba ile ba lebelela e le tokelo e kgolo go tlaišwa ka ge ba latela Jesu e bile ba ruta batho ka yena. (Dit. 4:18-21; 5:27-29, 40-42) Barutiwa ba be ba se na lebaka la go ba le dihlong tša gore ba latela Jesu. Bakriste ba bao ba ikokobeditšego ba ile ba thuša batho ba bantši go tseba Modimo le ge ba be ba tlaišwa. Ka mohlala, dipuku tša Beibele tšeo di ngwadilwego ke ba bangwe ba Bakriste bao di sa tšwela pele di thuša batho ba bantši lehono. Mmušo wa Modimo woo ba bego ba ruta batho ka wona, ga bjale o buša legodimong e bile kgauswinyane o tlo buša lefase ka moka. (Mat. 24:14) Eupša go thwe’ng ka mmušo wa Roma woo o bego o tlaiša Bakriste bao? Gona bjale o wele. Le gona Bakriste bao ba bego ba tloditšwe ga bjale ke dikgoši legodimong. Batho bao ba bego ba ba ganetša ba kae? Ba hwile. Le ge ba ka tsošwa, ba tlo bušwa ke mmušo woo o thekgwago ke Bakriste bao ba bego ba ba hloile.—Kut. 5:10.

5. Go ya ka Johane 15:19, ke ka baka la’ng batho ba nyatša Dihlatse tša Jehofa?

⁵ Lehono, batho ba bantši ga ba re hlomphe, e bile ba a re nyatša. Ka baka la’ng? Ka gobane ga re phele go swana le bona. Re leka ka gohle gore re be le boikokobetšo, re be boleta le go kwa melao ya Modimo. Eupša batho ba go se hlankele Jehofa, ba kgahlwa ke batho ba go ikgogomoša, ba go ikgantšha le ba go se kwe. Se sengwe ke gore, ga re tsenatsene ditabeng tša dipolotiki e bile ga re tsenele bošole bja naga le ge e le efe. Ga re swane le batho bao ba sa hlankelego Jehofa. Ke ka baka leo ba re nyatšago.—Bala Johane 15:19; Baroma 12:2.

6. Ke dilo dife tše dikgolo tšeo Jehofa a thušago batho ba gagwe go di dira?

⁶ Le ge batho bao ba sa hlankelego Jehofa ba re nyatša, Jehofa yena o re thuša go dira dilo tše dikgolo. O re thuša go phetha mošomo o mogolo wa go bolela ditaba tše dibotse lefaseng ka moka. O re thuša go tšweletša dimakasine le go di fetolela ka maleme a mantši go fetiša dimakasine ka moka lefaseng. E bile o re thuša go diriša Beibele gore re thuše batho ba bantši go fetoša maphelo a bona. Ke Jehofa a dirago gore dilo tše ka moka di kgonege. E bile o diriša sehlopha sa batho bao batho ba lefase ba ba nyatšago go dira mediro ye e megolo. Eupša go thwe’ng ka yo mongwe le yo mongwe wa rena? Na Jehofa a ka re thuša go ba le matla? Ge e ba go le bjalo, ke’ng seo rena re swanetšego go se dira gore a re thuše? Ga bjale a re boleleng ka dilo tše tharo tšeo re ka ithutago tšona go moapostola Paulo.

7. Ke’ng seo re ithutago sona go moapostola Paulo?

⁷ Selo se sengwe seo re ithutago sona go  moapostola Paulo ke se: O se ke wa ithekga ka matla a gago goba bokgoni bja gago ge o dutše o hlankela Jehofa. Batho ba bantši ba be ba duma moapostola Paulo ka baka la maemo a gagwe. Go be go ka ba bonolo gore a thome go ikgantšha le go ithekga ka matla a gagwe. Ka baka la’ng? Ka gobane Paulo o goletše Tareso e lego motsemošate wa Tsilitsia yeo e bego e le porofenseng ya Roma. Tareso e be e humile e bile e na le yunibesithi ya go tuma. Paulo o be a rutegile kudu. O be a rutilwe ke yo mongwe wa baetapele ba go tuma ba Bajuda ba mehleng ya gagwe e lego Gamaliele. (Dit. 5:34; 22:3) Le gona, nakong e itšego, Paulo o be a tšewa e le motho wa bohlokwa gare ga Bajuda. O ile a re: “Ke be ke tšwela pele kudu Bojudeng go feta ba bantši ba dithaka tša ka setšhabeng sa gešo.” (Bagal. 1:13, 14; Dit. 26:4) Eupša go sa šetšwe dilo tše ka moka, Paulo ga se a ka a ithekga ka matla a gagwe.

8. Go ya ka Bafilipi 3:8, Paulo o ile a lebelela bjang dilo tšeo a bego a di tlogetše, gona ke ka baka la’ng a ile a “thabišwa ke mafokodi” a gagwe?

⁸ Paulo ga se a ka a ba le bothata bja go tlogela maemo ao a bego a na le ona. O ile a re dilo tšeo a bego a na le tšona o di tšea e le “maudi” goba ditlakala. (Bala Bafilipi 3:8.) Paulo o ile a lebeletšana le mathata ka ge e be e le molatedi wa Kriste. Setšhaba sa gabo sa Bajuda se be se mo hloile. (Dit. 23:12-14) Baroma le bona ba ile ba mo itia ba ba ba mo golega. (Dit. 16:19-24, 37) Le gona, Paulo o be a tseba gore o na le sebe le gore go thata go dira se se lokilego. (Baroma 7:21-25) Eupša Paulo ga se a ka a dumelela mathata ao ka moka a mo fetša matla, go e na le moo o ile a “thabišwa ke mafokodi” a gagwe. Ka baka la’ng? Ka gobane ge a be a fokola ke moo a ilego a bona matla a Modimo a mo thuša.—2 Bakor. 4:7; 12:10.

9. Re swanetše go ikwa bjang ka dilo tšeo di dirago gore re ikwe re fokola?

⁹ Ge e ba re nyaka gore Jehofa a re nee matla, ga se ra swanela go nagana gore go phela gabotse mmeleng, go rutega, tsela yeo re godišitšwego ka yona goba mahumo ke tšona di dirago gore re be bohlokwa mahlong a Jehofa. E bile ga se tšona tšeo di dirago gore Jehofa a re diriše. Go bolela nnete, batho ba bantši bao ba hlankelago Jehofa ga ba “bohlale ka tsela ya nama, ga se ba bantši ba matla [e bile] ga se ba  bantši ba go tswalelwa bogošing.” Eupša Jehofa o kgethile go diriša “dilo tše di fokolago tša lefase.” (1 Bakor. 1:26, 27) Ka gona ge e ba o se na dilo tšeo re boletšego ka tšona mo mathomong a serapa, o se ke wa nagana gore o ka se kgone go hlankela Jehofa. Eupša tšea seo e le sebaka se sebotse sa go bona Jehofa a go thuša ka go go nea matla. Ka mohlala, ge e ba o tšhošwa ke batho bao ba ganetšago ditumelo tša gago, rapela Jehofa gore a go nee sebete sa go emela ditumelo tša gago. (Baef. 6:19, 20) Ge e ba o na le mathata ka gobane o babja kudu, rapela Jehofa gore a go nee matla a gore o dire sohle seo o ka se kgonago go mo hlankela. Nako le nako ge o bona Jehofa a go thuša, tumelo ya gago e a tia gomme wa matlafala.

10. Ke ka baka la’ng re swanetše go ithuta go batho ba botegago ba ka Beibeleng ba bjalo ka bao go boletšwego ka bona go Baheberu 11:32-34?

¹⁰ Paulo o be a ithuta Mangwalo ka tsela e tseneletšego. O ile a ithuta dilo tše dintši ka Beibeleng go akaretša le mehlala ya batho ba botegago bao ba bego ba hlankela Modimo. Ge Paulo a ngwalela Bakriste ba Baheberu lengwalo, o ile a ba kgopela gore ba naganišiše ka mehlala ya batho ba botegago bao ba bego ba hlankela Jehofa. (Bala Baheberu 11:32-34.) Nagana ka yo mongwe wa batho ba e lego Kgoši Dafida. Dafida o ile a ganetšwa ke manaba a gagwe a ba a ganetšwa le ke bao e kilego ya ba bagwera ba gagwe. Ge re dutše re ithuta ka mohlala wa Dafida, re tlo bona gore ke ka baka la eng Paulo a ile a holwa ke go nagana ka mohlala wo wa Dafida le gore rena re ka ekiša Paulo bjang.

11. Ke ka baka la’ng go be go bonagala eka Dafida o a fokola? (Bona seswantšho sa letlakala la ka ntle.)

¹¹ Goliata yoo e bego e le senatla, o be a bona Dafida a fokola. Beibele e re ge Goliata a bona Dafida, “o ile a mo nyatša.” Goliata e be e le senatla, a itlhametše ntwa e bile a tlwaeditšwe gabotse go lwa. Eupša Dafida yena e be e no ba mošemanyana yo a sa tsebego selo ka ntwa e bile a se a itlhamela ntwa. Le ge Dafida a be a bonagala a fokola o be a na le matla. O ile a ithekga ka Jehofa gore a mo nee matla gomme a fenya Goliata.—1 Sam. 17:41-45, 50.

12. Ke bothata bofe bjo bongwe bjoo Dafida a ilego a lebeletšana le bjona?

¹² Dafida o ile a lebeletšana le bothata bjo bongwe bjo bo ka bago bo ile bja dira gore a ikwe a fokola e bile a se na matla. Dafida o ile a botegela yoo Jehofa a bego a mo kgethile gore e be kgoši ya Isiraele, e lego Saulo. Mathomong Kgoši Saulo o be a hlompha Dafida. Eupša Saulo o ile a thoma go ba le boikgogomošo gomme a jela Dafida mona. Saulo o ile a swara Dafida makgwakgwa a ba a leka le go mmolaya.—1 Sam. 18:6-9, 29; 19:9-11.

13. Dafida o ile a dira’ng ge Kgoši Saulo a be a sa mo sware gabotse?

¹³ Le ge Kgoši Saulo a be a swara Dafida makgwakgwa, Dafida yena o ile a no tšwela pele a mo hlompha ka gobane Saulo o be a kgethilwe ke Jehofa gore e be kgoši. (1 Sam. 24:6) Dafida ga se a ka a sola Jehofa ge Saulo a be a sa mo sware gabotse. Eupša, Dafida o ile a ithekga ka Jehofa gore a mo nee matla a go kgotlelela.—Ps. 18:1, mantšu a mathomong a kgaolo.

14. Ke bothata bofe bjoo moapostola Paulo a bego a na le bjona bjoo bo bego bo swana le bjoo Dafida a kilego a ba le bjona?

¹⁴ Moapostola Paulo o ile a ba le bothata bjo bo swanago le bjoo Dafida a kilego a ba le bjona. Manaba a Paulo a be a mo feta ka matla. Baetapele ba bantši ba go tuma ba mehleng ya gagwe ba be ba mo hloile. Ba ile ba mo itia gantši ba ba ba mo golega. Go swana le Dafida, Paulo le yena o ile a swarwa gampe ke batho  bao e bego e swanetše go ba bagwera ba gagwe. Gaešita le ka phuthegong ba bangwe ba ile ba mo ganetša. (2 Bakor. 12:11; Bafil. 3:18) Eupša Paulo o ile a fenya bohle bao ba bego ba mo ganetša. O ile a dira seo bjang? O ile a no tšwela pele a bolela ditaba tše dibotse le ge a be a ganetšwa. O ile a dula a botegela Bakristegotee le yena le ge ba be ba mo nyamiša. Sa bohlokwa le go feta, o ile a dula a botegela Modimo go ba go fihla a ehwa. (2 Tim. 4:8) Paulo o ile a kgona go dira dilo tše ka moka ka gobane o be a ithekgile ka Jehofa e sego ka matla a gagwe.

15. Ke’ng seo re nyakago go se fihlelela, gona re ka thušwa ke’ng go se fihlelela?

¹⁵ Na batho bao o tsenago le bona sekolo, bao o šomago le bona goba ba leloko bao e sego Dihlatse ba fela ba go kwera goba go go ganetša? Na motho yo mongwe ka phuthegong o kile a go swara gampe? Ge e ba go le bjalo, gopola mohlala wa Dafida le wa Paulo. O ka kgona go tšwela pele o “fenya bobe ka botse.” (Baroma 12:21) Ge batho ba re ganetša, ga re lwe le bona go swana le ge Dafida a ile a lwa le Goliata. Eupša re fenya bobe ka botse ka go leka go thuša batho bao gore ba kgone go ithuta ka Jehofa le ka Beibele. Re ka kgona go fihlela seo ge e ba re diriša Beibele go araba dipotšišo tša batho, ka go hlompha bao ba re swarago gampe le go ba bontšha botho le ka go dira sohle seo re se kgonago go swara bohle gabotse go akaretša le manaba a rena.—Mat. 5:44; 1 Pet. 3:15-17.

16-17. Ke’ng seo Paulo a ilego a dula a se gopola?

¹⁶ Pele Paulo e eba morutiwa wa Kriste, e be e le lesogana la go nyatša e bile a tlaiša balatedi ba Jesu. (Dit. 7:58; 1 Tim. 1:13) Jesu o ile a thibela Paulo yoo ka nako yeo a bego a bitšwa Saulo, gore a tlogela go hlasela Bakriste. Jesu o ile a bolela le Paulo a le legodimong a ba a mo foufatša ka nakwana. E le gore Paulo a kgone go bona gape, o ile a swanelwa ke go yo nyaka thušo go bona batho bao a bego a ba tlaiša. O ile a ikokobetša gomme a amogela thušo ya morutiwa yo a bego a bitšwa Ananiase yoo a ilego a dira gore a bone gape.—Dit. 9:3-9, 17, 18.

¹⁷ Ge nako e dutše e eya, Paulo o ile a tuma  ka phuthegong. Eupša ga se a ka a lebala thuto e bohlokwa yeo Jesu a mo rutilego yona ge a be a le tseleng ya go ya Damaseko. Paulo o ile a dula a ikokobeditše gomme a amogela ge Bakristegotee le yena ba be ba mo thuša. O ile a amogela gore ke bona bao ba bego ba tloga ba mo “matlafatša.”—Bakol. 4:10, 11.

18. Ke ka baka la’ng ka dinako tše dingwe re sa nyake go amogela ge ba bangwe ba re thuša?

¹⁸ Re ka ithuta’ng go Paulo? Ge re be re sa tšwa go fihla ka phuthegong, go ka direga gore re be re thaba ge ba bangwe ba re thuša ka gobane re be re lemoga gore go na le dilo tše dintši tšeo re bego re swanetše go ithuta tšona. (1 Bakor. 3:1, 2) Eupša na re sa ikwa ka tsela yeo le gona bjale? Ge e ba e le kgale re le ka phuthegong e bile re na le phihlelo, go ka no ba thatanyana gore re amogele thušo go tšwa go ba bangwe, kudukudu ge re thušwa ke motho yoo e sego kgale a tlile ka phuthegong. Eupša re swanetše go dula re gopola gore gantši Jehofa o diriša bana babo rena le dikgaetšedi go re matlafatša. (Baroma 1:11, 12) Ge e ba re nyaka gore Jehofa a re nee matla re swanetše go amogela ge Bakristegotee le rena ba re thuša.

19. Paulo o thušitšwe ke’ng go kgona go dira dilo tše dikgolo?

¹⁹ Paulo o ile a kgona go dira dilo tše dikgolo ka morago ga gore e be Mokriste. O thušitšwe ke’ng? Ke go ithuta gore, e le gore motho a atlege tirelong ya Jehofa, o swanetše go ba le boikokobetšo a be a ithekge ka Jehofa, e sego go ithekga ka matla a gagwe, thuto, mahumo goba tsela yeo a godišitšwego ka yona. Eka ka moka ga rena re ka ekiša Paulo (1) ka go ithekga ka Jehofa, (2) go ithuta mehlaleng ya ka Beibeleng le (3) go amogela ge Bakristegotee le rena ba re thuša! Ge re ka dira bjalo, Jehofa o tla re nea matla go sa šetšwe gore re ikwa re fokola gakaaka’ng.