Ke belegetšwe kua St. Paul, Minnesota, U.S.A., ka 1954. Ka gae re be re tsena kereke ya Katholika. E bile re be re sa diile e bile re se ra huma. Ka gae re bana ba bahlano gomme nna ke wa bobedi. Ke tsene sekolo sa Katholika e bile ke be ke le mošemane yo a šomago aletareng, ke thuša moruti. Eupša ke be ke sa tsebe selo ka Beibele. Le ge ke be ke dumela gore go na le Modimo yo a bopilego dilo ka moka, ke be ke sa dumele gore kereke ya Katholika e ka nthuša gore ke mo rapele gabotse.

Ngwageng wa mathomo ge ke be ke ithutela go ba ramolao Kholetšheng ya William Mitchell, banyalani ba Dihlatse tša Jehofa ba ile ba re etela ka gae. Ba ile ba hwetša ke swaregile ke hlatswa diaparo gomme ba dumela gore ba tla boa. Ge ba boa, ke ile ka ba botšiša dipotšišo tše tše pedi: “Ke ka baka la’ng batho ba babe, go bonagala dilo di ba sepelela gabotse bophelong go feta batho ba go loka?” Le gore: “Motho a ka dira’ng gore a thabe?” Ba ile ba mpha puku ya Therešo ye Išago Bophelong bjo bo sa Felego le Beibele ya Phetolelo ya Lefase le Lefsa ya Mangwalo a Makgethwa yeo e bego e na le mmala o mobotse o motala. Le gona ke ile ka dumela gore ba nthute Beibele.  Thuto yeo ya Beibele e ile ya mpula mahlo. Ke ile ka thaba kudu go ithuta gore Mmušo wa Modimo ke wona o tlago go buša lefase ka moka. Ke be ke šetše ke bone gore mebušo ya batho e paletšwe le gore e dirile gore batho ba kwe bohloko, ba tlaišege le go swarwa ka go hloka toka.

Mathomong a ngwaga wa 1982, ke ile ka ineela go Jehofa gomme mafelelong a wona ngwaga woo ka kolobetšwa Kopanong ya Selete ya “Therešo ya Mmušo” yeo e bego e swaretšwe kua St. Paul Civic Center. Bekeng e latelago, ke ile ka boela moo civic center gore ke yo ngwala tlhahlobo ya go ba ramolao. Mathomong a kgwedi ya October, ke ile ka botšwa gore ke phasitše tlhahlobo yeo, seo sa ra gore nka thoma go šoma ke le ramolao.

Kopanong yeo ya “Therešo ya Mmušo,” ke ile ka kopana le ngwanabo rena Mike Richardson, yoo a bego a šoma Bethele ya kua Brooklyn. O ile a ntlhalosetša gore go hlomilwe lefapha le lefsa la tša molao ntlongkgolo ya rena. Ke ile ka gopola mantšu a Moethiopia ao a lego go Ditiro 8:36 gomme ka ipotšiša gore, ‘Ke’ng seo se nthibelago go kgopela go šoma Lefapheng la tša Molao?’ Ka gona ke ile ka romela fomo ya go kgopela go šoma Bethele.

Batswadi ba ka ba be ba sa thabišwe ke taba ya gore ke Hlatse ya Jehofa. Tate o ile a mpotšiša gore go šomela Watchtower go tlo nthuša ka eng mošomong wa ka wa go ba ramolao. Ke ile ka mo hlalosetša gore ke tla be ke le moithaopi. Ke ile ka mmotša le gore kgwedi e nngwe le e nngwe ke tlo hwetša tšhelete e nyenyane yeo e lekanago le ya motho yo mongwe le yo mongwe yoo a šomago Bethele.

Ka ge ke be ke šetše ke saenne konteraka ya gore ke tla šoma kgorong ya tsheko, ga se ka kgona go ya Bethele ka nako yeo. Ka gona ke ile ka thoma go šoma Bethele ya Brooklyn, New York, ka 1984. Ke ile ka newa kabelo ya go šoma Lefapheng la tša Molao. Phihlelo yeo ke e hweditšego ge ke be ke šoma kgorong ya tsheko, e ile ya nthuša gore ke tle ke kgone go dira mošomo wa ka gabotse.

Mokgatlo o ile wa reka moago wa Stanley Theater kua Jersey City, New Jersey, ka November 1983. Bana babo rena ba ile ba dira kgopelo ya gore ba mpshafatše dithapo tša mohlagase le diphaephe tša meetse tša moago woo. Bana babo rena ba ile ba hlalosetša batho ba mmušo gore ba nyaka go diriša moago woo wa Stanley Theater e le Holo ya Kopano ya Dihlatse tša Jehofa. Seo se ile sa baka bothata. Melao ya Jersey City e be e nyaka gore meago ya bodumedi e be feela mafelong ao go dulago batho. Bjale bothata e be e le gore moago wa Stanley Theater o be o le ka gare ga toropo moo go nago le meago ya kgwebo. Ka gona ba mmušo ba ile ba gana go nea bana babo rena tumelelo ya go mpshafatša moago  woo. Bana babo rena ba ile ba dira boipiletšo, eupša kgoro ya tsheko ya gana boipiletšo bjoo.

Bekeng ya ka ya pele ge ke le Bethele, mokgatlo o ile wa dira boipiletšo ka taba ye kgorongkgolo ya tsheko. Ka ge ke be ke sa tšwa go fetša mengwaga e mebedi ke šoma kgorongkgolo ya tsheko kua St. Paul, Minnesota, ke be ke tlwaelane le melato ya mohuta wo. Yo mongwe wa boramolao ba rena, o ile a ntšha mabaka a gore moago wa Stanley Theater o be o dirišetšwa mabaka a go fapafapana a go swana le go bogela dimmubi le go swarela dikhonsata tša mmino. Bjale, ke ka baka la’ng ba mmušo ba be ba re go be go ka se be molaong gore re dirišetše moago wo mabaka a bodumedi? Kgorokgolo ya tsheko e ile ya lebelela taba yeo, gomme ya phetha ka gore Jersey City e be e se ya hlompha tshwanelo ya rena ya tokologo ya bodumedi. Ka gona, kgorokgolo yeo ya tsheko e ile ya laela gore re newe tumelelo ya go mpshafatša moago woo. Ke ile ka thoma go bona gore Jehofa o šegofatša batho ba gagwe ditabeng tša molao. Ke be ke thabile kudu gore ke tsentše letsogo tabeng ye.

Bana babo rena ba ile ba thoma mošomo o mogolo wa go mpshafatša moago woo. Pele ngwaga o ka fela mošomo woo wa go mpshafatša o thomile, seboka sa go aloga ga klase ya bo-79 ya Gilead se ile sa swarelwa mo Holong ya Kopano ya Jersey City ka di-8 tša September, 1985. Ke be ke thabile kudu gore ke thušitše mokgatlo mošomong wo. Se se nthabišitše kudu go feta mošomo le ge e le ofe wo ke o dirilego ge ke be ke le ramolao pele nka tla Bethele. Ka nako yeo, ke be ke sa tsebe gore Jehofa o sa tlo ntiriša melatong e mengwe e mentši ya tša molao.

Ka bo-1980, gantši dingaka le dipetlele di be di sa hlomphe tshwanelo ya balwetši bao e lego Dihlatse tša Jehofa ya gore ba hwetše kalafo ntle le go tšhelwa madi. Gantši baahlodi ba dikgorong tša tsheko ba be ba nagana gore basadi ba baimana ga ba na tshwanelo ya go gana go tšhelwa madi. Baahlodi bao ba be ba re ge mosadi yoo a ka gana go tšhelwa madi, a ka hlokofala gomme ngwana yoo a tla a gola a se na mmagwe.

Ka di-29 tša December 1988, kgaetšedi Denise Nicoleau o ile a lahlegelwa ke madi a mantši ka morago ga gore a belege morwa wa gagwe. Ka ge go be go bonagala bophelo bja gagwe bo le kotsing, ngaka e be e nyaka gore a tšhelwe madi. Kgaetšedi Nicoleau o ile a gana go tšhelwa madi. Mesong e latelago, sepetlele seo a bego a le go sona se ile sa kgopela moahlodi gore a se nee tumelelo ya go mo tšhela madi. Moahlodi yoo, ga se a ka a nea Kgaetšedi Nicoleau goba monna wa gagwe sebaka sa gore ba hlalose gore ba ikwa bjang ka taba ye. Le gona ga se a ka ba hlalosetša gore o file sepetlele tumelelo ya gore se tšhele kgaetšedi Nicoleau madi.

Ka Labohlano la di-30 tša December, baoki le dingaka ba ile ba tšhela kgaetšedi Nicoleau madi le ge yena le monna wa gagwe gotee le ba bangwe ba leloko ba be ba sa dumelelane le taba yeo. Bošegong bjona bjoo, batho ba bangwe ba gabo kgaetšedi Nicoleau gotee le mogolo o tee goba ba babedi ba ile  ba golegwa ka ge go be go thwe ba thibetše kgaetšedi Nicoleau gore a se ke a tšhelwa madi. Mesong e latelago ka di-31 tša December, dikuranta, thelebišene le diradio tša New York City ka moka di be di bolela ka go golegwa ga batho bao.

Mesong ya Mošupologo ke ile ka bolela le moahlodi wa kgoro ya tsheko e phagamego e lego Milton Mollen. Ke ile ka mo hlalosetša bothata bja rena gabotse ka gatelela le taba ya gore moahlodi o be a laetše gore kgaetšedi Nicoleau a tšhelwe madi ntle le go theetša boipelaetšo bja gagwe. Moahlodi Mollen o ile a kgopela gore ke tle ofising ya gagwe gore re tle re tlo boledišana ka molato woo. Ngwanabo rena, Philip Brumley, yoo a bego a eteletše pele lefapha la rena, o ile a ya le nna go Moahlodi Mollen thapameng yeo. Moahlodi yoo o ile a kgopela le ramolao wa sepetlele gore a be gona. Ngangišano ya rena e be e fiša. Ka nako e nngwe, Ngwanabo rena Brumley o ile a ba a nngwalela molaetša pampišaneng gore ke theoše maswafo. Keletšo yeo e ile ya nthuša ka gobane ke be ke šetše ke thoma go galefa ge ke leka go bontšha gore sepetlele se dirile phošo.

Ka morago ga mo e ka bago iri, Moahlodi Mollen o ile a bolela gore molato wa rena o tla sekwa pele mesong e latelago. Ge re dutše re etšwa ka diofising tšeo tša gagwe, Moahlodi Mollen o ile a bolela gore ramolao wa sepetlele o tlo ba le mošomo o thata gosasa. Seo se be se era gore go be go ka se be bonolo gore ramolao yoo a hlatsele gore sepetlele se be se na le tshwanelo ya go gapeletša kgaetšedi Nicoleau go tšhelwa madi. Ke ile ka bona gore Jehofa o be a nkgonthišetša gore re tlo wina. Ke ile ka kwa ke inyatša ge ke bona gore Jehofa o diriša rena go phetha thato ya gagwe.

Re ile ra šoma go fihla bošego kudu re itokišeletša molato wa rena wa mesong e latelago. Kgoro ya tsheko e be e le kgauswi kudu le Bethele ya Brooklyn, ka gona ba bantši ba rena go tšwa lefapheng la tša molao re ile ra sepela ka maoto go ya moo. Ka morago ga gore baahlodi ba bane ba theetše molato wa rena, ba ile ba dira phetho ya gore moahlodi yola o be a sa swanela go ntšha taelo ya gore kgaetšedi Nicoleau a tšhelwe madi. Kgoro ya tsheko e phagamego e ile ya ema le kgaetšedi Nicoleau gomme ya bolela gore ke go gatakela ditshwanelo tša motho go nea tumelelo ya gore molwetši a tšhelwe madi yena a sa tsebe.

Ka moragonyana ga moo, kgoro ya tsheko e phagamego ya New York e ile ya nea kgaetšedi Nicoleau tshwanelo ya gore a alafiwe ntle le go tšhelwa madi. Wo e bile molato wa mathomo wa melato e mene ya mabapi le go tšhelwa madi yeo ke ilego ka swaragana le yona dikarolong tše di fapafapanego tša  United States. (Bona lepokisi leo le rego “ Melato Yeo re Ilego ra e Fenya Kgorongkgolo ya Tsheko.”) Le gona ke ile ka šoma le boramolao ba bangwe ba Bethele ditabeng tša go swana le tša tshwanelo ya go godiša bana, tša tlhalo, tša meago gotee le tša go fetoša tsela yeo moago o dirišwago ka yona.

Ge ke be ke thoma go kopana le mosadi wa ka Dawn, o be a hladilwe e bile a na le bana ba bararo. O be a šoma e bile a bula madibogo. O be a kile a ba le mathata a magolo kudu bophelong gomme ke ile ka rata tsela yeo a bego a ikemišeditše go tšwela pele a hlankela Jehofa. Ka 1992, re ile ra ya Kopanong ya Selete ya “Barwadi ba Seetša” kua New York City gomme ka mo kgopela gore re tsebane gakaone. Ka morago ga ngwaga re ile ra nyalana. Go ba le mosadi yo a ratago Jehofa le yo a dulago a thabile, ruri ke mpho e tšwago go Jehofa. Dawn o ntiretše dilo tše dibotse kudu mengwageng ka moka ya ge re be re le mmogo.—Die. 31:12.

Ge re be re nyalana, Dawn o be a na le bana ba bararo. Yo mongwe o be a na le mengwaga e 11, yo mongwe a na le e 13 gomme yo mongwe a na le e 16. Ke be ke nyaka go ba tate yo a ba swarago gabotse . Ka gona ke ile ka bala le go diriša dilo ka moka tšeo ke di balago ka dikgatišong tša rena tša mabapi le malapa a lenyalo la bobedi. Ga se gore dilo di ile tša ba bonolo eupša ke thabela gore bana ba rena ba ile ba nkamogela le go ntshepa bjalo ka mogwera wa bona le tate yo ba mo ratago. Re be re dumelela bagwera ba bana ba rena go tla ka gae, gomme re be re thabela go ba le bona.

Ka 2013, nna le Dawn re ile ra hudugela Wisconsin gore re yo hlokomela batswadi ba rena bao ba tšofetšego. Ke be ke sa kgolwe gore nka kgona go tšwela pele ka tirelo ya ka ya Bethele. Eupša ke ile ka kgopelwa gore ke tšwele pele ke thuša mokgatlo ka ditaba tša molao ke le moithaopi wa nakwana.

Ka September 2018, ke ile ka lemoga gore ke be ke swanelwa ke go gohlolanyana nako e nngwe le e nngwe pele nka bolela. Ngaka ya rena e ile ya ntlhahloba eupša ga se ya ka ya kgona go bona gore bothata ke eng. Ka moragonyana, ngaka e nngwe e ile ya šišinya gore ke yo bona ngaka ya bjoko. Ka morago ka January 2019, ngaka yeo ya bjoko e ile ya mpotša gore ke na le bolwetši bjo bošoro bjo bo sa tlwaelegago bja bjoko, bjoo bo bego bo tla dira gore mmele wa ka ka moka o se sa šoma gabotse.

Matšatši a mararo ka morago, ge ke be ke bapala lehlweng, ke ile ka wa ka robega letsogo la ka la go ja. Ke be ke feditše bophelo bja ka ka moka ke bapala lehlweng. Ka gona ke ile ka lemoga gore mešifa ya ka e thomile go se sa šoma gabotse. Ke ile ka makala go bona kamoo bolwetši bjo bja ka bo ilego bja mpefala ka lebelo ka gona. Ke ile ka thoma go thatafalelwa ke go bolela, go sepela le go metša.

Ke thabela gore ke ile ka kgona go thuša mokgatlo wa Jehofa ka mošomo wa ka wa go ba ramolao. Le gona ke thabela gore ke ile ka kgona go ngwala dihlogo tše dintši ka dimakasineng tšeo di balwago ke dingaka, boramolao le baahlodi. E bile ke ile ka bolela diseminareng dinageng tše dintši lefaseng ke lwela tshwanelo ya batho ba Jehofa ya go kgetha go alafiwa ntle le go tšhelwa madi. Eupša ke tla bolela mantšu ao a swanago le ao a boletšwego ke mongwadi wa Beibele go Luka 17:10 ge a be a re: ‘Ga ke mohlanka wa selo, seo ke se dirilego ke seo ke bego ke swanetše go se dira.’