1. Go ya ka Bafilipi 2:3, go ba le boikokobetšo go re thuša bjang go phedišana le ba bangwe gabotse?

RE IKOKOBELETŠA Jehofa ka gobane re a tseba gore ka mehla dilo tšeo a nyakago re di dira di a re hola. (Baef. 4:22-24) Ge re ikokobeditše, re tla kgona go bona gore seo Jehofa a nyakago re se dira se bohlokwa kudu go feta seo rena re se nyakago le gore ba bangwe ba re feta ka bogolo. Ka baka leo, re kgona go ba le segwera se sebotse le Jehofa gotee le bana babo rena le dikgaetšedi ka phuthegong.—Bala Bafilipi 2:3.

2. Ke’ng seo moapostola Paulo a ilego a se bolela, gona re tlo ithuta’ng sehlogong se?

² Ge e ba re sa itlhokomele, re ka feleletša re swana le batho ba lefase bao ba ikgantšhago e bile ba naganago ka bona feela. * Go bonala Bakriste ba bangwe ba pele le bona ba ile ba ba le bothata bjo ka gobane moapostola Paulo o ile a ngwalela Baroma gore: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona; eupša a nagane e le gore a be le monagano o hlaphogetšwego.” (Baroma 12:3) Paulo o boletše gore re swanetše go no fela re nagana ka rena. Eupša boikokobetšo bo tla re thuša gore re se ke ra nagana kudu ka rena go feta ka moo go nyakegago. Sehlogong se re tlo bolela ka maemo a mararo ao go ona boikokobetšo bo tla re thušago gore re se ke ra ikgantšha. Maemo ao ke lenyalo, ditokelo tšeo re nago le  tšona ka phuthegong le tsela yeo re dirišago Inthanete ka yona.

3. Ke ka baka la’ng go ka ba le mathata lenyalong, gona ba bangwe ba dira’ng go leka go rarolla mathata ao?

³ Jehofa o nyaka gore banyalani ba thabele lenyalo la bona. Eupša ka ge ka moka ga rena re belegwe re na le sebe, go na le dilo tšeo banyalani ba ka se kwanego ka tšona. Ge e le gabotse, Paulo o ngwadile gore batho bao ba nyalago ba tlo ba le tlaišego e itšego. (1 Bakor. 7:28) Ka ge batho ba bangwe ba phela ba elwa le balekane ba bona, ba feleletša ba nagana gore ba be ba se ba swanela go nyalana. Ge e ba ba nagana go swana le batho ba lefase ba ka feleletša ba nagana gore go hlalana go tla lokiša mathata a bona. Le gona ba tla nagana ka bona feela gomme ba bona eka ba tla thaba ge feela ba ka hlalana.

4. Ke’ng seo re sa swanelago go se nagana?

⁴ Ga se ra swanela go nagana gore lenyalo la rena le padile. Re a tseba gore Beibele e re lebaka le nnoši le gore motho a hlale molekane wa gagwe, ke ge molekane yoo wa gagwe a dirile bootswa. (Mat. 5:32) Ka gona, ge re lebeletšane le tlaišego yeo Paulo a ngwadilego ka yona, ga se ra swanela dumelela boikgogomošo bo dira gore re ipotšiše gore: ‘Na lenyalo le le a nkgotsofatša? Na ke hwetša lerato leo le ntshwanelago? Na ke tla thaba kutšwanyana ge nka nyalana le motho yo mongwe?’ Lemoga gore ge e ba o ipotšiša dipotšišo tšeo, go ra gore o nagana ka wena feela e sego ka molekane wa gago. Batho ba lefase ba tla go botša gore o swanetše go dira seo pelo ya gago e rego o se dire, le ge seo se bolela gore o swanetše go hlala molekane wa gago. Beibele e re: ‘O se ke wa kgahlegela ditaba tša gago feela eupša o kgahlegele le tša ba bangwe.’ (Bafil. 2:4) Jehofa o nyaka gore o se ke wa hlala molekane wa gago. (Mat. 19:6) Le gona, Jehofa o nyaka gore o nagane ka yena pele, e sego go nagana ka wena.

5. Go ya ka Baefeso 5:33, monna le mosadi ba swanetše go swarana bjang?

⁵ Monna le mosadi ba swanetše go ratana le go  hlomphana. (Bala Baefeso 5:33.) Beibele e re ruta gore re rate go nea go e na le go amogela. (Dit. 20:35) Ke seka sefe seo se tlago go thuša banyalani go bontšhana lerato le go hlomphana? Ke boikokobetšo. Banna le basadi bao ba ikokobeditšego, ga ba tsome seo se holago bona, eupša ba tsoma “seo se holago motho yo mongwe.”—1 Bakor. 10:24.

6. Re ithuta’ng go seo se boletšwego ke Steven le mosadi wa gagwe Stephanie?

⁶ Go ba le boikokobetšo go thušitše banyalani ba bantši ba Bakriste go thaba manyalong a bona. Ka mohlala, monna yo mongwe yo a bitšwago Steven o itše: “Ge e ba wena le molekane wa gago le šomišana gabotse, le tla kgona go šomišana le ge go na le mathata. Go e na le gore o nagane gore ‘ke’ng seo se ka nkholago, o tla nagana gore ke’ng seo se ka re holago?’” Mosadi wa gagwe e lego Stephanie le yena o bona dilo ka tsela e swanago. O re: “Ga go na motho yo a nyakago go dula le motho yo a phelago a elwa le yena. Ge go na le selo seo re sa kwanego ka sona, re leka go bona gore bothata bo ka ba bo bakilwe ke eng. Ke moka ra rapela, ra dira nyakišišo le go boledišana ka bothata bjoo. Ga re hlaselane, eupša re hlasela bothata.” Banyalani ba tla thaba ge e ba yo mongwe a sa ipone a le bohlokwa kudu go feta yo mongwe.

7. Ngwanabo rena o swanetše go dira’ng ge a hwetša boikarabelo bjo itšego ka phuthegong?

⁷ Re thabela go hlankela Jehofa ka tsela le ge e le efe yeo re e kgonago. (Ps. 27:4; 84:10) Ke mo gobotse kudu ge e ba ngwanabo rena a ikemišeditše go hlankela Jehofa ka mo go oketšegilego. Ge e le gabotse, Beibele e re: “Ge e ba motho le ge e le ofe a katanela go fihlelela bolebeledi, o kganyoga modiro o mobotse.” (1 Tim. 3:1) Eupša ge e ba a hwetša kabelo e itšego ka phuthegong goba boikarabelo, ga se a swanela go nagana gore o bohlokwa go feta batho ba bangwe. (Luka 17:7-10) O swanetše go nyaka go hlankela ba bangwe a ikokobeditše.—2 Bakor. 12:15.

8. Re ithuta’ng mohlaleng wa Dioterefe, wa Usia le wa Abesalomo?

⁸ Ka Beibeleng go na le mehlala ya batho bao ba ilego ba nagana kudu ka bona go feta ka mo go nyakegago. Ka mohlala Dioterefe o ile a ikgogomoša gomme a nyaka go hwetša ‘maemo a pele’ ka phuthegong. (3 Joh. 9) Usia yena o ile a ikgogomoša gomme a leka go dira mošomo woo Jehofa a bego a se a mo laela gore a o dire. (2 Dikor. 26:16-21) Abesalomo o be a nyaka go ba kgoši. Ka gona o ile a itira okare o rata setšhaba e le gore se tle se mo thekge. (2 Sam. 15:2-6) Mehlala ye ya ka Beibeleng e bontšha gabotse gore Jehofa ga a rate batho bao ba inyakelago letago goba bao ba ikgogomošago. (Die. 25:27) Batho bao ba ikgantšhago gomme ba nyakago gore batho ba ba tšeele godimo, ba feleletša ba wela mathateng.—Die. 16:18.

9. Jesu o re beetše mohlala ofe?

⁹ Ka go se swane le batho bao re boletšego ka bona, nagana ka Jesu, “yoo gaešita le ge a be a le ka sebopego sa Modimo a sa kago a nagana ka go thopa bolaodi, e lego gore o swanetše go lekana le Modimo.” (Bafil. 2:6) Le ge Jesu a fetwa ke Jehofa feela ka bogolo, ga a ke a nagana kudu ka yena go feta ka mo go nyakegago. O ile a botša barutiwa ba gagwe gore: “Yo a itshwarago bjalo ka yo monyenyane gare ga lena, ke yena yo mogolo.” (Luka 9:48) Ruri ke tokelo go hlankela Jehofa le babulamadibogo, bahlanka ba bodiredi, bagolo le balebeledi ba tikologo bao ba ikokobeditšego go swana le Jesu! Ge e ba re ikokobeditše re tla bontšha ba bangwe lerato go etša ge Jesu a itše Bakriste ba nnete ba tla tsebja ka go ratana.—Joh. 13:35.

10. O swanetše go dira’ng ge e ba o bona eka bagolo ga ba rarolle mathata a ka phuthegong gabotse?

¹⁰ O swanetše go dira’ng ge e ba o bona eka bagolo ga ba rarolle mathata a ka phuthegong gabotse? Go e na le gore o ngongorege, o swanetše  go bontšha boikokobetšo gomme o thekge bagolo. (Heb. 13:17) E le go go thuša go dira seo, o ka ipotšiša gore: ‘Na ruri mathata a e tloga e le a magolo moo a nyakago go rarollwa? Na ye ke nako ya maleba ya go a rarolla? Na taba ye e nyaka nna? Na ke dira gore go be le botee ka phuthegong, goba na ke dira gore go bonagale eka ke bohlokwa go feta ba bangwe?’

11. Go ya ka Baefeso 4:2, 3, go tlo direga’ng ge re hlankela Jehofa re ikokobeditše?

¹¹ Jehofa o bona go ba le boikokobetšo go le bohlokwa go feta go ba le bokgoni bjo itšego. Le gona ga a tšeele godimo motho yo a šomago ka bokgwari eupša a sa dire gore go be le botee. Ka gona, dira sohle seo o ka se kgonago gore o hlankele Jehofa o ikokobeditše. Ge o ka dira seo, o tla dira gore ka phuthegong go be le botee. (Bala Baefeso 4:2, 3.) Dira sohle seo o ka se kgonago go dula o botša batho ditaba tše dibotse. Bona kamoo o ka thušago ba bangwe ka go ba direla dilo tše dibotse. Amogela batho ka moka ka legaeng la gago, go akaretša le bao ba se nago maemo ka phuthegong. (Mat. 6:1-4; Luka 14:12-14) Ge o dutše o šoma le bana beno le dikgaetšedi ka phuthegong, ba tla bona gore o na le bokgoni eupša sa bohlokwa le go feta ba tla bona gore o ikokobeditše.

12. Na Beibele e re kgothaletša go ba le bagwera? Hlalosa.

¹² Jehofa o nyaka gore re ipshine le bagwera ba rena le ba gabo rena. (Ps. 133:1) Jesu o be a na le bagwera ba babotse. (Joh. 15:15) Beibele e re botša mehola ya go ba le bagwera ba nnete. (Die. 17:17; 18:24) Le gona e re botša gore ga go botse gore re phele re nnoši. (Die. 18:1) Batho ba bantši ba nagana gore go boledišana le batho ba diriša Inthanete (goba social media), go tla ba thuša gore ba be le bagwera ba bantši le gore ba se ke ba lewa ke bodutu. Eupša re swanetše go  itlhokomela ge re boledišana le batho re diriša Inthanete.

13. Ke ka baka la’ng batho ba bangwe bao ba dirišago mekgwa ya go boledišana le batho Inthaneteng ba ka feleletša ba lewa ke bodutu e bile ba gateletšegile monaganong?

¹³ Banyakišiši ba hweditše gore batho ba bantši bao ba fetšago nako e ntši ba lebeletše dinepe goba dilo tšeo batho ba di ngwadilego Inthaneteng, ba ka feleletša ba lewa ke bodutu goba ba gateletšegile monaganong. Ka baka la’ng? Lebaka le lengwe e ka ba gore gantši ge batho ba bea dinepe tša bona Inthaneteng, ge ba bea tša bagwera ba bona le tša mafelo ao ba kilego ba ya go ona, ba bea feela tše kaonekaone. Ge motho a bona dinepe tšeo gomme a di bapetša le bophelo bja gagwe, a ka bona eka bophelo bja gagwe bo a tšwafiša. Kgaetšedi yo mongwe wa mengwaga e 19 o re: “Ke ile ka thoma go ba le monanyana ge ke bona ba bangwe ba beile dinepe tša bona ba ipshina mafelobekeng mola nna ke dutše ka gae ke sa dire selo.”

14. Keletšo ya Beibele yeo e lego go Petro wa Pele 3:8, e ka re thuša bjang go diriša gabotse mekgwa ya go boledišana le batho Inthaneteng?

¹⁴ Ke nnete gore mekgwa ya go boledišana le batho re diriša Inthanete, e na le mehola. Ka mohlala, e re thuša go boledišana le bagwera ba rena le batho ba gabo rena. Eupša na o hlokometše gore dilo tše dintši tšeo batho ba di beago Inthaneteng, ba di beela feela gore batho ba ba dume? Go bonagala ba nyaka go no re: “Mponeng.” E bile ba bangwe ba ngwala dilo tša go se kgahliše goba tša maroga dinepeng tša bona goba dinepeng tšeo ba bangwe ba di beilego. Mokgwa wo ga o sepedišane le seo Bakriste ba kgothaletšwago go se dira gore ba bontšhe boikokobetšo. Ka gona ba ka se diriše mekgwa ye ya go boledišana le batho Inthaneteng ka tsela yeo.—Bala 1 Petro 3:8.

15. Beibele e ka re thuša bjang gore re se ke ra itira eka re bohlokwa go feta batho ba bangwe?

¹⁵ Ge e ba o diriša mekgwa ya go boledišana le batho Inthaneteng, ipotšiše gore: ‘Na dinepe goba dibidio tšeo ke di beago Inthaneteng le dilo tšeo ke di ngwalago di ka dira gore batho ba nagane gore ke a ikgantšha? Na nka dira gore ba bangwe ba ikwe ba na le mona?’ Beibele e re: “Dilo tšohle tše di lego lefaseng—kganyogo ya nama le kganyogo ya mahlo le pontšho ya bomponeng ya dilo tša motho tša boiphedišo—ga  di tšwe go Tate, eupša di tšwa lefaseng.” (1 Joh. 2:16) Beibele e nngwe e fetolela polelwana ye e rego “pontšho ya bomponeng ya dilo tša motho tša boiphedišo” e le “go nyaka go bonagala o le bohlokwa.” Bakriste ga se ba swanela go ipona ba le bohlokwa kudu go batho ba bangwe. Ba kwa keletšo ya Beibele yeo e rego: “Anke re se beng ba ikgopolago, re tsošetšana phenkgišano e bile re jelana mona.” (Bagal. 5:26) Go ba le boikokobetšo go tla re thuša gore re se ke ra swana le batho ba lefase bao ba ikgantšhago e bile ba naganago gore ba bohlokwa kudu.

16. Ke ka baka la’ng re se ra swanela go ba le boikgogomošo?

¹⁶ Re swanetše go ithuta go ba le boikokobetšo ka gobane batho bao ba ikgantšhago, ga ba na “monagano o hlaphogetšwego.” (Rom. 12:3) Batho bao ba ikgantšhago ba rata dingangišano. E bile ba ipona ba le bohlokwa go feta batho ba bangwe. Tsela yeo ba naganago ka yona le dilo tšeo ba di dirago gantši di feleletša di ba kwešitše bohloko le go kweša batho ba bangwe bohloko. Ge ba ka se fetoše tsela yeo ba naganago ka yona, Sathane o tla foufatša menagano ya bona, le go e senya. (2 Bakor. 4:4; 11:3) Motho yo a ikokobeditšego yena o hlaphogetšwe monaganong. Ga a nagane kudu ka yena ka gobane o a tseba gore batho ba bangwe ba mo feta ka bogolo. (Bafil. 2:3) E bile o a tseba gore “Modimo o lwa le baikgogomoši, eupša o bontšha baikokobetši botho bja gagwe bjo bogolo.” (1 Pet. 5:5) Batho bao ba hlaphogetšwego monaganong, ga ba nyake go fetoga manaba a Jehofa.

17. Re swanetše go dira’ng gore re dule re ikokobeditše?

¹⁷ E le gore re dule re ikokobeditše, re swanetše go diriša keletšo ya Beibele ya gore re “[hlobole] semelo sa kgale le ditlwaelo tša sona, gomme [re] apare semelo se sefsa.” Eupša seo ga se bonolo. Re swanetše go ithuta ka Jesu e le gore re tle re kgone go latela dikgato tša gagwe kgauswi goba go mo ekiša. (Bakol. 3:9, 10; 1 Pet. 2:21) Ge re ka dira bjalo re tlo holega kudu. Ge re ka ithuta go ba le boikokobetšo, malapa a rena a tla thaba kudu, go tla ba le botee ka phuthegong e bile re ka se diriše mekgwa ya go bolela le batho Inthaneteng go ikgantšha goba go dira gore batho ba bangwe ba re dume. Sa bohlokwa le go feta, re tlo amogelwa ke Jehofa e bile o tlo re šegofatša.