1-2. Mantšu a Jehofa ao a lego go Jesaya 65:16, 17, a re kgothatša bjang gore re se ke ra fela matla?

“O SE KE WA FELA MATLA!” Se e be e le sehlogo sa kopano ya selete e kgothatšago ya 2017. Kopano ye e ile ya re thuša go bona gore re ka dira eng gore re kgotlelele mathata a rena. Go šetše go fetile mengwaga e mene kopano ye e swerwe, gomme re sa dutše re kgotleletše lefaseng le la Sathane.

² Wena o kgotleletše mathata afe? Na o hlokofaletšwe ke motho wa geno goba mogwera wa gago? Na o swerwe ke bolwetši bjo šoro? Na o na le mathata ao a tlišwago ke botšofadi? Na mo o dulago gona go bile le kotsi ya tlhago? Na o a tlaišwa goba o ganetšwa go hlankela Jehofa? Goba na o lebeletšane le ditlamorago tša bolwetši bja Corona? Ruri re fela pelo ya gore ka letšatši le lengwe mathata a a fele, re a lebale le gore a se sa ba gona!—Bala Jesaya 65:16, 17.

3. Re swanetše go dira’ng gona bjale, gona ka baka la’ng?

³ Bophelo bo thata, eupša go ka direga gore nakong e tlago re tle re kopane le mathata a mangwe a magolo. (Mat. 24:21) Ka gona re swanetše go tšwela pele re ithuta go kgotlelela. Ka baka la’ng? Ka gobane Jesu o itše: “Ka go kgotlelela ga lena, le tla rua meoya ya lena.” (Luka 21:19) Go nagana kamoo ba bangwe ba kgotleletšego mathata a go swana le a rena, go ka re thuša gore le rena re kgotlelele.

4. Ke ka baka la’ng re re Jehofa ke yena a re beelago mohlala o mobotse kudu wa go kgotlelela?

⁴ Ke mang yo a re beelago mohlala o mobotse kudu wa go kgotlelela? Ke Jehofa Modimo. Na karabo ye e a go makatša? Mohlomongwe e ka go makatša, eupša ge o ka naganišiša ka yona o tlo kgona go e kwešiša. Lefase le le bušwa ke Diabolo e bile le tletše ka mathata. Jehofa a ka kgona go fediša mathata a ka moka gona bjale, eupša o letetše nako ya maleba gore a tle  a dire bjalo. (Baroma 9:22) A sa letile, o dula a kgotleletše mathata ao ka moka. Ga bjale a re boneng dilo tše senyane tšeo Jehofa a di kgotleletšego.

5. Leina la Jehofa le sentšwe bjang, gona wena o ikwa bjang ka seo?

⁵ Go senywa ga leina la gagwe. Jehofa o rata leina la gagwe e bile o nyaka gore batho ka moka ba le hlomphe. (Jes. 42:8) Eupša le be le dutše le senywa ka mengwaga e ka bago e 6 000. (Ps. 74:10, 18, 23) Taba ye e thomile serapeng sa Edene ge Diabolo (goba, “Mothomeletši”) a be a botša Adama le Efa maaka ka Modimo gore o ba tima selo seo se ka ba dirago gore ba thabe. (Gen. 3:1-5) Ga e sa le go tloga ka nako yeo, leina la Jehofa le ile la senywa ka gore o tima batho dilo tšeo ba di hlokago. Jesu o be a tshwenyegile ka gore leina la Tatagwe le a senywa. Ka baka leo o ile a ruta barutiwa ba gagwe go rapela ka gore: “Tatago rena wa magodimong, leina la gago a le kgethagatšwe.”—Mat. 6:9.

6. Ke ka baka la’ng Jehofa a dumeletše gore nako e telele e fete pele a ka bontšha gore ke yena a nago le tshwanelo ya go buša?

⁶ Go ganetšwa ga Mmušo wa gagwe. Jehofa ke yena a nago le tshwanelo ya go buša magodimong le lefaseng, e bile tsela ya gagwe ya go buša ke e kaonekaone. (Kut. 4:11) Eupša Diabolo o ile a leka go aroša barongwa le batho ka go leka go dira gore ba nagane gore Modimo ga a na tshwanelo ya go ba buša. Taba ya gore Jehofa ke yena a nago le tshwanelo ya go buša e be e ka se no rarollwa kapelapela. Ka bohlale, Modimo o ile a dumelela nako e telele gore e fete e le gore batho ba tle ba bone gore ge ba nyaka go ipuša ba ka se atlege. (Jer. 10:23) Ka ge Modimo a sa fele pelo, taba ye mafelelong e tlo rarollwa gatee ya ba moka. Batho ka moka ba tla tseba gore tsela ya Jehofa ya go buša ke yona e kaonekaone. E bile ke Mmušo wa gagwe feela wo o ka tlišago khutšo le tšhireletšego mo lefaseng.

7. Ke bomang bao ba ilego ba hlanogela Jehofa, gona o tlo dira’ng ka bona?

⁷ Bana ba bangwe ba gagwe ba ile ba mo hlanogela. Jehofa o bopile barongwa le batho ba phethagetše. Eupša morongwa yo a ilego a hlanogela Jehofa e lego Sathane (goba, “Moganetši”) o ile a dira gore Adama le Efa le bona ba hlanogele Jehofa. Barongwa ba bangwe le batho ba bangwe le bona ba ile ba hlanogela Jehofa. (Juda 6) Ka morago Baisiraele ba bangwe le bona ba ile ba hlanogela Jehofa gomme ba thoma go rapela medimo ya maaka. (Jes. 63:8, 10) Seo se ile sa nyamiša Jehofa eupša o ile a kgotlelela. Le gona o tlo dula a kgotleletše go fihla a tlo fediša batho ka moka bao ba mo hlanogetšego. Yeo e tla ba tšhegofatšo go batho ka moka bao ba mmotegelago bao ba kgotleletšego le yena mathata ka moka lefaseng le lebe la Sathane.

8-9. Ke maaka afe ao a bolelwago ka Jehofa, gona rena re swanetše go dira’ng ge re a kwa?

⁸ Maaka a Diabolo. Sathane o ile a bolela maaka ka Jobo le ka bahlanka ba Modimo ka moka bao ba botegago gore ba hlankela Jehofa feela ka gobane ba nyaka gore a ba šegofatše. (Jobo 1:8-11; 2:3-5) Le lehono Diabolo o sa tšwela pele a bolela maaka a go swana le a. (Kut. 12:10) Re ka thuša go bontšha gore Sathane o bolela maaka ka go kgotlelela mathata a rena le go dula re botegela Jehofa ka gobane re mo rata. Ka go dira bjalo, Jehofa o tlo re šegofatša go swana le ge a ile a šegofatša Jobo.—Jak. 5:11.

⁹ Sathane o diriša baruti go bolela gore Jehofa o sehlogo e bile ke yena a dirago gore batho ba welwe ke mathata. Ba bangwe ba re ge bana ba hlokofala, Modimo o ba tšere gore e  yo ba barongwa legodimong. Ruri ao ke maaka a matala! Rena re tseba nnete. Re a tseba gore ge re swerwe ke bolwetši bjo šoro goba re hlokofaletšwe ke batho ba gabo rena, re ka se bee Modimo molato. Go e na le moo, re a tseba gore ka letšatši le lengwe Modimo o tla fodiša malwetši le go tsoša bahu. Ka gona re swanetše go botša batho ba bangwe gore Jehofa Modimo o a re rata. Seo se tla dira gore Jehofa a fetole yoo a mo kwerago.—Die. 27:11.

10. Psalme 22:23, 24 e re botša’ng ka Jehofa?

¹⁰ Go tlaišega ga bahlanka ba gagwe bao a ba ratago. Jehofa ke Modimo yo a nago le kwelobohloko. Ga a nyake go re kwa re lla ka baka la mathata ao a re welago, e ka ba e le go tlaišwa, bolwetši goba mafokodi a rena. (Bala Psalme 22:23, 24.) Ge re ekwa bohloko Jehofa le yena o kwa bohloko, ka baka leo o nyaka go fediša dilo ka moka tšeo di re kwešago bohloko e bile o tlo dira seo. (Bapiša le Ekisodo 3:7, 8; Jesaya 63:9.) Ka letšatši le lengwe Jehofa o tlo phethagatša tshepišo ya gagwe ya gore “o tla phumola megokgo ka moka mahlong a [rena] gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—Kut. 21:4.

11. Jehofa o ikwa bjang ka bahlanka ba gagwe ba botegago bao ba hwilego?

¹¹ Go hwa ga bahlanka ba gagwe bao ba botegago. Jehofa o ikwa bjang ka banna le basadi ba botegago bao ba hwilego? O fela pelo ya go tlo ba bona gape! (Jobo 14:15) Nagana kamoo Jehofa a felago pelo ya go tlo bona mogwera wa gagwe Aborahama gape! (Jak. 2:23) Goba Moshe yoo a ilego a bolela le yena “ba lebantše difahlego.” (Ek. 33:11) Goba nagana kamoo a felago pelo ya go tlo kwa Dafida le baopedi ba bangwe ba Dipsalme ba opela dikoša tša go mo tumiša! (Ps. 104:33) Le ge bagwera ba ba Modimo ba hwile, eupša ga se a ba lebala. (Jes. 49:15) O gopola selo se sengwe le se sengwe ka  bona. Beibele e re “gobane go yena bohle ba a phela.” (Luka 20:38) Ka letšatši le lengwe o tlo ba tsoša, le gona o tlo kwa ge ba mo rapela go tšwa pelong e bile ba mo tumiša. Ge e ba motho wa geno goba mogwera wa gago a hlokofetše, eka mantšu a a ka go kgothatša le go go homotša.

12. Ke’ng seo se kwešago Jehofa bohloko kudu mehleng ye ya bofelo?

¹² Ge batho ba babe ba tlaiša batho ba bangwe. Ge Adama le Efa ba be ba thoma go hlanogela Jehofa serapeng sa Edene, Jehofa o be a tseba gore pele a ka lokiša maemo, a be a tlo mpefala le go feta. Jehofa o kwa bohloko ge a bona bobe, go hloka toka, bošoro le dilo tše dingwe tšeo di diregago mo lefaseng. O kwela batho ba go se kgone go itwela bohloko, ba go swana le ditšhiwana le bahlologadi. (Sak. 7:9, 10) Le gona o kwa bohloko ge a bona bahlanka ba gagwe ba botegago ba tlaišwa e bile ba išwa dikgolegong. Re ka kgodišega gore o re rata ka moka, rena bao re kgotleletšego gotee le yena.

13. Ke mekgwa efe yeo e šišimišago Modimo yeo batho ba e dirago?

¹³ Go mpefala ga mekgwa ya batho. Sathane o thabela go bona batho bao ba bopilwego ka seswantšho sa Modimo ba na le mekgwa e mebe le go feta. Mehleng ya Noa, ge Jehofa a be “a bona gore bobe bja batho bo be bo tletše lefaseng . . . [o ile] a itshola gore o dirile motho lefaseng gomme pelo ya gagwe ya kwa bohloko.” (Gen. 6:5, 6, 11) Na ga e sa le go tloga ka nako yeo maemo a kaonefatše? Aowa! Sathane o thaba kudu ge a bona gore mekgwa ka moka e mebe ya thobalano e atile kudu, go akaretša le thobalano ya batho ba bong bjo bo swanago! (Baef. 4:18, 19) Le gona o thaba kudu ge a bona batho bao ba hlankelago Jehofa ba dira sebe se segolo. Ge mafelelong Jehofa a se sa kgotlelela dilo tše mpe tšeo di diregago, o tla bontšha gore o hloile mekgwa e mebe ka go fediša batho ka moka bao ba nago le mekgwa yeo.

14. Batho ba swara bjang lefase le la Modimo le dilo tšeo a di bopilego?

¹⁴ Batho ba senya lefase leo a le bopilego. Motho o “buša yo mongwe gore a mo gobatše.” Le gona batho ga ba kgone go hlokomela lefase le diphoofolo tšeo Jehofa a ba kgopetšego gore ba di hlokomele. (Mmo. 8:9; Gen. 1:28) Borasaense ba bangwe ba re ditiro tša batho di ka dira gore mengwageng e sego kae e tlago, mehuta e mengwe e milione ya diphoofolo le dimela e se hlwe e sa ba gona. Se se re thuša go kwešiša gore ke ka baka la eng batho ba tshwenyegile ka dimela le diphoofolo. Re leboga Jehofa ka gobane o re tshepišitše gore o tlo “senya bao ba senyago lefase” le go tlo fetoša lefase gore e be paradeise.—Kut. 11:18; Jes. 35:1.

15-16. Ke’ng seo se ka re thušago go kgotlelela gotee le Jehofa? Nea mohlala.

¹⁵ Nagana ka dilo ka moka tšeo Tatago rena wa magodimong a di kgotleletšego ka mengwaga e dikete. (Bona lepokisi leo le rego “ Dilo Tšeo Jehofa a di Kgotleletšego.”) Jehofa a ka kgona go fediša dilo tše mpe tšeo di diregago mo lefaseng nako e nngwe le e nngwe. Eupša go se fele pelo ga gagwe go re thušitše kudu! Nagana ka mohlala wo o latelago. A re re monna le mosadi ba kwele gore ngwana wa bona o tla belegwa a se a phela gabotse, le gore a ka se tle a phela nako e telele. Ge ngwana yoo a belegwa ba thaba kudu gaešita le ge ba tseba gore go ka se be bonolo gore ba mo hlokomele. Ka ge ba rata ngwana yoo, ba tlo kgotlelela mathata a mangwe le a mangwe ao ba kopanago le ona gore ngwana yoo a ipshine ka bophelo.

 ¹⁶ Ka mo go swanago, bana ba Adama le Efa ka moka ba belegwe ba na le sebe. Eupša Jehofa o a ba rata e bile o na le taba le bona. (1 Joh. 4:19) Ka go se swane le batswadi ba re sa tšwago go bolela ka bona, Jehofa yena o tla dira se sengwe go fediša mathata ao a welago bana ba gagwe. O beile letšatši leo a tlago go fediša mathata a rena ka moka. (Mat. 24:36) Tsela yeo Jehofa a re ratago ka yona e dira gore re kgotlelele mathata gotee le yena go fihla mafelelong.

17. Mohlala wa Jesu wo o lego go Baheberu 12:2, 3 o ka re thuša bjang gore re dule re kgotleletše?

¹⁷ Jehofa o re beetše mohlala o mobotse kudu wa go kgotlelela. Jesu o ile a ekiša Tatagwe ka go ba le kgotlelelo. Ge a be a le mo lefaseng o ile a kgotlelela ge a be a gobošwa, a hlabišwa dihlong e bile a kokotelwa koteng ya tlhokofatšo ka baka la rena. (Bala Baheberu 12:2, 3.) Re kgodišegile gore Jesu o ile a thušwa ke go ekiša mohlala wa Tatagwe wa go kgotlelela. Le rena o ka re thuša.

18. Petro wa Bobedi 3:9 e re thuša bjang go kwešiša seo se diragalago ka baka la go se fele pelo ga Jehofa?

¹⁸ Bala 2 Petro 3:9. Jehofa o tseba nako ya maleba ya gore a tle a fediše lefase le le lebe. Ka baka la go se fele pelo ga Jehofa batho ba bantši ba hweditše sebaka sa go mo tseba, le gona ga bjale lešaba le legolo la batho ba dimilione le a mo hlankela. Ka moka ga bona ba thabela gore Jehofa o ile a kgotlelela go fihlela ba belegwa, ba ithuta go mo rata le go neela maphelo a bona go yena. Re tlo kgona go bona gore Jehofa o dirile phetho e botse ge batho ba dimilione bao ba kgonnego go kgotlelela le yena ba tla be ba phologa ge a fediša lefase le le lebe.

19. Re swanetše go ikemišetša go dira’ng, gona re tlo hwetša’ng?

¹⁹ Re ka kgona go kgotlelela re thabile go no swana le Jehofa. Go sa šetšwe gore Sathane o ile a dira gore Jehofa a nyame le go mmakela mathata, Jehofa o ile a dula e le “Modimo yo a thabilego.” (1 Tim. 1:11) Le rena re ka dula re thabile re sa letile ka go se fele pelo gore Jehofa a tle a kgethagatše leina la gagwe, a bontšhe gore o na le tshwanelo ya go buša e bile a fediše bobe le mathata ka moka ao a re welago. Eka ka moka ga rena re ka ikemišetša go kgotlelela le go kgothatšwa ke go tseba gore Tatago rena wa legodimong le yena o kgotleletše. Ge re ka dira bjalo, yo mongwe le yo mongwe wa rena o tla bona mantšu a latelago a phethagala: “Go thaba motho yo a tšwelago pele go kgotlelela moleko, gobane ge a amogelwa o tla hwetša mphapahlogo wa bophelo wo Jehofa a o holofeditšego bao ba tšwelago pele ba mo rata.”—Jak. 1:12.