1. Ke ka baka la’ng Jehofa a sa re bapetše le batho ba bangwe?

JEHOFA o rata dilo tše di fapafapanego. Se se bonagala tlholong ya gagwe e kgahlišago gotee le bathong bao a ba bopilego. Ka moka ga rena ga re swane. Ka gona Jehofa a ka se tsoge a go bapetša le batho ba bangwe. O hlahloba pelo ya gago, e lego seo o lego sona ka gare. (1 Sam. 16:7) O tseba dilo tšeo o kgonago go di dira gabotse le tšeo o sa kgonego go di dira gabotse. E bile o tseba le tsela yeo o godišitšwego ka yona. Le gona a ka se go kgopele gore o dire selo seo o ka se kgonego go se dira. Re swanetše go ekiša Jehofa ka go itebelela ka tsela yeo a re lebelelago ka yona. Ge re ka dira seo, re tla ba le “monagano o hlaphogetšwego” gomme ra se nagane kudu ka rena.—Baroma 12:3.

2. Ke ka baka la’ng go le kotsi go ipapetša le batho ba bangwe?

² Ke nnete gore re ka ithuta mo gontši go bana babo rena le dikgaetšedi bao ba nago le bokgoni bja go bolela tšhemong. (Baheb. 13:7) Go ekiša mohlala wa bona go ka re thuša go kaonefatša tsela yeo re bolelago ka yona tšhemong. (Bafil. 3:17) Eupša go na le phapano magareng ga go ithuta go batho ba bangwe le go ipapetša le bona. Ge re ka ipapetša le batho ba bangwe re ka feleletša re na le mona, ra nyama goba ra ikwa re se selo. Ka ge re kwele sehlogong se se fetilego, go ipapetša le batho ba bangwe ka phuthegong go ka senya segwera sa rena le Jehofa. Jehofa o re kgothaletša gore: “Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagal. 6:4.

3. Ke dilo dife tšeo o di fihleletšego ge o hlankela Jehofa tšeo di go thabišago?

³ Jehofa o nyaka gore o thabele dilo tšeo o di fihleletšego ge o mo hlankela. Ka mohlala, ge e ba o kolobeditšwe o swanetše  go thabela gore o fihleletše pakane yeo. O dirile phetho yeo ka bowena. O dirile seo ka ge o rata Jehofa. Nagana dilo ka moka tšeo o kgonnego go di dira ka morago ga gore o kolobetšwe. Ka mohlala, na o ile wa thoma go rata go bala Beibele le go ithuta kudu? Goba na o ile wa thoma go rapela go tšwa pelong? (Ps. 141:2) Na o kaonefaditše tsela yeo o rutago batho Beibele tšhemong le tsela yeo o dirišago dilo tšeo di lego ka gare ga Teaching Toolbox? Ge e ba o na le lapa, na Jehofa o go thušitše gore o be monna, mosadi goba motswadi yo mokaone? Ge e ba go le bjalo, o thabišwa kudu ke dilo ka moka tšeo o kgonnego go di fihlelela.

4. Re tlo ithuta ka eng sehlogong se?

⁴ Re ka thuša ba bangwe gore ba thabela seo ba se dirago go kaonefatša tsela yeo ba hlankelago Jehofa ka yona. Le gona re ka ba thuša gore ba se ke ba ipapetša le batho ba bangwe. Sehlogong se re tlo bona kamoo batswadi ba ka thušago bana ba bona, kamoo banyalani ba ka thušanago ka gona le kamoo bagolo le ba bangwe ba ka thušago bana babo rena le dikgaetšedi ka phuthegong. Sa mafelelo, re tlo bona kamoo melao ya motheo ya Beibele e ka re thušago go ipeela dipakane tšeo re ka kgonago go di fihlelela.

5. Go ya ka Baefeso 6:4, ke’ng seo batswadi ba sa swanelago go se dira?

⁵ Batswadi ba swanetše go hlokomela gore ba se ke ba bapetša bana ba bona goba ba nyaka gore ba dire dilo tšeo ba sa kgonego go di dira. Ge ba ka ba bapetša, bana ba bona ba tlo nyama. (Bala Baefeso 6:4.) Kgaetšedi Sachiko * o re: “Barutiši ba ka ba be ba nyaka gore ke phale bana ba bangwe ka klaseng. Mma le yena o be a nyaka gore ke dule ke phasa sekolong, e le gore barutiši ba ka le tate yoo e sego Hlatse ya Jehofa, ba kgone go amogela bodumedi bja rena. Ge e le gabotse, mma o be a nyaka gore ke se ke ka dira phošo le e tee ge ke be ke ngwala ditlhahlobo, gomme seo se be se ka se kgonege. Le ge gona bjale e le kgale ke se sa tsena sekolo, ke fela ke ikwa eka Jehofa ga a nkamogele le ge ke leka ka thata gore ke mo kgahliše.”

6. Batswadi ba ka ithuta’ng go Psalme 131:1, 2?

⁶ Batswadi ba ka ithuta thuto e bohlokwa go Psalme 131:1, 2. (Bala.) Kgoši Dafida o itše ga se a “inyakela dilo tše kgolo kudu” goba dilo tšeo a ka se kgonego go di fihlelela. Ka ge a be a ikokobeditše, o ile a kgotsofala le go ba le  khutšo ya monagano. Batswadi ba ka ithuta’ng mantšung a a Dafida? E le gore batswadi ba ikokobetše, ga se ba swanela go letela go dira dilo tšeo ba ka se kgonego go di dira le go letela gore bana ba bona ba dire dilo tšeo ba ka se di kgonego. Batswadi ba ka thuša bana ba bona ka go ba bontšha dilo tšeo ba ka kgonago go di dira le tšeo ba ka se di kgonego, le go ba thuša go ipeela dipakane tšeo ba ka kgonago go di fihlelela. Kgaetšedi Marina o re: “Mma ga se a ka a mpapetša le bana bešo ba bararo goba le bana ba bangwe. O nthutile gore motho yo mongwe le yo mongwe go na le seo a se kgonago le gore ka moka ga rena re bohlokwa go Jehofa. Ga bjale ke a mo leboga ka gore ga se gantši ke ipapetšago le batho ba bangwe.”

7-8. Monna a ka godiša mosadi wa gagwe bjang?

⁷ Monna wa Mokriste o swanetše go godiša mosadi wa gagwe. (1 Pet. 3:7) Go godiša motho go akaretša go mo swara gabotse le go mo hlompha. Ka mohlala, monna o godiša mosadi wa gagwe ge a mo lebelela e le motho wa bohlokwa. Ga a kgopele mosadi wa gagwe gore a dire dilo tšeo a ka se kgonego go di dira. Le gona ga a mmapetše le basadi ba bangwe. Mosadi o tla ikwa bjang ge e ba monna wa gagwe a mmapetša le basadi ba bangwe? Rosa yoo monna wa gagwe e sego Hlatse ya Jehofa gantši o mmapetša le basadi ba bangwe. Mantšu a gagwe a hlabago a be a dira gore Rosa a kwe bohloko e bile a bone eka ga go na motho yo a mo ratago. Rosa o re: “Ke hloka go gopotšwa ka mehla gore Jehofa o a nthata.” Eupša monna yo e lego Hlatse ya Jehofa o godiša mosadi wa gagwe. O a tseba gore go dira seo go ama tswalano ya gagwe le mosadi wa gagwe le tswalano ya gagwe le Jehofa. *

⁸ Monna yo a godišago mosadi wa gagwe o bolela ka yena gabotse bathong, o mmotša gore o a mo rata e bile o a mo reta. (Die. 31:28) Monna wa Katerina yoo re boletšego ka yena sehlogong se se fetilego, o ile a kgona go mo thuša ge a be a ikwa a inyatša. Ge Katerina e be e sa le ngwana, mmagwe o be a mo nyatša e bile a dula a mmapetša le banenyana ba bangwe le bagwera ba gagwe. Ka baka leo, o ile a thoma go ipapetša le batho ba bangwe gaešita le ka morago ga ge a šetše a ithutile therešo. Eupša monna wa gagwe yoo e lego Hlatse ya Jehofa o mo thušitše gore a se sa ipapetša le batho ba bangwe, le gore a itebelele ka tsela yeo Jehofa a mo lebelelago ka yona. Katerina o re: “Monna wa ka o a nthata, o a ntheta ge ke dirile dilo tše dibotse e bile o a nthapelela. Le gona o nkgopotša ka dika tše dibotse tša Jehofa le go nthuša go fetoša tsela e fošagetšego yeo ke naganago ka yona.”

9-10. Bagolo ba ile ba thuša kgaetšedi yo mongwe bjang gore a se ke a ipapetša le ba bangwe?

⁹ Bagolo ba ka thuša bjang batho bao ba nago le bothata bja go ipapetša le ba bangwe? A re boneng mohlala wa kgaetšedi Hanuni yoo a bego a sa retwe gantši ge e be e sa le ngwana. O re: “Ke be ke na le dihlong e bile ke bona okare bana ba bangwe ba bohlale go mphala. Ke thomile go ipapetša le ba bangwe ke sa le yo monyenyane.” Le ka morago ga gore Hanuni e be yo mongwe wa Dihlatse tša Jehofa, o be a sa tšwela pele a ipapetša le ba bangwe. Ka baka leo o ile a ikwa a se bohlokwa ka phuthegong. Eupša ga bjale ke mmulamadibogo yo a thabilego. Ke’ng seo se ilego sa mo thuša gore a se sa ipapetša le ba bangwe?

¹⁰ Hanuni o re o thušitšwe ke bagolo bao ba ilego ba mmontšha gore ba na le taba le yena.  Ba ile ba mmotša gore o bohlokwa, ba ba ba mo reta ka gore o bea mohlala o mobotse ka phuthegong. O ngwadile gore: “Bagolo ba ile ba fela ba nkgopela gore ke kgothatše dikgaetšedi tše dingwe tšeo di hlokago thušo ka phuthegong. Seo se ile sa dira gore ke ikwe ke le bohlokwa. Nka se tsoge ke lebetše kamoo bagolo ba ilego ba nteboga gore ke kgothaditše dikgaetšedi tše dingwe tša bafsa ka phuthegong. Ke moka ba ile ba mpalela Bathesalonika ba Pele 1:2, 3. Ruri lengwalo leo le ile la nkgoma pelo! Ka ge bagolo bao ba ile ba bontšha gore ba na le taba le nna, gona bjale ke a bona gore ke bohlokwa ka phuthegong.”

11. Go ya ka Jesaya 57:15, re ka thuša bjang bao ba kwelego bohloko?

¹¹ Bala Jesaya 57:15. Jehofa o na le taba le bao ba “setlegilego” e lego bao ba kwelego bohloko. Bagolo le bagoeledi ka moka ka phuthegong ba ka kgothatša dikgaetšedi le bana babo rena ba. Tsela e nngwe yeo re ka ba kgothatšago ka yona ke ka go ba bontšha gore re na le taba le bona. Jehofa o nyaka gore re ba bontšhe gore o ba rata kudu. (Die. 19:17) Le gona re ka thuša bana babo rena le dikgaetšedi ka gore re be le boikokobetšo le gore re se ke ra ikgantšha ka dilo tšeo re kgonago go di dira. Ga re nyake go ipiletša mahlo a batho ka gobane seo se ka dira gore ba bangwe ba re jele mona. Go e na le moo, re nyaka gore dilo tšeo re di dirago le go di bolela di kgothatše bana babo rena le dikgaetšedi.—1 Pet. 4:10, 11.

12. Ke ka baka la’ng batho ba maemo a tlasana ba be ba rata go ba le Jesu? (Bona seswantšho sa letlakala la ka ntle.)

¹² Tsela yeo Jesu a bego a swara balatedi ba gagwe ka yona e ka re ruta dilo tše dintši mabapi le kamoo re ka swarago ba bangwe ka go gona. Jesu ke motho yo a tsebegago kudu yo a kilego a phela mo lefaseng. Eupša o be a le ‘boleta e bile a na le pelo e ikokobeditšego.’ (Mat. 11:28-30) Ga se a ka a ikgantšha ka gore o be a le bohlale kudu le ka gore o be a tseba dilo tše dintši. Ge a be a ruta batho o be a diriša polelo e kwagalago le dipapišo tšeo di kgomago pelo. (Luka 10:21) Jesu o be a sa swane le baetapele ba bodumedi bao ba ikgogomošago. O be a sa dire gore batho ba bangwe ba ikwe eka ga ba bohlokwa go Modimo. (Joh. 6:37) Go e na le moo, o be a ba hlompha.

13. Jesu o ile a bontšha barutiwa ba gagwe botho le lerato bjang?

¹³ Jesu o ile a bontšha gore o na le botho le lerato, ka tsela yeo a ilego a swara barutiwa ba gagwe ka yona. O be a tseba gore ba be ba se na bokgoni bja go swana, le gore maemo a bona a be a sa swane. Ka baka leo, ba be ba ka se kgone go dira dilo go swana, e bile ba be ba ka se kgone go fetša nako e lekanago ge ba botša batho ditaba tše dibotse. Eupša o be a thabišwa ke gore ba be ba dira sohle seo ba ka se kgonago. Jesu o ile a bontšha gore o a thaba ge batho ba dira sohle seo ba ka se kgonago papišong ya mabapi le ditalente. Papišong yeo, mong wa bahlanka o ile a nea mohlanka yo mongwe le yo mongwe mošomo “go ya ka bokgoni bja gagwe.” Yo mongwe wa bahlanka ba babedi bao ba bego ba šoma ka thata o ile a hwetša ditalente tše dintši go feta yo mongwe. Eupša mong wa bona o ile a ba reta go swana. O itše: “O dirile gabotse mohlanka yo botse le yo a botegago!”—Mat. 25:14-23.

14. Re ka ekiša Jesu bjang ka tsela yeo a swarago ba bangwe ka yona?

¹⁴ Jesu o dula a re swara ka botho le ka lerato. O a tseba gore bokgoni bja rena le maemo a rena ga a swane, e bile o thabišwa ke gore re dira sohle seo re ka se kgonago go hlankela Jehofa. Re dira gabotse ge re ekiša tsela yeo Jesu a swarago ba bangwe ka yona. Ga re nyake gore ngwanabo rena goba kgaetšedi a ikwe a se na mohola ka ge a sa kgone go dira dilo go swana  le ba bangwe. Eupša re swanetše go dula re reta bana babo rena le dikgaetšedi ge ba dira sohle seo ba ka se kgonago go hlankela Jehofa.

15-16. Kgaetšedi yo mongwe o ile a holwa bjang ke go ipeela dipakane tšeo a ka kgonago go di fihlelela?

¹⁵ Go ipeela dipakane ge re hlankela Jehofa go re thuša gore re kgotsofale e bile re tsebe seo re se phelelago. Eupša re swanetše go ipeela dipakane tšeo re ka kgonago go di fihlelela. Ga go hlokagale gore re ipeele dipakane tše di swanago le tša ba bangwe. Ge re ka dira seo, mafelelong re ka tla ra nyama. (Luka 14:28) Nagana ka kgaetšedi wa mmulamadibogo e lego Midori.

¹⁶ Tatago Midori yoo e sego Hlatse ya Jehofa o be a nyatša Midori ge e be e sa le ngwana, ka go mmapetša le bana babo le bana bao a bego a tsena le bona ka klaseng. Midori o re: “Ke ile ka ikwa ke se na mohola.” Eupša ge Midori a dutše a gola o ile a thoma go itshepa. O re: “Ke be ke bala Beibele letšatši le lengwe le le lengwe e le gore ke kgone go ba le khutšo le gore ke bone gore Jehofa o a nthata.” Le gona o ile a ipeela dipakane tšeo a ka di fihlelelago e bile a rapela Modimo ka go lebanya gore a mo thuše go di fihlelela. Seo se ile sa thuša Midori gore a thabele go hlankela Jehofa.

17. Re ka thušwa ke’ng gore re fetoše tsela yeo re naganago ka yona, gona mafelelo e tla ba afe?

¹⁷ Go ka tšea nako e telele go fetoša tsela yeo re ikwago ka yona. Eupša Jehofa o re kgothatša ka gore: “Le dule le mpshafatšwa matleng a lena a tutuetšago monagano.” (Baef. 4:23, 24) E le gore re dire seo, re swanetše go rapela, re ithute Beibele le go naganišiša ka seo re ithutago sona. Tšwela pele o dira dilo tše gomme o kgopele Jehofa gore a go thuše. Moya wa gagwe o mokgethwa o tla go thuša gore o se sa ipapetša le batho ba bangwe. Jehofa o tla go  thuša go bona ge e ba o thoma go ba le mona goba o ikgogomoša, ke moka a go thuša gore o fetoge kapelapela.

18. O ka kgothatšwa bjang ke mantšu ao a lego go Dikoronika tša Bobedi 6:29, 30?

¹⁸ Bala 2 Dikoronika 6:29, 30. Jehofa o tseba seo re se naganago. O tseba le gore re leka go lwantšhana le mekgwa e mebe le diphošo tšeo re di dirago letšatši le letšatši. Ge Jehofa a bona re lwantšhana le mekgwa yeo e mebe, seo se dira gore a re rate le go feta.

19. Nea mohlala wo o bontšhago kamoo Jehofa a ikwago ka gona ka rena?

¹⁹ Jehofa o diriša mohlala wa kamoo mma a ratago ngwana wa gagwe ka gona go re bontšha kamoo a ikwago ka gona ka rena. (Jes. 49:15) Nagana ka mohlala wa Rachel. O ngwadile gore: “Morwedi wa ka Stephanie o belegwe pele ga nako. Ge ke be ke mmona la mathomo e be e le yo monyenyanenyenyane, a sa kgone go itirela selo. Eupša sepetlele ba ile ba ntumelela gore ke mo kuke letšatši le lengwe le le lengwe kgweding ya gagwe ya mathomo ge a be a sa le ka gare ga motšhene. Ka nako yeo nna le ngwana wa ka re ile ra ba le tswalano ya kgauswi kudu. Gona bjale o na le mengwaga e tshela gomme ke yo monyenyane ge o mmapetša le dithaka tša gagwe. Eupša ke mo rata kudu ka gobane o ile a lwa ka thata gore a phele, e bile o dirile gore ke thabe kudu!” Go kgothatša kudu go tseba gore Jehofa le yena o re rata ka yona tsela yeo ge a bona re dira sohle seo re ka se kgonago go mo hlankela!

20. Ke ka baka la’ng bahlanka ba Jehofa ba swanetše go thaba?

²⁰ Bahlanka ba Jehofa ba swanetše go thabišwa ke gore yo mongwe le yo mongwe wa bona o bohlokwa. Jehofa ga se a go gogela go yena ka gobane o le kaone go feta batho ba bangwe. O go gogetše go yena ka gobane a hlahlobišišitše pelo ya gago, gomme a bona gore o ikokobeditše le gore o ikemišeditše go ithuta ka yena le go fetoga. (Ps. 25:9) Tseba gore o a thaba ge a bona gore o dira sohle seo o ka se kgonago go mo hlankela. Go kgotlelela ga gago le go mmotegela go bontšha gore o na le “pelo e botse le e lokilego.” (Luka 8:15) Ka gona tšwela pele o dira sohle seo o ka se kgonago go hlankela Jehofa. Ke moka o tla ba le lebaka la go hlalala ‘ka wena ka noši.’