1. Jehofa o ile a dira’ng ka morago ga gore Adama le Efa ba dire sebe? (Genesi 3:15)

 KA MORAGO ga gore Adama le Efa ba dire sebe, Jehofa o ile a nea bana ba bona kholofelo ka boporofeta bjo bohlokwa. Seo a se boletšego se ngwadilwe go Genesi 3:15.—Bala.

2. Ke ka baka la’ng boporofeta bjo bo le bohlokwa?

² Boporofeta bjo bo tšwelela ka pukung ya mathomo ya Beibele, eupša dipuku tše dingwe tša Beibele di sepedišana le bjona. Go swana le ge mokokotlo wa puku o swaraganya matlakala a puku ka moka, mantšu ao a lego go Genesi 3:15 a swaraganya ditaba tšeo di lego pukung e nngwe le e nngwe ya Beibele gomme a dira gore e be moaletša o tee, woo o rego Modimo o tlo romela Morwa wa gagwe gore a fediše Sathane le balatedi ba gagwe. b Ruri e tlo ba nako e kgahlišago kudu go batho ka moka bao ba ratago Jehofa!

3. Re tlo boledišana ka’ng sehlogong se?

³ Sehlogong se re tlo araba dipotšišo tše di latelago tša boporofeta bjo bo lego go Genesi 3:15: Ke bomang bao go bolelwago ka bona? Boporofeta bjo bo phethagala bjang? Gona bo re hola bjang?

4. “Noga” ke mang, gona re tseba bjang?

⁴ Bao go bolelwago ka bona go Genesi 3:14, 15 ke “noga,” “peu” ya noga, “mosadi,” le “peu” ya mosadi. Beibele e re thuša go kwešiša gore ge e le gabotse ke bomang. c A re thomeng ka go kwešiša gore ge e le gabotse noga ke mang. Noga e tlwaelegilego e be e ka se kgone go kwešiša seo Jehofa a se boletšego kua serapeng sa Edene. Ka gona Jehofa o swanetše go ba a be a bolela ka sebopiwa se se hlalefilego. Ke mang? Kutollo 12:9 e re hlalosetša gabotse gore noga ke mang. “Noga” ye ke Sathane Diabolo. Bjale peu ya noga ke mang?

5. Peu ya noga e bopša ke bomang?

⁵ Ge Beibele e bolela ka peu ka tsela ya seswantšhetšo, e bolela ka bao ba naganago le go dira dilo go swana le tatago bona. Peu ya noga e bopša ke barongwa bao ba sa botegego le batho bao ba ganago go kwa Jehofa le go ganetša batho ba gagwe. Se se akaretša barongwa bao ba sa botegego bao ba ilego ba tlogela dikabelo tša bona legodimong mehleng ya Noa, le batho bao ba ekišago tatago bona diabolo.—Gen. 6:1, 2; Joh. 8:44; 1 Joh. 5:19; Juda 6.

6. Ke ka baka la’ng re re Efa ga se mosadi yo go bolelwago ka yena?

⁶ Ga bjale a re boneng gore mosadi ke mang. E ka se be Efa. Ke ka baka la’ng re realo? Ke ka gobane boporofeta bo re peu ya mosadi e be e tlo “pšhatla” hlogo ya  noga. Ka ge re boletše, noga ke Sathane le gona re a tseba gore ga go na motho mo lefaseng yo a ka kgonago go mo fediša. Bjale Sathane o be a tlo fedišwa bjang?

7. Go ya ka Kutollo 12:1, 2, 5, le 10, mosadi yo go bolelwago ka yena go Genesi 3:15 ke mang?

⁷ Puku ya mafelelo ka Beibeleng e re botša gore mosadi yo go bolelwago ka yena go Genesi 3:15 ke mang. (Bala Kutollo 12:1, 2, 5, 10.) Yo ga se mosadi yo a tlwaelegilego! Mosadi yo o na le kgwedi ka tlase ga dinao tša gagwe e bile o rwele mphapahlogo wa dinaledi tše lesomepedi. O belega ngwana yo a sa tlwaelegago e lego Mmušo wa Modimo. Mmušo wo o legodimong, ka gona mosadi yo o swanetše go ba a le legodimong. O emela karolo ya mokgatlo wa Jehofa wa legodimong wo o bopšago ke barongwa bao ba botegago.—Bagal. 4:26.

8. Peu e bohlokwa ya mosadi ke mang, gona e thomile go ba gona neng? (Genesi 22:15-18)

⁸ Lentšu la Modimo le re thuša go tseba gore peu e bohlokwa ya mosadi ke mang. E be e tlo tšwa molokong wa Aborahama. (Bala Genesi 22:15-18.) Go ya le ka ge boporofeta bo boletše, Jesu o ile a tšwelela molokong wa Aborahama. (Luka 3:23, 34) Eupša peu ye e be e swanetše go ba le matla a go feta a batho ka gobane e be e tlo fediša Sathane Diabolo. Ge Jesu a be a na le mengwaga e 30, Modimo o ile a mo tlotša ka moya o mokgethwa. Go tloga ka yona nako yeo, o ile a ba peu e bohlokwa ya mosadi. (Bagal. 3:16) Ka morago ga gore Jesu a tsošwe bahung, Modimo o ile a mo rweša “mphapahlogo wa letago le kgodišo” ke moka a mo nea “matla ka moka legodimong le lefaseng,” go akaretša le matla a go “fediša mediro ya Diabolo.”—Baheb. 2:7; Mat. 28:18; 1 Joh. 3:8.

9-10. (a) Ke bomang ba bangwe bao e lego karolo ya peu ya mosadi, gona ba ba gona neng? (b) Re tlo ithuta ka’ng?

⁹ Go na le karolo ya bobedi ya peu ya mosadi. Moapostola Paulo o boletše ka peu ye ge a be a botša Bakriste ba tloditšwego bao e lego Bajuda le bao e sego Bajuda gore: “Ge e ba le le ba Kriste ruri le peu ya Aborahama, bajabohwa go ya ka kholofetšo.” (Bagal. 3:28, 29) Ge Jehofa a tlotša Mokriste ka moya o mokgethwa, motho yoo o ba karolo ya peu ya mosadi. Ka gona peu ya mosadi e bopša ke Jesu Kriste le ba 144 000 bao ba bušago le yena. (Kut. 14:1) Ka moka ga bona ba leka go nagana le go dira dilo go swana le Tatago bona Jehofa Modimo.

¹⁰ Ka ge ga bjale re tseba bao go bolelwago ka bona go Genesi 3:15, a re boneng gore Jehofa o phethagatša boporofeta bjo bjang le gore rena re holega bjang.

11. Boporofeta bo ra gore’ng ge bo re peu ya mosadi e be e tlo longwa serethe?

¹¹ Go ya ka boporofeta bjo bo lego go Genesi 3:15, noga e be e tlo loma mosadi “serethe.” Se se diregile ge Sathane a dira gore Bajuda le Baroma ba bolaye Morwa wa Modimo. (Luka 23:13, 20-24) Go no swana le ge ntho yeo e tšwilego seretheng e ka go kweša bohloko ka nakonyana, le lehu la Jesu le dirile gore a robale lebitleng ka matšatši a mararo.—Mat. 16:21.

12. Hlogo ya noga e tlo pšhatlaganywa neng, gona bjang?

¹² Jesu o be a swanetše go tsošwa mabitleng e le gore boporofeta bjo bo lego go  Genesi 3:15 bo phethagale. Ka baka la’ng? Ka gobane peu ya mosadi e be e tlo pšhatla hlogo ya noga. Se se ra gore Jesu o be a swanetše go tsošwa mabitleng. Ke therešo gore se se ile sa direga! Ka letšatši la boraro ka morago ga lehu la Jesu, o ile a tsošwa e le sebopiwa sa moya seo se sa hwego. Jesu o tlo fediša Sathane ka nako yeo Modimo a e beilego. (Heb. 2:14) Bao ba tlago go buša le Jesu ba tlo mo thuša go fediša manaba a Modimo e lego peu ya noga.—Kut. 17:14; 20:4, 10. d

13. Re holega bjang ka go phethagala ga boporofeta bjo?

¹³ Ge e ba o le mohlanka wa Modimo le wena boporofeta bjo bo a go hola. Jesu o ile a tla mo lefaseng, gomme a ekiša dika tša Tatagwe ka mo go feletšego. (Joh. 14:9) Ka gona ge re ithuta ka Jesu re tseba Jehofa le go mo rata. Re a holega ge Jesu a re ruta le go re hlahla a diriša phuthego ya Bokriste lehono. O re rutile gore re ka phela bjang e le gore re thabiše Jehofa. Re a holega ka ge Jesu a ile a longwa serethe goba a hwa. Re holega bjang? Ge Jesu a be a ehwa, o ile a neela madi a gagwe e le sehlabelo se se phethagetšego seo se re ‘hlwekišago sebeng sohle.’—1 Joh. 1:7.

14. Re tseba bjang gore boporofeta bjo Jehofa a boletšego ka bjona serapeng sa Edene ga se bja phethagala ka nako yeo?

¹⁴ Boporofeta bjo Jehofa a bo boletšego kua serapeng sa Edene bo be bo bontšha gore bo ka se phethagale ka yona nako yeo. Go be go tlo tšea nako gore mosadi a be le peu e tshepišitšwego, gore Sathane a be le balatedi ba gagwe le gore go be le lehloyo magareng ga dihlopha tše tše pedi. Re holega kudu ka go kwešiša boporofeta bjo ka gobane bo re thuša go tseba gore batho bao ba laolwago ke Sathane ba be ba tlo hloya bahlanka ba Modimo. Jesu le yena ka morago o ile a nea barutiwa ba gagwe temošo e swanago. (Mar. 13:13; Joh. 17:14) Re bone go phethagala ga boporofeta bjo bja Modimo kudu mengwageng e 100 e fetilego. Re bone seo bjang?

15. Ke ka baka la’ng lefase le hloile bahlanka ba Modimo, gona ke ka baka la’ng re se ra swanela go tšhaba Sathane?

¹⁵ Ka 1914 Jesu o ile a ba kgoši legodimong. Ke moka ka moragonyana Sathane a rakwa. (Kut. 12:9, 12) O raketšwe mo lefaseng e bile o emetše go fedišwa. Eupša go tloga ka nako yeo a rakilwego legodimong ka yona, o galefile kudu e bile o hlasela batho ba Modimo. (Kut. 12:13, 17) Ke ka baka leo batho ba hloilego bahlanka ba Modimo mo lefaseng. Eupša ga se ra swanela go tšhaba Sathane le balatedi ba gagwe. Re swanetše go kgodišega go swana le moapostola Paulo yoo a ilego a ngwala gore: “Ge e ba Modimo a ema le rena, ke mang yo a tlago go lwa le rena?” (Baroma 8:31) Re ka tshepa Jehofa ka mo go feletšego ka gobane re šetše re bone gore karolo e kgolo ya boporofeta bjo bo lego go Genesi 3:15 e šetše e phethagetše.

16-18. Curtis, Ursula, le Jessica ba ile ba holega bjang ka go kwešiša Genesi 3:15?

¹⁶ Kholofetšo ya Jehofa yeo e lego go Genesi 3:15 e ka re thuša go lebeletšana le mathata ka moka ao re nago le ona. Curtis  yo a hlankelago bjalo ka moromiwa kua Guam, o re: “Ka nako e nngwe ke ile ka ba le mathata a mantši kudu ao a ilego a leka potego ya ka go Jehofa. Eupša go naganišiša ka boporofeta bjo bo lego go Genesi 3:15 go nthušitše gore ke tshepe Modimo.” Curtis o fela pelo ya go bona letšatši leo Jehofa a tlago go fediša mathata a rena ka moka.

¹⁷ Kgaetšedi Ursula yo a dulago Bavaria o re go kwešiša Genesi 3:15 go ile gwa mo thuša gore a dumele gore Beibele ke Lentšu la Modimo. O ile a bona kamoo boporofeta bjo bo sepedišanago le diporofeto tše dingwe ka Beibeleng gomme seo se ile sa mo kgahla kudu. O oketša ka gore: “Ge ke be ke ithuta gore Jehofa o dirile se sengwe gore batho ba be le kholofelo, ke ile ka mo rata le go feta.”

¹⁸ Jessica yo a tšwago Micronesia, o re: “Ke gopola ka tsela yeo ke bego ke ikwa ka yona ge ke lemoga gore ke hweditše therešo! Go phethega ga lengwalo la Genesi 3:15 go ile gwa nthuša go tseba gore mathata ao re nago le wona lehono ga re a bakelwe ke Modimo. Boporofeta bjo bo ile bja tiiša tumelo ya ka le go nthuša go tseba gore go hlankela Jehofa go tlo ntlišetša ditšhegofatšo gona bjale le nakong e tlago.”

19. Ke eng seo se re kgodišago gore karolo ya mafelelo ya boporofeta e tlo phethagala?

¹⁹ Ka ge re bone, boporofeta bjo bo lego go Genesis 3:15 bo a phethagala. Re bone gore peu ya mosadi le peu ya noga ke bomang. Jesu e lego karolo e bohlokwa ya peu ya mosadi, o tsošitšwe bahung e bile ga bjale ke Kgoši e matla yeo e sa hwego. Karolo ya bobedi ya peu ya mosadi e kgauswi le go felela legodimong. Ka ge karolo ya mathomo ya boporofeta bjo e phethagetše, re a tshepa gore le karolo ya bobedi ya go pšhatlwa ga hlogo ya noga e tlo phethagala. Ruri e tlo ba nako e thabišago kudu go bahlanka ba Jehofa ge Sathane a fedišwa! O se ke wa fela matla ge re sa dutše re letile nako yeo. Modimo wa rena o a tshepagala. O tlo diriša peu ya mosadi go direla “ditšhaba ka moka tša lefase” dilo tše dibotse.—Gen. 22:18.