1. Re ka kgodišega ka’ng, gona ka baka la’ng?

 GE O LEBELETŠE maemo a lefase le lehono, na o thatafalelwa ke go dumela gore dilo di tla kaonefala? Malapa a a senyega, batho ba rata dintwa, ba inaganela ba nnoši e bile ba bogale. Batho ba bantši ga ba sa tshepa bao ba nago le matla a bolaodi. Eupša dilo tše ka moka di swanetše go tiiša tumelo ya gago. Ka baka la’ng? Ka gobane batho ba dira dilo go ya le kamoo Beibele e boletšego gore “mehleng ya bofelo” dilo di be di tlo dirwa ka gona. (2 Tim. 3:1-5) Go phethagala ga boporofeta bjo bo lego molaleng bjo motho yo mongwe le yo mongwe a kgonago go bo bona, go re nea bohlatse bja gore Jesu Kriste o thomile go buša e le Kgoši ya Mmušo wa Modimo legodimong. Mohlala wo e no ba o mongwe wa mehlala yeo e bolelago ka Mmušo wa Modimo. Ge re ka ithuta ka boporofeta bjo bongwe bjoo bo phethagalago mehleng ya rena, tumelo ya rena e tlo tia.

2. Re tlo ithuta ka’ng sehlogong se, gona ka baka la’ng? (Hlalosa seswantšho sa letlakala la ka ntle.)

² Sehlogong se re tlo ithuta ka (1) boporofeta bjoo bo tlago go re thuša go bona gore Mmušo o hlomilwe neng, (2) boporofeta bjoo bo tlago go re thuša go bona go ba gona ga Jesu e le Kgoši ya Mmušo wa Modimo, le (3) boporofeta  bjoo bo tlago go re thuša go bona gore manaba a Modimo a tlo fedišwa bjang. Re tlo bona gore boporofeta bjo bo a sepedišana, e bile bo tlo re bontšha gore re phela dinakong dife tša boporofeta.

3. Boporofeta bjo bo lego go Daniele 7:13, 14 bo re kgonthišetša eng ka Kgoši ya Mmušo wa Modimo?

³ Boporofeta bjo bo lego go Daniele 7:13, 14 bo re kgonthišetša gore Jesu Kriste e tlo ba kgoši e swanelegago ya Mmušo wa Modimo. Batho ba go tšwa ditšhabeng ka moka ‘ba tla mo hlankela,’ e bile ga go motho yo a tlago go mo tšeela bogoši. Boporofeta bjo bongwe bjo bo lego ka pukung ya Daniele bo boletše e sa le pele gore Jesu e be e tla ba Kgoši ya Mmušo wa Modimo ka morago ga mabaka a šupago. Na go a kgonega gore re tsebe gore seo se diregile neng?

4. Hlalosa kamoo Daniele 4:10-17 e re lebišago nakong yeo Jesu Kriste a thomilego go buša ka yona. (Bona mongwalo wa tlase.)

⁴ Bala Daniele 4:10-17. “Mabaka a šupago” a emela mengwaga e 2 520. Nako yeo e thomile ka ngwaga wa 607 B.C.E. ge Bababilona ba tloša kgoši yeo e emelago Jehofa kua Jerusalema. E fedile ka 1914 C.E. ge Jehofa a bea Jesu “yo a nago le tshwanelo ya molao” gore e be Kgoši ya Mmušo wa gagwe. b—Hesek. 21:25-27.

5. Boporofeta bja “mabaka a šupago” bo ka re hola bjang?

⁵ Boporofeta bjo bo ka re hola bjang? Go tseba ka “mabaka a šupago” go re kgodiša gore Jehofa o phethagatša dikholofetšo tša gagwe ka nako ya maleba. Go no swana le ge Jehofa a ile a hloma Mmušo wa gagwe ka nako yeo a e beilego, le diporofeto tše dingwe o tlo di phethagatša ka nako yeo a e beilego. Letšatši la Jehofa le “ka se diege!”—Habak. 2:3.

6. (a) Re na le bohlatse bofe bja gore Jesu o buša a le legodimong? (b) Bohlatse bjo bo sepedišana bjang le boporofeta bjo bo lego go Kutollo 6:2-8?

⁶ Mafelelong a bodiredi bja Jesu mo lefaseng, o ile a bolela dilo tšeo di tlago go thuša balatedi ba gagwe go tseba gore o thomile go buša legodimong. Go dilo tše dingwe tšeo a boletšego ka tšona, o ile a bolela ka dintwa, ditlala, le ditšhišinyego tša lefase. O boletše le gore go tla ba le malwetši a go swana le bolwetši bja COVID-19, le gore a be a tla ba gona “lefelong le lengwe ka morago ga le lengwe.” Tše ke tše dingwe tša dilo tšeo Beibele e di bitšago “dipontšho” tša go ba gona ga Kriste. (Mat. 24:3, 7; Luka 21:7, 10, 11) Ka morago ga mengwaga e 60 Jesu a boetše legodimong, o ile a kgodiša moapostola Johane gore dilo tše di tlo direga. (Bala Kutollo 6:2-8.) Ditiragalo tše ka moka di diregile ka morago ga ge Jesu a thomile go buša ka 1914.

7. Ke ka baka la’ng go ile gwa ba le madimabe mo lefaseng ka morago ga gore Jesu a buše?

⁷ Ke ka baka la’ng maemo a lefase le a ile a mpefala ka morago ga gore Jesu e be Kgoši? Kutollo 6:2 e re nea lebaka le bohlokwa. Ka morago ga gore Jesu e be Kgoši o ile a lwa le Sathane le batemona ba  gagwe. Go ya ka Kutollo kgaolo 12, Sathane le batemona ba gagwe ba ile ba fenywa gomme ba lahlelwa mo lefaseng. Ka ge Sathane a be a befetšwe, o ile a tlišetša batho ba mo lefaseng “madimabe.”—Kut. 12:7-12.

8. Re holega bjang ge re bona boporofeta bjo bo sepedišanago le Mmušo wa Modimo bo phethagala?

⁸ Boporofeta bjo bo ka re hola bjang? Ditiragalo tše diregago mo lefaseng di ka re thuša go bona gore Jesu ke Kgoši. Ka gona, go e na le gore re kgopišege ge re bona batho ba na le lehloyo le moya wa boithati, re swanetše go gopola gore ditiro tša bona di phethagatša boporofeta bja Beibele. Mmušo o hlomilwe! (Ps. 37:1) Re ka letela le gore mathata a lefase le a oketšege ge Haramagedone e dutše e batamela. (Mar. 13:8; 2 Tim. 3:13) Re leboga Tatago rena wa legodimong Jehofa ka go re thuša go kwešiša dinako tše tše thata?

9. Boporofeta bjo bo lego go Daniele 2:28, 31-35 bo hlalosa bjang mmušo wa mafelelo wa lefase, gona mmušo woo o tšweletše neng?

⁹ Bala Daniele 2:28, 31-35. Re kgona go bona boporofeta bjo bo phethagala lehono. Toro ya Nebukadinetsara e ile ya re bontšha seo se tlago go direga “mehleng ya bofelo” ka morago ga ge Jesu a thomile go buša. Manaba a Jesu a mo lefaseng a emelwa ke mmušo wa mafelelo wa mo lefaseng woo o swantšhetšwago ke “dinao tša tšhipi le letsopa.” Mmušo wo wa lefase o šetše o le gona. O thomile go buša nakong ya Ntwa ya Pele ya Lefase ge Maisimane le Maamerika ba dira kgwerano. Toro ya Nebukadinetsara e boletše ka dilo  tše dingwe tše pedi tšeo di dirago gore mmušo wo wa mafelelo o fapane le mebušo e mengwe e fetilego.

10. (a) Boporofeta bja Daniele bo hlalosa bjang mmušo wa lefase wa Maisimane le Maamerika? (b) Re swanetše go hlokomela dikotsi dife? (Bona lepokisi leo le rego, “ Itlhokomele Gore o se ke wa Tanywa ke Letsopa!”)

¹⁰ Sa pele, mmušo wa Maisimane le Maamerika ga o swane le mebušo e mengwe e fetilego yeo e swantšhetšwago ke gauta le silifera eupša wona o emelwa ke tšhipi le letsopa. Letsopa le emela “bana ba batho,” goba batho bao ba tlwaelegilego. (Dan. 2:43) Lehono batho ba kgona go bouta, ba lwela ditokelo tša bona, ba a toitoya e bile go na le mekgatlo ya go lwela bašomi. Dilo tše ka moka di dira gore go be thata gore mmušo wo o dire dilo tšeo o nyakago go di dira.

11. Mmušo wa Maisimane le Maamerika o re kgonthišetša bjang gore re phela mehleng ya bofelo?

¹¹ Sa bobedi, ka ge mmušo wa Maisimane le Maamerika o emelwa ke dinao tša seswantšho, se se bontšha gore ke mmušo wa mafelelo wo Beibele e boletšego ka wona. O ka se ke wa tšeelwa legato ke mmušo o mongwe wa dipolotiki, go e na le moo o tlo fedišwa ka ntwa ya Haramagedone ge Mmušo wa Modimo o tla be o fediša mebušo ka moka ya batho. c—Kut. 16:13, 14, 16; 19:19, 20.

12. Ke boporofeta bofe bjo bongwe bja Daniele bjo bo re homotšago le go re nea kholofelo?

¹² Boporofeta bjo bo ka re hola bjang. Boporofeta bja Daniele bo re nea bohlatse bjo bo oketšegilego bja gore re phela mehleng ya bofelo. Mengwageng e 2 500 e fetilego, Daniele o ile a bolela gore ka morago ga mmušo wa Babilona, mebušo e mengwe e mene e megolo e be e tla ama batho ba Modimo. Go oketša moo o ile a utolla le gore mmušo wa Maisimane le Maamerika o be o tla ba wa mafelelo. Se se a re homotša le go re nea kholofelo ya gore e se kgale Mmušo wa Modimo o tlo fediša mebušo ka moka ya batho ke moka wa thoma go buša.—Dan. 2:44.

13. “Kgoši ya seswai” le “dikgoši tše lesome,” tšeo go bolelwago ka tšona go Kutollo 17:9-12, di swantšhetša’ng, gona boporofeta bjo bo phethagetše bjang?

¹³ Bala Kutollo 17:9-12. Ntwa ya Pele ya Lefase e ile ya bontšha go phethagala ga boporofeta bjo bongwe ka Beibeleng mabapi le mehla ya bofelo. Baetapele ba lefase ba be ba nyaka gore go be le khutšo lefaseng. Ka January 1920, ba ile ba dira Kgwerano ya Ditšhaba, yeo ka morago e ilego ya tšeelwa legato ke Ditšhaba tše di Kopanego ka October 1945. Mokgatlo woo o bitšwa “kgoši ya seswai.” Eupša ga se mmušo wa lefase. O ithekgile ka matla a dipolotiki. Beibele e bitša mebušo yeo gore ke “dikgoši tše lesome.”

14-15. (a) Kutollo 17:3-5 e re botša eng ka “Babilona o Mogolo”? (b) Go direga’ng ka bao ba bego ba thekga bodumedi bja maaka?

¹⁴ Bala Kutollo 17:3-5. Moapostola Johane o ile a bona pono ya mogweba-ka-mmele e lego “Babilona o Mogolo,” yeo e swantšhetšago madumedi ka moka a maaka mo lefaseng. Pono ye e phethagetše bjang? Ke kgale bodumedi bja maaka bo dirišana le mekgatlo ya dipolotiki e bile bo e thekga. E se kgale Jehofa o tlo tsentšha “dipelong tša tšona gore di phethe kgopolo ya gagwe.” Ka morago go tlo direga’ng? Mekgatlo yeo ya dipolotiki, “yeo e  swantšhetšago “dinaka tše lesome,” e tlo hlanogela bodumedi ka moka bja maaka ke moka ya bo fediša.—Kut. 17:1, 2, 16, 17.

¹⁵ Re tseba bjang gore Babilona o Mogolo o kgauswi le go fedišwa? E le gore re kgone go araba potšišo ye, re swanetše go tseba gore Babilona ya mehleng ya bogologolo e be e šireleditšwe ke meetse a noka ya Eforate. Puku ya Kutollo e swantšha batho ba dimilione bao ba thekgago Babilona o Mogolo le “meetse.” (Kut. 17:15) E bontšha gape le gore meetse ao a tla ‘gopa,’ e lego seo se bolelago gore batho ba bantši ga ba sa tlo thekga Babilona o Mogolo. (Kut. 16:12) Lehono re bona go phethagala ga boporofeta bjoo ka gobane batho ba bantši ga ba sa thekga bodumedi bja maaka e bile ba ya mafelong a mangwe moo ba ka hwetšago thušo gona.

16. Re holega bjang ge re kwešiša boporofeta bja mabapi le go tšwelela ga Ditšhaba tše di Kopanego le go fedišwa ga Babilona o Mogolo?

¹⁶ Boporofeta bjo bo ka re hola bjang? Go tšwelela ga Ditšhaba tše di Kopanego le go bona batho ba bantši ba se sa thekga bodumedi bja maaka ke bohlatse bja gore re  phela mehleng ya bofelo. Le ge batho ba bantši ba se sa thekga bodumedi bja maaka, eupša ga se bona ba tlago go bo fediša. Go swana le ge re boletše pejana, Jehofa o tlo tsentšha dipelong tša mekgatlo ya dipolotiki “gore di phethe kgopolo ya gagwe.” Ditšhaba tšeo di tla fediša Babilona o Mogolo gomme seo se tla makatša batho ba mo lefaseng. d (Kut. 18:8-10) Go fedišwa ga Babilona o Mogolo go tla dira gore batho ba bantši ba tšhoge, eupša bahlanka ba Modimo ba tla ba ba na le mabaka a mabedi a go thaba. Bodumedi bja maaka e lego lenaba la Jehofa Modimo leo e lego kgale le le gona le tla be le fedišitšwe, e bile tshepedišo e mpe ya Sathane e tla be e le kgauswi le go fela!—Luka 21:28.

17-18. (a) Re ka tšwela pele re tiiša tumelo ya rena bjang? (b) Re tlo ithuta’ng sehlogong se se latelago?

¹⁷ Daniele o boletše e sa le pele gore “tsebo ya therešo e tla ata.” Seo ke therešo. Gona bjale re kwešiša boporofeta bjo bo phethagalago mo mehleng ya rena. (Dan. 12:4, 9, 10) Go phethagala ga boporofeta bjo go dira gore re tshepe Jehofa le lentšu la gagwe Beibele. (Jes. 46:10; 55:11) Ka gona tšwela pele o tiiša tumelo ya gago go Modimo ka go ithuta Lentšu la gagwe le go thuša batho ba bangwe gore ba be le segwera se sebotse le Jehofa. O tlo šireletša bao ba mo tshepago e bile o tlo ba nea “khutšo ya neng le neng.”—Jes. 26:3.

¹⁸ Sehlogong se se latelago, re tlo boledišana ka boporofeta bjo bo amago phuthego ya Bokriste bjoo bo phethagalago mehleng ya rena. Boporofeta bjoo bo hlatsela gabotse gore re phela mehleng ya bofelo. Re tlo bona le bohlatse bjo bongwe bjoo bo bontšhago gore Kgoši ya rena Jesu o dirišana le balatedi ba gagwe bao ba botegago.