1. Bakriste ba ka swana bjang le mohlare? (Bona le seswantšho.)

 “MOYA o ka se robe gabonolo mohlare wo o kobegago.” Polelwana ye e no bontšha gore mehlare e swanetše go kobega ge moya o tšutla gore e se ke ya robega gabonolo. Bakriste le bona ba swanetše go swana le mohlare woo gore ge maemo a fetoga ba tšwele pele ba hlankela Jehofa ba thabile. Bjang? Re swanetše go ba le tekatekano ge maemo a rena a fetoga, e bile re swanetše go hlompha tsela yeo batho ba bangwe ba lebelelago dilo ka yona le go dira diphetho ka yona.

2. Ke dika dife tšeo di tlago go re thuša ge maemo a fetoga bophelong bja rena, gona re tlo ithuta ka’ng sehlogong se?

² Bjalo ka bahlanka ba Jehofa re nyaka go dula re e na le tekatekano. Le gona re nyaka go ba le boikokobetšo le kwelobohloko. Sehlogong se re tlo bona kamoo dika tše di ilego tša thuša Bakriste ba bangwe go lebeletšana le diphetogo tšeo di bilego gona maphelong a bona. Re tlo bona le gore dika tše di ka re thuša bjang. Eupša a re thomeng pele ka go ithuta go Jehofa le Jesu e lego mehlala e mebotse ya go ba le tekatekano.

3. Re tseba bjang gore Jehofa o na le tekatekano?

³ Jehofa o bitšwa “Leswika” ka gobane o tiile e bile ga a šišinyege. (Doit. 32:4) Eupša o na le tekatekano. Ge maemo a dutše a fetoga mo lefaseng, Modimo wa rena o fetofetoga le ona e le gore a phethagatše merero ya gagwe. Jehofa o bopile batho ka seswantšho sa gagwe ba na le bokgoni bja go fetofetoga le maemo. O re neile melao ya motheo ya Beibele yeo e re thušago go dira diphetho tše bohlokwa go sa šetšwe mathata ao re ka kopanago le ona. Mohlala wa Jehofa gotee le melao ya motheo yeo a re neilego yona, e re thuša go bona gore le ge e le “Leswika” o na le tekatekano.

4. Nea mohlala wa kamoo Jehofa a bontšhago tekatekano ka gona. (Lefitiko 5:7, 11)

 ⁴ Ditsela tša Jehofa di phethagetše e bile di na le tekatekano. Ga a gatelele batho ge a dirišana le bona. Ka mohlala, nagana kamoo Jehofa a ilego a bontšha tekatekano ka gona ge a be a dirišana le Baisiraele. O be a se a letela gore Baisiraele bao ba humilego le bao ba diilago ba tliše dibego tša go swana. Ka dinako tše dingwe o be a dumelela motho gore a tliše sebego seo yena a se kgonago.—Bala Lefitiko 5:7, 11.

5. Nea mohlala wo o bontšhago gore Jehofa o ikokobeditše e bile o na le kwelobohloko.

⁵ Boikokobetšo bja Jehofa le go kwela batho ba bangwe bohloko go dira gore a be le tekatekano. Ka mohlala, Jehofa o ile a bontšha gore o ikokobeditše nakong ya ge a tlo fediša batho ba kgopo ba Sodoma. Jehofa o ile a diriša barongwa ba gagwe go laela Lota yo a lokilego gore a tšhabele dithabeng. Lota o be a tšhaba go ya moo. Ka gona o ile a kgopela gore yena le ba lapa la gagwe ba tšhabele Tsoare e lego motse o monyenyane woo o bego o tlo fedišwa. Jehofa o be a ka gapeletša Lota gore a latele ditaelo tša gagwe, eupša Jehofa o ile a mo dumelela gore a tšhabele motseng woo gomme a se o fediše. (Gen. 19:18-22) Ka morago ga mengwaga e makgolo Jehofa o ile a bontšha batho ba Ninife kwelobohloko. O ile romela moporofeta Jona gore a tsebiše batho ba Ninife gore o kgauswi le go ba fediša gotee le motse wa bona. Eupša ge batho ba Ninife ba be ba itshola, Jehofa o ile a ba kwela bohloko gomme a se ba fediše.—Jona 3:1, 10; 4:10, 11.

6. Hlalosa kamoo Jesu a ilego a bontšha gore o ekiša Jehofa ka go ba le tekatekano.

⁶ Jesu o ile a ekiša Jehofa ka go ba le tekatekano. O ile a romelwa lefaseng gore a tle a nee bohlatse go “dinku tše di timetšego tša ntlo ya Isiraele.” Eupša o ile a bontšha tekatekano ge a be a phetha kabelo ya gagwe. Ka letšatši le lengwe mosadi yo e bego e se Moisiraele o ile a kgopela Jesu gore a fodiše morwedi wa gagwe yo a bego a “tlaišwa o šoro ke batemona.” Ka ge Jesu a be a kwela mosadi yoo bohloko, o ile a fodiša morwedi wa gagwe. (Mat. 15:21-28) Nagana ka mohlala o mongwe. Nakong ya ge Jesu a thoma bodiredi bja gagwe, o itše: “Mang le mang yo a ntatolago . . . , le nna ke tla mo latola.” (Mat. 10:33) Eupša ga se a ka a latola Petro le ge yena a ile a mo latola ka makga a mararo. Jesu o ile a bona gore Petro o a itshola e bile o na le tumelo. Ka morago ga gore Jesu a tsošwe, o ile a iponagatša go Petro gomme go ka direga gore o ile a mo kgonthišetša gore o mo lebaletše e bile o a mo rata.—Luka 24:33, 34.

7. Go ya ka Bafilipi 4:5, re nyaka go tsebja ka’ng?

⁷ Re bone gore Jehofa Modimo le Jesu Kriste ba na le tekatekano. Le rena Jehofa o nyaka gore re be le tekatekano. (Bala Bafilipi 4:5.) Re ka ipotšiša gore: ‘Na batho ba nagana gore ke na le tekatekano e bile ke fetofetoga le maemo? Goba na ba ntseba ke le motho wa hlogo thata? Na ke gapeletša batho gore ba  dire dilo ka tsela yeo nna ke nyakago di direga ka yona? Goba na ke theetša batho ba bangwe gomme ka dumelelana le bona ge go kgonega?’ Tsela yeo re bontšhago tekatekano ka yona e tla bontšha ge e ba re ekiša Jehofa le Jesu. A re boneng maemo a mabedi moo re swanetšego go bontšha tekatekano. Ge maemo a rena a fetoga le ge tsela ya batho ba bangwe ya go dira diphetho e fapana le yeo rena re dirago dilo ka yona.

8. Ke’ng seo se ka re thušago go ba le tekatekano ge maemo a rena a fetoga? (Bona le mongwalo wa tlase.)

⁸ Go ba le tekatekano go akaretša go kgona go fetofetoga le maemo. Diphetogo tše dingwe di ka dira gore re lebeletšane le mathata ao re bego re se ra a letela. Ka mohlala, re ka babja, ra ba le mathata a ditšhelete goba maemo a dipolotiki a fetoga nageng yeo re dulago go yona. (Mmo. 9:11; 1 Bakor. 7:31) Re ka thatafalelwa le ke go lebeletšana le diphetogo tšeo di bago gona dikabelong tša rena ka mokgatlong wa Jehofa. Go sa šetšwe diphetogo tšeo di bago gona, re ka kgona go lebeletšana le tšona ge e ba re latela megato ye e mene: (1) amogela gore dilo di fetogile, (2) nagana ka bokamoso, (3) nagana ka dilo tše dibotse, gomme (4) o thuše le batho ba bangwe. b A re boneng gore bana babo rena le dikgaetšedi ba bangwe ba ile ba holega bjang ka go latela megato ye.

9. Banyalani ba bangwe ba baromiwa ba ile ba lebeletšana bjang le mathata ao ba bego ba se ba a letela?

⁹ Amogela gore dilo di fetogile. Emanuele le Francesca ba ile ba hwetša kabelo ya go ba baromiwa nageng e nngwe. Ge ba sa tšo thoma go ithuta leleme le leswa le go tlwaelana le bana babo bona ba phuthegong, leuba la bolwetši bja COVID-19 le ile la thoma gomme ba swanelwa ke go dula ba nnoši ba se sa kopana le batho ba bangwe. Ke moka ka moragonyana mmago Francesca o ile a hlokofala. Francesca o be a nyaka go ya go thekga lapa la gabo eupša leuba la COVID-19 le ile la dira gore a se ke a kgona go ya. O ile a thušwa ke’ng gore a kgotlelele mathata a? Sa pele, Emanuele le Francesca ba ile ba rapela Jehofa gore a ba nee bohlale le gore a ba thuše go kgotlelela letšatši le lengwe le le lengwe. Jehofa o ile a araba dithapelo tša bona a diriša mokgatlo wa gagwe. Ka mohlala, ba ile ba kgothatšwa ke mantšu a ngwanabo rena yo mongwe yo a ilego a bolela bidiong gore: “Ge re ka amogela maemo a rena a maswa ka pela, re tlo kgona go thaba e bile re tlo diriša sebaka seo go hlankela Jehofa.” c Sa bobedi, ba ile ba kaonafatša tsela ya go bolela ditaba tše dibotse ka founo ba ba ba thoma le thuto ya Beibele. Sa boraro, ba ile ba amogela kgothatšo e lerato yeo e tšwago go bana babo bona. Kgaetšedi yo mongwe yo botho o be a ba romela molaetša o nago le temana ya Beibele letšatši le lengwe le le lengwe, ngwaga ka moka. Le rena ge re ka amogela maemo a rena a maswa, re tlo thabišwa ke seo re kgonago go se dira.

10. Kgaetšedi yo mongwe o ile a lebeletšana bjang le phetogo e kgolo yeo e bilego gona bophelong bja gagwe?

¹⁰ Nagana ka bokamoso o be o nagane kudu ka dilo tše dibotse. Christina e lego kgaetšedi yo a tšwago Romania yo a dulago Japan, o be a nyamile ge phuthego yeo a bego a kopanela go yona ya seisemane e tswalelwa. Eupša ga se a ka a dulela go nagana ka selo seo se diragetšego. Go ena le moo, o ile a ya phuthegong  yeo e bego e bolela Sejapane gomme a dira sohle seo a ka se kgonago gore a bolele ditaba tše dibotse ka leleme leo. O ile a kgopela mosadi yo mongwe yo a bego a šoma le yena gore a mo rute go bolela Sejapane gabotse. Mosadi yoo o ile a dumela go diriša Beibele le poroutšha ya Thabela Bophelo go ya go Ile! ge a ruta Christina Sejapane. Ka gona, Christina o ile a kaonafatša tsela yeo a bolelago Sejapane ka yona, eupša sa bohlokwa le go feta ke gore mosadi yoo o ile a nyaka go tseba ka mo go oketšegilego ka Beibele. Ge re ka se dulele go nagana ka dilo tšeo di diregilego gomme ra nagana kudu ka dilo tše dibotse, diphetogo tšeo di bago gona tšeo re sa di letelago di ka ba le mafelelo a mabotse.

11. Banyalani ba bangwe bao ba bego ba na le mathata a ditšhelete ba ile ba thušwa ke’ng go kgotlelela?

¹¹ Thuša batho ba bangwe. Banyalani ba bangwe bao ba dulago nageng yeo modiro wa rena o thibetšwego, ba ile ba thoma go ba le mathata a ditšhelete ge ikonomi ya naga yeo e ewa. Ba ile ba kgona bjang go lebeletšana le bothata bjo? Ba ile ba thoma ka go nolofatša bophelo bja bona. Ke moka ba se sa nagana kudu ka mathata a bona gomme ba fetša nako e ntši ba thuša batho ba bangwe ka go ba botša ditaba tše dibotse. (Dit. 20:35) Monna yoo o itše: “Re be re se na nako e ntši ya go nagana ka mathata a rena ka ge re be re fetša nako e ntši re bolela ditaba tše dibotse e bile re dira seo Modimo a nyakago re se dira.” Ge maemo a rena a fetoga re swanetše go dula re gopola gore go bohlokwa gore re thuše batho ba bangwe kudukudu ka go bolela ditaba tše dibotse.

12. Mohlala wa moapostola Paulo o ka re thuša bjang gore re fetofetoge le maemo ge re le tšhemong?

¹² Re swanetše go fetofetoga le maemo ge re le tšhemong. Re kopana le batho ba go se swane, le bao ba godišitšwego ka ditsela tše di fapafapanego. Re ka ithuta mohlaleng wa moapostola Paulo wa go fetofetoga le maemo. Jesu o ile a kgetha Paulo gore e be “moapostola go ditšhaba.” (Baroma 11:13) Paulo o be a bolela ditaba tše dibotse go Bajuda, Bagerika, batho bao ba rutegilego, batho bao ba tlwaelegilego, baetapele ba mmušo le dikgoši. E le gore Paulo a kgone go fihlelela dipelo tša batho ba ba fapafapanego, o ile a ba “dilo tšohle go batho ba mehuta ka moka.” (1 Bakor. 9:19-23) O be a tshwenyegile ka setšo sa bona, tsela yeo ba godišitšwego ka yona le ditumelo tša bona gore a kgone go bolela le bona ka tsela yeo e tla dirago gore ba theetše molaetša wa Modimo. Le rena re ka kaonafatša tsela yeo re rutago ka yona ge re le tšhemong le go dira sohle seo re ka se kgonago gore re thuše motho yo mongwe le yo mongwe.

13. Go hlompha diphetho tša batho ba bangwe go ka re thuša bjang go phema kotsi yeo go bolelwago ka yona go 1 Bakorinthe 8:9?

¹³ Go ba le tekatekano go re thuša gore re hlomphe diphetho tša batho ba bangwe. Ka mohlala, dikgaetšedi tše dingwe di rata go tlola makeup, mola ba bangwe ba kgetha go se o tlole. Bakriste ba bangwe ba kgetha go nwa bjala ka tsela e lekanyeditšwego mola ba bangwe ba kgetha go se bo nwe ka mo go feletšego. Bakriste ka moka ba nyaka go phela gabotse eupša ba kgetha mehuta e fapanego ya tša kalafo. Ge e ba re ka nagana gore dilo tšeo re di dirago di dula di lokile gomme ra nyaka gore bana babo rena le dikgaetšedi ba dire dilo ka tsela yeo rena re di dirago ka yona, seo se ka kgopiša ba bangwe gomme sa baka dikarogano. Ruri re ka se nyake go dira bjalo! (Bala 1 Bakorinthe 8:9; 10:23, 24) A re boledišaneng ka mehlala e mebedi ye e bontšhago  kamoo go diriša melao ya motheo ya Beibele go ka re thušago ka gona gore re be le tekatekano le go dula re na le khutšo.

14. Ke melao efe ya motheo yeo e tlago go re thuša ge re kgetha diaparo tšeo re tlago go di apara le go lokiša meriri ya rena?

¹⁴ Moaparo le go itokiša. Jehofa ga a re botše gore re apare eng, eupša o re neile melao ya motheo yeo re swanetšego go e latela. Re swanetše go apara ka tsela yeo e bontšhago gore re bahlanka ba Modimo, re bontšha tekatekano, re a hlomphega e bile re “hlaphogetšwe monaganong.” (1 Tim. 2:9, 10; 1 Pet. 3:3) Ka gona, ga re nyake go apara ka tsela yeo e tla bontšhago moya wa bomponeng. Melao ya motheo ya Beibele e tla thuša bagolo go phema go bea melao mabapi le kamoo batho ba swanetšego go apara ka gona le go lokiša meriri. Ka mohlala, bagolo ba phuthegong e nngwe ba be ba nyaka go thuša bafsa bao ba bego ba ekiša batho ba lefelong la gabo bona ka go tlogela meriri ya bona e le e menyenyane eupša ba se ba e kama. Bagolo ba be ba ka ba thuša bjang ntle le go ba beela molao? Molebeledi wa tikologo o ile a eletša bagolo go botša bana babo rena bao gore, “Ge o ka re o nea polelo wa hwetša batheetši ba naganišiša kudu ka tsela yeo o bogegago ka yona go feta seo o se bolelago, gona go ra gore go na le bothata ka moaparo wa gago le go itokiša.” Mantšu a a bonolo a dirile gore bana babo rena bao ba baswa ba kwešiše seo ba swanetšego go se dira ntle le gore bagolo ba ba beele molao. d

15. Ke melao efe ya Beibele le melao ya motheo yeo e ka re thušago ge re kgetha mehuta ya kalafo? (Baroma 14:5)

¹⁵ Go itlhokomela ka tša maphelo. Mokriste yo mongwe le yo mongwe o swanetše go ikgethela gore o hlokomela bjang bophelo bja gagwe. (Bagal. 6:5) Ge Bakriste ba kgetha  mehuta ya tša kalafo, ba swanetše go latela melao ya Beibele ya gore ba ile madi le gore ba se dirišane le meoya e mebe. (Dit. 15:20; Bagal. 5:19, 20) Eupša ba itirela phetho ya gore ba tla amogela mehuta efe ya tša kalafo. Ba bangwe ba kgetha go hwetša thušo dipetlele feela mola ba bangwe ba kgetha mehuta e mengwe ya tša kalafo. Le ge re ka ba re nagana gore mohuta o itšego wa kalafo o ka thuša goba wa gobatša motho, re swanetše go hlompha diphetho tšeo bana babo rena le dikgaetšedi ba di dirago mabapi le mehuta ya kalafo yeo ba e nyakago. Re swanetše go dula re gopola dintlha tše di latelago tše nne: (1) Mmušo wa Modimo ke ona feela o tlago go fodišetša batho sa ruri. (Jes. 33:24) (2) Mokriste yo mongwe le yo mongwe o swanetše go “kgodišega” ka seo a se kgethago. (Bala Baroma 14:5.) (3) Ga se ra swanela go ahlola batho ba bangwe goba ra ba tšeela diphetho. (Baroma 14:13) (4) Bakriste ba bontšhana lerato e bile ba a kwešiša gore go ba le botee ka phuthegong go bohlokwa kudu go feta tsela yeo ba lebelelago dilo ka yona. (Baroma 14:15, 19, 20) Ge re ka dula re gopola dintlha tše, re tlo kgona go gwerana le bana babo rena le dikgaetšedi le go dira gore ka phuthegong go dule go na le khutšo.

16. Mogolo a ka bontšha bjang tekatekano ge a dirišana le bagolo ba bangwe? (Bona le seswantšho)

¹⁶ Bagolo ba swanetše go bea mohlala o mobotse wa go ba le tekatekano. (1 Tim. 3:2, 3) Ka mohlala, mogolo ga se a swanela go letela gore ka mehla go dule go tšewa dikgopolo tša gagwe feela ka gobane a feta bagolo ba bangwe ka mengwaga. O swanetše go lemoga gore moya wa Jehofa o ka dira gore mogolo yo mongwe le yo mongwe a bolele selo seo se tla thušago gore go tšewe phetho e bohlale. Le gona, ge e ba bagolo ba dumelelana ka phetho e itšego yeo e sa thulanego le melao ya motheo ya Beibele, mogolo yo a nago le tekatekano o tlo thekga phetho yeo le ge a be a ka duma gore dilo di dirwe ka tsela e fapanego.

17. Re thabela ditšhegofatšo dife ge re na le tekatekano?

¹⁷ Ge re na le tekatekano, re holega ka ditsela tše dintši. Re thabela go gwerana le bana babo rena le dikgaetšedi le go dira gore go be le khutšo ka phuthegong. Re thabela go phela gare ga batho ba sa swanego le ba tšwago ditšong tša go se swane bao ba hlankelago Jehofa e le batee. Re thabišwa ke go tseba gore re ekiša Modimo wa rena yo a nago le tekatekano e lego Jehofa.