Tate e be e le moruti kerekeng ya United Church of Canada, ka gona o be a re re ye sekolong sa bana sa kereke ka Sontaga, gomme ka morago re be re eya le yena tirelong ya kereke ka 11 mesong. Thapama re be re eya le mma Holong ya Mmušo. Re be re bona gore madumedi a a mabedi a fapana.

Mma o ile a botša bagwera ba gagwe ba bagolo e lego Bob le Marion Hutcheson, ka dilo tšeo a bego a ithuta tšona ka Beibeleng gomme le bona ba ile ba thoma go ithuta Beibele ke moka ya ba Dihlatse tša Jehofa. Ka 1958, Ngwanabo rena Hutcheson le mosadi wa gagwe ba ile ba tšea nna le barwa ba bona ba bararo gomme ra ya kopanong ya ditšhabatšhaba ya matšatši a seswai kua New York City ya sehlogo seo se rego Divine Will. Ga bjale ke a lemoga gore go be go se bonolo gore ba sepele le nna, eupša kopano yeo ke e nngwe ya dikopano tšeo nka se tsogego ke di lebetše bophelong bja ka.

Ge ke be ke sa le mofsa ke be ke dula dipolaseng gomme ke thabela go hlokomela diphoofolo. Ke ile ka feleletša ke nyaka go ba ngaka ya diphoofolo. Mma o ile a botša mogolo yo mongwe ka se. Mogolo yoo ka botho o ile a nkgopotša gore re phela “mehleng ya bofelo,” gomme a ntemoša kamoo go ya yunibesithi ka mengwaga e itšego go ka kgomago ka gona segwera sa ka le Jehofa. (2 Tim. 3:1) Seo se ile sa dira gore ke kgethe go se ye yunibesithi.

 Ke be ke ipotšiša gore ke tlo dira eng ge ke fetša sekolo se se phagamego. Le ge ke be ke eya bodireding mafelobekeng a mangwe le a mangwe, ke be ke sa thabele tšhemo e bile ke sa ipone ka letšatši le lengwe ke le mmulamadibogo. Ka nako yeo, tate yo e bego e se Hlatse ya Jehofa le rangwane, ba be ba nkgothaletša gore ke hwetše mošomo khamphaning e nngwe e kgolo ya di inšorense kua Toronto. Rangwane e be e le yo mongwe wa ba bagolo khamphaning yeo, ka gona ke ile ka feleletša ke amogetše mošomo woo.

Kua Toronto, ke be ke dula ke šoma e bile ke gwerana le batho bao e sego Dihlatse tša Jehofa gomme seo se be se dira gore ke se be gona dibokeng le tirelong ya tšhemo ka mehla. Ke be ke dula le rakgolo yo e bego e se Hlatse ya Jehofa gomme ka morago ga gore a hlokofale ke ile ka swanelwa ke go hwetša lefelo le lengwe la go dula.

Ba ga Hutcheson, bao ke ilego ka ya le bona kopanong ka 1958, ba be ba le bjalo ka batswadi ba ka. Ba ile ba mmema gore ke tle ke dule le bona legaeng la bona gomme ba nthuša gore ke be le segwera se sebotse le Jehofa. Ka 1960, nna le morwa wa bona John re ile ra kolobetšwa. John o ile a thoma go ba mmulamadibogo, gomme seo se ile sa nthuša gore ke nyake go bolela ditaba tše dibotse ka mo go oketšegilego. Bana babo rena ka phuthegong ba ile ba bona gore ke dira tšwelopele gabotse ke moka ba nkgetha gore ke be mohlanka wa sekolo sa bodiredi. a

Ka 1966, ke ile ka nyalana le Randi Berge yo a bego a ena le mafolofolo e bile a ikemišeditše go hlankela mo go nago le tlhokagalo e kgolo ya bagoeledi. Molebeledi wa rena wa mosepedi o ile a re bontšha gore o a re rata gomme a re kgothaletša gore re ye go thuša phuthego ya kua Orillia, Ontario. Ka gona, re ile ra tloga le semeetseng.

Ge re fihla Orillia, le nna ke ile ka ba mmulamadibogo wa ka mehla go swana le Randi. Tsela yeo a bego a thabile ka yona e ile ya dira gore le nna ke thabe. Ka morago ga gore ke be mmulamadibogo, ke ile ka thabela go diriša Beibele kudu le go bona batho ba e kwešiša. Ke ile ka thabela go thuša banyalani ba bangwe kua Orillia gore ba fetoše maphelo a bona gomme e be bahlanka ba Jehofa.

Ge re be re etetše Toronto, ke ile ka kopana le Arnold MacNamara e lego yo mongwe wa bana babo rena bao ba bego ba eteletše pele Bethele. O ile a botšiša ge e ba re ka thabela go ba babulamadibogo bao ba kgethegilego. Ke ile ka araba kapelapela ka re: “Ruri re ka thabela seo! Re ka ya go gongwe le go gongwe ntle le Quebec!” Ke be ke hueditšwe ke tsela e fošagetšego yeo batho ba go bolela Seisemane kua Canada ba ikwago ka yona ka megwanto e bago gona porofenseng ya Quebec moo go bolelwago leleme la Sefora. Ka nako yeo, batho ba be ba dula ba gwanta kgahlanong le mmušo ba nyaka gore o ntšhe porofense ya Quebec gore e se ke ya hlwa e eba karolo ya naga ya Canada.

Arnold o ile a araba ka gore, “Gona bjale ofisi ya lekala e romela babulamadibogo bao ba kgethegilego Quebec feela.” Ke ile ka dumela go ya moo ka pelapela. Ke be ke tseba gore Randi le yena o be a thabela go ya go hlankela moo. Ka morago, ke ile ka lemoga gore phetho yeo re e dirilego ke ya bohlokwa kudu.

Ka morago ga go ya klaseng ya dibeke tše hlano ya go ithuta leleme la Sefora, nna, Randi gotee le banyalani ba bangwe, re ile ra ya Rimouski yeo e lego bokgole bja dikhilomithara tše 540 ka lebowa-bohlabela bja Montreal. Go be go sa na le dilo tše dintši tšeo re bego re swanetše go ithuta tšona. Ke ile ka bona seo gabotse ka letšatši le lengwe ge ke be ke bala ditsebišo dibokeng. Ke ile ka re kopanong ya rena e latelago, re tlo ba le baeng ba bantši ba “dimpšhe” go ena le gore baeng ba bantši ba go tšwa “Austria.”

Ge re be re le Rimouski, go ile gwa tla dikgaetšedi tše nne tša mafolofolo tšeo di sego lenyalong, gotee le banyalani ba bangwe ba ga Huberdeau le barwedi ba bona ba babedi. Ngwanabo rena le kgaetšedi Huberdeau ba ile ba hiriša ntlo e kgolo yeo babulamadibogo ba bego ba dula go yona gore ba thušane ka go lefa rente. Ntlo yeo re be re e bitša White House ka gobane e be e le e tšhweu ka pele e bile e ena le dipilara tše di tšhweu. Gantši ka moo ntlong yeo, go be dula batho ba 12 goba ba 14. Ka ge nna le Randi re be re le babulamadibogo ba ba kgethegilego, re be re eya tšhemong mesong, mosegare le thapama. Ka gona re be re thaba kudu ge ka mehla go e ba le motho wa go re felegetša gaešita le ge e le marega thapama.

Re ile ra ba le segwera sa kgauswi kudu le babulamadibogo ba bao ba botegago moo re ilego ra feleletša re ba tšea bjalo ka ba malapa a gabo rena. Ka dinako tše dingwe re be re dula mmogo mollong goba ra apea re le mmogo. Yo mongwe wa bana babo rena o be a tseba mmino, ka gona ka mekibelo bošego re be re opela e bile re bina.

Batho ba bantši kua Rimouski ba be ba nyaka go ithuta Beibele. Pele mengwaga e mehlano e fela, re ile ra thabela go bona batho ba bantši ba ithuta Beibele e bile ba kolobetšwa. Phuthego e ile ya gola ya ba le bagoeledi ba e ka bago ba 35.

Ge re be re le kua Quebec, re ile ra tlwaetšwa go ba baebangedi gabotse. Re bone ka moo Jehofa a re thušitšego ka gona ge re be re le tšhemong e bile a re thuša le ka dilo tšeo re bego re di hloka. Le gona re ile ra ithuta go rata batho ba go bolela Sefora, ra rata leleme la bona le setšo sa bona gomme seo se ile sa dira gore re thome go rata le ditšo tše dingwe.—2 Bakor. 6:13.

Ofisi ya lekala e ile ya re kgopela re sa letela gore re hudugele teropong ya Tracadie yeo e lego lebopong la bohlabela bja New Brunswick. Go be go se bonolo ka gobane re be re sa tšwa go saena kontraka ya go hiriša ntlo e bile ke be ke saenile kontraka ya go ruta sekolong se sengwe ka matšatši a itšego. Go oketša moo, ba bangwe ba barutwana ba rena ba Beibele ba be ba sa tšwa go ba bagoeledi le gona re be re swaregile ka go aga Holo ya Mmušo.

 Re ile ra fetša mafelobeke ka moka re rapela ka taba ya go huduga gomme ka morago ra etela Tracadie yeo e bego e fapane kudu le Rimouski. Re ile ra phetha ka gore re tlo ya ka gobane seo ke se Jehofa a se nyakago. Re ile ra leka Jehofa gomme ra bona a tloša selo le ge e le sefe seo se ka re šitišago. (Mal. 3:10) Go huduga go ile gwa ba bonolo ka gobane Randi o be a na le segwera se tiilego le Jehofa, a sa inaganele a nnoši e bile a kgona go dira gore batho ba thabe.

Phuthegong ya gabo rena e mpsha go be go ena le mogolo o tee feela e lego Robert Ross. Yena le mosadi wa gagwe Linda e be e le babulamadibogo moo. Ka morago ga gore ngwana wa bona wa mošemane a belegwe ba ile ba phetha ka gore ba tšwele pele ba dula moo. Le ge ba be ba godiša ngwana wa mošemane, ba ile ba re kgothatša ka tsela yeo ba re amogetšego ka yona, maikemišetšo ao ba bego ba ena le ona le mafolofolo ao ba bego ba a bontšha tšhemong.

Ka morago ga gore re be babulamadibogo kua Tracadie ka mengwaga e mebedi, re ile ra hwetša taletšo e nngwe yeo re sa e letelago e lego ya go hlankela modirong wa bosepedi. Re hlanketše ditikologong tšeo go bolelwago leleme la Seisemane ka mengwaga e šupago, ke moka ka morago ra išwa tikologong ya leleme la Sefora kua Quebec. Molebeledi wa rena wa selete kua Quebec, e lego Léonce Crépeault, o be a ntheta ka dipolelo tša ka eupša ka morago o be a dula a mpotšiša gore “O nagana gore o ka dira’ng gore o kaonefatše ge o ruta?” b Se se ile sa nthuša gore ge ke ruta ke bolele ka dilo tše di lebanyago le tšeo go lego bonolo go di kwešiša.

Kabelo e nngwe yeo nka se tsogego ke e lebetše, ke ya Kopano ya Ditšhabatšhaba ya sehlogo seo se rego, “Victorious Faith” kua Montrea ka 1978. Ke be ke šoma lefapheng la dijo. Re be re letetše batho ba 80 000, le gona tsela yeo re bego re swanetše go ba nea dijo ka yona e be e fapane le ya nakong e fetilego. Dilo ka moka e be e le tše diswa. Dilo tša go apea, dijo tšeo di bego di swanetše go lewa le tsela ya go di lokišeletša. Re be re ena le ditšidifatši tše 20 tše dikgolo tšeo ka dinako tše dingwe di bego di sa šome gabotse. Ka lebaka la papadi yeo e bego e sa tšwa go fela, re ile ra ema lepatlelong go fihla gare ga bošego ka ge re be re palelwa ke go tsena ka gare gore re beakanye dilo. Re ile ra swanelwa ke go tšhuma ditofo pele ga ge letšatši le hlaba gore re kgone go dira dijo tša mesong. Re be re lapile eupša ke ile ka ithuta go gontši tabeng ya go šoma ka thata, go ba le temogo le ka moo bašomigotee le rena ba bego ba dira gore re thabe. Re ile ra ba bagwera ba bagolo goba go fihla le lehono. Ruri ke ile  ka thabela go ba kopanong yeo e bohlokwa kua Quebec, e lego porofense yeo bana babo rena ba bego ba tlaišwa o šoro magareng ga bo 1940 le 1960.

Ke ithutile dilo tše dintši go balebeledi bao ke bego ke šoma le bona dikopanong tša rena tše dikgolo kua Montrea. Ka ngwaga o mongwe David Splane, yoo ga bjale a hlankelago e lego yo mongwe wa Sehlopha se Bušago, e be e le molebeledi wa kopano. Kopanong e latelago ke ile ka newa kabelo yeo eupša David o ile a nthekga.

Ka 2011, ka morago ga gore re fetše mengwaga e 36 re hlankela modirong wa bosepedi, ke ile ka laletšwa gore ke be mohlahli sekolong sa Bagolo ba Phuthego. Nna le Randi re ile ra robala mepeteng e 75 e fapafapanego ka mengwaga e mebedi eupša ga se ra ka ra itshola le gatee. Mafelobekeng a mangwe le a mangwe bagolo ba be ba leboga ka gobane ba be ba bona gore Sehlopha se Bušago se be se nyaka go ba thuša gore ba be le segwera se sebotse le Jehofa.

Ka morago, ke ile ka ba mohlahli Sekolong sa Baebangedi ba Mmušo. Gantši o be o hwetša barutwana ba lapile e bile ba tšhogile ka lebaka la lenaneo la sekolo. Ba be ba dula klaseng ka diiri tše e ka bago tše šupa ka letšatši, ba dira mošomo wa gae ka diiri tše e ka bago tše tharo e bile ba ena le dikabelo tše nne goba tše tlhano ka beke. Nna le mohlahli yo mongwe re ile ra ba hlalosetša gore Jehofa ke yena feela yo a ka ba thušago gore ba kgone go dira seo. Ke dula ke gopola tsela yeo barutwana ba bego ba makala ka yona ge ba lemoga gore ge ba ka ithekga ka Jehofa, ba ka kgona go dira dilo tšeo ba bego ba nagana gore ba ka se tsoge ba kgonne go di dira.

Ka ge mma a be a bontšha batho gore o a ba rata, seo se ile sa dira gore dithuto tša gagwe tša Beibele di bontšhe tšwelopele e bile sa thuša le tate gore a fetoše tsela yeo a bego a lebelela therešo ka yona. Matšatši a mararo ka morago ga gore mma a hlokofale, tate o ile a re makatša ka go tla Holong ya Mmušo go tlo theetša polelo ya phatlalatša, le gona o ile a tšwela pele a eba gona dibokeng ka mengwaga e 26 e latelago. Le ge tate a se a ka a kolobetšwa, bagolo ba ile ba mpotša gore ka mehla o be a dula e le motho wa mathomo wa go fihla dibokeng beke e nngwe le e nngwe.

Mma o beetše nna le dikgaetšedi tša ka mohlala o mo botse. Dikgaetšedi tša ka tše tharo le banna ba bona ba hlankela Jehofa ka go botega. Ba babedi ba hlankela diofising tša makala, yo mongwe o lekaleng la Portugal gomme yo mongwe o lekaleng la Haiti.

Ga bjale nna le Randi re hlankela re le babulamadibogo ba kgethegilego mo Hamilton, Ontario. Ge re be re le modirong wa bosepedi re be re thabela go felegetša batho maetong a bona a go boela le dithutong tša bona tša Beibele. Ge re dutše re gwerana le bana babo rena le dikgaetšedi ba ka phuthegong ya gabo rena e mpsha, re ikwa re kgothatšega ge re bona kamoo Jehofa a ba thušago maemong a bona ka moka.

Ge re lebelela morago, re tloga re leboga gore batho ba bantši ba ile ba re bontšha gore ba a re rata. Le rena ka morago re ile ra bontšha batho ba bangwe gore re tloga re ‘tshwenyega e le ka kgonthe’ ka bona le go ba kgothaletša gore ba dire sohle seo ba ka se kgonago go hlankela Jehofa. (2 Bakor. 7:6, 7) Ka mohlala, ka lapeng le lengwe, mma, morwa wa gagwe le morwedi wa gagwe ba be ba le tirelong ya nako e tletšego. Ke ile ka botšiša hlogo ya lapa leo ge e ba a ile a nagana ka go ba mmulamadibogo. O ile a mpotša gore o hlokomela babulamadibogo ba bararo. Ka gona ke ile ka mmotšiša gore, “Na o ka ba hlokomela go feta kamoo Jehofa a ka ba hlokomelago ka gona?” Ke ile ka mo kgothaletša gore le yena a thabele seo lapa la gagwe le se thabelago. Pele ga ge di kgwedi tše tshela di ka fela, ke ge e šetše e le mmulamadibogo.

Nna le Randi re tlo tšwela pele re “botša moloko o latelago” ka “mediro e makatšago” ya Jehofa e bile re holofela gore ba tla thabela go mo hlankela go etša ge rena re thabile.—Ps. 71:17, 18.