1-2. Mokriste a ka swantšhwa le moago o motelele ka tsela efe? (1 Bakorinthe 15:58)

 MAFELELONG a bo 1970, moago o motelele wa mabato a 60 o ile wa agwa toropong ya Tokyo kua Japan. Batho ba ile ba ipotšiša gore ke eng seo se tlo dirago gore moago woo o dule o eme ka gobane go be go dula go na le ditšhišinyego tša lefase toropong yeo. Ke’ng seo se thušitšego moago woo gore o kgone go dula o eme? Baentšeneare ba ile ba hlama moago woo ka tsela ya gore o se šišinyege le ge go ka ba le tšhišinyego. Bakriste ba swantšhwa le moago woo. Ka tsela efe?

² Mokriste o swanetše go ba le tekatekano le go fetofetoga le maemo ge go tliwa tabeng ya go ema a tiile. O swanetše go dula a tiile e bile a sa šišinyege gomme a ikemišetše go dula a phela ka melao ya Jehofa. (Bala 1 Bakorinthe 15:58.) O dula a “ikemišeditše go kwa” e bile ga a dumelele selo se mo šitiša. Ka lehlakoreng le lengwe, o swanetše go fetofetoga le maemo ge e ba go nyakega gore a dire bjalo. (Jak. 3:17) Mokriste yo a ithutilego go fetofetoga le maemo o tla phema go dira dilo ka tsela e feteletšego. Sehlogong se re tlo kwa gore re ka dira eng gore re se šišinyege. Re tlo boledišana le ka ditsela tše tlhano tšeo Sathane a di dirišago go leka go re dira gore re se ke ra ema re tiile le gore re ka dira eng gore re mo ganetše.

3. Ke melao efe ya Monei Molao yo a phagamego yeo e hwetšwago go Ditiro 15:28, 29?

³ Jehofa o be a dutše a nea batho ba gagwe melao e kwagalago, ka ge e le Monei Molao yo a phagamego. (Jes. 33:22) Ka mohlala, sehlopha se bušago sa lekgolong la pele la mengwaga, se ile sa bolela ka ditsela tše tharo tšeo di ka thušago Bakriste ka moka gore ba dule ba tiile e lego, (1) go gana go  rapela medingwana ya diswantšho gomme ba rapele Jehofa a nnoši, (2) go kwa molao wa Jehofa wa gore madi ke a makgethwa, le (3) go latela melao e phagamego ya Beibele ya boitshwaro. (Bala Ditiro 15:28, 29.) Lehono Bakriste ba ka latela bjang ditsela tše tše tharo?

4. Re ka dira’ng go bontšha gore re ineetše go Jehofa ka mo go feletšego? (Kutullo 4:11)

⁴ Re gana go rapela medingwana ya diswantšho, gomme re rapela Jehofa a nnoši. Jehofa o ile a laela Baisiraele gore ba rapele yena a nnoši. (Doit. 5:6-10) Nakong ya ge Jesu a lekwa ke Diabolo, o ile a bolela ka go lebanya gore re swanetše go rapela Jehofa a nnoši. (Mat. 4:8-10) Ka gona, ga re rapele medingwana ya bodumedi. Ga re lebelele baetapele ba bodumedi, baetapele ba dipolotiki goba bao ba tumilego ka dipapadi le boithabišo e le medingwana. Re dula re le ka lehlakoreng la Jehofa gomme re hlankela yena a nnoši ka ge a “bopile dilo ka moka.”—Bala Kutullo 4:11.

5. Ke ka baka la’ng re ekwa molao wa Jehofa wa mabapi le go hlompha bophelo le madi?

⁵ Re kwa molao wa Jehofa wo o bolelago ka go hlompha bophelo le madi. Ka baka la’ng? Ka gobane Jehofa o re madi a emela bophelo, e lego mpho e bohlokwa e tšwago go yena. (Lef. 17:14) Mathomong ge Jehofa a be a laela batho gore ba ka ja nama, o ile a ba laela gore ba se ke ba ja madi. (Gen. 9:4) O ile a bušeletša taelo ye ge a be a nea Baisiraele Molao wa Moshe. (Lef. 17:10) Le gona o ile a laela sehlopha se bušago sa lekgolong la pele la mengwaga gore se botše Bakriste ka moka gore ba ‘dule . . . ba ila madi.’ (Dit. 15:28, 29) Re kwa taelo ye ka mo go feletšego ge re dira diphetho mabapi le tša kalafo. b

6. Re ka dira’ng gore re kgone go phela ka melao e phagamego ya Jehofa ya boitshwaro?

⁶ Re latela tsela ya Jehofa e phagamego ya boitshwaro ka mo go feletšego. (Baheb. 13:4) Moapostola Paulo o ile a diriša polelwana ya seswantšhetšo e kwagalago ge a be a re eletša gore re “bolaye” ditho tša mebele ya rena. Seo se ra gore re swanetše go ganetša dikgopolo ka moka tše di fošagetšego. Re phema go lebelela goba go dira selo le ge e le sefe seo se ka dirago gore re feleletše re dirile bootswa. (Bakol. 3:5; Jobo 31:1) Ge re lekega go dira selo seo se fošagetšego, ka pelapela re gana go nagana goba go dira selo le ge e le sefe seo se ka senyago segwera sa rena le Modimo.

7. Re swanetše go ikemišetša go dira’ng, gona ka baka la’ng?

⁷ Jehofa o letetše gore re “mo kwe go tšwa pelong.” (Baroma 6:17) Dilo tšeo Jehofa a re botšago gore re di dire di dula di re hola, le gona re ka se tsoge re fetotše melao ya gagwe. (Jes. 48:17, 18; 1 Bakor. 6:9, 10) Re dira sohle seo re ka se kgonago gore re kgahliše Jehofa, e bile re ekiša mopsalme yo a boletšego gore: “Pelong ya ka ke ikemišeditše go latela ditaelo tša gago go iša mehleng ya neng le neng, go fihla mafelelong.” (Ps. 119:112) Eupša Sathane o tlo leka go re šitiša go ema re tiile. O diriša mekgwa efe?

8. Sathane o diriša bjang tlaišo go leka go re dira gore re se ke ra ema re tiile?

⁸ Go tlaišwa. Diabolo o re tlaiša mmeleng le maikwelong go leka go re dira gore re se ke ra ema re tiile. Lebaka la gagwe le legolo ke gore a re “metše” gore a senye segwera sa rena le Jehofa. (1 Pet. 5:8) Bakriste ba lekgolong la pele la mengwaga ba ile ba tšhošetšwa,  ba itiwa, le go bolawa ka gobane ba be ba ikemišeditše go ema ba tiile. (Dit. 5:27, 28, 40; 7:54-60) Le lehono Sathane o sa dutše a tlaiša batho ba Jehofa. Se se bonagala kamoo bana babo rena le dikgaetšedi ba kua Russia le dinageng tše dingwe ba tlaišwago o šoro ka gona. Le gona, bana babo rena le dikgaetšedi ba bangwe lefaseng ka moka ba tlaišwa ka ditsela tše di fapafapanego.

9. Ke ka baka la’ng go le bohlokwa go lemoga tsela yeo Sathane a ka re gatelelago ka yona? Hlalosa.

⁹ Go ba ka tlase ga kgatelelo. Sathane ga a no tlaiša batho feela, eupša o diriša le “bohwirihwiri.” (Baef. 6: 11) Nagana ka mohlala wa ngwanabo rena Bob yo a bego a le sepetlele gomme a letetše go dirwa ophareišene. O ile a botša dingaka gore di se ke tša mo tšhela madi le ge boemo bo ka mpefala. Ngaka yeo e bego e tlo mo dira ophareišene e ile ya dumela go hlompha phetho ya gagwe. Bošegong bja pele ba ka mo dira ophareišene, ngaka e nngwe e ile ya etela Bob ka morago ga gore ba lapa la gabo ba ye gae. Ngaka yeo e ile ya botša Bob gore ba ka se diriše madi eupša ba tlo ba le ona kgauswi bakeng sa ge a ka nyakega. Mohlomongwe ngaka yeo e be e nagana gore Bob o tla fetola monagano wa gagwe ka ge lapa la gabo le be le se gona kgauswi. Eupša Bob o ile a ema a tiile, a bolela gore a se ke a tšhelwa madi le ge boemo bo ka fetoga.

10. Ke ka baka la’ng tsela yeo batho ba lebelelago dilo ka yona e le kotsi? (1 Bakorinthe 3:19, 20)

¹⁰ Tsela yeo batho ba lebelelago dilo ka yona. Ge re ka dira dilo go swana le batho bao ba sa kwego Jehofa, re ka feleletša re sa kwe melao ya gagwe. (Bala 1 Bakorinthe 3:19, 20.) “Bohlale bja lefase le” gantši bo dira gore batho ba se ke ba kwa Modimo. Bakriste ba bangwe kua Peregama le Theathera ba ile ba itshwara go swana le batho ba moo ka go rapela medingwana ya diswantšho le go itshwara ka tsela e sa hlwekago. Jesu o ile a kgalema diphuthego tšeo ka ge di be di amogela batho bao ba bego ba dira bootswa. (Kut. 2:14, 20) Batho ba bangwe bao re phelago gare ga bona lehono ba nyaka gore re amogele dikgopolo tšeo di fošagetšego. Ba malapa a gabo rena le batho bao re ba tsebago ba ka dira gore re bone eka re latela melao ya Modimo ka mo go feteletšego gomme ba re kgothaletša gore re se ke ra e latela. Ka mohlala, ba ka bolela gore ga go bohlokwa gore re dule re hlwekile boitshwarong le gore melao ya Beibele ya boitshwaro ga e sa na mohola.

11. Re swanetše go dira’ng ge re dutše re eme re tiile?

¹¹ Ka dinako tše dingwe re ka bona eka tlhahlo yeo Jehofa a re neago yona ga se ya lekana. Le gona re ka lekega “go fetela ka kua ga dilo tšeo di ngwadilwego.” (1 Bakor. 4:6) Baetapele ba bodumedi ba mehleng ya Jesu ba be ba dira sona seo. Ba be ba oketša melao ya bona godimo ga Molao woo o bego o beilwe gomme batho bao ba tlwaelegilego ba be ba thatafalelwa ke go e latela. (Mat. 23:4) Jehofa o re nea tlhahlo e kwagalago a diriša Lentšu la gagwe le mokgatlo wa gagwe. Ga re na lebaka la go oketša go tlhahlo yeo a re neago yona. (Die. 3:5-7) Ka gona ga re fetele ka kua ga dilo tšeo di ngwadilwego ka Beibeleng goba ra beela badumedigotee le rena melao ka dilo tšeo Beibele e sa bolelego ka tšona.

12. Sathane o diriša bjang “bofora bja lefeela”?

¹² Bofora. Sathane o diriša “bofora bja lefeela” le “dilo tša motheo tša lefase” go lahletša batho le go ba aroganya. (Bakol. 2:8) Lekgolong la pele la mengwaga, dilo tšeo di be di akaretša dikgopolo tša batho tša difilosofi, dithuto tša Sejuda tše sa thewago Mangwalong le dithuto tšeo di bego di kgothaletša  Bakriste gore ba latele molao wa Moshe. Dilo tše e be e le tša bofora ka gobane di be di dira gore batho ba arogele kgole le Mothopo wa bohlale e lego Jehofa. Lehono, Sathane o diriša boraditaba le di Social Media go phatlalatša boitsebišo bja bofora le ditaba tša maaka tšeo di kgothaletšwago ke baetapele ba dipolotiki. Re bone se nakong ya leuba la bolwetši bja COVID-19. c Dihlatse tša Jehofa tšeo di bego di theetša tlhahlo e tšwago go mokgatlo di ile tša phema go tshwenyega gomme tša se swane le batho bao ba bego ba theetša boitsebišo bja maaka.—Mat. 24:45.

13. Ke ka baka la’ng re se ra swanelwa ke go šitišega?

¹³ Ditšhitišo. Re swanetše go dula re “dira dilo tše bohlokwa kudu.” (Bafil. 1:9, 10) Ditšhitišo di ka dira gore re fetše nako le matla a rena re dira dilo tšeo di se nago mohola. Dilo tšeo di tlwaelegilego tšeo re di dirago letšatši le letšatši tše bjalo ka go ja, go nwa, go itapološa le mošomo, di ka fetoga ditšhitišo ge e ba di e tla pele bophelong bja rena. (Luka 21:34, 35) Go oketša moo, letšatši le lengwe le lengwe re kwa ka megwanto le mathata a dipolotiki. Re swanetše go kgonthišetša gore dilo tše ga di re šitiše, ka gobane re ka feleletša re tšea lehlakore ka menaganong ya rena le ka dipelong tša rena. Sathane o diriša mekgwa ye ka moka gore a re šitiše go dira seo se lokilego. A re kweng gore re ka dira eng gore re dule re tiile.

14. Re ka thušwa ke’ng gore re dule re tiile ge re le ka lehlakoreng la Jehofa?

¹⁴ Gopola gore ke ka baka la’ng o ineetše go Jehofa le go kolobetšwa. O gatile megato ye ka gobane o be o nyaka go ba ka lehlakoreng la Jehofa. Gopola gore o kgodišitšwe ke’ng gore o hweditše therešo. O ile wa tseba Jehofa gabotse gomme wa thoma go mo rata le go mo hlompha bjalo ka Tatago wa legodimong. O ile wa ba le tumelo gomme seo sa dira gore o itshole dibeng tša gago. O ile wa tlogela go dira dilo tšeo Jehofa a di hloilego gomme wa thoma go dira dilo tšeo di mo kgahlago. Ge o be o ekwa gore Modimo o go lebaletše, o  ile wa ikwa o imologile. (Ps. 32:1, 2) O ile wa thoma go ya dibokeng gomme wa botša batho ka dilo tše dibotse tšeo o ithutilego tšona. Ga bjale ka ge o le Mokriste yo a kolobeditšwego, o sepela tseleng e išago bophelong bjo sa felego e bile o ikemišeditše go dula o sepela go yona.—Mat. 7:13, 14.

15. Ke ka baka la’ng go bala le go naganišiša go le bohlokwa?

¹⁵ Bala Lentšu la Modimo o be o naganišiše ka lona. Go swana le ge mohlare o tia ge medu ya ona tsemile fase, le rena tumelo ya rena e tlo tia ge e ba re ithekga ka lentšu la Modimo. Ge mohlare o dutše o gola, le medu ya ona e a gola gomme ya phatlalala. Ge re bala le go naganišiša, re tiiša tumelo ya rena e bile re tloga re kgodišega gore ditsela tša Jehofa ke tše kaonekaone. (Bakol. 2:6, 7) Naganišiša kamoo ditaelo, tlhahlo le tšhireletšo ya Jehofa di thušitšego bahlanka ba gagwe ka gona nakong e fetilego. Ka mohlala, Hesekiele o ile a lebeledišiša ka kelohloko ponong ge morongwa a be a ela tempele. Pono yeo e ile ya tiiša Hesekiele, le gona e ka re thuša go tšeela godimo dithuto tše bohlokwa tša melao ya Jehofa ya borapedi bjo bo hlwekilego. d (Hesek. 40:1-4; 43:10-12) Le rena re a holega ge re ithuta le go naganišiša ka dilo tše di tseneletšego tša Lentšu la Modimo.

16. Go ba le pelo e tiilego go thušitše bjang Bob? (Psalme 112:7)

¹⁶ Eba le pelo e tiilego. Kgoši Dafida o ile a bontšha gore a ka se tsoge a tlogetše Jehofa ge a be a opela ka gore: “Modimo, pelo ya ka e tiile.” (Ps. 57:7) Le rena re ka ba le pelo e tiilego gomme ra tshepa Jehofa ka mo go feletšego. (Bala Psalme 112:7.) Nagana kamoo se se thušitšego Bob yoo re boletšego ka yena pejana. Ge a be a botšwa gore go tlo bewa madi gore a tle a tšhelwe ge a ka nyakega, ka pejana o ile a araba ka gore ge go ka nyakega gore a tšhelwe madi o tla tloga moo sepetlele ka pelapela. Ka morago Bob o itše, “Ke be ke tseba seo ke swanetšego go se dira, e bile ke sa tshwenyege ka seo se tla diregago ka morago.”

17. Re ka ithuta’ng go seo se diragaletšego Bob? (Bona le seswantšho)

 ¹⁷ Bob o ile a se šišinyege ka gobane o be a dirile phetho ya go ema a tiile le pele a ka tsena sepetlele. Sa pele, o be a nyaka go thabiša Jehofa. Sa bobedi, o ile a bala Beibele le dikgatišo tša rena tšeo di theilwego Beibeleng tša go bolela ka go hlompha bophelo le madi. Sa boraro, o be a kgodišegile gore ge a ka latela tlhahlo ya Jehofa o tlo šegofatšwa. Le rena re ka kgona go ba le pelo e tiilego go sa šetšwe mathata ao re kopanago le ona.

18. Mohlala wa Baraka o re thuša bjang gore re kgone go tshepa Jehofa? (Bona seswantšho sa letlakala la ka ntle.)

¹⁸ Tshepa Jehofa. Nagana kamoo Baraka a ilego a atlega ka gona ka baka la go tshepa tlhahlo ya Jehofa. Le ge Baisiraele ba be ba sa itokišetša ntwa e bile ba se na dibetša, Jehofa o ile a laela Baraka gore a ye go lwa le moetapele wa madira a Bakanana e lego Sisera yo a bego a itlhamile kudu e bile a na le dibetša tše dintši. (Baa. 5:8) Moporofeta wa mosadi e lego Debora o ile a botša Baraka gore a theogele kua tlase go yo lwa le Sisera le madira a gagwe ao a bego a sepela ka dikoloi tše 900 tša ntwa. Le ge madira a Sisera a be a sepela ka dikoloi tša ntwa tšeo di bego di ka dira gore a fenye gabonolo, eupša Baraka o ile a no theetša tlhahlo. Ge madira a dutše a theoga thabeng ya Thabora, Jehofa o ile a neša pula e matla. Dikoloi tša Sisera tša ntwa di ile tša tanywa lerageng gomme Jehofa a dira gore Baraka a fenye ntwa yeo. (Baa. 4:1-7, 10, 13-16) Ka mo go swanago, Jehofa o tlo dira gore re fenye ge eba re ka mo tshepa gomme ra diriša tlhahlo yeo a re neago yona a diriša mokgatlo wa gagwe.—Doit. 31:6.

19. Ke ka baka la’ng o ikemišeditše go dula o tiile?

¹⁹ Re swanetše go dula re tiile ge re phela mo tshepedišong ye ya dilo. (1 Tim. 6:11, 12; 2 Pet. 3:17) Eka re ka ikemišetša gore re se ke ra akgaakgwa ke go tlaišwa, go ba ka tlase ga kgatelelo, tsela yeo batho ba lebelelago dilo ka yona, bofora le ditšhitišo. (Baef. 4:14) Go e na le moo anke re emeng re tiile boineelong bja rena go Jehofa e bile re kwe ditaelo tša gagwe. Lega go le bjalo, re swanetše go ba le tekatekano ge go nyakega. Sehlogong se latelago, re tlo boledišana kamoo Jehofa le Jesu ba re beelago mohlala o mobotse ka gona wa go ba le tekatekano.