Haykanush, e lego mogoeledi yo a sa kolobetšwago wa kua Armenia, o ile a topa paseporoto kgauswi le legae la gagwe. Ka gare ga yona go be go na le dikarata tša panka le tšhelete e ntši kudu. O ile a botša monna wa gagwe, yo le yena e lego mogoeledi yo a sa kolobetšwago, ka seo a se hweditšego.

Banyalani ba ba be ba na le mathata a magolo a ditšhelete e bile ba na le dikoloto. Eupša ba ile ba phetha ka gore ba bušetše tšhelete yeo go mong wa yona ba thušwa ke aterese yeo e bego e le ka paseporotong yeo. Mong wa paseporoto yeo le lapa la gagwe ba ile ba makala kudu. Haykanush le monna wa gagwe ba ile ba hlalosa gore ba bušitše paseporoto yeo ka baka la seo ba ithutago sona ka Beibeleng. Ke moka ba ile ba diriša sebaka seo go bolela ka Dihlatse tša Jehofa le go nea lapa leo dikgatišo tša rena.

Lapa leo le be le nyaka go fa Haykanush e nngwe ya tšhelete yeo go mo leboga, eupša ga se a ka a e tšea. Letšatšing le le latelago, mosadi wa lapa leo o ile a etela Haykanush le monna wa gagwe legaeng la bona gore a ba leboge. O ile a gapeletša Haykanush gore a amogele palamonwana ya taamane.

Go swana le lapa leo, batho ba bantši ba tla makatšwa ke go botega ga Haykanush le monna wa gagwe. Eupša na Jehofa o ile a makala? O ile a lebelela bjang go botega ga bona? Na go botega ga bona e bile ga lefeela?

Dikarabo tša dipotšišo tšeo ga di thata. Ka baka la’ng? Ka baka la gore bahlanka ba Modimo ba a tseba gore go ekiša dika tša Jehofa go bohlokwa kudu go yena go feta ditaamane, gauta le matlotlo a mangwe. Ee, seo Jehofa a se lebelelago se le bohlokwa se fapane le seo batho ba bantši ba se lebelelago se le bohlokwa. (Jesaya 55:8, 9) Le gona bahlanka ba Jehofa ba a tseba gore maiteko a bona a go ekiša dika tša gagwe a bohlokwa kudu.

Re ka bona se go tšwa go seo Beibele e se bolelago ka temogo le bohlale. Diema 3:13-15 e re: “Go thaba motho yo a hweditšego bohlale le yo a hwetšago temogo, ka gobane go ba le bjona e le leruo go phala go ba le silifera e le leruo gomme go ba le bjona go phala go ba le gauta. Bo bohlokwa go phala maswika a bohlokwa a ka lewatleng gomme dilo tše dingwe ka moka tšeo di go kgahlago di ka se lekanywe le bjona.” Go molaleng gore Jehofa o tšeela dika tšeo godimo kudu go feta matlotlo le ge e le afe.

Ka gona, go thwe’ng ka go botega?

Jehofa ka boyena o a botega. A ‘ka se ke a aketša.’ (Tito 1:2) E bile o buduletše moapostola Paulo go ngwalela Bakriste ba Baheberu ba lekgolong la pele la nywaga gore: “Tšwelang pele le re rapelela, gobane re holofela gore re na le letswalo le botegago, ka ge re rata go itshwara ka go botega dilong tšohle.”​—Baheberu 13:18.

Jesu Kriste o beile mohlala o mobotse wa go botega. Ka mohlala, ge Moperisita yo a Phagamego e lego Kayafa a be a re: “Ke go eniša ka Modimo yo a phelago gore o re botše ge e ba o le Kriste Morwa wa Modimo!,” Jesu o ile a botega gomme a dumela gore ke yena Mesia. O ile a bolela therešo le ge a be a tseba gore kgoro ya Sanhedrine e be e tlo mmona molato wa gore o roga Modimo le gore se se be se ka dira gore a bolawe.​—Mateo 26:63-67.

Go thwe’ng ka rena? Ge re ka ikhwetša re le boemong bjoo re ka holegago ka dilo tše di bonagalago, na re tla ba re botega ge re ka se bolele therešo goba ra fetoša ditaba tše dingwe ganyenyane?

Go ka ba thata go botega mehleng ye ya bofelo ka ge batho ba bantši e le “baithati, barati ba tšhelete.” (2 Timotheo 3:2) Ge go na le mathata a ditšhelete goba go le thata go hwetša mešomo, ba bantši ga ba bone e le phošo go utswa, go hlalefetša goba go dira dilo tše dingwe tša go se botege. Mokgwa wo o atile kudu moo batho ba bantši ba naganago gore e le gore o kgone go phela o swanetše go se botege. Gaešita le Bakriste ba bangwe ba ile ba dira diphetho tše mpe gomme ka baka la go ‘nyaka go ikhola’ ba ile ba lahlegelwa ke botumo bja bona bjo bobotse ka phuthegong.​—1 Timotheo 3:8; Tito 1:7.

Lega go le bjalo, Bakriste ba bantši ba ekiša Jesu. Ba a lemoga gore go ba le dika tša go swana le tša Modimo go bohlokwa go feta mahumo goba mehola le ge e le efe. Ke ka baka leo bafsa ba Bakriste ba sa kopišego e le gore ba ka hwetša dimaraka tše dibotse sekolong. (Diema 20:23) Ga se gore ka mehla ge re botega re tlo hwetša moputso go swana le Haykanush. Eupša go botega ke selo seo Modimo a se letetšego go rena, e bile go botega go dira gore re be le letswalo  le le hlwekilego, e lego selo sa bohlokwa kudu.

Mohlala wa Gagik o bontšha seo. O re: “Pele nka ba Mokriste, ke be ke šoma khamphaning e kgolo yeo mong wa yona a bego a sa lefe lekgetho ka go bega feela karolo e nyenyane ya tšhelete yeo khamphani e bego e e dira. Ka ge ke be ke le molaodi khamphaning yeo, go be go letetšwe gore ke nee mohlankedi wa makgetho tšotšo e le gore a se ke a tsenya khamphani ya rena mathateng ka baka la boradia bja yona. Mafelelong ke ile ka tuma ka go se botege. Ka morago ga gore ke ithute therešo, ke ile ka gana go tšwela pele ke dira seo, gaešita le ge mošomo woo o be o lefa gabotse. Go e na le moo, ke ile ka bula kgwebo ya ka. Di tloga fase, ke ile ka ngwadiša khamphani ya ka semolao gomme ka lefa makgetho ka moka.”​—2 Bakorinthe 8:21.

Gagik o re: “Tšhelete yeo ke bego ke e dira e be e le e nyenyane ge e bapetšwa le yeo ke bego ke e gola khamphaning yeo, ka gona go be go le thata go hlokomela lapa la ka. Lega go le bjalo, gona bjale ke thabile. Ke na le letswalo le le hlwekilego pele ga Jehofa. Ke mohlala o mobotse go barwa ba ka ba babedi, e bile ke neilwe ditokelo ka phuthegong. Gona bjale ke tumile ka go botega gare ga bahlahlobi ba makgetho le bao ke dirago kgwebo le bona.”

Jehofa o rata bohle bao ba mo tumišago ka go ekiša dika tša gagwe tše di kgahlišago, go akaretša le go botega. (Tito 2:10) E bile o re o tla re thuša ge re dira bjalo. O ile a budulela Kgoši Dafida go bolela gore: “Nkile ka ba lesogana, e bile ke tšofetše, eupša ga se ka bona le ge e le mang yo a lokilego a tlogetšwe a le feela, goba bana ba gagwe ba kgopela dijo.”—Psalme 37:25.

Phihlelo ya Ruthe e hlatsela seo. O ile a dula le mmatswale wa gagwe e lego Naomi, go e na le gore a mo tlogele ka gobane a tšofetše. Ruthe o ile a hudugela Isiraele, moo a bego a ka rapela Modimo wa therešo. (Ruthe 1:16, 17) O be a botega e bile o ile a šoma ka thata go budutša, e le ge a latela tokišetšo ya Molao wa Modimo yeo e bego e hola badiidi. Le gona go fo swana le seo se diragaletšego Dafida, Jehofa ga se a ka a lahla Ruthe le Naomi. (Ruthe 2:2-18) E bile Jehofa o ile a dira seo se fetago go hlokomela Ruthe ka dilo tše di bonagalago. O ile a mo kgetha gore a be karolo ya leloko la Kgoši Dafida gotee le la Mesia yo a holofeditšwego!​—Ruthe 4:13-17; Mateo 1:5, 16.

Go ka ba thata gore bahlanka ba bangwe ba Jehofa ba hwetše tšhelete e lekanego go hlokomela malapa a bona. Lega go le bjalo, go e na le gore ba leke go iphediša ka ditsela tša go se botege, ba šoma ka thata le ka mafolofolo. Ka go dira se, ba bontšha gore dika tše di kgahlišago tša Modimo, go akaretša go botega, ke tše bohlokwa kudu go bona go feta mahumo.​—Diema 12:24; Baefeso 4:28.

Go swana le Ruthe, Bakriste lefaseng ka moka ba bontšhitše gore ba na le tumelo ya gore Jehofa o tla ba thuša. Ba tloga ba botile Jehofa, Yoo a holofeditšego gore: “Le ka mohla nka se ke ka go tlogela le ge e le go go lahla.” (Baheberu 13:5) Jehofa o bontšhitše ka makga a mantši gore o thuša bao ba botegago ka dinako tšohle. O be a dutše a phetha kholofetšo ya gagwe ya gore o tla hlokomela bahlanka ba gagwe.​—Mateo 6:33.

Ee, batho ba ka lebelela ditaamane le matlotlo a mangwe di le bohlokwa kudu. Eupša re ka kgodišega gore Tatago rena wa legodimong o tšeela godimo kudu go botega ga rena le dika tše dingwe tše dibotse, go feta matlotlo le ge e le afe a bohlokwa!