1. Ke ka baka la’ng go se na Mmopi yo a swanago le Jehofa?

KA November 2010, sebjana sa letsopa sa kgale kudu sa China se ile sa rekišwa ka ditolara tše e ka bago tše 70 milione kua Engelane. Go a makatša gore motho a ka diriša letsopa la go se re selo go bopa sebjana se sebotse le sa go tura. Jehofa, yena Mmopi wa rena, o phala kgole mmopi le ge e le ofe. Beibele e re Jehofa o bopile motho yo a phethagetšego “ka lerole la mmu,” ke gore, ka letsopa. (Genesi 2:7) Motho yoo, e lego Adama, e be e le “morwa wa Modimo” e bile o be a bopilwe a na le bokgoni bja go ekiša dika tša Modimo.​—Luka 3:38.

2, 3. Re ka ekiša bjang Baisiraele bao ba bego ba itshola?

² Ge Adama a be a hlanogela Mmopi wa gagwe, o ile a se sa ba morwa wa Modimo. Eupša bana ba bantši ba Adama ba kgethile Jehofa gore e be Mmuši wa bona. (Baheberu 12:1) Ka go mo kwa ka boikokobetšo, ba bontšhitše gore ba nyaka gore Jehofa e be Tatago bona le Mmopi wa bona, e sego Sathane. (Johane 8:44) Go botegela ga bona Modimo go re gopotša ka seo Baisiraele bao ba itsholago ba se boletšego ge ba be ba re: “Wena Jehofa, o Tatago rena. Re letsopa gomme wena o  Mmopi wa rena; ka moka ga rena re modiro wa seatla sa gago.”​—Jesaya 64:8.

³ Barapedi ba Jehofa ba therešo lehono le bona ba leka ka matla go ikokobetša le go kwa. Ba lebelela go bitša Jehofa gore ke Tatago bona e le tokelo, e bile ba nyaka gore a ba bope. Na re ikemišeditše go ba letsopa le boleta leo Modimo a ka bopago sebjana se sebotse ka lona? Na re lebelela bana babo rena ka moka le dikgaetšedi e le batho bao ba lekago go dira se se nepagetšego, e le bao ba sa dutšego ba bopša ke Modimo? E le go re thuša go ba le pono e botse tabeng ye, re tlo ahlaahla kamoo Jehofa a kgethago batho bao a ba bopago, lebaka leo ka lona a ba bopago le kamoo a ba bopago ka gona.

4. Jehofa o kgetha bjang batho bao a ba gogelago go yena? Nea mehlala.

⁴ Jehofa ga a lebelele batho go swana le rena. Go e na le moo, o bona dipelo le seo yo mongwe le yo mongwe wa rena a lego sona. (Bala 1 Samuele 16:7b.) Bohlatse bja seo ke bja ge a be a bopa phuthego ya Bokriste. O gogetše go yena le go Morwa wa gagwe batho ba bantši bao ba bangwe ba ba lebelelago e se selo. (Johane 6:44) Ka mohlala, yo mongwe wa batho bao e be e le Mofarisei yo a bitšwago Saulo, yo e bego e le “morogaki, motlaiši le motho wa mereba.” (1 Timotheo 1:13) Eupša Jehofa o ile a hlahloba pelo ya Saulo gomme a se mo lebelele e le letsopa la go hloka mohola. (Diema 17:3) Go e na le moo, Jehofa o ile a bona gore Saulo a ka bopega gomme ya ba ‘sebjana seo a se kgethilego’ seo se bego se tla bolela ditaba tše dibotse “ditšhabeng gotee le go dikgoši le go bana ba Isiraele.” (Ditiro 9:15) Le gona Jehofa o kgethile batho ba bangwe bao a bego a ka ba bopa “bakeng sa tirišo e hlomphegago,” go akaretša bao e kilego ya ba matagwa, bao ba kilego ba itshwara ka tsela e gobogilego le mahodu. (Baroma 9:21; 1 Bakorinthe 6:9-11) Ge ba dutše ba ithuta Mangwalo, ba ile ba ba le tumelo e tiilego go Jehofa gomme ba mo dumelela gore a ba bope.

5, 6. Ge re dumela gore Jehofa ke Mmopi wa rena, re tla lebelela bjang (a) batho ba tšhemong ya gabo rena? (b) bana babo rena le dikgaetšedi?

⁵ Re kgodišegile gore Jehofa o kgona go kgetha batho ba go loka le go ba gogela go yena. Ke ka baka leo re sa swanelago go ahlola batho ba tšhemong ya gabo rena goba ka phuthegong. Ka mohlala, ekwa kamoo monna yo a bitšwago Michael a bego a arabela ka gona ge Dihlatse tša Jehofa di be di mo etela. O re: “Ke be ke di hlokomologa, ke dira tše nkego ga ke di bone. Ke be ke di swara makgwakgwa! Ge nako e dutše e eya, ke ile ka kopana le lapa le lengwe leo ke bego ke le rata kudu ka baka la boitshwaro bja lona bjo bobotse. Ke moka ka letšatši le lengwe ke ile ka makala kudu​—ke ile ka hwetša gore lapa leo le lona ke Dihlatse tša Jehofa. Boitshwaro bja lapa leo bo ile bja dira gore ke ipotšiše gore go re’ng ke hloile Dihlatse. Ke ile ka lemoga gore lehloyo la ka le be le bakwa ke mabarebare le bošilo bja ka. Ke be ke iphoufaletša therešo.” Michael o ile a  nyaka go ithuta mo go oketšegilego ka Modimo gomme a dumela go swarelwa thuto ya Beibele. Ka morago o ile a kolobetšwa gomme a hlankela Jehofa ka nako e tletšego.

⁶ Ge re dumela gore Jehofa ke Mmopi wa rena, tsela yeo re lebelelago bana babo rena le dikgaetšedi le yona e tla fetoga. Re tla lebelela yo mongwe le yo mongwe wa bona e le yo a sa phethagalago le yo a lekago go dira se se nepagetšego. Ye ke tsela yeo Jehofa a ba lebelelago ka yona. O bona seo ba tlogago ba le sona ka gare e bile o a tseba gore e se kgale ba tlo phethagala. Le gona o tseba seo yo mongwe le yo mongwe wa bona a ka bago sona. (Psalme 130:3) Re ka ekiša Jehofa ge e ba le rena re lebelela bana babo rena ka tsela e botse. Le gona re ka thušana le Mmopi wa rena go thuša bana babo rena le dikgaetšedi go dira tšwelopele moyeng. (1 Bathesalonika 5:14, 15) Bagolo ka phuthegong ba swanetše go bea mohlala tabeng ye.​—Baefeso 4:8, 11-13.

7. Ke ka baka la’ng o leboga gore Jehofa o a re laya?

⁷ Batho ba bangwe ba ka re: ‘Ke be ke nagana gore batswadi ba ka ba a ntshwenya ge ba be ba nkeletša, go ba go fihla le nna ke eba le bana.’ Ge re gola, re thoma go tšeela keletšo godimo ka gobane re tla ba re bona gore ge motho a re eletša go ra gore o a re rata. (Bala Baheberu 12:5, 6, 11.) Ee, Jehofa o a re rata ka gobane re bana ba gagwe. Ke ka baka leo a re layago ka go se fele pelo, goba go re bopa. Ka ge e le Tatago rena, o nyaka re hlalefa, re thaba le go mo rata. (Diema 23:15) Ga a nyake go bona re hlaka, e bile ga a nyake gore re hwe re le badiradibe bao ba sa itsholego.​—Baefeso 2:2, 3.

8, 9. Ke tokišetšo efe yeo Jehofa a e dirišago lehono go re ruta, gona thuto ye e tlo oketšega gakaaka’ng lefaseng le lefsa?

⁸ Pele re tseba Jehofa, go ka direga gore re be re na le mekgwa e mentši e mebe. Eupša Jehofa o ile a re bopa gomme a re thuša go fetoga. Ka go re’alo, ga bjale re na le dika tše dibotse. (Jesaya 11:6-8; Bakolose 3:9, 10) Re phela paradeiseng ya moya. Ye ke tokišetšo e kgethegilego yeo Jehofa a e dirišago mehleng yeno go re bopa. Paradeiseng ye ya moya, re ikwa re šireletšegile gaešita le ge lefase leo re phelago go lona le tletše bokgopo. Bao ba goletšego malapeng ao go se nago lerato, ga bjale ba ikwa ba ratwa kudu ke bana babo bona le dikgaetšedi paradeiseng ye ya moya. (Johane 13:35) Le gona re ithutile go ratana. Eupša sa bohlokwa kudu ke gore re tseba Jehofa gomme ga bjale re thabela lerato la gagwe bjalo ka tate.​—Jakobo 4:8.

⁹ Lefaseng le lefsa, re tlo holega ka botlalo paradeiseng ya moya. Le gona re tlo ipshina ka bophelo paradeiseng ya kgonthe moo go tla bego go buša Mmušo wa Modimo. Ka nako yeo, Jehofa o tlo tšwela pele a re bopa le go re ruta ka tsela yeo ga bjale re ka se kgonego le go e nagana. (Jesaya 11:9) E bile Jehofa o tlo dira gore  re phethagale monaganong le mmeleng. Seo se tlo re thuša go kwešiša ditaelo tša gagwe le go di kwa ka mo go feletšego. Ka gona anke re tšweleng pele re dumelela Jehofa gore a re bope, le gona anke re mmontšheng gore re leboga bohlatse bjo bja gore o a re rata.​—Diema 3:11, 12.

10. Jesu o ile a ekiša bjang go se fele pelo le bokgoni bja Mmopi wa rena yo Mogolo?

¹⁰ Go etša ge mmopi wa letsopa a tseba mohuta wa letsopa leo a bopago dilo ka lona, Mmopi wa rena e lego Jehofa, o re tseba gabotse kudu. O tseba diphošo tša rena, mafokodi a rena, le tšwelopele yeo re šetšego re e dirile. Ka gona o bopa yo mongwe le yo mongwe wa rena a naganne ka dilo tšeo. (Bala Psalme 103:10-14.) Re ka tseba kamoo Jehofa a re lebelelago ka gona ka go lebelela tsela yeo Jesu a bego a arabela ka yona mafokoding a baapostola ba gagwe. Ka dinako tše dingwe, baapostola ba be ba ngangišana ka gore yo mogolo ke mang gare ga bona. Ge nkabe o phetše le bona, o be o tla lebelela boitshwaro bja bona bjang? Mohlomongwe nkabe o ile wa nagana gore ga ba swane le letsopa le boleta. Eupša Jesu o be a tseba gore ba be ba ka bopega ge ba be ba ka theetša keletšo e botho yeo a bego a ba nea yona a sa fele pelo le go ekiša boikokobetšo bja gagwe. (Mareka 9:33-37; 10:37, 41-45; Luka 22:24-27) Ka morago ga tsogo ya Jesu, baapostola ba ile ba amogela moya o mokgethwa wa Modimo gomme ba se sa tshwenyega ka gore yo mogolo ke mang gare ga bona. Go e na le moo, ba ile ba swarega kudu ka mošomo wo Jesu a bego a ba neile wona.​—Ditiro 5:42.

11. Dafida o bontšhitše ka ditsela dife gore o be a swana le letsopa le boleta, gona re ka mo ekiša bjang?

¹¹ Lehono, Jehofa o diriša Beibele, moya wa gagwe o mokgethwa le phuthego go re bopa. Beibele e ka re bopa bjang? Re swanetše go e bala, re naganišiše ka seo re se balago, gomme re kgopele Jehofa gore a re thuše go diriša seo re ithutilego sona. Kgoši Dafida o ngwadile gore: “Ge ke go gopotše ke le malaong, ke naganišiša ka wena dinakong tša bošego tša go hlapetša.” (Psalme 63:6) O ngwadile gape gore: “Ke tla reta Jehofa, yena yo a nkeleditšego. Bošego dipshio tša ka di mphošolotše.” (Psalme 16:7) Ee, Dafida o be a naganišiša ka keletšo ya Jehofa gomme a e dumelela gore e bope dikgopolo tša gagwe le maikwelo a gagwe, le ge keletšo yeo go be go le thata go e amogela. (2 Samuele 12:1-13) Dafida o re beetše mohlala o mobotse kudu wa boikokobetšo le go kwa. Ka gona ipotšiše gore: ‘Ge ke bala Beibele, na ke naganišiša ka seo ke se balago gomme ka dumelela keletšo ya Modimo e bopa dikgopolo tša ka le maikwelo a ka? Na nka dira seo gantšinyana?’​—Psalme 1:2, 3.

12, 13. Jehofa o re bopa bjang ka moya o mokgethwa le ka phuthego ya Bokriste?

¹² Moya o mokgethwa o ka re bopa ka ditsela tše mmalwa. Ka mohlala, o ka re thuša go ekiša Jesu le go bonagatša dika tše di fapafapanego tšeo di enywago ke moya wo. (Bagalatia 5:22, 23) Se sengwe sa dika tšeo ke lerato. Re rata Modimo e bile re nyaka go mo kwa le go bopša ke yena ka gobane re a tseba gore melao ya gagwe e hola rena. Go oketša moo, moya o mokgethwa o ka re nea matla a go gana go bopša ke lefase le le kgopo. (Baefeso 2:2) Ge moapostola Paulo e sa le  mofsa, o be a ekiša baetapele ba bodumedi ba Bajuda bao ba bego ba ikgantšha. Eupša moya o mokgethwa o ile wa mo thuša go fetoga. Ka morago o ile a ngwala gore: “Dilong tšohle ke na le matla ka baka la yo a mphago matla.” (Bafilipi 4:13) Le rena re swanetše go kgopela Jehofa gore a re nee moya o mokgethwa, re tseba gore o tla araba dithapelo tše bjalo tše di tšwago pelong.​—Psalme 10:17.

¹³ Le gona Jehofa o diriša phuthego le bagolo go bopa yo mongwe le yo mongwe wa rena. Ka mohlala, ge bagolo ba lemoga gore re na le bofokodi bjo itšego, ba a re thuša. Lega go le bjalo, ga ba re eletše ka dikgopolo tša bona. (Bagalatia 6:1) Go e na le moo, ka boikokobetšo ba rapela Jehofa gore a ba nee kwešišo le bohlale. Ke moka, ba dira nyakišišo ba diriša Beibele le dikgatišo tša rena e le gore ba hwetše boitsebišo bjo bo tlago go re thuša. Ge bagolo ba etla go wena gomme ba go nea keletšo e lerato, mohlomongwe ba go eletša ka moaparo wa gago, gopola gore seo ke bohlatse bja gore Modimo o a go rata. Ge o diriša keletšo yeo, o tla swana le letsopa le boleta leo Jehofa a kgonago go le šomiša, gomme o tla holega.

14. Le ge Jehofa a na le matla a go re laola, ke ka baka la’ng a sa re gapeletše go dira seo a se nyakago?

¹⁴ Ge e ba re kwešiša kamoo Jehofa a re bopago ka gona, re tla ba le ditswalano tše dibotse le bana babo rena le dikgaetšedi. Le gona re tla lebelela batho ba tšhemong ya gabo rena gabotse, go akaretša le dithuto tša rena tša Beibele. Mehleng ya Beibele, pele motho a bopa selo ka letsopa, o be a le hlwekiša e bile a le ntšha maswikana le ditšhila tše dingwe. Mmopi yo Mogolo e lego Jehofa, o thuša batho bao ba nyakago go bopega. Ga a ba gapeletše go fetoga, go e na le moo, o ba ruta ditekanyetšo tša gagwe tše di hlwekilego. Ke bona ba swanetšego go kgetha ge  e ba ba tla dira diphetogo tšeo di nyakegago.

15, 16. Batho bao re ithutago Beibele le bona ba bontšha bjang gore ba nyaka go bopša ke Jehofa? Nea mohlala.

¹⁵ Nagana ka seo se ilego sa diragalela kgaetšedi yo a bitšwago Tessie kua Australia. O ithutile Beibele gabonolo kudu. Lega go le bjalo, o be a sa dire tšwelopele e bile a sa ye dibokeng. Kgaetšedi yo a bego a bala le yena o ile a rapela Jehofa gomme a dira phetho ya go kgaotša thuto. Ke moka go ile gwa direga mohlolo. Ka letšatši le lengwe ka morago ga thuto, Tessie o ile a botša kgaetšedi yoo seo se bego se mo šitiša go dira tšwelopele. Tessie o re o be a ipona e le moikaketši ka gobane o be rata go petšha. Eupša mo lebakeng le o be a feditše le pelo gore a ka se sa petšha.

¹⁶ Go se go ye kae, Tessie o ile a thoma go ya dibokeng le go bonagatša dika tša Bokriste gaešita le ge ba bangwe ba bao e kilego ya ba bagwera ba gagwe ba be ba mo kwera. Ge nako e dutše e eya, Tessie o ile a kolobetšwa gomme a ba mmulamadibogo wa ka mehla, gaešita le ge a be a na le bana ba banyenyane. Go molaleng gore ge barutwana ba Beibele ba dira diphetogo gore ba kgahliše Modimo, yena o tla ba batamela le go ba bopa gore e be dibjana tša bohlokwa kudu.

17. (a) Ke’ng se se go thabišago ka taba ya gore Jehofa o a go bopa? (b) Re tlo ahlaahla ditaba dife sehlogong se se latelago?

¹⁷ Lehono, batho ba bangwe ba sa kgona go bopa dilo tše dibotse kudu ka diatla le ka kelohloko. Ka go se fele pelo, Jehofa le yena o diriša keletšo go re bopa, e bile o re lebelela ka kelohloko e le gore a bone kamoo re tlago go arabela ka gona. (Bala Psalme 32:8.) Na o a bona gore Jehofa o na le taba le wena? Na o bona kamoo a go bopago ka gona ka kelohloko? Ge e ba go le bjalo, ke dika dife tšeo di tlago go go thuša go dula o swana le letsopa le boleta ka diatleng tša Jehofa? Ke mekgwa efe yeo o swanetšego go e phema e le gore o se be letsopa le thata leo le sa bopegego? Le gona batswadi ba ka šomišana bjang le Jehofa go bopeng bana ba bona? Sehlogo se se latelago se tla araba dipotšišo tše.