1, 2. Beibele e boletše’ng e sa le pele ka koketšego ya batho ba Jehofa?

LEFASENG ka moka, go na le mokgatlo wo o bopilwego ke batho bao ba ratago Jehofa le bao ba ratago go mo hlankela. Batho bao ke Dihlatse tša Jehofa. Le ge ba na le mafokodi gomme ba dira diphošo, Jehofa o ba hlahla ka moya wa gagwe o mokgethwa. Anke re boneng tše dingwe tša ditsela tšeo a ba šegofaditšego ka tšona.

² Ka 1914, go be go na le batho ba sego kae feela bao ba bego ba hlankela Jehofa. Eupša Jehofa o šegofaditše modiro wa go bolela ditaba tše dibotse. Ka baka leo, batho ba dimilione ba ithutile ditherešo tša Beibele gomme ba fetoga Dihlatse tša gagwe. Jehofa o hlalositše kgolo ye e makatšago ge a be a re: “Yo monyenyane e tla ba ba sekete (1 000) gomme mmotlana a ba setšhaba se matla. Nna Jehofa, ke tla akgofiša se ka nako ya gona.” (Jesaya 60:22) Lehono re bona gabotse gore boporofeta bjo bo phethagetše. Batho ba Jehofa ba swana le setšhaba se segolo. Ge e le gabotse, go na le dinaga tše dintši mo lefaseng tšeo palo ya badudi ba tšona ge e kopane e fetwago ke palo ya Dihlatse tša Jehofa ka moka.

3. Bahlanka ba Modimo ba bontšhitše bjang lerato?

 ³ Mehleng ye ya bofelo, Jehofa o thušitše batho ba gagwe gore ba ratane kudu. “Modimo ke lerato,” ka gona ba a mo ekiša. (1 Johane 4:8) Jesu o laetše balatedi ba gagwe gore “[ba] ratane.” Le gona o ba boditše gore: “Bohle ba tla tseba ka se gore le barutiwa ba ka, ge e ba le ratana.” (Johane 13:34, 35) Nywageng e sa tšwago go feta, bahlanka ba Jehofa ba bontšhane lerato leo gaešita le ge ditšhaba di be di elwa. Ka mohlala, ntweng ya bobedi ya lefase, batho ba e ka bago ba 55 milione ba ile ba bolawa. Eupša batho ba Jehofa ga se ba ka ba bolaya motho le o tee ntweng yeo. (Bala Mika 4:1, 3.) Se se ba thušitše go dula ba “hlwekile mading a batho bohle.”​—Ditiro 20:26.

4. Ke ka baka la’ng koketšego ya batho ba Jehofa e makatša?

⁴ Batho ba Modimo ba tšwela pele ba oketšega le ge ba na le lenaba le matla e lego Sathane. Ke “modimo wa lefase le.” (2 Bakorinthe 4:4) Sathane o laola mekgatlo ya dipolotiki ya lefase le, gotee le mekero ya ditaba gomme o diriša dilo tše go leka go emiša modiro wa rena wa go bolela ditaba tše dibotse. Eupša a ka se tsoge a kgonne. Lega go le bjalo, Sathane o a tseba gore o šaletšwe ke nako e kopana, ka gona o dula a leka go re dira gore re kgaotše go hlankela Jehofa.​—Kutollo 12:12.

5. Ke ka baka la’ng ka dinako tše dingwe ba bangwe ba ka re kweša bohloko? (Bona seswantšho seo se lego mathomong a sehlogo.)

⁵ Bahlanka ba Modimo ba ithuta gore go bohlokwa go rata Modimo le batho ba bangwe. Jesu o itše: “‘O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.’ Ye ke taelo e kgolokgolo le ya pele. Ya bobedi ya go swana le yona ke ye: ‘O rate moagišani wa gago ka mokgwa wo o ithatago ka wona.’” (Mateo 22:35-39) Lega go le bjalo, Beibele e bontšha gore batho ka moka ba belegwa ba sa phethagala ka baka la sebe sa Adama. (Bala Baroma 5:12, 19.) Ka baka leo, ka dinako tše dingwe ba bangwe ka phuthegong ba ka bolela goba ba dira selo se sengwe seo se ka re kwešago bohloko. Ge se se direga, re tlo dira’ng? Na re tla dula re rata Jehofa? Na re tla mmotegela le go botegela batho ba gagwe? Beibele e re botša ka ba bangwe ba bahlanka ba Modimo bao ba ilego ba bolela goba ba dira dilo tšeo di ilego tša kweša ba bangwe bohloko. Anke re boneng seo re ka ithutago sona go seo se ba diragaletšego.

6. Ke ka baka la’ng go ka thwe Eli o paletšwe ke go kgala barwa ba gagwe?

⁶ Ka mohlala, Eli e be e le moperisita yo a phagamego wa Isiraele, eupša barwa ba gagwe ba babedi ba be ba sa kwe melao ya Jehofa. Beibele e re: “Barwa ba Eli bona e be e le batho ba go se re selo; ba sa re selo ka Jehofa.” (1 Samuele 2:12) Eli o be a tseba gore barwa ba gagwe ba be ba dira dilo tše mpe kudu. Lega go le bjalo, o be a sa ba kgale. Ge nako e dutše e eya, Jehofa o ile a otla Eli le barwa ba gagwe ba babedi. Ke moka ka morago ga moo, o ile a se sa dumelela ditlogolo tša Eli go hlankela e le baperisita ba phagamego. (1 Samuele 3:10-14) Ge nkabe o phetše mehleng ya Eli gomme o tsebile gore o be a tlogela bana ba gagwe ba dira dilo tše mpe, na o ka be o ile wa kgopišega? Na seo  nkabe se ile sa fokodiša tumelo ya gago go Jehofa, ke moka wa feleletša o tlogetše go mo hlankela?

7. Ke dibe dife tše dikgolo tšeo Dafida a ilego a di dira, gona Modimo o ile a swaragana bjang le boemo bjoo?

⁷ Dafida o be a na le dika tše dibotse, ke ka baka leo Jehofa a bego a mo rata kudu. (1 Samuele 13:13, 14; Ditiro 13:22) Eupša le Dafida o ile a dira sebe se segolo kudu. Ge Uria a be a ile ntweng, Dafida o ile a robala le mosadi wa Uria e lego Batseba gomme a ima. Dafida o be a sa nyake gore batho ba tsebe seo a se dirilego. Ka gona, o ile a laela gore Uria a tle a mmone ke moka a leka go mo gapeletša gore a ye gae. Dafida o be a letetše gore Uria a robale le Batseba e le gore batho ba tle ba nagane gore Uria ke tatago ngwana yoo. Eupša Uria o ile a gana go ya gae. Ka gona Dafida o ile a dira gore Uria a bolawe ntweng. Dafida le lapa la gagwe ba ile ba tlaišega kudu ka baka la dibe tšeo tša gagwe tše dikgolo. (2 Samuele 12:9-12) Lega go le bjalo, Jehofa o ile a mo kwela bohloko gomme a mo lebalela. O be a tseba gore Dafida o be a nyaka go dira dilo tše di lokilego. (1 Dikgoši 9:4) Ge nkabe o phetše mehleng yeo, o ka be o ile wa ikwa bjang ka seo Dafida a se dirilego? Na nkabe o ile wa tlogela go hlankela Jehofa?

8. (a) Moapostola Petro o ile a palelwa bjang ke go phetha seo a se boletšego? (b) Ke ka baka la’ng Jehofa a ile a tšwela pele a diriša Petro ka morago ga phošo ya gagwe?

⁸ Mohlala o mongwe wa ka Beibeleng ke wa moapostola Petro. Jesu o ile a mo kgetha gore e be moapostola. Lega go le bjalo,  ka dinako tše dingwe Petro o be a bolela goba a dira dilo tšeo di sa lokago. Ka mohlala, Petro o ile a bolela gore a ka se tsoge a tlogetše Jesu le ge ba bangwe ba be ba ka mo tlogela. (Mareka 14:27-31, 50) Eupša ka morago ga gore Jesu a swarwe, baapostola ba gagwe ka moka, go akaretša le Petro, ba ile ba mo tlogela. Ka morago, Petro o ile a bolela ka makga a mararo gore ga a tsebe Jesu. (Mareka 14:53, 54, 66-72) Lega go le bjalo, Petro o ile a kwa bohloko kudu ka seo a se dirilego. Ka gona, Jehofa o ile a mo lebalela gomme a tšwela pele a mo diriša. Ge nkabe o be o le morutiwa wa Jesu ka nako yeo gomme o tsebile ka seo Petro a se dirilego, na nkabe o ile wa tšwela pele o bota Jehofa?

9. Ke ka baka la’ng o dumela gore Modimo o dula a dira se se nepagetšego?

⁹ Go tšwa mehlaleng ye, re a bona gore bahlanka ba bangwe ba Jehofa ba ile ba dira dilo tše mpe gomme ba kweša ba bangwe bohloko kudu. Ge se se direga lehono, o tlo dira’ng? Na o tla tlogela go ya dibokeng goba wa tlogela Jehofa le batho ba gagwe ka mo go feletšego? Goba na o tla lemoga gore Jehofa o a lebalela le gore a ka ba a emetše motho yoo gore a itshole? Eupša ka dinako tše dingwe motho a ka dira dibe tše dikgolo eupša a se itshole. Ge seo se ka direga, na o tla bota gore Jehofa o tseba seo motho yoo a se dirilego le gore o tla tšea kgato ka nako e swanetšego? Jehofa a ka ba a tloša motho yoo ka phuthegong ge e ba go nyakega. Na o a dumela gore Jehofa o tla dula a dira se se nepagetšego?

10. Ke’ng seo Jesu a ilego a se dira go sa šetšwe mafokodi a Judase Isikariote le Petro?

¹⁰ Ka Beibeleng, re bala ka batho ba bantši bao ba ilego ba dula ba botegela Jehofa le batho ba gagwe gaešita le ge bao ba bego ba phela le bona ba be ba dira diphošo tše dikgolo. Jesu o beile mohlala o mobotse tabeng ye. O ile a kgona go kgetha baapostola ba 12 ka morago ga gore a fetše bošego ka moka a rapela Tatagwe gore a mo thuše. Eupša ka moragonyana, yo mongwe wa barutiwa bao e lego Judase Isikariote, o ile a mo eka. Moapostola Petro le yena o ile a re ga a tsebe Jesu. (Luka 6:12-16; 22:2-6, 31, 32) Ge ba bangwe ba barutiwa ba Jesu ba be ba mo nyamiša, ga se a ka a sola Jehofa goba barutiwa ka moka. Go e na le moo, Jesu o ile a dula a le kgauswi le Tatagwe gomme a tšwela pele a mo hlankela ka potego. Ka baka la seo, Jehofa o ile a mo putsa ka go mo tsoša bahung gomme ka morago a mo dira Kgoši ya Mmušo wa legodimong.​—Mateo 28:7, 18-20.

11. Ke’ng seo Beibele e se boletšego e sa le pele ka bahlanka ba Jehofa ba mehleng yeno?

¹¹ Mohlala wa Jesu o re ruta gore re botegele Jehofa le batho ba gagwe. E bile re na le mabaka a mabotse a go dira bjalo. Re a bona gore Jehofa o hlahla bahlanka ba gagwe mehleng ye ya bofelo. O ba thuša go ruta batho therešo lefaseng ka moka, e bile ke bona feela bao ba dirago modiro wo. Le gona ba na le botee e bile ba thabile  ka baka la dilo ka moka tšeo Jehofa a ba rutago tšona. Jehofa o ile a bolela se e sa le pele ge a be a re: “Bonang! Bahlanka ba ka ba tlo goeletša ka lethabo ka baka la boemo bjo bobotse bja pelo.”​—Jesaya 65:14.

12. Re swanetše go dira’ng ka mafokodi a ba bangwe?

¹² Re thabile kudu ka baka la gore Jehofa o a re hlahla le go re thuša go dira dilo tše dintši tše dibotse. Eupša batho lefaseng la Sathane ga se ba thaba e bile ga ba na bokamoso. Ruri e tla ba bošilo ge re ka tlogela Jehofa le batho ba gagwe feela ka gobane yo mongwe ka phuthegong a boletše goba a dirile selo se se fošagetšego! Go e na le moo, re swanetše go dula re botegela Jehofa le go latela tlhahlo ya gagwe. Le gona re swanetše go ithuta kamoo re ka lebelelago mafokodi a ba bangwe le kamoo re ka arabelago ka gona.

13, 14. (a) Ke ka baka la’ng re sa swanela go felelana dipelo? (b) Ke kholofetšo efe yeo re sa swanelago go e lebala?

¹³ O swanetše go dira’ng ge yo mongwe wa bana babo rena a bolela goba a dira selo seo se go kwešago bohloko? Beibele e nea keletšo ye: “O se ke wa akgofela go kgopišega moyeng, gobane go kgopišega go agile sehubeng sa ditlaela.” (Mmoledi 7:9) Ka moka ga rena ga se ra phethagala gomme re dira diphošo. Ka gona re ka se letele gore bana babo rena ba dule ba bolela goba ba dira dilo tše di nepagetšego. Le gona ga se ra swanela go dula re nagana ka diphošo tša bona. Ge re ka dira bjalo, re ka se sa thabela go hlankela Jehofa. Se sebe le go feta ke gore tumelo ya rena e ka fokola gomme ra tlogela mokgatlo wa Jehofa. Ge seo se ka direga, re ka se sa kgona go hlankela Jehofa. Le gona re ka lahlegelwa ke kholofelo ya go phela lefaseng la gagwe le lefsa.

¹⁴ Ka gona, ke’ng seo se ka go thušago go dula o thabile ge o hlankela Jehofa le ge ba bangwe ba dira dilo tše di go kgopišago? Dula o gopola kholofetšo e homotšago ya Jehofa yeo e rego: “Šefa ke hlola magodimo a mafsa le lefase le lefsa; dilo tša pele di ka se sa gopolwa, e bile di ka se sa rotoga pelong.” (Jesaya 65:17; 2 Petro 3:13) Jehofa o tla go nea ditšhegofatšo tše ge e ba o dula o mmotegela.

15. Ke’ng seo Jesu a itšego re swanetše go se dira ge ba bangwe ba re fošetša?

¹⁵ Ke therešo gore ga se ra hlwa re tsena lefaseng le lefsa. Ka gona ge yo mongwe a ka re kweša bohloko, re swanetše go naganišiša ka seo Jehofa a nyakago re se dira. Ka mohlala, Jesu o itše: “Ge e ba le lebalela batho dikarogo tša bona, Tatago lena wa legodimong le yena o tla le lebalela; anthe ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.” Le gona ge Petro a be a botšiša Jesu ge e ba re swanetše go lebalela ba bangwe “go fihla gašupa,” Jesu o itše: “Ke re go wena, e sego go fihla gašupa, eupša go fihla ga masomešupa-šupa.” Jesu o re rutile gore re swanetše go dula re ikemišeditše go lebalela  ba bangwe.​—Mateo 6:14, 15; 18:21, 22.

16. Josefa o re beetše mohlala ofe o mobotse?

¹⁶ Mohlala wa Josefa o re ruta kamoo re swanetšego go arabela ka gona ge ba bangwe ba re kweša bohloko. Josefa le moratho wa gagwe e be e le bona feela barwa ba Jakobo le Ragele. Jakobo o be a na le barwa ba bangwe ba lesome, eupša o be a rata Josefa go ba feta ka moka. Seo se ile sa dira gore ba jele Josefa mona. Ge e le gabotse, ba ile ba mo hloya kudu mo e lego gore ba ile ba mo rekiša gore e be lekgoba, ke moka a išwa Egipita. Ka morago ga nywaga e mentši, kgoši ya Egipita e ile ya nea Josefa maemo a phagamego kudu nageng yeo ka gobane e be e kgahlwa ke mošomo o mobotse wa Josefa. Ka morago, bana babo Josefa ba ile ba tla Egipita go tlo reka dijo ka baka la tlala. Ge ba bona Josefa, ga se ba ka ba mo tseba, eupša yena o ile a ba tseba. Le ge ba ile ba mo swara gampe, ga se a ka a ba otla. Go e na le moo, o ile a ba leka gore a bone ge e ba ba tloga ba fetogile. Ge Josefa a lemoga gore ba tloga ba fetogile, o ile a ba botša gore ke yena ngwanabo bona. Ka morago ga moo o ile a ba homotša gomme a re: “Le se ke la boifa. Ke tla nea lena le bana ba lena ba banyenyane dijo.”​—Genesi 50:21.

17. Ke’ng seo o nyakago go se dira ge ba bangwe ba dira diphošo?

¹⁷ Gopola gore ka ge motho yo mongwe le yo mongwe a na le mafokodi, le wena o ka kgopiša ba bangwe. Ka gona ge o lemoga gore o kgopišitše yo mongwe, latela keletšo ya Beibele. Kgopela motho yoo gore a go lebalele, gomme o leke go dira khutšo le yena. (Bala Mateo 5:23, 24.) Na ga re thabe ge ba bangwe ba re lebalela? Ka gona le rena re swanetše go ba lebalela. Bakolose 3:13 e re: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” Ge e ba re rata bana babo rena e le ka kgonthe, re ka se dule re kgopišegile ka seo ba se dirilego nakong e fetilego. (1 Bakorinthe 13:5) Le gona ge e ba re lebalela ba bangwe, Jehofa le yena o tla re lebalela. Ka gona ge ba bangwe ba re fošetša, anke re ba gaugeleng, go swana le ge Jehofa Tatago rena a re gaugela.​—Bala Psalme 103:12-14.