“THOBELA! Le tsogile bjang?”

O swanetše go ba o kile wa dumediša ka tsela ye gantšinyana. O ka ba o ile wa ba wa swara motho ka seatla goba wa mo gokarela. Mekgwa le mantšu ao re a dirišago ge re dumedišana di fapana go ya ka mafelo, eupša gantši madume a no swana. Ge e le gabotse, ge motho a sa dumediše ba bangwe goba a sa arabe ge a dumedišwa a ka lebelelwa a se na lerato goba a na le mekgwa e mebe.

Eupša ga se batho ka moka bao ba ratago go dumediša. Ba bangwe ba tšhaba go dumediša ka ge ba na le dihlong goba ka gobane ba inyatša. Ba bangwe ba hwetša go le thata go dumediša batho bao e sego ba morafo wa gabo bona, ba setšo sa gabo bona goba ba maemo a sa swanego le a bona setšhabeng. Lega go le bjalo, le ge tumedišo e ka ba e kopana e ka ba le mohola.

Ipotšiše gore: ‘Go dumediša ba bangwe go ka hola ka’ng? Le gona Lentšu la Modimo le ka nthuta’ng tabeng ya go dumediša?’

Koronelio e bile moditšhaba wa mathomo wa go fetoga Mokriste. Ge moapostola Petro a be a mo amogela ka phuthegong ya Bokriste o itše: “Modimo ga a bebe sefahlego.” (Dit. 10:34) Ka morago Petro o ile a ngwala gore Modimo “o rata gore bohle ba fihlelele boitsholo.” (2 Pet. 3:9) Re ka tswalanya ditemana tše le motho yo a sa ithutago therešo. Eupša Petro o ile a buša a eletša Bakriste gore: “Godišang batho ba mehuta ka moka, ratang mokgatlo wohle wa bana babo rena.” (1 Pet. 2:17) Ka gona, na e ka se be mo gobotse go dumediša batho ba bangwe, go sa šetšwe gore ke ba morafo ofe, setšo goba maemo afe? Seo e tla ba e le go ba godiša goba go ba hlompha le go ba rata.

Moapostola Paulo o ile a botša ditho tša phuthego gore: “Amogelanang go etša ge Kriste le yena a re amogetše.” (Baroma 15:7) Paulo o ile a bolela ka go lebanya ka bana babo bao ba ilego ba mo ‘matlafatša.’ Lehono bana babo rena le dikgaetšedi ba hloka go kgothatšwa kudu ka gobane Sathane o hlasetše batho ba Modimo o šoro.​—Bakol. 4:11; Kut. 12:12, 17.

Mehlala ya ka Mangwalong e bontšha gore go dumediša ba bangwe go ka ba hola kudu go feta go no ikwa ba amogelegile.

Ge nako e be e fihlile ya gore bophelo bja Morwa wa Modimo bo fetišetšwe ka popelong ya Maria, Jehofa o ile a roma morongwa gore a yo bolela le Maria. Morongwa yoo o ile a thoma ka gore: “Dumela, wena yo a ratilwego kudu, Jehofa o na le wena.” Maria o be a ‘tshwenyegile kudu,’ a sa tsebe gore ke ka baka la eng morongwa a be a bolela le yena. Ge morongwa a bona se o ile a re: “Se boife, Maria, gobane Modimo o go ratile.” Morongwa yoo o ile a mo hlalosetša gore e be e le morero wa Modimo gore a tle a belege Mesia. Go e na le gore Maria a no tšwela pele a tshwenyegile, ka boikokobetšo o ile a re: “Bona, nna lekgoba la Jehofa! A go ntiragalele go ya ka mantšu a gago.”​—Luka 1:26-38.

E be e le tokelo e kgolo kudu gore morongwa yoo e be mmoleledi wa Jehofa, eupša ga se a ka a nyatša kabelo yeo ya go yo bolela le motho yo a sa phethagalago. O ile a thoma ka go dumediša. Re ithuta’ng mohlaleng wo? Re swanetše go dumediša ba bangwe le go ba kgothatša. Re ka diriša mantšu a sego kae feela go ba thuša le go ba kgonthišetša gore le bona ke batho ba Jehofa.

Paulo o be a tseba batho ba bantši diphuthegong tša Asia Minor le Yuropa. Mangwalo a gagwe a na le ditumedišo tše dintši tšeo di yago go batho ba itšego. Mohlala wa se o go Baroma kgaolo 16. Paulo o ile a romela Bakristegotee le yena ba bantši ditumedišo. O boletše ka Foibe, “kgaetšedi ya rena,” gomme a kgothaletša  bana babo gore ba “mo amogele Moreneng ka tsela yeo e swanelago bakgethwa, le gore [ba] mo nee thušo le ge e le efe yeo a e nyakago.” Paulo o ile a dumediša le Perisika le Akhwila, “bao ba sa lebogwego ke [yena] feela eupša ba lebogwa le ke diphuthego tšohle tša ditšhaba.” O ile a dumediša le ba bangwe bao ba sa tsebjego lehono, ba bjalo ka “moratiwa wa [gagwe] Epaineto,” gotee le “Teraefina le Teraefosa, basadi bao ba šomago ka thata Moreneng.” Ee, Paulo o ile a ipha nako ya go dumediša bana babo le dikgaetšedi.​—Baroma 16:1-16.

Nagana kamoo ba ilego ba thaba ka gona ge ba be ba ekwa gore Paulo ga se a ba lebala. Seo se swanetše go ba se ile sa dira gore ba rate Paulo le go feta gotee le go matlafatša segwera sa bona! Le gona go kwa ditumedišo tšeo tše lerato go swanetše go ba go ile gwa kgothatša Bakriste ba bangwe, gomme seo sa ba dira gore ba dule ba tiile tumelong. Go reta ba bangwe le go ba dumediša ka tsela yeo e bontšhago gore re na le taba le bona, go tiiša segwera le go dira gore bahlanka ba Modimo bao ba botegago ba dule ba le boteeng.

Ge Paulo a be a lebile lebopong la Puteoli a le tseleng ya go ya Roma, Bakriste bao ba tšwago ka borwa ba ile ba tla go mo gahlanetša. Eitše ge Paulo a ba bona ba sa le kgojana, “a leboga Modimo a tia matla.” (Dit. 28:13-15) Ka dinako tše dingwe, re ka no kgona feela go myemyela goba go emišetša motho letsogo. Eupša sona seo se ka thabiša motho yoo mohlomongwe a gateletšegilego goba a nyamilego.

Morutiwa Jakobo o be a swanetše go nea Bakriste keletšo e matla. Bakriste ba bangwe ba be ba thomile go ba dihlotlolo tša moya ka ge ba be ba gwerane le lefase. (Jak. 4:4) Eupša ekwa gore Jakobo o thomile lengwalo la gagwe bjang. O itše:

“Nna Jakobo mohlanka wa Modimo le wa Morena Jesu Kriste, ke ngwalela meloko e lesomepedi ye e gašanego gohle ke re: Madume!” (Jak. 1:1) Ga go pelaelo gore bao a bego a ba ngwaletše lengwalo le ba ile ba hwetša go le bonolo go amogela keletšo ya gagwe ge ba be ba bona gore go ya ka tsela yeo a ba dumedišitšego ka yona ba a swana pele ga Modimo. Ee, tumedišo e bonolo e ka dira gore o kgone go thoma poledišano le ge go se bonolo go dira bjalo.

Gore tumedišo e be le mafelelo a mabotse, e swanetše go tšwa pelong gomme e bontšhe lerato. Re swanetše go dira seo le ge go bonagala eka ga go na motho yo a re bonago. (Mat. 22:39) Kgaetšedi yo mongwe wa kua Ireland o kile a fihla Holong ya Mmušo metsotswana e sego kae pele diboka di ka thoma. Ge a hlaganetše go yo dula fase, ngwanabo rena yo mongwe o ile a sokologa, a myemyela ke moka a re: “Thobela. Ke thabela go go bona.” Kgaetšedi yoo o ile a no itulela fase.

Ka morago ga dibeke tše mmalwa, kgaetšedi yoo o ile a ya go ngwanabo rena yo a ilego a mo dumediša gomme a mmotša gore o na le nako e teletšana a na le mathata ka gae. Kgaetšedi yoo o itše: “Ka letšatši lela o be o ntumediša ke be ke kwele bohloko kudu, ke nyakile ke sa tle Holong ya Mmušo. Ga ke gopole gore dibokeng go be go be go bolelwa ka eng, ke no gopola feela ge o be o ntumediša. Ke ile ka ikwa ke amogelegile. Ke a leboga.”

Ngwanabo rena yoo o be a se a lemoga kamoo tumedišo ya gagwe e kopana e bilego le mohola ka gona. O re: “Ka morago ga gore kgaetšedi yo a mpotše kamoo tumedišo yeo e kopana e mo kgomilego ka gona, ke ile ka thabela gore ke dirile boiteko bja go mo dumediša. Seo se ile sa dira gore le nna ke thabe.”

Solomone o ngwadile gore: “Lahlela senkgwa sa gago godimo ga meetse, ka gobane o tla se hwetša gape ka morago ga matšatši a mantši.” (Mmo. 11:1) Go tseba bohlokwa bja go dumediša ba bangwe, kudukudu Bakristegotee le rena, go kgothatša ba bangwe e bile le rena re a thaba ge re dira seo. Ka gona, anke le ka mohla re se ke ra nyatša bohlokwa bja go dumediša ba bangwe.