DIPUKU tšeo di be di bitšwa dipuku tša mebala ya molalatladi. Ge ke be ke di bala ke ile ka hwetša diswantšho tšeo di kgahlišago tšeo di ilego tša ntira gore ke naganišiše. Dipuku tšeo di ile tša dira gore ke nyake go tseba ka mo go oketšegilego ka Beibele ke sa le yo monyenyane.

Bophelo bja ka bo ile bja thoma go hlakahlakana kudu ge go be go bonagala Ntwa ya Bobedi ya Lefase e le kgauswi le go fihla India. Batswadi ba ka ba ile ba arogana gomme ba feleletša ba hlalane. Ke be ke sa kwešiše gore go tla bjang gore batho ba babedi bao ke ba ratago ba kgaogane. Ke ile ka kwa bohloko kudu e bile ka ikwa eka ga go na motho yo a nthatago. Ke be ke le ngwana a nnoši gomme go be go se na motho yo a nkhomotšago le go nthekga.

Ka nako yeo nna le mma re be re dula toropong ya Karachi, e lego motsemošate wa Pakistan. Ka letšatši le lengwe re ile ra etelwa ke mokgalabje yo mongwe yo a bitšwago Fred Hardaker yo e bego e le ngaka. E be e le Hlatse ya Jehofa. O be a le bodumeding bjo tee le monna yola wa moromiwa yo a ilego a nea lapa lešo dipuku tšela tša mebala ya molalatladi. O ile a kgopela  mma gore a ithute Beibele le yena. Mma o ile a gana eupša a re mohlomongwe nna nka thabela seo. Ke ile ka thoma go ithuta le Ngwanabo rena Hardaker bekeng e latelago.

Ka morago ga dibeke tše sego kae, ke ile ka thoma go ya dibokeng tša Dihlatse tša Jehofa tšeo di bego di swarelwa kliniking ya Ngwanabo rena Hardaker. Batšofadi bao e ka bago ba 12 ba be ba kopanela moo. Ba ile ba nkgothatša le go ntlhokomela bjalo ka morwa wa bona. Ke gopola gabotse kamoo ba bego ba dula le nna, ba ntebelela ka mahlong e bile ba boledišana le nna bjalo ka mogwera wa nnete, e lego seo ke bego ke tloga ke se hloka ka nako yeo.

Go se go ye kae, ke ge Ngwanabo rena Hardaker a nkgopela gore ke thome go ya le yena tšhemong. O ile a nthuta go šomiša keramafomo e nyenyane e le gore re bapalele batho direkhoto tšeo di nago le dipolelo tše kopana tša Beibele. Tše dingwe tša dipolelo tšeo di be di bea taba phaa, gomme batho ba bangwe ba be ba sa rate molaetša wa tšona. Eupša ke be ke thabela go bolela ka Beibele. Ke be ke rata therešo ya Beibele e bile ke thabela go botša ba bangwe ka yona.

Ge mašole a Japane a be a le kgauswi le go hlasela India, balaodi ba Brithania ba ile ba tlaiša Dihlatse tša Jehofa kudu. Ka July 1943, le nna ke ile ka thoma go tlaišwa. Hlogo ya sekolo, yeo e bego e le moruti wa kereke ya Anglican, e ile ya nthaka sekolong e re ke morutwana wa go se kwe. E ile ya botša mma gore ka ge ke le Hlatse ya Jehofa ga ke beele barutwana ba bangwe mohlala o mobotse. Mma o ile a galefa kudu gomme a nthibela gore ke se sa kopanela le Dihlatse tša Jehofa. Ka morago ga moo, o ile a nthomela go tate kua Peshawar, e lego toropo yeo e lego bokgole bja dikhilomithara tše e ka bago tše 1 370 ka leboa la Pakistan. Ka ge ke be ke se sa ithuta Beibele e bile ke sa ye dibokeng, ke ile ka se sa ba le tswalano e botse le Jehofa.

Ka 1947, ke ile ka boela toropong ya Karachi go yo nyaka mošomo. Ge ke be ke le moo, ke ile ka etela Ngaka Hardaker kliniking ya gagwe. O ile a nkamogela gabotse.

Ka ge a be a nagana gore ke a babja, o ile a mpotšiša gore: “Bothata ke’ng?”

Ke ile ka mo araba ka gore: “Ga ke babje mmeleng, eupša ke babja moyeng. Ke nyaka go ithuta Beibele.”

O ile a mpotšiša gore: “O nyaka go thoma neng?”

Ke ile ka re: “Ge e ba go kgonega, gona bjale.”

Bošegong bjoo re ile ra ipshina ka go ithuta Beibele. Ke ile ka ikwa ke thabile ka gobane ke be ke kopanela le batho ba Jehofa gape. Mma o ile a leka ka thata go nthibela gape go kopanela le Dihlatse tša Jehofa, eupša mo nakong ye ke be ke dirile phetho ya gore ke nyaka go hlankela Jehofa. Ka di-31 tša August 1947, ke ile ka bontšha gore ke ineetše go Jehofa ka go kolobetšwa. Ka moragonyana ga moo, ge ke be ke na le mengwaga e 17, ke ile ka ba mmulamadibogo wa ka mehla.

Kabelo ya ka ya pele ya bobulamadibogo e bile toropong ya Quetta, moo go bego go kile gwa dula mašole a Brithania. Ka 1947, naga yeo e ile ya aroganywa ya ba India le Pakistan. * Tiragalo ye e ile ya tsoša dintwa tša bodumedi, e lego seo se ile sa dira gore batho ba bantši kudu ba huduge. Bafaladi ba e ka bago ba dimilione tše 14 ba ile ba gapeletšega go tloga moo ba bego ba dula gona. Mamoseleme a India a ile a hudugela Pakistan, mola Mahindu le Masikh a Pakistan ona a ile a hudugela India. Gare ga tlhakahlakano yeo ke ile ka namela terene yeo e bego e tletše kudu kua Karachi, ka itshwarelela ka tšhipi ya ka ntle ya go itshwareletša go fihla Quetta.

Kua Quetta, ke ile ka kopana le George Singh yo a bego a le mengwageng ya magareng a bo-20 yo e bego e le mmulamadibogo yo a kgethegilego. George o ile a mpha paesekele ya kgale yeo ke bego nka kgona go e reile tšhemong ya moo yeo e bego e na le meboto. Gantši ke be ke eya tšhemong ke nnoši. Ka dikgwedi tše tshela ke be ke šetše ke ithuta Beibele le batho ba 17 gomme ba bangwe ba bona ba ile ba amogela therešo. Yo mongwe wa bona e lego Sadiq Masih, yo e bego e le molaodi wa mašole o ile a thušana le nna le George gore re fetolele dikgatišo tšeo di theilwego Beibeleng ka Seurdu, e lego leleme leo le bolelwago ke batho ba Pakistan. Ge nako e dutše e eya, Sadiq o ile a ba mogoeledi yo mafolofolo wa ditaba tše dibotse.

Ka morago ke ile ka boela Karachi ka ya go hlankela le Henry Finch le Harry Forrest, bao e bego e le baromiwa bao e bego e se kgale ba fihlile ba etšwa Sekolong Gilead. Ba ile ba mpha tlwaetšo e bohlokwa kudu! Ka letšatši le lengwe ke ile ka felegetša Ngwanabo rena Finch go yo ruta batho Beibele ka leboa la Pakistan.  Metseng e mengwe ya kgauswi le dithaba tše dikgolo, re ile ra hwetša batho bao ba ikokobeditšego bao ba bolelago Seurdu bao ba bego ba tloga ba nyaka go tseba ka Modimo. Ka morago ga mengwaga e mebedi, le nna ke ile ka ya Sekolong sa Gilead, gomme ka boela Pakistan ke le molebeledi wa tikologo wa nakwana. Ke be ke dula legaeng la baromiwa kua Lahore le bana babo rena ba bararo ba baromiwa.

Ka manyami, ka 1954 baromiwa bao ba bego ba dula Lahore ba ile ba se kwane, gomme seo se ile sa dira gore ofisi ya lekala e ba romele dikabelong tše difsa. Ka ge ke ile ka ema le ba bangwe ba bona, ke ile ka newa keletšo e matla. Ke ile ka ikwa ke nyamile kudu, gomme ka phetha ka gore ga se ka tia moyeng. Ke ile ka boela Karachi gomme go tloga moo ka ya London, Engelane, ke ipotša gore ke tla thoma fase.

Kua London, phuthego yeo ke bego ke kopanela go yona e be e tletše ka ditho tša lapa la Bethele. Pryce Hughes, yo e bego e le mohlanka wa lekala yo nago le botho, o ile a ntlwaetša gabotse. Ka letšatši le lengwe o ile a mpotša gore o kile a hwetša keletšo e matla go tšwa go ngwanabo rena Joseph F. Rutherford, yoo ka nako yeo a bego a okamela mošomo wa go bolela ditaba tše dibotse lefaseng ka moka. Ge Ngwanabo rena Hughes a be a leka go ka ikemelela, Ngwanabo rena Rutherford o ile a mo kgalemela. Ke be ke makaditšwe ke go bona Ngwanabo rena Hughes a myemyela ge a gopola tiragalo yeo. O itše mathomong tiragalo yeo e ile ya mo kweša bohloko. Eupša ka morago o ile a lemoga gore o be a hloka motho yo a ka mo eletšago ka go lebanya, gomme seo se be se bontšha gore Jehofa o a mo rata. (Baheb. 12:6) Seo a ilego a mpotša sona se ile sa nkgoma le go nthuša gore ke hlankele Modimo gape ka lethabo.

Mo e ka bago ka nako yeo, mma o ile a hudugela London gomme a dumela go rutwa Beibele ke ngwanabo rena John E. Barr, yoo ka morago e ilego ya ba setho sa Sehlopha se Bušago. Mma o ile a tšwela pele gabotse moyeng gomme a kolobetšwa ka 1957. Ka morago ke ile ka kwa gore pele tate a hlokofala, le yena o ile a ithuta le Dihlatse tša Jehofa.

Ka 1958, ke ile ka nyala Lene, e lego kgaetšedi yo a tšwago Denmark yo a bego a dula London. Ngwageng o latelago re ile ra šegofatšwa ka morwedi yo a bitšwago Jane, e lego wa mathomo go bana ba rena ba bahlano. Ge ke le Phuthegong ya Fulham ke ile ka newa ditokelo tše itšego. Lega go le bjalo, ge nako e dutše e eya Lene o ile a babja gomme ra gapeletšega go hudugela moo go sa tonyego kudu. Ka gona ka 1967, re ile ra hudugela toropong ya Adelaide, kua Australia.

Phuthego ya rena ya Adelaide e be e na le batlotšwa ba 12 bao ba tšofetšego. Ba be ba etelela pele ka mafolofolo modirong wa go bolela ditaba tše dibotse. Ga se gwa re tšea nako e telele gore re boele lenaneong la rena la go hlankela Jehofa.

 Ka 1979, nna le Lene re ile ra ba le ngwana wa bohlano, e lego Daniel. Daniel o belegwe a na le bolwetši bja Down syndrome * e bile go be go thwe a ka se phele nako e telele. Le lehono ke sa thatafalelwa ke go hlalosa bohloko bjo re ilego ra bo kwa. Re ile ra dira sohle seo re ka se kgonago go mo hlokomela, eupša re sa hlokomologe bana ba rena ba bangwe ba bane. Ka dinako tše dingwe Daniel o be a fetoga o motala ka ge a be a na le mašobana a mabedi pelong ya gagwe ao a bego a dira gore a hloke oxygen, gomme re be re swanelwa ke go mo kitimišetša sepetlele. Eupša le ge a be a babja, e be e le ngwana yo bohlale e bile a rata batho. Le gona o be a rata Jehofa kudu. Ge ka gae re be re rapelela dijo, o be a swara diatla tša gagwe tše dinyenyane, a dumela ka hlogo, gomme a re “Amene” ka go tšwa pelong. Ke moka e be e tla ba gona a jago.

Ge Daniel a be a na le mengwaga e mene, o ile a swarwa ke kankere e šoro ya madi (leukemia). Nna le Lene re be re lapile e bile re nyamile. Ke be ke ikwa eka ke tla tloga ke gafa. Eupša ka letšatši le lengwe ge re be re ikwa re nyamile kudu, molebeledi wa rena wa tikologo e lego Neville Bromwich, o ile a re etela. Bošegong bjoo, Ngwanabo rena Bromwich o ile a re gokarela a lla. Ka moka ga rena re ile ra lla. Mantšu a gagwe a lerato le a kwelobohloko a ile a re homotša kudu. O ile a sepela letšatšing le le latelago mo e ka bago ka iri ya pele mesong. Daniel o ile a hlokofala ka moragonyana ga moo. Lehu la Daniel le ile la re nyamiša kudu. Go sa šetšwe seo, re ile ra kgotlelela, re kgodišegile gore ga go na selo seo se ka aroganyago Daniel le lerato la Jehofa, gaešita le lehu le ka se kgone. (Baroma 8:38, 39) Re fela pelo ya go tlo mmona gape lefaseng le lefsa la Modimo.—Joh. 5:28, 29.

Le ge ke ile ka bethwa ke stroke gabedi, ke sa hlankela ke le mogolo ka phuthegong. Dilo tšeo ke fetilego go tšona di dirile gore ke kwešiše le go kwela ba bangwe bohloko, kudukudu bao ba nago le mathata. Ke leka go se ba ahlole. Go e na le moo, ke ipotšiša gore: ‘Dilo tšeo di ba diragaletšego bophelong di kgomile bjang kamoo ba ikwago ka gona le kamoo ba naganago ka gona? Nka dira’ng go ba bontšha gore ke na le taba le bona? Nka ba thuša bjang gore ba dire thato ya Jehofa?’ Ke tloga ke rata go dira maeto a bodiši. Ge e le gabotse, ge ke homotša le go lapološa ba bangwe moyeng, ke kwa ke homotšega e bile ke lapologile.

Ke ikwa bjalo ka mopsalme yo a boletšego gore: “Ge dikgopolo tša ka tše di mpherekanyago di be di ata ka go nna, dikhomotšo tša [Jehofa] di ile tša okobatša moya wa ka.” (Ps. 94:19) Jehofa o ile a nthekga ge ke be ke na le mathata ka gae, ke ganetšwa go mo hlankela, ke nyamišitšwe ke diphošo tša ka le ge ke be ke gateletšegile monaganong. Ka nnete Jehofa e bile Tate wa ka wa kgonthe!