Na o badile ka kelohloko dimakasine tša morago bjale tša Morokami? Bona ge e ba o ka kgona go araba dipotšišo tše di latelago:

Ke dilo dife tše nne tšeo re ka di dirago go kaonefatša tsela yeo re opelago ka yona?

Re ka ema gabotse gomme ra swarela kopelo ya rena godimo. Re swanetše go hema gabotse. Ge re ahlamiša molomo, seo se tla re thuša gore re opelele godimo.​—w17.11, letl. 5.

Ke eng seo se bego se kgahliša ka mafelo le ditsela tšeo di bego di eya metseng ya botšhabelo ya Isiraele?

Go be go na le metse e tshelelago ya botšhabelo nageng ka moka, e bile go na le ditsela tše di lokišitšwego gabotse tša go ya moo. Ka gona motho o be a ka hwetša lefelo la botšhabelo kapejana.​—w17.11, letl. 14.

Ke ka baka la’ng mpho yeo Modimo a re neilego yona ya topollo e le mpho e kgolokgolo?

Mpho ye e dira gore re kganyoge go tšwela pele re phela, e bile e re lokolla sebeng le lehung. Ka ge Modimo a re rata, o ile a romela Jesu gore a tlo re hwela ge re be re sa le badiradibe.​—wp17.6, matl. 6-7.

Psalme 118:22 e boletše bjang e sa le pele gore Jesu o be a tla tsošwa bahung?

Batho ba ile ba se dumele gore Jesu ke Mesia gomme ba mmolaya. O ile a swanelwa ke go tsošwa bahung e le gore e tle e be “hlogo ya sekhutlo.”​—w17.12, matl. 9-10.

Na motho e be e swanetše go ba leitšibulo e le gore e be wa lešika la Mesia?

Ka dinako tše dingwe batho ba lešika la Jesu ba be ba tšwelela ka morwa wa leitšibulo, eupša ga se ka mehla go bego go le bjalo. Dafida e be e se morwa wa mathomo wa Jese; eupša Mesia o ile a tšwelela lešikeng la Dafida.​—w17.12, matl. 14-15.

Ka Beibeleng go na le melao efe ya motheo ya mabapi le tša kalafo?

Molao wa Moshe o be o laetše gore batho bao ba swerego ke malwetši a itšego ba be ba swanetše go dula kgole le batho ba bangwe. Batho ba be ba swanetše go hlapa ka morago ga go kgoma setopo. Molao wo o be o neile tsela ya maleba ya go lahla mantle. Ngwana wa mošemane o be a swanetše go bolotšwa letšatšing la seswai a belegwe ka ge go dumelwa gore madi a bana bao ba sa tšwago go belegwa a kgona go kgahla gabotse ka nako yeo.​—wp18.1, letl. 7.

Ke ka baka la’ng e se phošo gore Mokriste a ithate?

Re swanetše go rata baagišani ba rena ka mokgwa wo re ithatago ka wona. (Mar. 12:31) Banna ba swanetše “go rata basadi ba bona bjalo ka mebele ya bona.” (Baef. 5:28) Ke therešo gore batho ba bangwe ba ka ithata ka mo go feteletšego.​—w18.01, letl. 23.

Ke dilo dife tšeo re ka di dirago gore re tšwele pele re gola moyeng?

Re swanetše go ithuta Lentšu la Modimo, re naganišiše ka lona ke moka re diriše seo re ithutago sona. Re swanetše go amogela tlhahlo ya moya o mokgethwa le thušo ya ba bangwe.​—w18.02, letl. 26.

Ke ka baka la’ng go ithuta dinaledi le go dirišana le batemona go ka se re thuše go tseba bokamoso?

Go na le mabaka a mantši, eupša lebaka le legolo ke gore Beibele ga e dumelelane le mekgwa ye.​—wp18.2, matl. 4-5.

Re swanetše go dira’ng ge re dumetše go ya mo re laleditšwego gona?

Ge e ba re be re šetše re dumetše go ya mo ba re laleditšego gona, re swanetše go ya. (Ps. 15:4) Ga se ra swanela go no fetoga ka baka la mabaka a go se re selo. Motho yo a re laleditšego a ka ba a šomile ka thata go re apeela.​—w18.03, letl. 18.

Banna bao ba kgethilwego go hlankela ka phuthegong ba ka ithuta’ng go Timotheo?

Timotheo o be a tloga a rata batho e bile a etiša dilo tša moya pele. O be a šoma ka thata kabelong ya gagwe gomme a diriša dilo tšeo a ithutilego tšona. O ile a tšwela pele a itlwaetša le go ithekga ka moya wa Jehofa. Bagolo le batho ba bangwe ka moka ba ka ekiša mohlala wa gagwe.​—w18.04, matl. 13-14.